ايه الضرر لما انقل علي 5 او 6 !!rpm

[superb]

يا جماعه الموضوع دا الناس بتقول فيه اى كلام و بنسمع كلام كتير ... نجيب المفيد فى اختصار:
1. اختراع المحرك او موتور العربيه دا موضوع عدى عليه اكتر من 100 سنه .. يعنى كل سنه فى جديد و تطوير و الأهم هو الأمان و الشركات دايما بتدور على الأعتماديه و فى نفس الوقت تطلع احسن قدره و عزم من المحرك بأقل تكاليف فى الأستهلاك ..
2. لو الأر بى ام مش امان بعد ال 4000 لفه فى الدقيقه كان زمان كل العربيات بتقف عند 4000 و ريحو و ريحونا

الفكره مش فكرة الحرق بيهلك العربيه .. بس حط فى دماغك العربيه عباره عن حاجات كتير مبنيه على بعضها يعنى عاوز تحرق تشيك ولو كل يوم ولا اتنين على السوائل و ضغط الهوا فى الكاوتش و مش لازم تعلى الكاست علطول عشان تسمع صوت العربيه و اى صوت ممكن يظهر جديد و صدقونى عن تجربه شخصيه و تجارب ناس كتير مع عربيات قديمه كمان و كانت بتحرق 24 ساعه وصلنا ان اهتماك بالسوائل بالذات و التبريد الكويس بيحافظ على الموتور .. بس اللى المفروض يشغل بالنا هو العفشه لأن فى بلدنا الجميله تبقى ماشى فى امان الله تلاقى حاجه بترزع .. تسأل يقولولك بلاعه عم عبده فتحها و ام العيال كلمته روح ونسيها ...

يعنى ايه موتور مفتوح :
دا كلام منقول من ناس اجانب .. ان القياده على سرعات بطيئه بتكون رواسب على جدران مسار البنزين اللى فى العربيات الجديده الرشاشات و بالتالى بتعمل نوع من تضيق طريق البنزين لغرف الأحتراق .. فى الحاله دى هيحصل تهدير فى البنزين و العربيه تدوسلها تلاقيها مخنوقه .. و عشان كدا بدأنا نلاقى اختراعات عن منظفات البنزين و تنظيف دايرة البنزين و كلها اضافات تتحط فى التانك مع التفويل ..
لكن بقى لو سيادتك زى مبنقول كبيييس و بتحرق مش هيكون فى مجال لوجود اى رواسب فى دايرة الوقود و بالتالى العربيه هتاخد و تدى معاك حلو اوى .

نصيحتى :
طول ما قدامك طريق حلو احرق على الأر بى ام من فتره للتانيه و متعودش العربيه انها نايمه
لو بتحب الجرى علطول متقلقش بس تابع السوائل علطول و متنمش فى العسل و تقول استنى الصيانه الجايه .. تابع عربيتك بنفسك و التوكيل عمره مكان بيخاف على عربية حد اكتر منه نفسه .
الأهم و محدش فكر فيه : الفتس و زيت الفتيس .. اللى بيحرق لازم يتابع الموضوع دا بالذات فى العربيات اللى هى بعد 2005 بعد ظهور انواع جديده من التكنولوجيا زى ال تيب ترونك و السى فى فى تى و الدويال كلتش .. و على فكره الفتيس النهارده بقى ميقلش تكنولوجيا و تعقيدا عن المحرك بل بالعكس دا ممكن فتيس يزود القدره بتاعة العربيه ..


و اتمنى اكون فدتكو ..



