ممكن تساعدوني بخبرتكم كي اتقن القيادة

[نور العمر]

اشتريت سيارتي الأولى سفنتينا ( فيورا 87)
وعملت حادثة وفرمت جنبها الشمال بعد اليوم الخامس
جاتلي حالة رهاب
بخاف من الطرق العمومية واليوترنات
بخاف من الغيار الثالث وسرعة 60
لو في لينكات ممكن تفيدني كقيادة وميكانيكا ومبادئ تعامل آمنة مع العربية
أرجو أن تفيدوني بها
وشكرا

[samirayad]

اتقان القياده لايتم بالطريقه النظريه ولكن لابد من الممارسه العمليه.......مع تواجد الثقه وعدم الرهبه..........................

_ دايما اللى بيتعلم قياده يقول لنفسه سؤال محدد لنزع حتة الرهبه من عنده ( هما اللى بيسوقوا دول أحسن منى فى أيه ؟؟؟؟؟؟؟؟؟؟؟

_ وحاليا يفضل تواجد متمرس قياده (الوالد أو أخ مثلا ) معك فى السياره أثناء القياده لأعطاء التوجيهات الازمه الى أن يتم تنمية الناحيه المهاريه فى القياده.........

_ وبرضه وجود الوالد أو الأخ معك أثناء التدرب حيفيد كتير فى الحكم على مدى تمكنك من القياده......................

_ زى المدرب كده مابيوجه المتدربين لحين الأطمئنان عليهم وأعطائهم شهاده بأنهم أصبحوا أكفاء....................

_ وأعيد وأكرر الثقه هى العامل المهم فى الموضوع كله........وكله بالتعود.................أمنياتى بالتوفيق

[bee]

مبروك مقدما ع العربية
والحمد لله انك بخير بعد الحادئة ثانيا

نخش في ثالثا بقه

اي قيادة آمنة في الدنيا ليها شروط ميختلفش عليها اتنين زي ايه نقول زي ايه :

1-او حاجه تعمليها لما تركبي العربية حتى قبل ما تدوري تربطي حزام الأمان ولو فيه عطل او مش موجود لازم تصلحيه او تشتريه لانه مهم جدا جدا جدااااااااا ..

2-تتأكدي ان العربية ممورة يعني مش آخده غيار .. ويفضل تعودي نفسك تدوسي دبرياش قبل ما تدوري عشان حتى لو العربية آخده غيار متمشيش وتخبط اي حاجه قدامك لا قدر الله ..

3- قبل التحرك بالعربية وأثناء التسخين التأكد من ان المراية الداخلية والمراية الجانبية مظبوطين والرؤية فيهم مظبوطة يعني يكونوا كاشفين جمبين العربية والطريق وراكي ..

وقبل ما تطلعي تبصي في المراية وحتى لو ملقتيش حد عودي نفسك على الاشارات .. ليه بقه .. عشان تبقى عادة عندك وعشان فيه اوقات تبصي في المراية مش بتلاقي حد ومرة واحده تلاقي حد عدى من جمبك وتقولي ايه ده جه منين .. بيكون في مكان اسمه النقطة العمياء ودي مش بتظهر في المراية العادية .. عشان كده معظم العربيات الحديثة المراية الجانبيه فيها جزء فيه خط بالطول وبعده زاوية الرؤية بتكون مختلفة عن باقي المراية عشان تكشف النقطة العمياء .. فبنبهك تاني لازم تدي اشارة وتبصي كويس في المراية ..

4-بعد كده لما تطلعي ع الطريق كان نفسي اقولك خليكي ع اليمين .. بس بمااننا في مصر هقولك حاولى دايما تنكوني ع اليمين طول ما الطريق مفتوح لكن لو منطقة كلها ميكروباصات وكده خليكي ع الشمال عشان متتلبخيش بانك تتفادي اي سواق ميكروباص يقف قدامك مرة واحده .. ومهما حد زمرلك متتخضيش وافتكري دايما ان الشارع ملكك انتي كمان لكن في حدود الادب بمعنى اني امسك جمب ومليش دعوة بحد لكن مش امشي في الوسط واقول مليش دعوة ..

5-حاولي دايما تشغلي قرآن هيهديكي .. ولو بتسمعي أغاني متعليهاش ع الاقل دلوقتي عشان تركزي .. وانا انصحك بفيرووووز .. وصفة سحرية بجد في الهدوء ..
ولو جالك تليفون اركني على جمب وادي انتظار واتحركي بنفس الخطوات السابقه بعد ما تقفلي التليفون .. اوعي تتكلمي وانتي سايقه .. ومتفكيش الحزام حتى لو مش ماشيه وراكنه طول ما انتى جوا الحزام مربوط..

