قربة مياة ابيزا 98 !

**simsim_scorpio** · 17-09-2012 07:12 PM

السلام عليكم ورحمة الله وبركاته

النهاردة وانا بزود مياة القربة لاحظت ان القربة فيها مكان لفيشة كهرباء تحت فتحة غطاء القربة بحاجة بسيطة علي الشمال شوية المهم قولت اكيد الفيشة واقعه دورت عليها في كل حتة ملقتهاش روحت لكهربائي وسألته عليها دور هو كمان شوية وقالي الفيشة بتاعتها مش موجودة اصلا ولما سألته عن وظيفة الفيشة - بالرغم من اني استنتجت الاجابة رغم معلوماتي المعدومة عن العربيات - قالي دي تقريباً بتدي اشارة في التابلوه في حالة نقص مياة القربة .
كلمة تقريباً دي مريحتنيش لاني اول ما شوفت مكان الفيشة في القربة استنتجت ان غالبا هيكون دورها زي دور فيشة زيت الفرامل مثلا . بس الاستنتاجات دي متخليش الواحد مطمن فكرت اتصل بالمهندس ايهاب او الاستاذ محمد سيد بس قولت بدل ما اصدعهم اعمل موضوع احسن علشان الناس اللي لسه جديدة زي كده تستفيد لاني اوقات كتير بقرأ مواضيع من باب العلم بالشيء ومع مرور الوقت بلاقي اني اللي قرأته قي المواضيع دي بمر بيه .
نيجي بقي للاسئلة

الفيشة دي دورها ايه بالظبط ؟ وعدم وجودها ده يسبب مشكلة مع العلم ان اشتريت العربية من 9 شهور ولسه ملاحظ موضوع الفيشة ده النهاردة
السؤال التاني : النهاردة بعد ما زودت مياة القربة ( خليت منسوب المياة فوق الماكس بحاولي 2 مم ) ومشيت مشوار حوالي 30 كم بصيت علي القربة لقيت منسوب المياة زاد حوالي 2 سم !
فهل ده طبيعي ولا كده يبقي في مشكلة ؟
وبرده هوضحلكم شوية نقط عشان تتقدروا تحددوا
العربية موديل 98 1000CC بدون تكييف او باور
بالنسبة لمؤشر الحرارة الصبح بياخد 4 دقايق فعلا زي ما الاستاذ محمد سيد والمهندس ايهاب منصور قالوا قبل كده في الموضوع ده http://www.nilemotors.net/Nile/307095-a.html ولكن الاختلاف انه مبيكنش عند النص بيكون عند الربع الاول اللي بيكون لونه رمادي شوية وبعدها بدقيقتين او تلاته بيوصل عند النص وبيثبت علي كده وانا دايما بتابعه من يوم ما اشتريت العربية وعمرة ما زاد او قل عن النص ده طبعا لما بتكون العربية سخنة .
بصراحه معرفش بزودها مياه كل اد ايه بس علي فترات متباعده يعني ببص عليها كل اسبوع مثلا ( يعني كل 360 كم تقريبا ) ولو المياه ناقصه بتكون ناقصه حاجة بسيطة جدا
في بقي سؤالين خارج الموضوع لاني قريت موضوع عن تسقيط موتور ولقيت في مصطلح مفهمتوش يعني ايه شورت بلوك ؟
والسؤال التاني في فتحة في الماتور تقريبا ليها علاقة بالعادم هي عبارة عن انبوب اسطواني قطره حوالي 5 سم تقريبا الكتالوج بتاع البولو بيتكلم عنها تحت العنوان ده Inlet air temperature control system لقيت الفتحة داخل فيها خرطوم اسود ومتوصل بحاجه تانية في الكتالوج . الفتحة دي عندي مش متوصل فيها اي حاجه ومكشوفه فهل ده يسبب مشكلة والفتحة دي بتاعه ايه بالظبط ؟
معلش اسألتي كتييييييييير

تحياتي للجميع

**ehab_mansour** · 17-09-2012 08:27 PM

أولا : الفيشة دي لحساس موجود داخل القربة بيدي اشارة للكنترول لما بتقل مياة القربة عن مستوي معين و دي موجوده فقط في العربيات اللي بتنزل كاملة و موجوده في موديل بعد 2000 و عندي في الكوردوبا 2002 موجوده و شغاله و لما بيقل المياة في القربة بيدي سارينة انذار تيت تيت تيت كام مرة و تستكت و بعدين لمبة حمراء في التابلوه بتنور و تطفي شوية وتسكت بتعرفك ان العربية محتاجه تزويد مياه

