حد جرب كمبريسور نفخ الاطارات ؟

[Dr_Smart]

حد جرب كمبريسور نفخ الاطارات اللي بيشتغل علي ولاعة العربيه ؟

شفت ٣ انواع مختلفه في كارفور سعرهم حسب مانا فاكر في رينج ١٥٠ - ٣٠٠

هل هي عمليه ؟ فيه نوع معين تنصحوني بيه ؟ واشتريه منين ؟

[S O P H O S]

جربته مع صديق
لكن لسه بفكر اشتري ليا
وسألت لقيت اثنين واحد بستم واحد ب 150 او 200 مش متذكر
والتاني 2 بستم ب 300

[Dr_Smart]

يعني عملي ولا مالوش لازمه ؟

هيغني عن بتوع الكاوتش في ظبط الهوا ؟ وهينفع في الحالات الطارئة لا قدر الله ؟

[S O P H O S]

بص يا باشا هو عملي فالمواقف المهمة
يعني مثلا الكاوتش يحصله شئ وانت علي كوبري
او لسه نازل وعاوز تخليه يمشيك لحد بتاع الكاوتش
بدل ما تفضل تفك وتغير للاستبن وبعدين ترجع كل ده تاني
حالات زي ده بينفع لكن في ملحوظة حصلت معايا
لو الكاوتش علي الارض خالص رفعت العربية بالكوريك الاول وبعيد شغلته
علشان لما بيبقي علي الارض لو بستم واحد مش بيقدر تقريبا ينفخ مرة واحدة
انما لو الكاوتش مش علي الارض خالص بينفخ علطول لو عالارض بترفع العربية بالكوريك
وبعدين بتنفخ الكاوتش عادي
والله اعلم

[Ayman_Amer]

افضل ماركة هي الجمل وهو 2 بستم وبيشتغل علي البطارية مش الولاعة
ولكن خد بالك لأن الماركة دي بقي منها مضروب في السوق.
واشتريها من التوفيقية ارخص.
والنوعية دي تنفخ ال 4 كاوتشات لو علي الارض عادي جدا عكس البستم الواحد اللي بيشتغل علي الولاعة فهو أضعف.

[khaled_yassin]

عملى وكويس انا نت جايب واحد والفرد عندى كانت على الارض نفخها وزى الفل
كان ب170 جنيه من احمد سعيد
بس فعلا التوافقية ارخص

[hesham fawzy h]

مش الحاجات دى بتبوظ البطارية زى برضو المكنسة الى بتشتغل على الولاعة

[abohend]

مش الحاجات دى بتبوظ البطارية زى برضو المكنسة الى بتشتغل على الولاعة

تبوظ البطارية ليه؟؟؟
أنا بدور العربية و أسيبها على السلانسية و بعد كده أشغل الكمبرسور
مش شايف بربلم

يا ريت توضح تخوفك من ايه بالضبط

[abohend]

حد جرب كمبريسور نفخ الاطارات اللي بيشتغل علي ولاعة العربيه ؟

شفت ٣ انواع مختلفه في كارفور سعرهم حسب مانا فاكر في رينج ١٥٠ - ٣٠٠

هل هي عمليه ؟ فيه نوع معين تنصحوني بيه ؟ واشتريه منين ؟

أنا من الاسكندرية
اشتريته من فتح الله ماركت
كان ب150 واحد بستم

جربته في تزويد اﻹطارات و شغال كويس و مقياسه مضبوط

بس مجربتوش في النفخ لو الفردة على اﻷرض

على جميع اﻷحوال هو عملي جدا و ينفع للمواقف المحرجة..
و جامد جدا في نفخ القوارب و العوامات و الكور و ما شابه
توكل على الله و هاته مش هيخسر

[hesham fawzy h]

تبوظ البطارية ليه؟؟؟
أنا بدور العربية و أسيبها على السلانسية و بعد كده أشغل الكمبرسور
مش شايف بربلم

يا ريت توضح تخوفك من ايه بالضبط

البروبلم ههههههههههههه

فى مرة يا ابو هند بية كنت بنضف العربية بمكنسة الى بتتحط فى الولاعة و بعدها بحوالى اسبوع البطارية باظت

[Ahmed_Ramadan]

البروبلم ههههههههههههه

فى مرة يا ابو هند بية كنت بنضف العربية بمكنسة الى بتتحط فى الولاعة و بعدها بحوالى اسبوع البطارية باظت

مفيش علاقة بينهم ... أخره يفضليلك البطارية لو مش مشحونة كويس و فعلا يفضل تشغله و العربية دايرة و أحسن كمان لو العجلة على الأرض ترفعها هينفخها أسرع

و أفضل نوع عن تجربة الجمل 2 بستم و بييجي معاه شنطة و وصلة سوستة و بيتوصل على البطارية

[hamahomo]

انا جبت الجمل بس بعد ما بزود الكاوتس اجي افكة من الكاوتش بيحصل تسريب هوا مش عارف العيب فين

[eng.m.abdo]

انصحك بشدة بشراء واحد لانه مهم جدا وعملي و يغنيك عن الذهاب لبتوع الكاوتش ........
انا كنت شاري واحد بستم يشتغل علي الولاعة بحوالي 150 جنيع من كرفور (هتلاقيه في التوفيقية ارخص شوية) وهو عملي جدا الحمد لله و مرة لقيت فردتين مرة واحدة علي الارض ونفختهم من غير ما ارفع العربية بالكوريك و حوالي 5 دقائق ونفخت الفردتين ومشيت بالعربية مشوار طويل وبعد كده روحت كشفت علي الكوتش وصلحته

[engmesk3]

الكومبريسسور ده يتاقل بالدهب .. كفاية انه بيغنيك عن انك لو لاقيت عجلة نايمة تفكها وتركب الاستبن يعني مرمطة .. انما هو ممكن ينفخلك العجلة وتيجي بيها مشوار من اسكندرية للقاهرة لحد ماتوصل لبتاع الكاوتش اللي علي مزاجك ..

[tameer1980]

زى الاخوة ما قالوا لو نوع كويس يبقى اتوكل على الله
ومش هاتعرف قيمته الا لما يحصل موقف معاك(يارب ما يحصل)
تبقى مستعجل وتلاقى فردة نايمة او مريحة اوى يا تمشى عليها وتبوظ وتدفع ثمن فردة 400-500 جنيه مثلا - ضعف ثمن الكومبريسور-او حبة بهدلة+تضييع 20دقيقة مهمين حسب شغلك وممكن يخسروك فلوس هى تتحسب كده
بس يفضل النوع اللى بيشتغل على البطارية ويكون معدن مش بلاستيك(مضروب)
واحد بستم كويس و2 بستم افضل وينفخوا الفردة حتى على الارض
انا اشتريته من حوالى سنتين او اكتر شوية من ساعتها الاستبن ما خرجش من شنطة العربية
وكنت بامشى بيها بالاسبوع وفيها خرمين ثلاثة وكل يوم ازود وخلاص لحد ما افضى واروح لصنايعى اعرفه