زيت الفيتيس

[wael abbass]

اعضاء المنتدي الكرام
انا قمت بتغيير زيت الفيتيس في احدي محطات شل يوم الخميس الماضي ممكن اعرف الزيت دة بيستخدم اد اية واغيرة امتي تاني
وشكرا

[hazem_khidr]

انا عن نفسي بغيره كل 15000 ميل ولكن بصرحه ما اعرفش ميعاده ايه بالضبط

[شريف]

انت تزودة لو ناقص و دة تكشف عليه كل كام مرة عند تغيير زيت الموتور

[محمد ابراهيم 1]

كل 30 ألف كم إلا اذا نص فى الكتالوج على غير ذلك سواء للفتيس الأوتوماتيك أو المانيوال

[Adham]

بالنسبة للفتيس الاوتوماتيك فهو بياخج زيت هيدروليك باور (زيت احمر) ATF و يستحسن تغيرة كل 10000 عشر آلاف كيلو
وتستخدم زيت كويس و انا بافضل زيت شل اللي بييجي في قزازة بلاستيك صغيرة كيلو لونها أسود و صناعتة كندا
لان كتير انوا مضروبة في السوق و بخاصة اللي مكتوب عليها صناعه امريكية بتبقي متعبية تحت السلم
وطبعا الزيت هو روح الفتيس الاوتوماتيك و لو تلف بيتكلف ألوف علشان يتصلح يعني الغلطة فية بدرس مُكلف جدا

اما بالنسبة للفتيس المانيوال فدة بيختلف حسب العربيات وبيتوضح في كتالوجاتها و مش مكلف و يستحسن يتغير كل سنة او كل 10 الاف كيلو برضة بس هو مش موضوع خطير للفتيس المانيوال لأنك حاتحس لما عصاية الفتيس تبقى تقيلة او صوت الفتيس يبقى خشن

وربنا يكفيكو شر الفتيسات الاوتوماتيك لما تخرب :D

أخوكم عندة 3 عربيات أوتوماتيك :lol:

[Santino]

أنا غيرته عند 60 ألف , كان زيت الفابريكه , الراجل قاللي أنه كويس بس يفضل إنه يتغير , الليتر بحوالي 10 جنية من موبيل, درجة لزوجته 90 , بس بصراحة بعد الكلام اللي إتقال علي زيوت موبيل بفكر أغيره تاني بس من شل .

[wael abbass]

هو انا فعلا حطيت شل هو كويس انا عربيتي 128

[Adham]

لا خللي بالكم ان اول ماتستلم عربية جديدة لازم تغير زيت الفتيس فورا قبل ماتمشي بيها لان الزيت اللي بيبقى في الفتيس بيبقى زيت تخزين مش زيت للسير بالسيارة و بالذات العربيات الفيات النصر سواء 128 او شاهين هما اللي بيعملوا الحركة دي و حصل مشاكل لكل اللي اشتروا شاهين و مشيوا بزيت التخزين مش عارف هل تنبهوا للموضوع دة و صححوة في الشركة المنتجة ولا لأ

و كتير قوي 60 الف كيلو على زيت الفتيس سواء عادة او اوتوماتيك

انا خربت فتيس هوندا قبل كدة علشان مشيت حوالي 30 الف كيلو من غير ما غير زيت الفتيس الاوتوماتيك و كلفني الفتيس حوالي 7000 جنية بسبب الغلطة دي اللي ماتنبهتلهاش بتغيير زيت الفتيس لمدة

وكان درس قاسي اتعلمت بعدة اهتم بزيوت الفتايس الاوتوماتيك و تغييرها في مواعيدها

[hic]

انا بصراحة اول مرة اسمع عن تغيير زيت الفتيس
انا اللى اعرفه ان الزيت ينكشف عليه و ينزود ان كان ناقص فقط

[Adham]

hic

أهو هو دة اللي اتقاللي زمان وانا في الجامعه و خلاني مشيت على فيس الهوندا 30 الف كيلو من غير ما غير زيت لغاية ماباظ و كلفني 7000 جنية :D

وهيه دي اخرة اللي يسمع فتاوي الميكانيكية و الكفتجية بتوع محطات البنزين

يا جدعان اي زيت في الدنيا لازم يتغير بعد فترة تشغيل سواء زيت موتور او فتيس او زيت دبرياج سيرفو او زيت باكم فرامل

انشالله زيت ماكينة خياطة :lol:

اي زيت بيقطع و بيخف غير انة بيجمع رواسب و شوائب و لابد يتغير كل فترة

[hic]

يا استاذ ادهم انا فى كتالوج عربيتى البيجو بالنسبة لزيت الفتيس يتم تزويده فقط فى حالة النقصان و لم يذكر اى شىء عن تغيره بعد فترة معينة
و انا ركبت اكتر من 10 موديلات عمرى ما غيرت الزيت الا لما يكون فى اصلاح فى الفتيس فاغير الزيت بالمرة هو اللى كان بيحصل انك تزودالزيت و ده برضه نادر جدا
وياريت برضه نسمع راى اخوانا الخبراء فى هذا الموضوع