6-لو حصل ولقيتي اتنين بيشدوا مع بعض وغرز وحركات ملكيش دعوه واعتبري انهممش موجودين وخليكي في الطوالي الي انتي ماسكاه .. حتى لو حسيتي انه هيخبطك هدي بشويش مكتبسيش فرامل وخليكي في خط مستقيم دايما ..
وافتكري دايما قبل ما توقفي العربية تبصي في مرايتك ان مفيش حد لازق وراكي لو فيه هدي وادي انتظار لحد ما الي وراكي يهدي وبعدين اديله اشارة للناحية الي هتركني فيها

دول شوية نصايح ع الماشي وربنا يوفقك وزي ما استاذ سمير قالك كله بالتعود ..

ربنا يوفقك

[merosss]

انا عايز اقول نصيحة بس(عشان متعمليش نفس غلطتى ) متسمعيش كلام الى يقول انتى لسة بتتعلمى امشى على اليمين لان المشى على اليمين فى مصر محتاج سواق محترف مش حد لسة بيتعلم حاولى تمشى على الشمال مع ان بضايق جدا من الى بيمشى على الشمال براحة بس دة امان اكتر ليكى انتى

[evoo90]

مش شرط حد يعلمك انا ماحدش علمنى السواقه و اول ماسوقت سوقت ميكروباص
انتى ممكن تتعلمى القواعد والارشادات زى ما الشباب قالوا وتمشى براحه وواحده واحده ولو مشيتى فى طريق عام او زحمه شغلى الانتظار وماتمشيش ورا الميكروباصات ولا النقل
والاهم من ده كله موضوع الخوف لازم تجمدى قلبك خايفه على ايه؟؟
العربيه .. يتجاب الف غيرها
روحك .. سلميها لله العمر واحد والرب واحد
بس مش معنى كده انك ترمى نفسك فى وسط الطريق بس ماتخافيش وجمدى قلبك
ويارب اكون افدتك وافدت اى حد لسه جديد فى حلبات المحروسه

[mahmoud_magdy]

الخبره بتيجي بالممارسه
طول ما انتي بتسوقي هتلاقي مواقف بتقابلك
اهم حاجه يكون تركيزك عالي جدا وحساسه جدا ادام المواقف المفاجئه
وخلي قلبك جامد اوي تخافي او تقلقي
مافيش داعي خالص للقلق
طول ما انتي ماشيه مزبوط محدش له حاجه عندك
القواعد الاساسيه احفظيها وعودي نفسك عليها
الحزام , الاشارات , المرايات خدي بالك منهم كويس اوي
الحزام مربوط , الاشارات في الاتجاه اللي انتي ريحاه , عينك عالمرايه اللي في النص بشكل دوري
والمرايتين الجانبيتين عند التنقل من حاره الى اخرى
زودي ثقتك في نفسك اكتر واكتر وسوقي وسط العربيات ( ابعدي عن النقل والميكروباص والاتوبيس )
امسكي الحاره اللي في النص يمكن دي افضل حاره تقدري تمشي فيها براحتك
مفيش خوف من السرعات طالما في تركيز عالي وفرامل قويه
واكيد لما هتجيبي سرعه عاليه في عربيه قديمه هتحسي بالسرعه دي
لكن متخافيش ابدا ابدا ابدا
وان شاء الله ربنا معاكي طول الوقت اولا واخرا
( على فكره انا خبرتي في العربيات قليله جدا يمكن اقل منك بس لما اسوق عربيه مبيهمنيش حد طول ما انا ماشي صح وكمان الحمد لله تركيزي عالي جدا حتى لو كنت بتكلم مع حد جمبي )

[M_Nabil]

طبعا زميلى مسبوش حاجه غير وقالوها بس اللى ممكن اضيفه عشان تكسرى الرهبه اللى عندك في الأول لو انتى لسه مش متمكنه في القيادة في الشوارع انك تدربى على الأقل أسبوع في حته فاضية على النقلات لحد الغيار الثالث مثلا والدبرياج والرجوع للخلف واليوتيرنات وابعاد السيارة ممكن تكون ساعة او ساعة ونص بالكثير كل يوم و بعدها واحدة واحدة في شوارع فرعية وغير مزدحمه بعدها ممكن شوارع زحمه شوية والكبارى يعنى متستعجليش انك تسوقى بسرعه لسلامتك وسلامه من في الطريق وكلها أيام بعد ما هتسوقى وهتكرهى السواقة اصلا من اللى هتشوفيه في الشوارع والزحام الرهيب ههههه مع تمنياتى لكى بالتوفيق

[نور العمر]

مرسيه جداً يا جماعة
مش عارفة أشكركوا إزاي
نصائح مفيدة جدا جدا

[blazer]

