سؤال من مبتدئ في السواقه بخصوص السواقه والعربيه((ليجانزا 2002

[romioromio]

السلام عليكم
انا لسه شاري ليجانزا جديده ومبتدئ الي حد ما في السواقه

1_انا يا جماعه كل لما اجي اخد مطب اكون ماشي علي الرابع مثلا اروح ممور وواكل المطب واروح جايب التاني الاقي العربيه بتكركر زي ما تكون حتنط كده
ولما جيت اجرب اهدي خالص عند المطب بس بيكون العربيه فيها سنة حركه يعني موقفتش اروح جايب الاول الاقي العربيه بتتنطنط كده لما ارفع رجلي من الدبرياج
ده من ايه يا شباب

2_انا ساعات بنسي وامشي وفرامل اليد مرفوعه الاقي العربيه ماشيه عادي
3_ساعات بسمع صوت حكه كده او صفاره وانا ماشي وساعات بتروح
4_الاطارات لسه جديده والطريق ناعم جدا
بس انا وانا ماشي كانت العربيه بترجرج كده مش عارف ليه هي ثابته بس فيها رجرجه بسيطه كده مش عارف انا موسوس كده ولا في حاجه عايزه تتعدل

4_اي نصايح الله يكرمكم
انا كنت مسافر بيها انهارده ورجعت عرقان جامد وزي ما اكون مش عارف اخد نفسي

وماشي مقلق طول الطريق
وحاسس اني بقول جوايا انا ندمان اني اشتريت عربيه ووجع دماغ هل ده احساس المبتدئين بس ولا ايه

5_اي تركات كده من حضراتكم للسواقه بس للمبتدئين يعني متوسطي المستوي


جزاكم الله خيرا ورمضان كريم

[teto2007]

اخى بالنسبة لموضوع المطب تاكد ان الغيار بيجى صح او ان السرعة اللى انت عليها تكون سرعة التانى لان سرعة التانى من 20 الى الى 40 ولما تاخد المطب خليك فى سرعة قليلة يعنى 20 كويس ومتقلقش من السواقة كلنا كنا كدة فى الاول وحاول بقدر الامكان متجبش الاولانى طول ما العربية ماشية حفاظا على الترس الاول وموضوع الكركرة تاكد من كهربة العربية انها تكون مظبوطة خلى الميكانيكى يبص عليها ولما تكركر منك اكتم بالدبرياج يعنى دوس دبرياج وسيب سنة سنة لحد الكركرة دى ما تروح وموضوع الحكة او السفارة ممكن يكون التيل عاوز يتغسل بالبنزين واى سؤال انا فى الخدمة

[Mr7mix]

ممكن يكون السبب طقم دبرياج

[Amr Axel]

السلام عليكم
انا لسه شاري ليجانزا جديده ومبتدئ الي حد ما في السواقه

1_انا يا جماعه كل لما اجي اخد مطب اكون ماشي علي الرابع مثلا اروح ممور وواكل المطب واروح جايب التاني الاقي العربيه بتكركر زي ما تكون حتنط كده
ولما جيت اجرب اهدي خالص عند المطب بس بيكون العربيه فيها سنة حركه يعني موقفتش اروح جايب الاول الاقي العربيه بتتنطنط كده لما ارفع رجلي من الدبرياج
ده من ايه يا شباب

2_انا ساعات بنسي وامشي وفرامل اليد مرفوعه الاقي العربيه ماشيه عادي

3_ساعات بسمع صوت حكه كده او صفاره وانا ماشي وساعات بتروح

4_الاطارات لسه جديده والطريق ناعم جدا
بس انا وانا ماشي كانت العربيه بترجرج كده مش عارف ليه هي ثابته بس فيها رجرجه بسيطه كده مش عارف انا موسوس كده ولا في حاجه عايزه تتعدل

4_اي نصايح الله يكرمكم
انا كنت مسافر بيها انهارده ورجعت عرقان جامد وزي ما اكون مش عارف اخد نفسي

وماشي مقلق طول الطريق
وحاسس اني بقول جوايا انا ندمان اني اشتريت عربيه ووجع دماغ هل ده احساس المبتدئين بس ولا ايه

5_اي تركات كده من حضراتكم للسواقه بس للمبتدئين يعني متوسطي المستوي


جزاكم الله خيرا ورمضان كريم

1- ده من رجلك لازم تظبط رجلك و ده هيجي بالتعود انك تحط رجلك ع البنزين و تشيل رجلك من ع الدبرياج بيما يتناسب مع سرعة العربية و الغيار

