كيف نشخص موتور خفيف ؟

[SkyBird]

ازاي نعرف اذا كان الموتور خفيف ولا سليم باختبارات بسيطة ؟
فيه ناس والعربية شغالة تقفل الشكمان بايديها او تفتح غطا الزيت وتقيس الضغط بايديها او تشوف ابخرة
ماذا نستفيد من معلومات من ملاحظة الدخان الابيض الخفيف والدخان الابيض المزرق

ازاي نعرف اذا كان الموتور عايز عمرة كاملة ولا كاوتش صباب ولا تغيير شنابر؟
ايه الافضل نشتري مكنة جديدة ولا نعمر الموتور الفابريكة ؟

اسئلة كثيرة جدا في بالي اتمنى من جميع الاعضاء اللي يعرف معلومة يقولها

ونبدأ بالتعريف
يعني ايه مكنة خفيفة ؟
ثانيا
كيفية تشخيص مكنة خفيفة ؟
عايز موضوع موسوعة
الهواء لكم .... تفضلوا

[robeir]

متابع باهتمام

[mesho_kimi]

من وجهة نظري إذا ما كانت المكنه عايزه اكتر من طقم شنبر فانت تبدلها بماكينة تانيه ويفضل إنها تبقى أكبر عشان تبقي عملت إضافه برضه ، بالنسبه للتشخيص فأنت ممكن تفتح غطا الزيت وتدور العربيه وتشوف إذا كان فى بخر حيطلع ولا لا ، الطريقة التانيه بخرطوم الفايز تفك الخرطوم من العمه و تدور العربيه وتبص إذا كان فى بخار ابيض طالع منه ولا لا لو في يبقى الماتور بيخف ( ده اللي أنا أعرفه )

[sab3aawy]

هنا عدة طرق بالنظر واليد والسمع تعطى معلومات لا بأس بها عن حالة المحرك ، لكن يعيب هذة الطرق ان كلها تؤكد ان الموتور خفيف لو ظهرت، لكنها لا تنفى انه خفيف لو لم تظهر

1- ظهور دخنة بيضاء مائلة للزرقة الخفيفة لها رائحة الزيت المحترق من الشكمان لحظة تدوير المحرك صباحا او بعد تركه لعدة ساعات تعنى ان كاوتش الصباب مقطوع او مهترئ
2- ظهوردخنة بيضاء مائلة للزرقة الخفيفة لها رائحة الزيت المحترق من الشكمان عند تعشيق الأول وبداية الحركة تعنى ان المحرك خفيف
3- ظهور بخار كثيف من فتحة خرطوم الفايض او الpcv (فى حالة ان السيارة مزودة بنظام pcv يجب سد خرطوم التنفس لملاحظة البخار) يعنى ان الحبك خفيف سواء كان ذلك بسبب الشنبر او الشميز او كلاهما
4- إضاءة لمبة الزيت فى السلانسيه أو انها ترعش مع بداية الحركة يعنى ان السبائك خفيفة لو تأكدنا ان الزيت من نوع جيد والطرمبة جيدة وساعة الزيت سليمة
5-ظهور دخنة بيضاء مائلة للزرقة من الشكمان طوال الوقت يعنى ان الموتور خلصان أو ان هناك شنبر مكسور
6- سماع صوت (رك رك رك رك) واضح من المحرك وهو ساخن، وخصوصا مع بدء الحركة يعنى ان الشنبر خفيف وبيحدث صوت اثناء التخبيط فى الشميز
7- سماع صوت (تك تك تك) من احد البساتم وخصوصا فى السلانسيه والمحرك ساخن يعنى ان هناك بنز خفيف
8- عند عدم التمكن من سد خرطوم الفايض باليد بسبب الضغط الواقع عليه هذا يعنى ان الموتور خفيف و(بينفخ)
9- وجود اثار زيت كثيفة على نهاية خرطوم الفايظ او فى العمة او مجمع الهواء حيث يتنهى خرطوم الفايض يعنى ان الموتور خفيف
10- وجود تعريق زيت على البوجيهات يعنى ان شنبر الزيت خفيف والزيت بيدخل حيز الاحتراق
11-وجود تسريب زيت كثيف من كل الجوانات برغم سلامتها يعنى ان الموتور خفيف والزيت بيخرج نتيجة لأن المتور بينفخ ويضغط على الزيت فيتسرب من الجوانات

كل هذة مؤشرات وجوده يشير الى ان المحرك خفيف لكن عدم وجودها لا ينفى، والفيصل هو قياس كبس الموتور فى المحطة ومتابعة استهلاك الزيت

[د.محمود صلاح]

سؤال : - العربيات الأنجكشن مافيهاش خرطوم فايظ ؟

[SkyBird]

شكرا استاذ ميشو
شكرا باشمهندس سبعاوي
وفيتم وكفيتم
لي سؤلان عن اختبار الاداء
سؤال1
ممكن يكون الموتور خفيف والشكمان يعرق مياه اثناء بداية التشغيل حتى في الجو الحار ؟
سؤال2
ايه حالة العربية اثناء المطالع الجامدة او الحمولة الزائده لما يكون الموتور خفيف ؟