ملحوظه اخيره : السرعه خطر .. لا تشرب الدواء هههههههههههه :)

[Amr_Azab]

بصراحة موضوع اكثر من رائع ومعلومات قيمة جدا جدا واشكر كل من ساهم فيه بجد
انا لسة شاري فابيا 2002 صاحبها كان محافظ عليها اوي وزياده عن اللزوم فمكنش بيجري بيها نهائي
وبالتالي وانا بسحب بالعربية حاسس فعلا ان سحبها ضعيف اوي وكنت شاكك ان الموضوع ده عيب فلاتر او زيت او طرمبة بنزين او تنظيف رشاشات واتأكدت ان الحاجات دي كلها تمام وكنت مستغرب جدا بصراحة لآن كانت معاية بيجو 305 موديل 78 قبليها وسحبها كان احسن من الفابيا بكتيرمع العلم ان موتور الفابيا حالته ممتازة جدا جدا وليس به اي عيب
بس بعد الكلام اللي شوفتو في المشاركة دي اعتقد فعلا ان ده هو السبب ان الموتور علطول نايم وانا حتي من ساعت مشترتها معدتش بيها ال100 وكل نقلاتي علي 3000

[borio1704]

اللى انا اعرفة ان تشغيل المحرك على لفات عالية بيكنس تراكمات الكربون من على مداخل و مخارج وش السلندر و بيسمح بتنفس احسن للمكنة... الموتور اساسا تقدر تعتبرة طلمبه هواء كبيرة لانة بيسحب هوا و بيطرد هوا فا كل ما كان مسار الهوا مفيش فيه اى معوقات هتتحسن الكفائة الحجمية للمكنة (قدرة المكنة على ملء كامل سعتها بخليط الهواء و البنزين) و دة يحسن ادائها



حتة "الزيت ميلحقش يوصل" دى غلط لان دورة التزييت دورة مغلقة و مفيش اى نقطة فيها مملوءة باى عنصر غير زيت المحرك... اللى بتتكلم فيه دة مبيحصلش الا عند بدء التشغيل فقط و الموتور بارد

mmamdouh

أتفق معاك إن تنفس الموتور هو من أهم الأشياء اللي بتخللي الموتور يستجيب أسرع



بس أختلف معاك بشدة في موضوع دورة التزييت

الغرض من التزييت هو وجود طبقة عازلة تمنع تلامس المعدن مع المعدن علشان ما يحصلش تآكل.

الزيت مهما كان نوعه محتاج سرعة خطية ماتزيدش عن حد معين عشان تفضل فيه طبقة من الزيت تملى الفراغ زي ما حضرتك بتقول

ولو افترضنا على سبيل المثال إن البستم بيتحرك في مشواره مسافة 85 مم ، يبقى البستم بيمشي حوالي (2 × 85 × 6000) = 1020000 مم/دقيقة = 1020 متر/دقيقة = حوالي كيلومتر في الدقيقة...

مع العلم بإن جدران السلندر الملامسة للبستم بيتزيت عن طريق الطرطشة من عمود الكرنك، والأجزاء التانية بتتزيت عن طريق مجاري خاصة

معدل مسح الزيت من على السلندر =عدد لفات الموتور في الثانية

تخيل لو الزيت في الموتور ما كانش على المستوى المطلوب.. الاحتكاك مش حيبقى عالي؟؟؟

طبعا كمية الزيت بتزيد لإن طلمبة الزيت بتشتغل بمعدل أعلى... بس هل تضمن إن الزيت واصل وبيزيت كل الأجزاء بنفس الكفاءة حتى مع زيادة سرعة الدوران؟؟؟...


مفيش شك إن حيحصل تآكل بمعدل أعلى.. مش في السلندر بس.. ده في كل أجزاء المحرك

أمال العمرات بيعملوها ليه؟؟؟

...

