السلام عليكم، فى البداية احب أهنئ واحى جميع الاخوة القائمين على هذا الموقع واتمنى لهم التوفيق والنجاح ان شاء الله. واسف ان أول مشاركه لى فى المنتدى تكون شكوى من المكونات المصرية اللى احنا نفسنا تبقى احسن منتجات ومكونات فى العالم ولكن الظاهر ما فيش فايدة. انا معايا نيسان صنى 2007 والعربيه معايا بقالها حوالى شهر ونصف. العربية عموما حلوه وعجبانى بصراحة لكن حصلت معايا مشكله فى كاسيت العربية خلتنى ابدأ اقلق من كل المكونات المصرية فى العربية. المشكله انى لاحظت ان الشاشه بتاعه الكاسيت لما تسيبه شغال فترة بلاقى الشاشه سخنت جامد وبعد كام يوم لاحظت ان السماعه اللى فى الباب الشمال اللى صوتها مش مظبوط وفيها صوت شخلله كده غريب وانا من النوع الحساس ناحيه الأصوات دى جامد. المهم وانا بعمل صيانة ال 1000 سألتهم فى التوكيل فقالوا ان السخونيه بتاعه الشاشه دى عادى انما عموما روح للتوكيل بتاع الكاست وخليهم يشوفوه برضه علشان الكاست والسماعات تبع توكيل كلاريون. انتهزت فرصه ان عيد العمال اجازه ونزلت رحت لتوكيل كلاريون اللى فى المهندسين. الناس هناك معالتهم مش بطاله حكيت للمسئول اللى قابلنى هناك على المشكله فبعت معايا واحد من الفنيين علشان يشوف المشكلة. بعد شويه تجارب منه ومحاوله لتظبيط السماعات قالى ان السخونه اللى فى شاشه الكاسيت دى عاديه لكن السماعة فعلا بايظة وبتشخلل قالى نفكها ونشوفها قلت له ماشى وهو بيحاول يفك الفرش الداخلى للباب لقيت شكله كده مش عارف بيتفك منين وواضح انه اول مره يفك باب نيسان فرفضت انه يفكه علشان مافيش حاجه فيه تبوظ لأنه كان بدأ يستخدم المفك ويحاول يخلع بيه مكان الازرار بتاعه الزجاج، فقالى حاضر وراح جاب واحد فنى تانى واضح انه اكثر منه خبره المهم فك الباب وطلع السماعه وشافها من جوه واليكم المفاجأة التالية :( السماعة مقطوعه من جوه لأنها عباره عن ورق ده فى العربية الزيرو المهم قلت له مش مهم الكاسيت فى الضمان نغيرها بقى قالى لأ دى مش تبعى اللى فى الضمان الكاسيت والسماعات اللى ورا بس انما السماعات اللى قدام دى مش كلاريون (المفاجأه الثانية) دى جولدى ودى ضمانها تبع توكيل العربيه او تبع توكيل جولدى بصيت على السماعه لقيت مكتوب عليها جولدى فعلا ومن النوع التعبان اوى والراجل بيحلف ان تمن السماعه دى حوالى 17 جنيه. تخيلوا معايا ان العربيه نص سماعتها كلاريون ونص سماعتها جولدى ودى عند توكيل ودى عند توكيل تانى والسماعات الجولدى بايظه ومافيش اى حاجه فى الضمان جايبه سيره جولدى ده خالص. بالذمه ده اسمه كلام حد يعمل كده برضه يعنى علشان اصلح حاجه فى العربيه اقعد الف على 20 توكيل علشان حد يصلحها وفيه حاجه اسمها ان سماعه تبوظ بعد شهر من تشغيلها، واذا كان ده حصل مع السماعات امال حيحصل ايه مع باقى المكونات المصرى ربنا يستر .
المهمم انى خليت الراجل يرجع السماعه مكانها تانى ويقفل الباب لغايه لما اروح التوكيل فى صيانه ال 5000 اسألهم على موضوع جولدى ده، وربنا يجعله عامر.
واسف للأطاله، بس انا بصراحه زعلان جدا من اللى بيحصل ده ، وشكرا ليكم
م/ ايهاب عبد العزيز