حمد الله على سلامتك اولا
اهم حاجه انك تحطى فى دماغك ان كل الناس بتغلط وان الحمد لله ان الحادثه جت على قد كد
لان حتى السواقين فى السباقات اللى بيسوقوا عربيات بملايين و بيسوقوا من زمااااان بيعملوا حوادث وكتير كمان
حاولى تنزلى وتتدربى مع اى حد يعرفيه و لازم يكون ولد لان البنات بيخوفوا بعض ومش هتعرفى تتعلمى منها حاجه

[نور العمر]

لما أدخل يوترن أدخل وأنا ممورة واللا عادي بس أدوس دبرياج
وأنا طالعة كوبري
وأنا نازلة
ممكن مسائل فنية تساعدني

[evoo90]

انا ماليش فى المانيوال قوى بسبب حادثه كده بس انا اعرف ان العربيه تتمور وانتى نازله من الكوبرى او ماشيه على طريق سريع والعربيه واخده سرعه عشان العربيه تستريح
وميكانيكيا يفضل تموير العربيه كتير عشان حركه التروس الكتيره دى بتديها فرصه اكبر فى التزييت وكمان الترس بيستريح عشان مايبقاش متعشق على طول وبيريح الحمل من عليه شويه

[bee]

لما أدخل يوترن أدخل وأنا ممورة واللا عادي بس أدوس دبرياج
وأنا طالعة كوبري
وأنا نازلة
ممكن مسائل فنية تساعدني

لو الطريق واقف هتفضلي واقفه شوية على ما العربيات الي قدامك تتحرك .. موري واستني لما العربيات تبدأ تتحرك وعشقي وتوكلي على الله ..
لكن لو اليوترن سالك دوسي دبرياج بس وانتي بتلفي ..
بس انا ليا رأي لو تعملي بيه..
اتعودي تروحي مكان فاضي مفيهوش عربيات وتهدي بالعربية من غير ما تدوسي دبرياجهتلاقي العربية بدأت تكركر وبعدين تكركر جامد وبعدين تقف ..
اعملي الحركة دي كذا مرة هتساعدك تعرفي امته تدوسي دبرياج وهو وقت بداية حدوث الكركرة .. لان فيه مفهوم غلط وهو اننا بندوس دبرياج عمال على بطال وده غلط وبيحمل على الاسطوانه ..
لما تتعودي على الي بقولك عليه وانتي بتلفي والطريق سالك غالبا مش هتدوسي اصلا دبرياج ولو احتجتي هتكوني ريحتي بس على الدبرياج او دستي عشان تجيبي نقلة اقل ..

بالنسبة للكباري وانتي طالعة لازم تدي غيار عزم .. يعني الاول لو انتي كنتي واقفه وهتطلعي و التاني لو كنت ماشية بطئ عشان عزم العربية ميقلش منك وانتي طالعة
وبالنسبة للنزول طالما ماشيه على مهلك خليكي على الغيار بتاعك طالما صوت العربيه معلاش عشان العربية تكون محكومة تحت رجلك واوعي تموري وانتي نازلة كوبري ابداااااااا ..

وبالتوفيق

[mahmoud_magdy]

وانتي داخله على يوتيرن موري احسن
وهدي شويه شويه بحيث انك تقدري تخلي العربيه ماشيه وفي نفس الوقت سرعه هاديه
وبعد كدا بعد ما تلفي هاتي التاني وتوكلي على الله
وعلى الكوبري امشي بسرعتك العاديه ولو حصل لا قدر الله الكوبري وقف وده اكيد بيحصل
حاولي تكوني متزنه جدا لان دا بيكون من الاختبارات الصعبه ويمكن اصعبهم
طبعا لما هتقفي هتجيبي الاول وتطلعي عادي جدا بس حاولي بسرعه اكبر من السرعه العاديه
عشان العربيه متنزلش على العربيه اللي وراكي :)
وانتي نازله من الكوبري متهديش اوي وبردو متجريش اوي لكن خدي سرعة الطريق اللي انتي ماشيه عليه
شكرا
اتمنى يكون كلامي صح !!!

[evoo90]

اوعي تموري وانتي نازلة كوبري ابداااااااا ..
وبالتوفيق

ممكن توضح ايه الغلط فى كده ؟؟؟

[merosss]

ممكن توضح ايه الغلط فى كده ؟؟؟

عشان كدة بتلغى ما يسمى engine break وبالتالى العربية هتقف اعتمادا على فراملها فقط واساسا على المنزل سرعة العربية بتزيد لوحدها بسبب القصور الذاتى بتعها وعشان كدة لاقدر الله لو الفرامل راحت منك تقوم تنزل بالغيار عشان تقلل سرعة العربية مستخدما engine break