[matmm]

انا من الناااااس الى بتحرق 24ساعة هيا دى طريقة سواقتى وحاولت اغيرهااا ومعرفتش انا بشوف الطريق بتجنن اكنى داخل سبق انا سقطت 3 مواتير فى عربيتى 2 فاوتو و 1 رزع واكتر موتور عاش معايا قعد سنتين مع العلم ان العربية اودى والالمااانى مشهور ان مواتيرة معمرة وعندى واحد قريبى معاااة بولو قديمة سقطلها موتور بردوا بس بسبب ان ورق الموتور القديم مكنش سليم وهو راجل كبير ملوش فى الحرق والكلام دة الموتور بتاعة بقالة بتاااع 8 سنين شغاااال زى الفل مركبة من قبل ما انا اعرف يعنى اية تسقيط مواتير اكل ال 3 مواتير بتوعى ولسة شغاااال زى الفل وانا بحووش فلوس عشااان اجيب موتور تانى

[strongxx]

هههههههههههه جاااامده موضوع يلبس العجل شرابات
انا مقتنع برأي حضرتك بس سؤالي بعد فتره يعني مثلا بعد سنتين او تلاته بردو العربيه اللي صاحبها بيسحب بيها جامد هتطلع من العربيه التانيه ولا الموتور هيكون تعب ؟

لا يا برنس...طبعا فيه حاجات حتبدأ تتعب في موتور العربيه.....وده أساسي.....لانك زي ما بتاخد شغل وشد محترم...برضه حتاخد منك صيانه من ناحيه تانيه.......زي ما بتاخد زي ما حتدي.....مافيش حاجه في ديتك بتفضل تاخد منها وبس...لازم تديها زي ما بتاخد.....يعني لو قلنا أنك مراعي العربيه زيت وبنزين عشره علي عشره يبقي دور علي سيور الموتور سواء كانت تقسيمه ولا دينامو ولا تكييف...ولو مكنش يبقي دور علي الإسطوانه والديسك وطقم الديبرياج عموما...ولو مكنش يبقي دور علي الكاوتش وشوف أنت جايب الكاوتش بتاعك يتحمل لحد سرعة كام كيلو في الساعه.........ولو مكنش يبقي دور علي تقويات سدر العربيه لتفتح منك وتتشرخ ودي لازم لها بار بيربط البطيختين مع بعض ..... هم دول كل الإحتمالات إلي ممكن تلاقيها بعد فتره من الشد والحرق إنت بتتكلم عليه

[Amr_Azab]

دلوقتي انا زي مقلت العربية كان سحبها ضعيف معاية فنزلت بيها علي الطريق الدولي وحاولت افتح الموتور وبقيت بنقل علي rpm 4 و 5 وجبت بالعربية 140 وفضلت ماشي عليها شوية حلوين
والكلام ده عملتو يومين ورا بعض وبصراحة حسيت بفرق كبير في سحب العربية عن الاول بقت بتسحب معاية كويس
فهل لو استمريت في سواقتي علي كده اني انقل علي 4 او بعد ال 4 rpm بشوية غلط وحهلك الموتور ولا ايه ؟
مع العلم اني قبل كده كنت علطول بنقل علي 3 rpm بالكتير اوي والعربية كان سحبها مش حلو وعشان كده عملت الموضوع ده بس طبعا لو فيها ضرر للموتور خلاص

[aboharb]

موضوع تفتيح الموتور ده اكيد ليه علاقه بقوة الموتور يعنى الكلام ده ممكن يكون فى الموديلات الجديده لكن عربيه موديل 2000 مثلا المحرك ممكن تظهر عليه علامات الارهاق بيبتدى بياكل زيت او بيسخن وغيرها من علامات التعب بعد 11 سنه صعب ان احرق عليه لغاية 5 rpm
لازم امش معاه عادى واعتقد ان موضوع النقل على rpm 5&6يندرج تحت بند القياده الرياضية
ولا انا غلطان

[MMamdouh]

الغرض من التزييت هو وجود طبقة عازلة تمنع تلامس المعدن مع المعدن علشان ما يحصلش تآكل.

الزيت مهما كان نوعه محتاج سرعة خطية ماتزيدش عن حد معين عشان تفضل فيه طبقة من الزيت تملى الفراغ زي ما حضرتك بتقول

ولو افترضنا على سبيل المثال إن البستم بيتحرك في مشواره مسافة 85 مم ، يبقى البستم بيمشي حوالي (2 × 85 × 6000) = 1020000 مم/دقيقة = 1020 متر/دقيقة = حوالي كيلومتر في الدقيقة...