طيب دي موجوده عندك ليه و انت معندكش الاوبشن ده ؟ الاجابة ان القربة دي اتغيرت و اللي غيرها اشتري اللي لقاها قدامه استيراد و اكيد البائع قاله ركبها و مشتغلش دماغك بالفيشة و انت كمان بقلك كبر دماغك لأنك معندكش الاوبشن ده اساسا

ثانيا موضوع زيادة منسوب المياة مع ارتفا درجة حرارتها طبيعي و مافيش مشكلة ولو لاحظت هتلاقيها ترجع تاني لمستواها بعد ما تبرد

ثالثا بخصوص المؤشر فكده طبيعي و حابب فقط اوضح ان مش لازم العربية تاخد زمن محدد عشان تسخن يعني الزمن ده بيختلف حسب درجة حرارة الجو المهم انها توصل لدرجة حرارة التشغيل الطبيعية عند منتصف المؤشر و لا تتغير الا قليلا جدا مهما حدث في ظروف التشغيل

ولو نزلت عن المنتصف بكتير او ارتفعت بكتير يبقي فيه مشكلة

رابعا موضوع الشورت بلوك هو جزء من المحرك اخترعه الصنايعيه كمصطلح لجزء معين من المحرك و حتي الان بحثت كتير عشان اعرف مكوناته ايه بالضبط و عندي تصور لكن محتمل يكون غلط و لكن هيفيدنا اكتر اللي ركب شورت بلوك قبل كده يقلنا ايه هو (ابو السيد)

خامسا حسب ما فهمت انك بتتكلم علي فتحه للجنب في جزء دخول الهواء للعمه و يقابلها فتحه في الجسم الالمونيوم اللي بيغطي فرن الشكمانبيوصل بينهم خرطوم حراري عشان ينقل هواء سخن بيساعد علي تسخين المحرك في الصبح في الجو البارد

الفتحة اللي في العمه داخله علي بوابة صغيره بتوازن نسبة الهواء حسب درجة حرارة الهواء الداخل ما بين هواء سخن جاء من الماسورة اللي بتتكلم عليها و مابين الهواء الخارجي اللي جاي من فتحة العمه الرئيسية

البوابة دي بتشتغل بواسطة خرطوم فاكيوم رفيع جاي من المانيفول علي حساس بفالف temperature control و بعدين خارج منه للبوابة دي

الحساس بيخرج فاكيوم بيشد البوابة حسب درجة حرارة الهواء الداخل
لو بصيت جوه العمه عندك هتلاقي جواها جزء لونه برتقالي كده ده هو الحساس اللي اقصده ولو فكيت العمه و بصيت عليه من تحت هتلاقي فيه فتحتين رفيعين لدخول و خروج خرطوم فاكيوم رفيع لعمل الوظيفة اللي قلتها (فيه صورة هجيبهالك بتبين الحساس ده)

المهم في الأخر عدم وجود الخرطوم او عمل البوابة دي لن يؤثر سوي علي ان المحرك هياخد وقت زياده عشان يسخن في الجو البارد و لا يوجد اي تأثير اخر له و عن تجربه في وجوده من عدمه معي شخصيا
ودي صورة للعمه من جوة و واضح فيها ما اقصد
http://desmond.imageshack.us/Himg225...pg&res=landing
و دي صورة اخري
http://desmond.imageshack.us/Himg401...pg&res=landing

و ده رابط المشاركه اللي مصورهالنا ابو السيد
http://www.nilemotors.net/Nile/30338...post3874472317

و بالتوفيق ان شاء الله

**dr.hazem** · 17-09-2012 08:49 PM

معنديش فكره عن الفيشه بس مبدئيا
غل انك تزود الميه فوق الماكس
وطبيعي انها تزيد بعد اي مشوار لان الميه بتتمدد وعشان كده معمول حساب التمدد ده ومعمول قربه...