[samirayad]

سؤال : - العربيات الأنجكشن مافيهاش خرطوم فايظ ؟

أى محرك سياره لابد له من توافر منظومة تهويه عن علبة المرفق (الكرتير )

وهو مايسمى بالتنفيس والتهويه على مراوح المحرك

زى ماواحد يكون مخنوق كده ......وتقوله قوم أتمشى شويه فى الهواء علشان تهوى على مراوحك

ومنظومة التهويه عن علب مرافق المحركات تنقسم الى قسمين

1- خط تهويه طبيعى natural ventilation خرطوم واصل من الكرتير لفلتر الهواء على طول

فى عربيات زمان ( 127 - 128 - 131 - وهكذا )

2- خط تهويه جبرى أو أيجابى أو أرغامى positive crank case ventilation

وده المطبق حاليا فى السيارات الحديثه

وفى هذا التصميم لمنظومة التهويه الجبريه عن كرتير أو باطن المحرك

بيتم سحب كمية هواء نظيف من مجمع سحب المحرك وأرساله الى الكرتير فى صورة هواء مدفوع لكى يأخذ فى طريقه كل الأبخره الموجوده بغزاره داخل الكرتير حيث يقوم الهواء النظيف هذا بكنسها أمامه وأرسالها مره أخرى الى منطقة سحب المحرك وبالطبع هذا النظام أفضل وبيفيد فى رفع حرارة الهواء الداخل لغرف الحريق وبالتالى رفع الجوده الحراريه للمحرك

وتصميم هذا النوع بيتوقف على رؤية الشركه الصانعه للمحرك ومدى رؤيتها للتصميم المناسب لها

فقد يصمم النظام الجبرى ببلف pvc ( زى الأنواع العريقه من المحركات فى السيارات الفارهه )

وللأسف لايوجد هذا البلف فى محركات الدايو على الرغم من وجود نظام تهويه جبرى لمحركات الدايو

والى الآن مازلت فى مرحلة دراسه لهذا السبب

يعنى ليه

مفيش فى محركات الدايو بلف pvc ( وخصوصا الدايو والنوبيرا )

فمازال البحث مستمرا حول تلك النقطه الفنيه

[Ahmed Hassan]

وبيفيد فى رفع حرارة الهواء الداخل لغرف الحريق وبالتالى لرفع الجوده الحراريه للمحرك

ممكن توضيح اكتر للنقطه دي بعد اذنك؟

[samirayad]

ممكن توضيح اكتر للنقطه دي بعد اذنك؟

نبدأ بالسلام عليكم ورحمة الله وبركاته

وقبل التطرق فى الحديث معك أخى الفاضل

أريد أن أطرح عليك سؤالا واحدا

فقد يكون هو المفتاح لوضع الأمور فى موضعها الصحيح

أيهما أفضل فى رفع الكفاءه الحراريه لأى محرك

دخول هواء باردا ..............أم هواء ساخنا ..................؟

[shaddadfalcon1]

طيب انا اول مابدور العربيه الصبح او لما ارجع من الشغل بتطلع شويه دخان لونهم داخل علي ازرق وبعد كده مبيبقاش فيه اي حاجه يبقي كده المكنه خفيفه؟

[samirayad]

يبقي كده المكنه خفيفه؟

نعم ونسبة الخفيه بتتوقف على مدى أستهلاك الزيت وأحتراقه فى صورة عادم أسود مائل للزرقه

طالما حالة البوجيهات جميعها تمام

وأكيد منسوب الزيت بيقل معاك وبتضطر تزود كل فتره

[أبو صلاح]

فين اكشف على كبس الموتور في القاهرة ؟

[Ahmed Hassan]

نبدأ بالسلام عليكم ورحمة الله وبركاته

وقبل التطرق فى الحديث معك أخى الفاضل

أريد أن أطرح عليك سؤالا واحدا

فقد يكون هو المفتاح لوضع الأمور فى موضعها الصحيح

أيهما أفضل فى رفع الكفاءه الحراريه لأى محرك

دخول هواء باردا ..............أم هواء ساخنا ..................؟

انا معرفش يعني ايه كفاءه حراريه. لكن لو السؤال تختار الهواء الداخل لغرفة الاحتراق يكون بارد و لا ساخن فالاجابه (بارد) طبعا.

[SkyBird]

ممكن اشترك في اجابة السؤال
انا رايي الافضل يكون الهوا اللي داخل للموتور ساخن
زي نظرية التربو كده

[Ahmed Hassan]

ممكن اشترك في اجابة السؤال
انا رايي الافضل يكون الهوا اللي داخل للموتور ساخن
زي نظرية التربو كده

التربو مش بيدخل هوا سخن لغرفة الاحتراق على فكره. بس عموما خلي التربو بره الموضوع علشان منتلخبطش بعد اذنك.