مع العلم بإن جدران السلندر الملامسة للبستم بيتزيت عن طريق الطرطشة من عمود الكرنك، والأجزاء التانية بتتزيت عن طريق مجاري خاصة

معدل مسح الزيت من على السلندر =عدد لفات الموتور في الثانية

كل دة كلام صح و كلام عظيم... بس لم يضيف جديد للموضوع اللى بنتكلم فيه...

تخيل لو الزيت في الموتور ما كانش على المستوى المطلوب.. الاحتكاك مش حيبقى عالي؟؟؟

دى مش مشكلة الموتور ولا تصميمة ولا طريقة السواقة... دى مشكلة اللى بيركب عربية و بيحرق عليها و هو مش حاطت زيت كفاية.. يعنى من الاخر دة يندرج تحت بند الاهمال اللى قولت عليه قبل كدة

طبعا كمية الزيت بتزيد لإن طلمبة الزيت بتشتغل بمعدل أعلى... بس هل تضمن إن الزيت واصل وبيزيت كل الأجزاء بنفس الكفاءة حتى مع زيادة سرعة الدوران؟؟؟...

طبعا ضامن... امال الموتور معمول الريد زون بتاعتة عند 6500 و 7000 و اكتر من كدة ازاى؟؟... تعتقد فيه مصنع هيعمل موتور و يحط زيد زون اعلى من اللى الموتور اصلا يستحملها؟؟؟

و بعدين احنا بنتكلم فى عدد لفات قليل جدا جدا مقارنة مثلا بمحركات الفورميولا 1 اللى بتوصل لحد 18000 لفة... لو كلامك صح كانت مكنة زى كدة ماتت بعد اول حرقة علما بان دورة التزييت فيها مش بتختلف عن المحركات العادية و كمان العربيات دى بتستعمل زيوت محرك زى اللى احنا بنستعملها

مفيش شك إن حيحصل تآكل بمعدل أعلى.. مش في السلندر بس.. ده في كل أجزاء المحرك

مضبوط... عشان كدة قولت معدل "استهلاك" الموتور هيبقى اعلى مش معدل "اهلاك" الموتور

أمال العمرات بيعملوها ليه؟؟؟

...

هو مبيعملش العمرات الا الناس اللى بتحرق؟؟؟

MMamdouh

[wael_elbarkoky]

انا دماغي اتلخبطت

يعني خلاصت الموضوع نعمل كده بس مش كل يوم تقعد تحرق و تجيب اخر حاجه في غيار العربيه
يعني اقرص علي العربيه بس مش علطول يعني مش كل يوم

[El Prince]

رأيى الخاص

الحقيقه انى لما كنت بنقل بعد 2000 لفه كنت بحس ان الموتور نايم وساعات كنت احس بتخبيط بسيط فى الموتور وتأخير فى الاستجابه Delay و اعتقد ان ده مؤذى اكتر منه مفيد أو موفر فى استهلاك البنزين

لذا غيرت أسلوب سواقتى أخذاً بالحكمة اللى بتقول خير الأمور الوسط ...

يعنى اصبحت بمشى على الاولانى لحد 2000 و انقل , و اى غيار من التانى لحد الخامس فى الحدود من 2500 لفه لحد 3000 و بكده باخد عزم شديد و استجابه كبيره من الموتور , و فى حالة انى عاوز اخرج من زنقه او ما شابه عند المفاجات ممكن اوصل لحد 4000 ار بى ام لكن مش لفترة طويلة و بعدين ارجع امشى عادى على عدد اللفات اللى سبق توضيحها - ولاحظت ايضا ان ده حسن اداء الفرامل يمكن علشان الضغط اللى رايح للماستر بأه مظبوط

