السلام عليكم ورحمة الله ..

في البداية احب اشكر أعضاء قسم رينو على كم المعلومات الهايل اللى قريته من فترة وخلاني اجيب رينو ميجان 2 عن اقتناع وبحمد الله بيزداد اقتناعي كل يوم عن اللى قابلة بالعربية ديه ..

المهم ..
في نقطتين في العربية الأول هي المشكلة اللى واضح انها مشهورة حبتين وهي ان لمبة الإيرباج مع لمبة السيرفس منورة..

انا قريت كام موضوع عن شريط الإيرباج، وبصراحة قلبي مش مطواعينى اني افك الدنيا زى ما الأخوة الأفاضل عملو هنا فسؤالي هو يا تري ممكن يكون العيب بس من الفيشة اللى تحت كرسي السواق، ولو ماعملتش العيب ده ياتري في أي تأثير اساسا على انظمة العربية .. ؟

السؤال التاني ..

من بعد ما جبت العربية بحوالي اسبوع ظهرت مشكلة .. وهي ان الصبح، أو عند التحرك بالعربية بعد توقف لعدة ساعات بس .. بعد ما بمشي مسافة صغيرة بالعربية -حوالي 1 أو 2 كلم- الاقي كلمة «Check Gearbox» ظهرتلي في لوحة الكومبيوتر اللى فى نص التابلوه واسمع صوت عالى سنه من الفتيس وكأن التعشيقة بتاعته فكت، أو صوت ونه زى بتاعت الكارونة بتاعت الجر الخلفي، ولما بطفي العربية واشغلها تاني كل شئ بيشتغل تمام طول اليوم، وطبعا لما الحكاية اتكررت مرتين تلاتة بقيت اجرب الفتيس في كافة الاوضاع حرق وقرص ومش خفيف ومش بسرعة وفي كافة الظروف كله تمام هي بس في اول ما العربية بتمشي وبعد ما ابطل العربية واشغلها تاني كل حاجة بتشتغل تمام جدا جدا وبدون أي مشاكل ..

السؤال بقه .. ممكن يكون المشكلة في زيت الفيتيس، ولا الموضوع ممكن يكون أكبر من كده ؟

بكرر شكرى لكل اعضاء القسم الكرام، وفي انتظار الرد الشافي بإذن الله ..