2-طبعا غلط و بيأثر ع العربية بشكل سلبي و خلي الميكانيكي يشدهالك شوية

3-ممكن يكون من تيل الفرامل

4- لو بتحس ان العربية ع السرعات الهادية بترجرج بس الدريكسيون عادي و كل ما تزود السرعة الرجة تهدي يبقي ده معناه ان ممكن عجلة ورا محتاجة تتغير
لو العربية مثلا كل ما تزود سرعة يعني مثلا من 80-90 و انت طالع الدريكسيون بيترجرج جامد فيكون حاجة من الاتنين ترصيص او عجلة ملوحة

5- النصايح حافظ ع العربية
- متابعة تغيير زيت الموتور و فلتر الزيت
- متابعة تزويد زيت الفتيس ( نصيحة بلاش تخليهم يززودولك من الاسطوانة البرتقالي عشان بتبقي عبارة عن زيت عربيات قديم ع شوية شحم و ده بيخرب الفتيس اشتري من عندهم علبة زيت فتيس و تتفتح قدامك و يتحط منها )
- تظبط طقم الكهربا و صيانة البطارية دايما
- زيت الفرامل لو نقص كمله ( زيت الباكم )
- الافضل تستخدم المية الخضرا للتبريد و ديه تتحط في القربة مش الريدياتير نفسه
و ده لأنها احسن من الماية العادية نظرا لأنها مش بتتبخر بسهولة و بتبرد ع عكس المية العادية بتحتوي ع املاح ...الخ و لو مش عارف خلي حد يعملهالك
- لو الفرامل اتأكلت غيرها عالطول
- فلتر البنزين يتغير ع حسب المدة يعني ممكن كل 40-50 الف
- فلتر الهوا كل ما تيجي تغير زيت او تغسل العربية خلي الراجل ينضفهولك بالهوا و لو الفلتر اتبهدل و شكله مهري جيب واحد جديد
- خلي بالك ع المطبات متدوسش فرامل و انت بتاخد المطب عشان العفشة يعني تهدي اوي و بعدين تخلي العربية تاخد المطب و طبعا خلي بالك من النقر و الحفر
- لو اي كاوتش اتلوح او النقشة راحت غيره فورا
-الموتور يتغسل مرة واحدة في السنة بعد الشتا
- في الشتا بالذات حاول تغسل العربية كل شهر مرة او مرتين من تحت عشان الطينة و البهدلة اللي العربية بتبقي فيها من تحت
- دايما حافظ ع ضغط الكاوتش يكون مظبوط و يفصل لو تستخدم النيتروجين لأنه مش بيتأثر بالحرارة و بيفضل محافظ ع ضغط العجل مدة طويلة قد تصل لــ3-4 شهور و فيه ناس قعدت معاهم 6 شهور
- و اخيرا و ليس اخرا متستناش ع اي حاجة في العربية تبوظ يعني دايما خليك مع العربية
- مش ناقص بقي غير انك قبل ما تنزل سمي و توكل ع الله و ادعي ان ربنا يستر طريقك :)

و دول شوية موضوعات بسيطة اتمني يفيدوك

http://www.nilemotors.net/Nile/195073-a.html

http://www.nilemotors.net/Nile/225059-a.html

http://www.nilemotors.net/Nile/223782-a.html

http://www.nilemotors.net/Nile/223589-a.html

http://www.nilemotors.net/Nile/227695-a.html

http://www.nilemotors.net/Nile/232923-a.html

http://www.nilemotors.net/Nile/238043-a.html

http://www.nilemotors.net/Nile/232413-a.html

http://www.nilemotors.net/Nile/224234-a.html

http://www.nilemotors.net/Nile/222768-a.html

http://www.nilemotors.net/Nile/225570-a.html

و اي استفسار اسأل يا ريس :)

و بالتوفيق ان شاء الله

[romioromio]

الف الف شكر لكن سؤال

انا بعد لما وقفت بالعربيه لببص عليها بصه كده

لقيت الميه في قربة الردياتير بتغلي جدا زي ما تكون حاجه بتغلي في حله

هل ده طبيعي ولا تكون في حاجه في المواسير مسدوده

[romioromio]

وانا قريت مواضيعك يا اليكس وتسلم ايديك