والحقيقه انى مستريح اكتر لأسلوب القياده ده
و انا مستعد للتصحيح و التعليق منكم علشان افهم اكتر خصوصاً من المهندسين الكبار اللى فى منتدانا الجميل

[Amr_Azab]

رأيى الخاص

الحقيقه انى لما كنت بنقل بعد 2000 لفه كنت بحس ان الموتور نايم وساعات كنت احس بتخبيط بسيط فى الموتور وتأخير فى الاستجابه delay و اعتقد ان ده مؤذى اكتر منه مفيد أو موفر فى استهلاك البنزين

لذا غيرت أسلوب سواقتى أخذاً بالحكمة اللى بتقول خير الأمور الوسط ...

يعنى اصبحت بمشى على الاولانى لحد 2000 و انقل , و اى غيار من التانى لحد الخامس فى الحدود من 2500 لفه لحد 3000 و بكده باخد عزم شديد و استجابه كبيره من الموتور , و فى حالة انى عاوز اخرج من زنقه او ما شابه عند المفاجات ممكن اوصل لحد 4000 ار بى ام لكن مش لفترة طويلة و بعدين ارجع امشى عادى على عدد اللفات اللى سبق توضيحها - ولاحظت ايضا ان ده حسن اداء الفرامل يمكن علشان الضغط اللى رايح للماستر بأه مظبوط

والحقيقه انى مستريح اكتر لأسلوب القياده ده
و انا مستعد للتصحيح و التعليق منكم علشان افهم اكتر خصوصاً من المهندسين الكبار اللى فى منتدانا الجميل

+1111
في رأي برده ده أفضل وضع بحيث لا اضغط علي الموتور اوي ولا يبقي الموتور خامل ومكتوم
وكل فترة كده مفيش مانع من ان الواحد يطلع طريق مفتوح زي الصحراوي مثلا وتفتح بالعربية تشوف حتجيب معاك اخرها كام
وفي انتظار رأي خبراء الموقع

[windofchange]

يا فهد فيه فرق كبير جدا بين "استهلاك" و "اهلاك"...

لا جدال على ان الحرق بيعتبر "استهلاك" اسرع للمكنة و فى الظروف دى هنتكلم دايما عن الحد الادنى اللى لازم عندة تتعمل الصيانة عشان المكنة تعيش... يعنى اى قطعة ليها حد ادنى و حد اقصى لازم تتغير خلالة يبقى انت لازم تمشى على الحد الادنى لان استهلاكك عالى

العكس بالعكس "الاهلاك" هو انى استعمل العربية و هى فعلا محتاجة صيانة يعنى امشى بيها بزيت منتهى الصلاحية او بدون مياه تبريد او بوجيهات ميتة و فلاتر مسدودة... بغض النظر عن طريقة سواقتى فا كل كيلو بمشية بيقلل من عمر المكنة فعلا لانى بستخدم الموتور بطريقة غلط و دة بيضر المكنة

و بعدين لو هنتكلم كلام نظرى فقط... ليه الريد زون معمولة عند 6500 مثلا مش 3000 او 4000 طالما ان المشى على RPM اعلى من كدة مضر للمحرك؟؟... و بما انك مهندس ميكانيكا فا اكيد انت عارف ان القدرة الحصانية القصوى للمحركات بتاعت السيارات بتطلع قرب الحد الاقصى للفات المكنة يعنى فى حدود 5700 او 5800... هل معنى كدة ان الاستخدام الصح للمكنة يعنى عدم استخراج كامل قدرة المكنة تحت اى ظرف؟؟... طيب انا هستفيد ايه من مكنة بتطلع 200 حصان عند 5800 لفة اذا كنت عمرى ما حزود عن 3500 عشان المكنة متبوظش؟؟