[Adham]

باشا أحنا بنتكلم عن زيوت الفتيس الأوتوماتيك مش المانيوال

صح وللا انا فاهم غلط

[PAYOO]

عندي تجربة مع زيت الفتيس أحب أشارككم فيها

في كتالوج السياره يوصى بتغيير زيت الفتيس كل 30ألف كيلو وبعد أن تخطيت الـ30ألف كيلو غيرت زيت الفتيس وحطيت زيت درجته 90 ونوعه التعاون (ده النوع إللي كان موجود في ورشة تغيير الزيوت) ولما أعترضت على نوع الزيت رد عليه الصنايعي وقاللي يا بيه كل الزيوت إللي في مصر مصدرها واحد والموضع مجرد ماركات بتتكتب على الجراكن عشان يضحكوا على الناس

المهم بعد ما غيرت الزيت بحوالي 5ألف كيلو وبعد سفرية طويله إلى شرم الشيخ والجري على سرعات عالية وصلت إلى 180كم/ساعة ولفترات طويلة لا حظت بعد رجوعي من هذه السفريه أن الفتيس أصبح فيه عضة عند أغلب النقلات
يعني كل ما أنقل ألقي في عضة وعصاية الفتيس مابتدخلش في مكانها بسهولة


أتصلت بالميكانيكي وقلت له على الحكاية بتاعت العضه دي قاللي غير زيت الفتيس
قلت له أني لسه مغيره ومكملتش به 7ألف كيلو حتى
قاللي أيه نوع الزيت إللي أنت حطيته
قلت له زيت التعاون
قاللي أبو 6 جنيه الكيلو ؟
قلت أه
قاللي طب معلش غيره برضه وقوللي على النتيجة بعدها
رحت محطة شل إللي قبل مدخل العبور عشان أغير زيت الفتيس
الصنايعي إللي هنا أول ما فتح الطبه ونزل كام نقطة زيت على الأرض قفل الطبة تاني وقاللي الزيت مش محتاج تغيير يا بيه
قلت له ليه مش محتاج تغيير ؟
قاللي الزيت لونه أخضر وزي الفل ومافيهوش حاجه والله ده حتى مش محتاج تزويد
قلت له ما أنا قلت كده برضه دا أنا لسه مغيرهخ قريب جدا بس الميكانيكي هو إللي قاللي أغيره
المهم
أتصلت بالميكانيكي وأنا خارج من المحطة عشان أقوله علىإللي قاله الصنايعي إللي في محطة البنزين لقيته بيقوللي لف وأرجع وغير الزيت من فضلك يا مستر هاني عشان خطري
قلت ليه يا أسطى شنوده أنت مصمم أن العيب مون الزيت ؟
قاللي الزيت إللي موجود عندك حاليا (محلول)
قلت له يعين أيه محلول؟
قاللي يعني الزيت حل
قلت له هو أنا فهمت الأولانيه لما هافهم التانيه
قاللي الزيت بتاع التعاون ومصر الشركات التعبانه دي بيحل مع السرعات العاليه والسخونه وبيفقد خواصة نهائيا يعني تلاقي لونه زي ما هوه لكن لزوجته معدومه وده حصل بسبب السرعات العاليه إللي انت بتمشي عليها دايما وخصوصا سفرية شرم دي جابت أجل الزيت

لفيت وخليت الفني بتاع المحطة يغير الزيت بدون نقاش

وبعد ما خرجت من المحطة ومشيت شوية كده ماصدقتش أبدا

العربية رجعت زي ما كانت وأحسن كمان نعومة أيه وسحب أيه ... لا وأيه الصوت أنعدم على الأطلاق يعني مبقاش في صوت للفتيس نهائيا

والقصة دي بتدل على أن نوعية الزيت مهمه جدا وكمان مواعيد تغيير الزيت مهمه جدا

ويارب أكون قدرت أفيدكم

[Adham]

الله ينور عليك يا أستاذ هاني

واهو دة مثل تاني على ان الصنايعية اللي في محطات البنزين كفتجية و بيقولو اي كلام و السلام

و الاستاذ هاني بيتكلم على عربية مانيوال
يعني وظيفة الزيت فيها و تأثيرة أقل بكثير من زيت الفتيس الهيدروماتيك

فما بالك بقى بفتيس فية 12 كلاتش و قربة و بودي فالف و بخاخ زيت و بلوف و شغلانة
يبقى اثر الزيت لو قديم او مغشوش حايكون تأثير قاتل عالفتيس الاوتوماتيك و على مكوناتة

[Adham]

و على فكرة يا جماعه الفتايس الاوتوماتيك كمان ليها فلتر لزيت الهيدروليك بيتغير كل 70 او 80 الف كيلو

و دة برضة من الأشياء الواجب مراعاتها للفتايس الاوتوماتيك
بس الفلتر دة بيبقى غالي يعني بتاع الفرونتيرا مثلا انا سالت علية لقيتة ب 150 جنية