حاطيت زيت شنبر بالغلط

[MostafaAssem]

بسم الله الرحمن الرحيم

دي أول مشاركة ليا في هذا المنتدى الجميل. وهي للاسف سؤال عن مشكلة .

أنا معايا سكودا فلشيا, عاملة 140 ألف, والحمد لله حال الموتور كويس (حتى الآن).

بس نقول إيه بقى, حبيت اجرب حاجة عشان تيجي على دماغي.

كنت بغير زيت وباملا بزيت موبيل 1 (عارف إنه ممكن يكون أحسن للعربية زيت5000 ).

المهم, كنت عاوز احط إضافة (وده أول مرة أعمل كده علشان انضف مجرى الزيت).

دورت على نوع كده كان متقال عليه في المنتدى (abro) ولكن مالقيتوش.

اللي لقيته STP Oil Treatment (عارف إنه حاجة تانية خالص والله).

كان مكتوب عليه إنه حلو(حاجة جميلة خالص), فحاطيته قال إيه عشان احافظ على الموتور.

طبعا بعد كده عرفت إن ده هو زيت الشنبر (والله ماكانش مكتوب عليه إنه شنبر).

وعرفت إنه ممكن يبقى مش لطيف مع الموتور السليم.. بس مش عارف دلوقتي, اضحي بزيت موبيل1 أبو 250 جنيه ولاممكن مايكونش وحش لعربيتي.

علما بأن, صوت الموتورعلي شوية بس مش اوي, يعني شوية صغيرين ممكن يكونوا اوهام برضه.

وبما إن زيت موبيل1 خفيف بالنسبة لعربية قديمة زي بتاعتي موديل97,فالتتقيل اللي عمله الشنبر مايكونش وحش؟

ولو وحش, هل ممكن ازالة الشنبر بس من غير زيت موبيل1 وأزود لتر واحد موبيل1 على أساس إن الشنبر يكون يترسب تحت لما العربية تبرد؟

افيدوني ياخبراء المنتدى. أنا لسه حاطيت الشنبر ده يوم الجمعة اللي فاتت بس.

علبة ال STP كانت زرقاء صفيح ب20 جنيه 450 ml, هل دة هي الشنبر أصلا؟

شكرا مقدما.

[wagdy90]

معنديش فكرة اتمنى مساعدتك من الخبراء وان شاء الله خير

[mo7y]

حد يعمل كدة في عربيته برضة يا مصطفي ؟

إخص عليك إخص

[MostafaAssem]

فين الخبراء الجمال؟

حد يعمل كدة في عربيته برضة يا مصطفي ؟

إخص عليك إخص

أيوه يا mo7y , أنا وحش.

حد يساعدني عشان نلحق العربية قبل ماتنهار .

[samirayad]

نزل حوالى 1.5 لتر زيت أو لترين من طبة الكرتير

وحط مكانهم زيت موبيل ا برضه من طبة الغيار

وياريت يكون نفس تاريخ أنتاج الموجود حاليا بالسياره

( هاتلك جركل كمان موبيل ا ....علشان حنقسمه على مرتين )

وشيل اللى نزل معاك فى عبوه نظيفه

عجبك آداء العربيه فى الغيار ده

ممكن تبقى تستعمل الزيت اللى نزل مع أضافة زيت موبيل ا برضه الغيار القادم

______________________


يعنى بالبلدى كده

أقسم البحر نصين على مرتين غيار

والآداء حيبان معاك بعد ماتعمل اللى قولتلك عليه مع الغيار الحالى


ده حل وسط ومجرد أجتهاد منى مش أكتر

وملوش أثر سلبى على محرك السياره


علشان تبقى ماسك العصايه من النصف

[samirayad]

اللي لقيته stp oil treatment (عارف إنه حاجة تانية خالص والله).

كان مكتوب عليه إنه حلو(حاجة جميلة خالص), فحاطيته قال إيه عشان احافظ على الموتور

والأهم حاليا

أن ميكونش ده مخصص لللفتايس المانيوال

مش محركات البنزين برضه

ولو عندك صوره للعبوه

أرفعها

جايز يكون ده بيرفع لزوجة زيت الفتيس

ومش زيت شنبرللمكنه

كان مكتوب عليه إنه حلو(حاجة جميلة خالص), فحاطيته قال إيه عشان احافظ على الموتور.