و على فكرة الشباب اللى بتتكلم عليهم و ماشيين بمكن مفوت دة بيرجع لاهمال الصيانة مش لانهم بيحرقوا و كدة... يوم ما تبقى فاضى عدى عليا فى الرحاب اخلليك تجرب عربية الوالد... العربية دى موديل 99 و عاملة 133 الف كيلو منهم بتاع 100 الف سواقة حرق... و لحد النهاردة ما شاء الله بتجيب اقصى سرعة مكتوبة فى كتالوج العربية بالرغم من طريقة السواقة و عدد الكيلومترات و عدد السنين اللى عدت عليها

الموضوع دة بالضبط زى ما تجيب واحد بيلعب رياضة وواحد مدمن مخدرات.... مينفعش تقول ان اللى بيلعب رياضة هيموت بدرى او حتى هيعجز بدرى لانة بيبذل مجهود و بيهلك عضلاتة... دة بيعمل حاجة طبيعية و متوافقة مع الغرض اللى ربنا خلق العضلات عشانة... بالعكس دا هتلاقى صحتة احسن من الشخص العادى... بس بشرط طبعا انة يتغذى كويس و يعوض الطاقة اللى بيحرقها و الا يفيص

اما اللى بياخد مخدرات فا دة بيهلك فى جسمة و بيبوظة و لازم يخرالة حاجة وحشة عاجلا او اجلا... هو اساسا جسمة مش معمول لاستيعاب المخدرات و تراكمها لازم يسبب اضرار و تلفيات بدون ادنى شك

ارجو انى اكون قدرت اوضح الفرق بين "الاستهللاك" و "الاهلاك" بشكل جيد

MMamdouh

موضوع ولا اروع شكرا عليسؤاللك يا محمد بك )) وجزاكم الله خير يا شباب بجد عجبني المناقشات دي جداااا ,محمد باشا سؤالي ليك معلشي انا من ساعة مسقطت المكنة مغيرتش البوجيهات اللي فيها 3 شمعة ngk ولما غيرت البوجيهات كانت مرطبة الجديدة 1شمعة ,وركبت القديم تاني والميكانيكي قاللي احسن من الجديد يمكن عشان بحرق اوقات كتير؟ يعني ايه بوجيهات ميتة ؟ وممكن بوجيهات تبوظ الموتور لو متغيرتش وامتي احس انها محتاجة تغيير مش طالما بتدور من اول تكة يبقي مش محتاجة؟ وشكرا ليك

[sammor_28]

بجد تسلم ايديكم على الموضوع ده
انا بحرق وبشد عالموتور وكنت خايف يتعب مع المدى الطويل
بس هقولوكم على حاجه:
انا اشتريت كليو موديل 2004 1200 سي سي ماشيه 40.000كم وكانت بتاعت واحده ست من الزيرو وهي بتسوق بهدوء فظيع وبتغير على 2000 ار بي ام 2500 بالكتير وانا ركبت معاها كذا مره قبل كده
المهم لما اشتريت العربيه كنت اجي اشد مالقيش حاجه خالص العربيه كا سحبها بجد بدون مبالغه (بطه)
المهم انا في سواقتي عامه بغير عن 4000 ار بي ام وممكن 5000 و 6000 كمان لو حكمت بس مش دايما
المهم اتبعت مع الكليو نفس الأسلوب
وكانت النتيجه بعد حوالي اسبوع مستمر على التغير مابين 4000 ار بي ام الى 6000
هايله العربيه ماشاء الله بقت حاجه تانيه
وبدون تعصب ولا ضرب شديت مع سيراتوموديل 2009 وماشيه 50.000كم اوتوماتيك بتاعت واحد قريبي ملبسها شرابات على رأيكم وكان اول مره يشد مع حد بالسيراتو بس هو قاللي انت 1200 ازاي تشد مع 1600 ده انا من غير ما ادوس ولا احرق هطلع منك
ابتدينا الشد من سرعه ستين وانا عالغيار الثالت لحد 100 والرابع لحد 140 والله العظيم كنت ماشي جنبه كبوتي جنب كبوته بالظبط بس بعد كده هو طلع مني بعد ال 140

