النور العالى والنور الواطى

[محمد عز]

فيه نوعين من النور للكشافات الاماميه
واحد واطى
واحد عالى

هنا فى الامارات بسنتخدم النور الواطى بليل (الزامى) سواء الشوارع مضاءة او لا
فى مصر لما نزلت الاجازة اللى فاتت
كنت مشغل النور الواطى وماشي
وكان دايما السواقين يطلبوا منى ان اطفى النور (وبالاخص سواقين التاكسي مع بعض الشتايم)

فافيدونى افادكم الله
فى مصر بستخدم النور الواطى دايما سواء كان الشارع منور او مطفى
ولا فى حالة الشوارع المضلمه بس

والقانون الجديد للمرور بيقول ايه

[iunknown]

سواق ميكروباص عمل معايا نفس الموضوع

قال لي بصوت ابح متحشرج
"ايه يا فندي انت ماشي على الصعراوي"


عموما النور الواطي من بعد الغروب مابطفيهوش

[M.Mokhtar]

انا بريح نفسى وبنور الشبوره
عشان بيكون واطى ومش بيأذى عين اللى قدامى
عشان اغلب السواقين فى مصر بيزعلوا من النور الواطى :)

[iBiZa]

الواطى هو الصح علاطول من وقت الغروب. انا مش بطفية اصلا.

بس مصر بطبيعتها غير كل الدول فا ليها قواعدها.

من زمان كان كل العربيات مستوى الاضائة بتاعها مش مظبوط فا لما تنور الواطى كان يخبط فى عين اللى جاى قدامك و تلاقية ضربلك العالى و قعدتم تتخانقوا.

فا جرت العادة منذ قديم الازل انك متولعش النور الواطى و تمشى على الصغير بس و لو لقيت حد مولع الواطى حتى لو مش جى فى عينك لازم تقولة يطفية احتياطى. {عادات و تقاليد}

[Eng.Mina]

فعلا انا حصل معايا الموضوع ده لاول مرة وانا في بورسعيد ودي كانت اول مرة بسافر بالعربية وكنت ماشي انا وابن خالتي (ساكن في بورسعيد ) في طريق بالليل وكنت منور النور الواطي لقيت كل العربيات اللي جايه بتقلبلي نور فسألت ابن خالتي هو في ايه ؟؟
قاللي في ناس كتير بتتخنق من اللي بيستخدموا النور الواطي وسط البلد وفعلا كان احسن حل اني اركب فوانيس الشبورة لانها مش بتضايق اللي جاي في المقابل وفي نفس الوقت بتخليك تشوف الطريق كويس لمسافة لا بأس بها

[OlaOsman]

لأ معلش مش فاهمة.. ايه الضرر من النور الواطي؟

[iBiZa]

لأ معلش مش فاهمة.. ايه الضرر من النور الواطي؟

و دة الرد على سؤالك

فا جرت العادة منذ قديم الازل انك متولعش النور الواطى و تمشى على الصغير بس و لو لقيت حد مولع الواطى حتى لو مش جى فى عينك لازم تقولة يطفية احتياطى. {عادات و تقاليد}

[Islam_galal]

السبب اللي بيخللي الناس تعمل كده:

- بيقوم الكثير من الناس و الكهربائية بضبط النور الواطي لفوق شوية .
- السيارات في مصر قديمة و زجاجها ملئ بالخدوش الصغيرة جدا و التي تشتت الضوء و تضعف الرؤية في وجود حتي الضوء الواطي.
- الشوارع غير مستوية بالمرة و بالتالي لو طالع مطلع بيبقي النور الواطي في عين السائق المقابل
- في معظم الدول المتقدمة بتوضع حوائل في وسط الطريق بين الإتجاهين لتلافي المشكلة دي
- الزينون المصري و حب الناس للأذي و قهر الآخرين

[MoToRiZeR]

- في معظم الدول المتقدمة بتوضع حوائل في وسط الطريق بين الإتجاهين لتلافي المشكلة دي

و لأننا دولة مش متقدمة و معندناش الحواجز دي مبيمشيش عالشمال عالدائري بالليل خالص لأن بحس إن الناحية التانية كلها داخلة في عيني

[OlaOsman]

يعني الموضوع عادة ليس أكثر.

بس متهيألي النور الصغير مش كفاية عشان الواحد يشوف المطبات و الحفر و البلاعات اللي شوارع مصر مليئة بيها، خصوصا لو ماشي في مكان مش متعود عليه و حافظ مطباته.

[Islam_galal]

طبعا النور الصغير و ظيفته اعلان ان فيه عربية جايه فقط و لا علاقة له بإضاءة الطريق

في الطرق الضلمة باولع النور الواطي و اركز في الأسفلت مش في العربيات القادمة تفاديا للضوء العالي و الترعيش

[MoToRiZeR]

و الله يا علا الحاجات اللي قلتيها دي ولا ينفع معاها وزارة الكهربا حتي مش النور الصغير

عامة النور الصغير ضروري عشان اللي قدامك يشوفك في المراية حتي لو جي من بعيد و يبقي واخد باله منك لو هينحرف شمال أو يمين (ده لو بيبص في المرايا يعني!)

انا اللي بيغيظني الناس اللي مشغلة العالي عالمحور .. يعني يمكن الطريق الوحيد في القاهرة اللي فعلا الإضاءة معمولة فيه بضمير و علي نضافة و شايف الشارع كله و مية مية .. ايه لازمة النور العالي !!؟ الله أعلم ..

[MohabSaeed]

لو الطريق ضلمه بولع العالى ... والى مش عاجبه هو حر ... اصلى مش حلبس فى نقر وبلاعات ومطبات و احتمال موتسيكلات ماشيه من غير نور .... علاشان الى قدامى مش عاجبه .

لكن لو الطريق منور بمشى على النور الواطى و او نور الشبوره .....

عموما الضوء الواطى عندى فيه عدسات ... وانا بنفسى جربت اشغله ووقفت قدامه و بصيت فيه .... واتأكدت انه مش مؤذى و غير كده هو ضارب فى الارض .
فلما بكون ماشى و منوره الواطى و حد بيرعش علاشان اطفيه .. بضربله العالى .. علاشان يفهم ...

[iBiZa]

فلما بكون ماشى و منوره الواطى و حد بيرعش علاشان اطفيه .. بضربله العالى .. علاشان يفهم ...

انا فعلا بعمل كدة بعد عشان اوريلة ان فية عالى بردة.

[iBiZa]

لو الطريق ضلمه بولع العالى ... والى مش عاجبه هو حر ... اصلى مش حلبس فى نقر وبلاعات ومطبات و احتمال موتسيكلات ماشيه من غير نور .... علاشان الى قدامى مش عاجبه .

هو بس انا ليا تعليق فى النقطة دية, لما تقرب من العربية اللى قدامك, اطفى العالى و خليك على الواطى لحد ما تعدى منة و بعدين ارجع للعالى تانى.

و دة الصح على فكرة.