حد جرب كمبريسور نفخ الاطارات ؟

[تامر راغب]

أنا جبت واحد 2 بستم من سعيد نصار فى إسكندرية - سموحة
وجربته مرة تزويد كدة علشان أشوفه - كويس جدا وينفع لو لاقدر الله الواحد ماشى فى صحرا أو فى مكان مقطوع ....


بس كويس جدا وأساسى

[abokoko]

هات ال2 بستم اللي بيشتغل علي البطاريه مش علي الولاعه عندي و كويس

[Moe86]

عندى 2 بستم و بيشتغل على البطارية (افضل من الولاعة علشان السلك بيسخن)
اغلبه معدن و تقيل
جبته من التوفيقية ب 220 جنيه من 6 شهور
ممتاز جدا و بينفخ العجلة فى دقيقتين

[M!SHO]

عندي واحد عليه علامة تويوتا

كنت جايبه من عبداللطيف جميل من السعودية

كان بحوالي ١٣٠ ريال بس الكلام ده من سنتين او اكتر

جميل وعملي جداً غير الصيني اللي بيتباع هنا

[adelghanem]

انا عندى الاتنين بستم ماركه الجمل اللى بيشتغل على
البطاريه ونفخ الكاوتش وهى على الارض من غير كوريك
رغم وزن العربيه الكارينز...وهوه يساوى وزنه دهب فى
المواقف دى.

[sherif4004]

أنا عندي واحد جبته من مكتبه بن اند بيبر ب95 هوا كويس بينفخ العربيه بس بتريحه كل 3 دقايق لأنه يسخن ولو الفرده علي الارض بينفخها في 15 دقيقه اننا اسمع ان الاتنين بستم اقوي بكتير وممكن ينفخ الفرده من علي الارض في 5 دقايق

[Zing0]

عملى وكويس انا نت جايب واحد والفرد عندى كانت على الارض نفخها وزى الفل
كان ب170 جنيه من احمد سعيد
بس فعلا التوافقية ارخص

عملى و بيسعف
أحسن أماكن لشراؤه... التوفيقية
المستوردين هناك, و فيه شركة إسمها "شرف" بتجمعه فى مصر (قطع غيار صينى طبعاً)
كل اللى فى السوق صينى و لا بدائل أياً كان مكان الشراء (إلا لو هتجيبة شحن من النت من أى موقع أجنبى مش مصرى )
فيه من أول 40 ج لحد 75 ج ده كلة تروس بلاستيك من جوة و مش بيستحمل
من أول 100 لحد 130 الواحد بستم (أحجام مختلفة و كله بودى معدن و البستم طبعاً معدن)
الـ 2 بستم من 175 الى 300 ج, برضة أحجام ...)

من خلال تجربتى:
الكاوتش كذا مرة ينام يوم الأحد, و أروح ألحمه عند واحد نصاب - مكنتش أعرف - و ألبس فى 14 خرم , و تانى مرة 10 أخرام, رميت الفرده طبعاً لإنها باظت و قولت أجيب المنفاخ أحسن.
جبت واحد من التوفيقية , الواحد بستم, لإن صاحب المحل قال الواحد بستم كفاية أوى عالملاكى, و الـ 2 بستم للجيب و الأوتوبيس و المكروباص (جبته من فترة بـ 140 , نزلت سألت عليه بعدهها بـ 4 شهور بقى بـ 120 علشان فيه حاجات أحدث نزلت)
المهم إنه عملى جداً, و باظ منى و فكيته و صلحته و جمعته تانى (كأنه بستم موتور موتوسيكل)
بينفخ الفرده لو عالأرض من 5 - 7 دقايق من غير كوريك
النفخ على فترات, يعنى تشغل و أيدك على السلك , أول ميبدأ يسخن إفصله , يريح شوية و بعدين شغل تانى
المؤشر بتاعة كان دقيق (بس بعد إعادة الإصلاح بقى مهييس)
يفضل جداً جداً.... لو بيشتغل عالولاعة توصله بمشبك كروكودايل (اللى بيمسك فى قطاشات البطارية - فيه منه أحجام صغيرة) و توصلة على سلك لا يقل عن 1 مم, و تخلى التشغيل عالبطارية مش من الولاعة
يفضل تدور العربية و إنت بتنفخ (يعنى يسحب كهربا من الدينامو مش من البطارية)

دى خلاصة معلوماتى عنه و ربنا يوفقك الجميع و يبارك للى إشترى و يرزق اللى لسه ما إشتراش