واخيرا ربنا يطمنكم وريح قلبكم دا نا كنت خايف لحسن اجيب اجل الموتور بدري بدري

[Elawany13]

mmamdouh باشا :)

مش معنى ان ال max hp بيطلع عند 6000 لفة او اكثر ان المحرك مصمم انى امشى بية على 6000 لفة على طول و ساعات بيبقى مكتوب فى الكتالوجات اقصى سرعة على كل نقلة هل معنى كدة انى امشى على السرعات دية على طول ؟؟؟؟؟؟؟

و على فكرة اقصى عزم عمرة ما بيطلع على rpm عالى جدا كدة و بعدين ال hp ما هو الا torque مضروب فى rpm

و مثلا لو قولنا محرك بيطلع xxx حصان عند 6000 لفة و xxx عزم عند 3000 لفة معنى كدة ان اقصى عزم تاخدة من المحرك هو عند 3000 لفة مش 6000 لفة يعنى لو عاوز تجر حاجة تجرها على 3000 rpm مش على 6000 rpm

انا حتى قولت فى المشاركة الى فاتت انى اوقات الجرى بنقل عند 6000 rpm عادى جدا و دة وقت الحاجة فقط لكن فى الطبيعى عمرة ما حمشى على 6000 rpm

مثال اخر بسيط

الكاسيت و السماعات لو انت جايب كاسيت للبيت هل هو مصمم انك تفضل معلية على طول على الأخر ؟؟؟؟؟؟؟؟

حتقولى لأ

حقولك امال هما عاملين لية انك ممكن تعلية للأخر ؟؟؟؟؟؟؟؟؟؟؟؟

لو انت فضلت معلية على الأخر اية الى هيحصلة ؟؟؟؟؟؟؟؟ اكيد السماعات حتضرب !

لأن بيبقى مكتوب ال peak watts مثلا 1000 و لكن انت مش ممكن تفضل كدة على طول

زى ال peak hp عند 6000 rpm !

دة مثال مشابة لمحرك السيارة

ممكن اة تلففة ل 6000 rpm بس دة فى اوقات معينة يعنى مش كل يوم يعنى

و كمان البنى ادم

ممكن يمشى و ممكن يمد و ممكن يجرى صح ؟؟؟؟؟

بس هل ممكن انة يفضل يجرى على طول ؟؟؟؟ اكيد هيتعب فى فترة مهما طالت

دة حتى طبيا الجرى الكتيير غلط ( على الأسفلت ) لأنة بيحصل تأكل فى الغضاريف و فى الكبر بيسبب مشاكل

لكن لو انت بتجرى فى المعقول مش هتعانى من اى مشاكل

و بعدين فى كل حاجة خير الأمور اوسطها

و بعدين اثناء ما انت على 6000 rpm كل مكونات المحرك بتبقى شغالة بكامل طاقتها يعنى نظام حقن الوقود , نظام الأشعال , نظام التبريد , نظام ال lubrication , ... و طبعا الحاجات دية حتتعب بدرى دة غير طبعا الأجزاء الميكانيكية !

و طبعا لو فية اى defect فى الأجزاء الميكانيكية مثلا فى ال connecting rod حتلاقيها اتكسرت لأنك كدة بتحملها على طول بأقصى حمل هية مصممة انها تتحملة فا بالتالى اى عيب صغير بيكون موجود بيتزايد لغاية لما بتحصل مشكلة كبيرة

و فى النهاية اتمنى ان الأختلاف فى الرأى ميعملش اى مشاكل احنا بنتناقش و كل واحد حر يقتنع بأنهى رأى

و اخر نصيحة اقدر اقدمها لأى حد بيسوق على rpm عالى على طول انه يغير الزيت قبل معادة علشان يحافظ على المحرك لأطول فترة ممكنة !

كلامك منطقى :b4_388:
خير الأمور الوسط

[ashouhdy]

هل هو الموضوع ماتور بس ولا داخل فى اساسيات تانية قواعد و جلب وخلافة؟