تحياتي

**SYD** · 17-09-2012 11:39 PM

طبعا المهندس ايهاب الله يبارك فيه ماخلاش حاجة للواحد يقولها

القربة اللي راكبة عندك بتاعة بولو لأن البولو بتتميز عن الأبيزا بالموضوع اللي قالك عليه المهندس ايهاب واحتمال وارد جدا تكون قربة ابيزا 2000 whatever القربة بتاعة ايه (لأن كل عربيات فولكس وكل عربيات المجموعة بتاعتها بيركبلها نفس القربة بالظبط وفي نفس المكان) المهم ان القربة دي مش بتاعتك وعدم وجود الفيشة لن يؤثر علي منسوب المياة او له اي تأثير لا من قريب ولا من بعيد غير بس التنبيه لنقص المياة كما وضح ايهاب.

نيجي لنقطة الماكس - احتمال انك ماتشوفش الخط بتاع الماكس او كلمة max لسوء حالة القربة نتيجة السخونة والأتربة والأملاح وما الي ذلك من الظروف الطبيعية ولكن هناك دليل اخر من داخل القربة نفسها وهو انك ستلاحظ ان القربة من الداخل ليها زي حرف والحرف دة بيخنق القربة شوية وبيخليها من الداخل ضيقة ونازلة علي شكل اسطواني - تمام ؟؟ - لو بصيت فوق الحرف دة هتلاقي داير مايدور اخرام حوالين الحرف دة - المفروض منسوب المياة مايزيدش عن مستوي الأخرام دي - لأن الأخرام دي بتاعة الراجع - يعني المفروض تسيب مساحة لدورة الراجع من المياة عشان يتم التبادل بشكل بسليم وعليه يتم التبريد بشكل سليم.

اما بالنسبة لمؤشر الحرارة ففي الغالب عند الدوارة في الصباح الباكر يكون بالطبع عند الخط الأبيض - وبعد حوالي ال3 دقائق او 4 يترفع منسوبه ليخرج من الحيز الأبيض وعندها ستلاحظ هدوء في صوت المحرك وانخفاض مستوي عداد لفات المحرك الي 9 او اقل قليلاً وعند التحرك بالسيارة ستلاحظ انتصاف المؤشر في منتصف المبين - ومن ثم يثبت علي هذا المستوي حتي وان مشيت علي سرعة 200 في القطب الجنوبي في عكس اتجاه الريح او سافرت الي خط الأستواء ومشيت علي سرعة 60 علي الغيار الأول في اتجاه الريح
طالما الدورة التبريد تعمل بأنتظام فلن يتحرك المؤشر من مكانه ولا حتي بالطبل البلدي.

نيجي للنقطة اللي مش هريحك بردو فيها وهي الشورت بلوك
ههههههههههه
بهزر طبعا
الشورت بلوك يا سيدي الفاضل هو مصطلح شائع بين الفنيين وتجار قطع الغيار علي انه النص التحتاني للموتور + النص الفوقاني بدون ادوات التغذية ..
يافرحتي - ودة ايه دة بالظبط ؟؟؟!!!
النص التحتاني او مايطلق عليه البلوكة ودي اللي فيها غرفة الحريق والصبابات والدنيا كلها - يعني تقدر تقول عليها هي دي الموتور - ودي اللي بيدمغ عليها رقم الموتور وهي اللي بيتعمل فيها الفتة لما الصنايعي بيعك ويقولك هعمر الموتور (تقريبا هعمر يبقي يقصد انه مش هيفت وهيعمل رز معمر) المهم..
نيجي للنص الفوقاني وهو الجزء اللي فيه عمود الكامات علي شوية اجزاء اخري تخص الموتور ودي مش بتفرق كتير في العمرة واي لعب فيها مش بيعتبر عمرة - يعني تغير جوان وش السلندر او الكشت منها لا يؤثر علي اداء المحرك او يعيبه
اما بالنسبة لأدوات التغذية فهي تتلخص في الأتي (مارش ودينمو وموبينة واسبراتير - طرمبة باور ومياة وفرن شكمان - الحساسات والبوابة والمنافولد) واخيرا سلوك البوجيهات

اما بالنسبة للجزء اللي مش موجود عندي ولا عندك ولا في اي عربية في مصر (الا من رحم ربي) ودة اسمه البسكوتة - وسمي بهذا الأسم لشدة رقته وحساسيته وقابليته الشديدة للكسر بسهولة ودة طبعا وضحلك ايهاب دوره علي اكمل وجه والنهائي - انه لا يؤثر عدم وجوده علي اداء المحرك او الأستهلاك
وبالنسبة للعمة فهي بالفعل فيها الحساس بتاع كمية الهوا

تحياتي لحضرتك وانا تحت امرك لأي سؤال او استفسار اخر