العربية الأوتوماتيك

[Eng.Salah Mahdy Salama]

حقيقي انا مركبتش أتوماتيك إلا في عربية بي إم دبليو قديمة
و إن شاء الله ناوي إشتري إالنترا جديدة أوتوماتيك (للمتابعين منتدى الهيونداي أكيد عارفين)
ممكن شرح مبسط لإستحدام النقلات الإتوماتيك؟؟
شكرا

[Eng.Salah Mahdy Salama]

للتبسيط الرجاء الإستعانة بالصورة التالية




يعني كل رمز بيعمل إية

شكرا مقدما !!!

[ecybrarian]

بص يا باشمهندس،
P (Park دي بتعشق العربية وهي واقفة
R مارشدير (الرجوع للخلف)
N (Normal المور بتاع العربية
D (Drive حركة العربية وبتكون عادة 4 نقلات من الأول للرابع حسب تسارع العربية (ضغطك على دواسة البنزين) والنقلة الرابعة اسمها اوفردرايف Over Drive وممكن تلغي الأوفر درايف.
2 معناها إن العربية تنقل من الأول لثاني فقط مع ذيادة عزم الموتور
L (low أو أحيانا 1 وده معناه ان العربية تفضل على الأول بس أعلى عزم للموتور

العربية لا يمكن تدور إلا على P او N
وفي حاجة اسمها الكيك دون Kick Down انك تدوس بنزين جامد (تعلي الـ RPM) لحد ما تحس بنقلة العربية

والله أعلم :D

[Eng.Salah Mahdy Salama]

يعني لما أجي ادور العربية أخليها على اية؟
و لما أجي طالع أبتدي بـ L و بعدين بـ D2 و بعدين D3 و لا اية؟
و إيمتي اغير بين التلاتة؟؟؟
و الا انا مش بتكلم صح؟ يعني قصدي هيتم اوتوماتيك
شكرا جدا

[Hossam Mounir]

بص يا سيدى:

- وأنت بتدور العربية لازم يبقى الفتيس يأما على P أو على N ... كما قال الاخ ecybrarian لك علشان العربية ترضى تدور ... ولاما هتبدئ الحركة لازم رجلك بتكون على الفرامل ... يعنى العربية دايرة وهتبدئ تتحرك وأنت رجلك على الفرامل ...

- بعد كدة سيادتك بتنقل من ال P إلى نقلتين فقط اما ال D ... لو عايز العربية تتحرك إلى الأمام
أو إلى R ... لو عايز العربية تتحرك إلى الخلف ... يأما نفس الحركتين من الوضوع N ... بس سواء هتنقل من P أو N إلى D أو R ... لسة رجلك على الفرامل ... ( الموضوع ده مهم جداً )

- بعد كدة سيادتك بالراحة بتشيل رجلك من على الفرامل ... العربية هتبدئ فى الحركة ... سواء للأمام أو للخلف .. وبعد كدة نزود بدال البنزين ... حسب الأحتياج ... وحالة الطريق ...

- النقل فى الجزء السفلي من الصورة إللي سيادتك حاططها ... ممكن بدون توقف العربية يعنى ... من D إلى 2 أو 3 أو L ... ده ممكن والعربية ماشية ... وده هيبقى حسب الأحتياج أليهم ... وغالباً ... مش هتحتاجهم ... سيادتك ... بتخلى العربية على ال D ... وكل شئ هيتظبط لوحدة ...

- أما النقل فى الجزء الأمامى من الصورة ... N أو R أو P ... لازم والعربية فى حالة توقف كامل ... ورجلك على الفرامل ...

ولو فى أى أستفسارات أخرى أنا تحت أمرك ...

تحياتى للجميع ...

