عضو جديد ينضم لعصابه الاوبل

**belbesy** · 23-04-2009 03:25 AM

الحمد لله خلصت ف فيكترا 96

وجبتها

بس عشان ابقى عضو نشيط ف الاوبل

عاوز اعمل شويه حاجات كده

دلوقت انا الحمد لله معايا مكنه وعفشه ملهمش حل

مكنه 2000 سىسى واحد كامه بس حاله جامده جدا

ولسه هشحن التكييف هيتكلف كام طيب ؟ واشحنه فين ؟

عندى بقا مشكله بسيطه عاوز اظبها

الزجاج عندى الباب بتاعى اللى ادام باجى انزل الازاز بضغط على الزرار بيتك معايا تمام بس مش عاوز ينزل حاسس ان فى حاجه بتعاكس ف الباب

وتقريبا وحده الرفه سلمت نمر وعاوزه تتغير لانها بتطلع الزجاج بالعافيه وبطلت ترفع اول ماخدت العربيه بيوم

اغيرها فين ونوع ايه والسعر كام ؟

المساحات عاوز احط ميه اللى هيا بتتبخ ع الزجاج عشان يتمسح واغير المساحات خالص

والمرايات مش بتتحرك اوتوماتيك مش عارف ليه

وفيه زرار ف الباب بتاعى اللى ادام برده مدور كده فيه اكتر من حاجه اضغط عليها
دا بتاع ايه ومش شغال اعمل فيه ايه ؟

والاشارات بتاعه العربيه شغاله كلها انوار وكده تمام سليمه
بس يعنى اجى اضغط على الزرار الاحمر بتاع الاستوب الشمال بس اللى بتنور
مع ان الفانوس اليمين مش محروق لا دا بيتغل لما اجى اغير يمين

وعاوز اشترى معطر جامد مش تروح ريحته من العربيه

يا ريت يا جماعه التفصيل ف الرد على الاستفسارات
يعنى عند مين ويا ريت ف الشرقيه
ولو حد برا الشرقيه وكويس ماشى بس يكون كويس

ويا ريت الاسعار عشان انا لسه طالب اكون عامل حسابى

نسيت اعرفكم اسسف

محمد جوهر
بلبيس شرقيه
فيكترا 96 2000 سىسى اوتوماتيك لون ابيض

**lancerevolution** · 23-04-2009 09:10 AM

مبروك العربية و العصابة نورت
بالنسبة للإزاز فممكن تنضف المجرا بفرشة سنان و wd40 بالنسبة لوحدة الرفع فدى معرفش عنها حاجة
المية بتاعت الإزاز فى غطا أصفر كدا جنب البطارية مرسوم عليه مساحات شيله و إملا المية
المساحات ممكن تستنى عليها لحد الشتا الى جاى مش هتستعملها فى الصيف تقريبا
بالنسبة للمرايات هى ضم كهربا و لا عادى بس هى تقريبا عندك ثابتة ما بتتحركش
الزرار الى فى الباب بتاعك دال بتاع المرايات المدور بيحركهم شمال يمبن و فوق و تحت و فى زرار فوقه إختيار يمين أو شمال دا عشان تختار المراية الى هتظبتها
بانسبة للفوانيس الخلفية إتأكد إن اللمبات راكبة كويس و ساعات بتبفى اللمبة نتيجة الدقة فى التصنيع أصغر فى الحجم من الدوايا بتاعتها فممكن تحط جنبها عصاية صغيرة تسندها لحد لما تسلم نمر
المعطر دا أنت و ذوقك و كله بيروح

**Ahmad Allawy** · 23-04-2009 10:10 AM

الف مبروك يا محمد بك..

اولا التكييف: يفضل انك لو نزلت هنا القاهرة تشحنه هنا عند شركة ديافيا..
يكششفوا علي التكييف كله و يظبطوا الشحن و كل حاجة..

موضوع الزجاج احتمال كبير يكون بسبب الكاوتش بتاع المجرة بتاعت الزجاج.. بيكون بيعاكس ف النزول و الطلوع طبعا اصعب.. يعني ممكن متكونش مكنة الزجاج الكهربا..
ولو باظت حتي تغيرها استيراد مش غالية متقلقش..

و الباقي تم الرد عليه بواسطة عضو العصابة الفاضل.. lancerevolution

**N.a.j.d** · 23-04-2009 12:09 PM

اهلا بيك يا باشا الشباب هنا ح ترد عليك ومش ح تقصر ان شالله عشان انا برا مصر دلواقتي معرفش حاجه

**فادى محمد** · 23-04-2009 04:21 PM

الف مبروك يا باشا مفيش حاجه اقولها .الرجاله قامت معاك بالواجب

**KHALED AYMAN** · 23-04-2009 08:13 PM

ايه النور ده ؟؟
العصابه نورت بيك يا باشا !!!
و عايزين شغل بقى احنا هنا زى الجيش مفيش راحه هههههههههههههه

**belbesy** · 23-04-2009 09:12 PM

الله يبارك فيكم جميعا
وانا سعيد جدا انكم قبلتونى معاكم عضو جديد ف العصابه

انتظرونى بعد التعديلات
ان شاء اله هبقى نشيط جدا

بس برده محدش اتكلم ف الاسعار ؟
عاوز اسمع ارقام ارقام يا جماعه
هههههههه

وتانى مره شكرا بجد وانا سعيد جدا جدا انى معاكم ف العصابه

**lancerevolution** · 23-04-2009 09:24 PM

wd40 فى إزازة ب 15 و إزازة ب25 هات الى ب 25 أوفر و ظبط بيه الإزاز و التزيق و كل حاجة مصدية غالبا الأزاز كان متزيت و الزيت نشف فبيعمل كدا
بس لو هتغير المكن بتاع الإزاز روح لحد نضيف و إسأل عشان العربية دى ما بتحبش العك و الفتاوى
بالنسبة للمبات ممكن تنضف الدوايا بتاعتا بإسبراى إسمه akai انا لسة مجربه دلوقتى على لمبة كانت الدوايا بتاعتها مصدية و مكنش شغالة