عاوزين برضه

نشوف الحاجات الحلوه

اللى كانت مكتوبه عليه

[kmorsy]

أنا شايف ان إنت تغير الزيت و أمرك لله


---------------------------------------------------------------------
شيل الزيت شكرا xxxxx


_______________________


العضو الفاضل

يرجى ضرورة مراعاة شعور زملائك

وعدم وضع أبتسامات غير لائقه فى ردودك

وفى أوقات غير مناسبه

وفى حالة تكرارك لمثل هذا الأسلوب

سيتم أتخاذ أجراء آخر

وسنكتفى بتحزيرك هذه المره



مشرف الورشه

[mahmoud5777]

لو المكنة قديمة شوية فكل زيوت الشنبر تعتبر محسنات لزوجة للزيت يعنى بتخلى الزيت يحتفظ بلزوجته شوية لما يكون سخن والمفروض صوت المكنة يتكتم شوية او ينعم موش يعلى وممكن يسبب صعوبة دوارة فى الشتاء يعنى تحس انك عاوز تأخر كهربا بس فى العموم انا موش شايف ان مرة زيت شنبر هاتعمل حاجة خصوصا ان العبوات بتاعته بيبقى مكتوب عليها انو بيضاف للموتور السليم علشان يحافظ عليه
ده غير انو فى واحد قريبى فى ايطاليا بيقول انو بيشترى العربية تقعد معاه 3 سنين ويغيرها من غير مايغير زيت خالص وبيقول ان عملية غيار الزيت ده نوع من النصب علينا
بس مادام حمارتك العرجة تغنيك عن سؤال اللئيم واحنا موش بنشترى عربية جديدة كل 3 سنين يبقى خلينا فى المضمون ونغير زيت
اللي اقصده متتخضش غيار الزيت مايستاهلش ده كله
طنش لغاية ما تغير او لو ظبطت معاك تغيير الزيت فبل معاده بشويه توكل على الله
لو خايف اعمل اللى قاله باش مهندس سمير جركن واقسمه على اتنين مع اللى موجود فى العربيه
وحرام عليك تنزل الزيت وتحط غيره مانصحكش

[MostafaAssem]

شكرا samirayad و mahmoud5777 و wagdy90 للمشاركة

شكرا samirayad و mahmoud5777 و wagdy90.

فكرة ال 2 لتر شكلها حلو, و هتبقى كانى حاطط زيت تقيل شوية, زى زيت التعاون 3000 كده.

ان شاء الله أنا فاكر انه كان زيت للموتور. للأسف معنديش العلبه. اللى فاكره من اللى كان مكتوب عليه هو:
against engine wear, fight met al to met al friction, thicker cushion, Protect

شوفو, هو كان نفس الكلام زى ده (/http://www.stp.com/products/oil-additives/oil-treatment) عدا ان العلبه صفيح.
لاحظت انه مختلف عن العلبتين دول (/http://www.stp.com/products/oil-additives/engine-stop-leak) و (/http://www.stp.com/products/oil-additives/smoke-treatment).
هل ده بقى يبقى شنبر ولا لأ؟

سؤالين كمان لو سمحتوا:
هل فى حاجه ممكن أحطها تخفف من لزوجة الزيت شويه؟
هو تأثير الشنبر ده يقعد لحد كام كيلو (يعنى الزيت يرجع للزوجه الطبيعيه امتى)؟ هو بيتحط على زيت 3000 فى العاده مش كده؟
أخيرا, ممكن يكون الصوت الزياده ده من الاسطوانه أصلها حالتها مش أوى. فممكن يكون الزيت تقيل عليها مثلا؟

أنا هستنى الردود قبل مأعمل حاجه.

جزاكم الله خيرا.