م / حسام منير

[ecybrarian]

لما تدور العربية لازم الفتيس يكون على الـ P or N فقط. غير كدة العربية مش هاتدور
غالبا سواقة الأتوماتيك بتبقى على الـ D فقط. لان D فيها كل النقلات. لكن حالات نادرة جدا قد تحتاج عزم أكبر للموتور (مثلا لما تكون قاطر عربية وراك وطالع مطلع أو العربية غارزة) في تلك الحالات ممكن تستخدم 2 او L

وحاجة تانية، ما تستعجلش وانت بتنقل من D to R او العكس. الأفضل انك تستنى لحظة لحد ماتحس ان العربية استقرت في الوقفة وبعدين تنقل.
حاجة أخيرة، تمنع كل العربيات الأتوماتك النقل المباشر من D إلى 2 ومن 2 إلى L ولكن العكس ممكن
يعني من الآخر خليك على الـ D ومتفكرش كتير في النقلات

برضة من الأفضل ان العربية ماتجيش على المور N إلا وهي واقفة. يعني بلاش تمور العربية وهي نازلة منزل ثم تنقل على الـ D قبل ما تقف العربية (مش عارف ليه ده ممكن يكسر الفتيس)

[Eng.Salah Mahdy Salama]

معلش يا جماعة
في دلوقتي حاجتين
م/حسام قال : النقل فى الجزء السفلي من الصورة إللي سيادتك حاططها ... ممكن بدون توقف العربية يعنى ... من D إلى 2 أو 3 أو L ... ده ممكن والعربية ماشية ... وده هيبقى حسب الأحتياج أليهم

و ecybrarian قال : حاجة أخيرة، تمنع كل العربيات الأتوماتك النقل المباشر من D إلى 2 ومن 2 إلى L ولكن العكس ممكن

يا ترى مين الرأي الأصح؟؟؟
شكرا

[ecybrarian]

انا آسف اني ماكنتش واضح في كلامي. انا هاحكيلك على فتيس عربيتي (كيا سفيا 99 أتوماتيك)....
في عربيتي في زرار كبير في دراع الفتيس (الفتاسة). الزرار لازم ادوس علية وانا بانقل من P. وكمان لازم ادوس عليه لو حبيت انقل من D لنقلة اقل. يعني من D إلى 2 ومن 2 إلى 1 (L). ولو مادستش الزرار ده... دراع الفتيس هايرفض يتحرك للنقلة الأقل.

ولكن الحركة من N إلى D وبالعكس بتتم من غير ما ادوس على الزرار إللي في الفتيس...كذلك النقل من النقلات الواطية للعاليه... يعني انقل من 1(L) لحد D من غير مادوس الزرار في الفتيس...

وده اتعمل لأمان العربية والعربيات إللي من غير زرار الفتيس ده (زي إللي في الصورة فوق) بتعوض الزرار بالزجزاج في مسار عصاة الفتيس...تخيل لو العربية على 120 كيلو وبعدين السواق غلط ونزل عصاية الفتيس جامد للنقلة 1 ايه إللي ممكن يحصل للعربية..أكيد كارثة

:roll:


[url]بص على اللينك ده

http://www.i22i.net/uploads/118ca85b35.bmp

[Ahmed Hassan]

Eng.Salah Mahdy

في حاله الالنترا مفيش زرار في عصايه الفتيس و بيغني عنها تعرج مسار النقلات.. و بالتالي محدش هينقل من غير قصد.

ملاحظه تانيه الحرف "N" معناه "NEUTRAL"

[ecybrarian]

على فكرة انا باركن في أول جاردن سيتي من الاحد للخميس بالنهار وغير كدة انا غالبا في المقطم لوعايز تعرف فكرة النقلات دي عمليا لأن انا لسة حاسس إني كلامي مش واضح.

[Eng.Salah Mahdy Salama]

على فكرة انا باركن في أول جاردن سيتي من الاحد للخميس بالنهار وغير كدة انا غالبا في المقطم لوعايز تعرف فكرة النقلات دي عمليا لأن انا لسة حاسس إني كلامي مش واضح.

