بفكر اجيب عربية حوادث واجددها هل هتبقى أوفر؟؟

[michohat]

فى فكرة جت لى معرفش هتبقى كويسة ولا لا
وهى بما ان اسعار العربيات الجديدة اللى تستاهل ان الواحد يشتريها من وجهه نظرى ( سكودا اوكتافيا) مولعه وصعب انى اوفر ثمنها دلوقت

ففكرت انى لو اشتريت عربية سكودا عامله حادثة ولا حاجه بحيث يكون تمنها اقل و بعد كده اشدها واظبطها صح " مش هبخل عليها"
فمعرفش الفكرة دى هتبقى موفرة وهل هتطلع لى عربية بنفس الامكانيات
لو حد عنده خبرة فى الموضوع ده يرشدنى
لانى شوفت واحد صاحبى كان جدد عربية اسكودا ب 16 الف و طلعت حلوه جدا فمن ساعتها وانا بفكر فى الفكرة دى

[islamnabil]

الموضوع عايز تفرغ للصنايعية و عايز طولة بال ده غير ان النتايج مش مضمونة يعني عشان تتعمل صح لازم تكون عارف كل صنايعي بيشتغل في العربية و واقف على ايده

[hotboja]

بس اوعة يكون العربية فية عفريت

على شان تعرف تسوق بس اهم حاجة الحوض بتاعة يعنى لو خبطة فى الجنب مش مهم او فى السقف لكن فى الحوض هيكون صعب انك لو عايز تبيع ان حد يشترى


والله اعلم


تم حذف التوقيع لمخالفته الحجم المسموح به
و تجاهل طلب الإشراف بتغييره
برجاء مراعاة الحجم بحيث لا يزيد عن 600*800

مشرف القسم التعليمي

[michohat]

طب فى حد من العضاء جرب الموضوع ده قبل كده
هل الموضوع ده بيوفر ولا مفيش فرق

[casper2010]

فكرة 10 علي 10 بس بشروط :
عربية واقعة جدا يعني جديدة ب 100 مثلا تاخدها حوادث ب 30
خبرتك تكون حلوة جدا في العربيات + تكون عارف صنايعية 100 100

[ahmedkafas]

فكرة حلوة للي عندة خبرة في السيارات
وعلاقات طيبه عند اصحاب الورش

يعني اللي يحتاج اصلاحة جنيه ما يدفعش فيه عشرة

ويتاكد من ان قطع الغيار اصليه وركبت في مكانها فعلا

[enashelmy]

نصيحه
اوعى تعمل الموضوع ده
لانه هيصرف مصاريف انت مش متخيلها
فعلا فى ناس بتعمل كده
بس بيبقوا تجار محترفين
ومتفقين مع صنايعيه
لكن ليك انت شخصيا بما انك مالكش خبرة فى الموضوع ده
بلاش
لانى اعرف صديق عمل كده
ومش عارف يقفل المصاريف خالص
اشترى عربيه مستعمله نضيفه وخلاص

[ahmedfawzy14]

انا اعرف واحد تاجر لسه عاملها فى عربية لانوس 2007
وجابلها نص

ودلوقتى فابريكة

بس فى الاخر دى شغلته تاجر وفاهم

[hazem_khidr]

محتاجه شغل كتير
و صنايعيه فاهمين صح
و عارفين هما بيعملوا ايه
لكن برضه في الاخر مش حتبقي زي الجديده.

[tamera]

التاجر مش خسران حاجة

أعتقد التاجر بيعمل كدا علشان يبيعها ويكسب منها مش علشان يركبها ويبيعها على مافيها من عيوب ممكن تظهر بعد وقت لأنه ميهموش النتيجة تكون 100% وماظنش ابدا يرضى يركب عربية من اللي هو بيظبطهم دول
فانت لو عملت كدا ممكن العربية ماتطلعش مظبوطة وهايتعمل عليك شغل.. وحتى لو اتعملت مظبوط مش هاتستريح نفسيا وهاتفضل دايما قلقان من اقل صوت هاتسمعه فيها
لو عايز عربية تركبها بلاش تعمل كدا

[chihab18]

ابعد عن القديم وغني له ولو كان مرسيدس عيون

[michohat]

فعلا انا مقتنع ان العربية المتجددة مش هتكون زى المصنع بس من كتر ما شوفت الناس اللى بتعمل الموضوع ده فكرت فيه وقولت اخد رأيكم فيه وخصوصا انى من النوع الموسوس جدا ولازم العربية اللى معايا تكون فى اقرب حاله من حاله المصنع وده اللى حاولت اعمله فى ال131 اللى معايا حاليا

[ana]

نصيحه منى بلاش تعمل كده ابدا انا كنت ناوى اعمل زيك وخلاص كنت بشترى البى ام بس واحد صاحبى الله يباركلو عمل حادثه وقالولوا يبيع العربيه لانها هتفتح معاه باعها ب12 الف وسعرها مستعمل 85 الف اوعى تعمل كده

[waleedrahmy]

هوالميت بيصحي العربية ال عاملة حادثة بتبقي زي الميت ال عمره ما يرجع يعيش تاني وأن عاش بيعيش عليل العمر كله نصيحة بلااااااااااااااااااااااااااااااااااش تغلط غلطة عمرك الا أذا كنت مش تعبان في فلوسك وغاوي تتبهدل مه الصنايعية والورش

[mody_halawa]

هو موضوع حلو وجامد بس عاوز واحد يحسبها الاول قبل ما يشترى العربية يعنى يحسب حتتكلف تصليحها كام وحيكون الفرق بينها وبين اى عربية تانية مش عاملة حادثة كام بعد التصليح لو مبلغ كبير يبقى تمام
على فكرة فى عربيات كتيير بتعمل حوادث واصحابها صلحوها وبتمشى احسن من الاول انا ليا واحد صاحبى عمل حادثة بعربيتو الجولييت وصلحها وبقيت احسن من الاول بس هو الفكرة كلها فى انك تصلح العربية صح يعنى متبخلش عليها