بسم الله الرحمن الرحيم
السلام عليكم ورحمة الله وبركاته
روحت توكيل اوتو ايجيبت فى ابو رواش
لعمل صيانة العربيه وهى عباره عن تربيط عفشه وكشف على السوائل ومش فاكر ايه تانى
بس انا كان فيه عندى كذا مشكله رايح ليهم اساسا وهم
ان التكييف بيشتغل لمدة 4 ثوانى وبيفصل لمدة 4 ثوانى باستمرار والكلام ده لاحظته وهوه على السرعه الاولى اما بقية السرعات مركزتش معاه والمشكله ديه كنا اتناقشنا فيها فى المنتدى لما روحت لمهندس الاستقبال قاللى ان هوه اول مره يسمع بالمشكله ديه وان طالما ان العربيه الجو جوه بيبقى بارد باستمرار يبقى خلاص وان العيب ده مش موجود فى التيدا ولكنه موجود فى ال n16
المشكله التانيه ان فيه ريحه بتدخل جوه العربيه لما اكون ماشى فى مكان فيه ريحه وحشه ( المكان ده غالبا من اخر شارع السودان وانا داخل على الشارع اللى بيوصلنى لنفق الهرم ) رغم انى مشغل الدوره الداخليه
المشاكل اللى جايه ديه هى اللى كانت مهمه ومؤثرة بالنسبه لى وهم
مبين الاشارات والانتظار فى التابلوه مش بيشتغل وبالتالى صوت الاشارات والانتظار مش بسمعه فكنت وانا سايق بنسى انى مدى اشاره والكلام ده بحصل ساعات وساعات
تانى مشكله وهى ان عدادين الرحلات A,B بيصفروا مع نفسهم مع كل تدويره للعربيه تقريبا
تالت مشكله ان مؤشر البنزين لما بدور العربيه مش بيتحرك من منطقة الصفر غير بعد بضعة ثوانى
المهم خدوا العربيه على تقريبا الساعه تسعه ونص وسلموها ليا على الساعه واحده ونص تقريبا
المهم بالنسبه للمشكله الاولى مكتبنهاش فى الورقه اللى المهندس بيملاها
المشكله التانيه قاللى انه نضف فلتر التكييف وبصوا على البوابات اللى بتدخل هوا من بره العربيه ولقوها مقفوله تمام المهم كنت قريت موضوع بعد ما جيت الصيانه عن تنضيف فلتر التكييف واللى كان عامل الموضوع بيقول ان الفلتر مش بيتنضف علشان هوه ورا درج التابلوه فلما بيطلع الريش بتاعته بتتنى فمش بيبقى نافع تانى
مش عارف بقى هوه فعلا نضف الفلتر ولا ايه
بالنسبه للمشاكل الاخيره الخاصه بالاشارات والانتظار وعداد الرحلات ومؤشر البنزين فهما ظبطوا علبة الفيوازت والمشاكل الحمدلله اتحلت
المهم كان المكان زحمه علشان يوم سبت بالاضافه ان مواعيد حظر التجوال مخليه اخر وقتهم تلاته ونص العصر
اعذرونى لو طولت ولو التقرير مش مرتب اوى علشان ديه اول مره اعمل تقرير

كنت سألت فى المنتدى على اى لينك اقدر احمل بيها كتالوج الصيانه والاصلاح ياريت لو حد يعرف يضيف اللينك


وجزاكم الله خيراً