حقيقي متشكر جدا يا ecybrarian . الحقيقة انا في المعادي الجديدة
يمكن لما إن شاء الله أستلم العربية نتبقى نتقابل و يارب تكون معرفة خير
متشكر جدا
اخوك صلاح

[bassam nagy]

على حد علمى الفتيس الية فى الصورة فى D3 لو جبت الفتيس على D3 ثم تجيبوا يمين كدة تبقى ماشى على D العادى اما D3 هاتفضل ماشى على السرعة التالتة ومش هايغير وزى ماقالو الاخوة فى طريقة الاستخدام

[مهندس محمد صلاح]

بصوا ياشباب

اولا الخطوات التى يجب اتباعها لقيادة السيارة الاتوماتيك:

1- اول ما تركب العربية تكون متاكد ان الفتيس على P او N والا مش حتدور العربية
2- تدور العربية واول ما تكون جاهز علشان تتحرك تدوس فرامل خفيف كده وتحرك العصايا الى R لو حترجع ورا او D لو حتطلع للامام
3- ترفع رجلك من على الفرامل وتبدا فى التحرك ومعاك ربنا
4- وقفت فى اشارة مرور سريعة تخليك دايس فرامل واول ما تفتح الاشارة ترفع رجلك من الفرامل وندوس بنزين ومعاك ربنا
5- الاشارة طولت وشكلها حتطول كمان تنقل العصايا على N وتشد فرامل اليد وترفع رجلك من على الفرامل علشان ما تسخنش
6- رقم 2 معمول علشان استخدمه وانا طالع مطلعاية او نازل منزلاية طويلة
7- رقم 1 معمول علشان استخدمه وانا طالع مطلعاية شديدة الميل او نازل منزلاية شديدة الميل
8- رقم D معمول للقيادة العادية ويتم النقل اتوماتيكيا لغاية سرعة 300 كيلو متر فى الساعة ولو تقدر تجيب اكتر هات
9- عندك زرار اسمه الاوفر درايف ده يبقى دائما ON ويبقى OFF فقط فى حالات انك عاوز تقرص قرصة وتعدى عربية جنبك ولا حاجة وبعدها ترجعها تانى ON

محظورات:

1- ممنوع منعا باتا تحريك العصايا من D الى 1 او 2 اثناء القيادة وخصوصا على السرعات العالية
2- ممنوع منعا باتا تحريك العصايا من R الى D والعكس اثناء القيادة ويتم ذلك والعربية واقفة تماما
3- ممنوع منعا باتا اختيار العصايا على P وانا باركن ولسة العربية بتتحرك
4- ممنوع منعا باتا باتا باتا جر اى عربية بعربيتك الاتوماتيك والا تعيش انت
5- منوع منعا باتا ترك عربيتك سواء فى الجراج او الشارع وانت على P من غير ما تشد فرامل اليد .. ممكن واحد ظريف يزقها لك بعربيته وتعيش انت
6- ممنوع منعا باتا ترك العربية على N بدون شد فرامل اليد

كلما اتبعت خطوات الحفاظ على الفتيس الاتوماتيك عاش معاك اطول فترة ممكنة من غير ما يزعلك وكلما اهملته ولم تحافظ عليه ياويلك منه ومن زعله

وربنا يوفقكم جميعا وانا تحت امركم

[mina_ramsis]

ممنوع منعا باتا تحريك العصايا من D الى 1 او 2 اثناء القيادة وخصوصا على السرعات العالية

مش عارف بس اعتقد ان عادى انك تحرك الفتيس من d الى 1 او 2 و العربية ماشية بس بسرعة قليلة انما لو بسرعة عالية هنا تبقى خطر

[Eng.Salah Mahdy Salama]

- عندك زرار اسمه الاوفر درايف ده يبقى دائما ON ويبقى OFF فقط فى حالات انك عاوز تقرص قرصة وتعدى عربية جنبك ولا حاجة وبعدها ترجعها تانى ON

ممكن توضيح أكتر؟ و فين الزرار دة؟؟؟؟؟؟؟؟

شكرا