[samirayad]

لاحظت انه مختلف عن العلبتين دول (/http://www.stp.com/products/oil-additives/engine-stop-leak) و (/http://www.stp.com/products/oil-additives/smoke-treatment).
هل ده بقى يبقى شنبر ولا لأ؟

صور العلب مظهرتش

هل فى حاجه ممكن أحطها تخفف من لزوجة الزيت شويه؟

مفيش غير الطريقه اللى قولتلك عليها

يا أخ : مصطفى

هو تأثير الشنبر ده يقعد لحد كام كيلو (يعنى الزيت يرجع للزوجه الطبيعيه امتى)؟ هو بيتحط على زيت 3000 فى العاده مش كده؟

حيستمر معاك لحد ميعاد الغيار

أخيرا, ممكن يكون الصوت الزياده ده من الاسطوانه أصلها حالتها مش أوى. فممكن يكون الزيت تقيل عليها مثلا؟

ممكن

زيادة اللزوجه مخليه قشط الزيت بشنابر الزيت بيسير بمعدل بسيط

أثناء قشطه للكرتير مره تانيه مع نزول البساتم للنقطه الميته السفلى

من مشاوير الحريق

يعنى ممكن يحصل أصوات فعلا بسبب أضافة زيت الشنبر

أنا هستنى الردود قبل مأعمل حاجه.

أعقلها وتوكل

أصل حرام فعلا ترمى 250 ج ( على الأرض )

[MostafaAssem]

صور العلب مظهرتش

قصدك اللينك شغال بس الصور مش باينه؟

لينك اخر للصور:
اللى حطيته: http://www.stp.com/img/products/hero_ot.jpg
الأنواع الأخرى: http://www.stp.com/img/products/hero_esl.jpg & http://www.stp.com/img/products/hero_st.jpg

اللينكات لشرح المنتجات مرة أخرى:
اللى حطيته: STP® Fuel & Oil Additives - Choose The Best Fuel Additive For Your Car
الأنواع الأخرى: STP® Fuel & Oil Additives - Choose The Best Fuel Additive For Your Car & STP® Fuel & Oil Additives - Choose The Best Fuel Additive For Your Car

السؤال بقى, كده اللى أنا حطيته شنبر ولا لأ؟

ممكن

زيادة اللزوجه مخليه قشط الزيت بشنابر الزيت بيسير بمعدل بسيط

أثناء قشطه للكرتير مره تانيه مع نزول البساتم للنقطه الميته السفلى

من مشاوير الحريق

يعنى ممكن يحصل أصوات فعلا بسبب أضافة زيت الشنبر

أنا كنت بقصد أسطوانة الديبرياج. مش الزيت برضه ممكن يخليها تتزحلق على الديسك؟



شكرا

[samirayad]

أنا كنت بقصد أسطوانة الديبرياج. مش الزيت برضه ممكن يخليها تتزحلق على الديسك؟

لا يأخى
مفيش علاقه بين الدبرياج وزيت تزييت المكنه نهائيا

السؤال بقى, كده اللى أنا حطيته شنبر ولا لأ؟

بالفعل فأنت وضعت زيت شنبر

[MostafaAssem]

جزاك الله خيرا

[MostafaAssem]

أنا رحت لبنزينة موبيل، و قلتله شيل 2 و حط 2 لتر، قالى مفيش الكلام ده.
قالى انه صعب انه يعمل الحركه ديه و ان الزيت كده هيضيع فى الأرض.
سألنى ليه عاوز تعمل كده، حكيتله، قالى مفيش مشكله انى أنا اكمل كده عادى و الزيت ال stp ده مش هيضر، و ان عربيات كتير بتحطه من غير ميكون عندها مشكله.

رحت لواحد تانى (موبيل برضه)، قالى نفس الكلام.

فمش عارف، هل أروح لواحد بتاع زيت (مش بنزينة يعنى) ، ولا أطنش؟
و هل لازم العربيه تكون بارده، ولا لأ؟

شكرا جزيلا.

[samirayad]

فمش عارف، هل أروح لواحد بتاع زيت (مش بنزينة يعنى) ، ولا أطنش؟

أنت اللى حاسس بوضع المكنه عندك

لو عاملالك مشكله فى الصوت والسحب والدخنه وكده

يبقى مطنش وسيبك من كلام بتوع البنزينه

وتروح تعرض الوضع على ميكانيكى خارج البنزينات مثلا

___________________

أما لو أنت حاسس أن الوضع مش مؤثر قوى

يبقى الطناش مطلوب حاليا