ممكن تساعدوني بخبرتكم كي اتقن القيادة

[gebreel]

حمد الله على السلامة يا فاندم و المهم انك سليمة العربية هتتظبط بكلام فاضي ان شاء الله و متظبطيش حاجة دلوقتي لغاية متتقني السواقة

و في حاجة انا شوفتها مع اهلي و اصحابي و معايا انا شخصيا ان اي حد بيسوق لازم هيتعلم عليه في حادثة ده زي ختم السواقة الابدي و حالة الرهبة دي طبيعية لاكن متسبيهاش تتحكم فيكي لانك ممكن تكوني سويقة و تعملي حادثة عادي لاكن المهم تاخدي بالك كويس

انا مش هقول كلام غير اللي اخواتي هنا قالوه استخدمي اشاراتك و مراياتك دوول مش اكسسوار مع العربية و خصوصا المراية و اربطي حزامك و امشي على مهلك خالص اي حد يقلب نوور ولا يدي كلالكس في اقرب حتة و ارميه ... وسعيله خليه يمشي في طريقه و كملي انتي طريقك و ثقي في انك تقدري تسوقي يمكن تكوني في الاتقان بتاع السواقة لسة مش قوي بس كووووووووووول اللي بيسوقو في الشوارع دوول كانوا في يوم من الايام زيك و انا ائيد كلام الاستاذ اللي بيقولك انك تنزلي تسوقس ساعة ساعة و نص كدة تاخدي على العربية اقولك على تجربة مع اختي كانت تنزل حصة السواقة و اخدها بعدها على عربيتها تفصل منها و تاخد مطبات و تبهدل الدنيا مع الحصة و ساقت أول حادثة عملتها كانت مع اتوبيس نقل عام:k48: و عدت و العربية بقت زي الفل و هي اتجرئت و بقت تسوق كويس جدا دلوقتي و اتمنى لك التوفيق ان شاء الله

[Mostafa Hessen]

مبروك مقدما ع العربية
والحمد لله انك بخير بعد الحادئة ثانيا

نخش في ثالثا بقه

اي قيادة آمنة في الدنيا ليها شروط ميختلفش عليها اتنين زي ايه نقول زي ايه :

1-او حاجه تعمليها لما تركبي العربية حتى قبل ما تدوري تربطي حزام الأمان ولو فيه عطل او مش موجود لازم تصلحيه او تشتريه لانه مهم جدا جدا جدااااااااا ..

2-تتأكدي ان العربية ممورة يعني مش آخده غيار .. ويفضل تعودي نفسك تدوسي دبرياش قبل ما تدوري عشان حتى لو العربية آخده غيار متمشيش وتخبط اي حاجه قدامك لا قدر الله ..

3- قبل التحرك بالعربية وأثناء التسخين التأكد من ان المراية الداخلية والمراية الجانبية مظبوطين والرؤية فيهم مظبوطة يعني يكونوا كاشفين جمبين العربية والطريق وراكي ..

وقبل ما تطلعي تبصي في المراية وحتى لو ملقتيش حد عودي نفسك على الاشارات .. ليه بقه .. عشان تبقى عادة عندك وعشان فيه اوقات تبصي في المراية مش بتلاقي حد ومرة واحده تلاقي حد عدى من جمبك وتقولي ايه ده جه منين .. بيكون في مكان اسمه النقطة العمياء ودي مش بتظهر في المراية العادية .. عشان كده معظم العربيات الحديثة المراية الجانبيه فيها جزء فيه خط بالطول وبعده زاوية الرؤية بتكون مختلفة عن باقي المراية عشان تكشف النقطة العمياء .. فبنبهك تاني لازم تدي اشارة وتبصي كويس في المراية ..

4-بعد كده لما تطلعي ع الطريق كان نفسي اقولك خليكي ع اليمين .. بس بمااننا في مصر هقولك حاولى دايما تنكوني ع اليمين طول ما الطريق مفتوح لكن لو منطقة كلها ميكروباصات وكده خليكي ع الشمال عشان متتلبخيش بانك تتفادي اي سواق ميكروباص يقف قدامك مرة واحده .. ومهما حد زمرلك متتخضيش وافتكري دايما ان الشارع ملكك انتي كمان لكن في حدود الادب بمعنى اني امسك جمب ومليش دعوة بحد لكن مش امشي في الوسط واقول مليش دعوة ..

5-حاولي دايما تشغلي قرآن هيهديكي .. ولو بتسمعي أغاني متعليهاش ع الاقل دلوقتي عشان تركزي .. وانا انصحك بفيرووووز .. وصفة سحرية بجد في الهدوء ..
ولو جالك تليفون اركني على جمب وادي انتظار واتحركي بنفس الخطوات السابقه بعد ما تقفلي التليفون .. اوعي تتكلمي وانتي سايقه .. ومتفكيش الحزام حتى لو مش ماشيه وراكنه طول ما انتى جوا الحزام مربوط..

6-لو حصل ولقيتي اتنين بيشدوا مع بعض وغرز وحركات ملكيش دعوه واعتبري انهممش موجودين وخليكي في الطوالي الي انتي ماسكاه .. حتى لو حسيتي انه هيخبطك هدي بشويش مكتبسيش فرامل وخليكي في خط مستقيم دايما ..
وافتكري دايما قبل ما توقفي العربية تبصي في مرايتك ان مفيش حد لازق وراكي لو فيه هدي وادي انتظار لحد ما الي وراكي يهدي وبعدين اديله اشارة للناحية الي هتركني فيها

دول شوية نصايح ع الماشي وربنا يوفقك وزي ما استاذ سمير قالك كله بالتعود ..

ربنا يوفقك

كلام تمااااام

تفبل تحياتى

[blazer]

لما أدخل يوترن أدخل وأنا ممورة واللا عادي بس أدوس دبرياج
وأنا طالعة كوبري
وأنا نازلة
ممكن مسائل فنية تساعدني

وانتى فى اى منزل متموريش العربيه
و انتى داخله يمين او شمال لازم تبصى على المرايات الجانبيه والمرايه اللى فى النص عشان تشوفى ايه العربيات اللى جايه وراكى و تستخدمى انوار الاشارات حسب الاتجاه اللى انتى عاوزاه
لو انت عاوزه تدخلى شارع او ملف ونسيتى اوعى تتخذى قرار متسرع و تدوسى فرامل فجأه كدا اكبر غلط ممكن تعمليه لان اى حد ممكن يبقى جاى بسرعه وراكى و يلبس فى عربيتك لا قدر الله

[bee]

ممكن توضح ايه الغلط فى كده ؟؟؟

لان زي ما ذكر moresss في المشاركة الي بعد مشاركتك ده سبب ..
وسبب تاني لاقدر الله وارد ان العربية تطفي وساعتها انسى الفرامل يا مان ووطبعا ساعتها المخ بيتوقف للحظات .. وربنا يستر

[bee]

كلام تمااااام

تفبل تحياتى

شكرا لذوقك ..
وتقبل تحياتي

[evoo90]

عشان كدة بتلغى ما يسمى engine break وبالتالى العربية هتقف اعتمادا على فراملها فقط واساسا على المنزل سرعة العربية بتزيد لوحدها بسبب القصور الذاتى بتعها وعشان كدة لاقدر الله لو الفرامل راحت منك تقوم تنزل بالغيار عشان تقلل سرعة العربية مستخدما engine break

لان زي ما ذكر moresss في المشاركة الي بعد مشاركتك ده سبب ..
وسبب تاني لاقدر الله وارد ان العربية تطفي وساعتها انسى الفرامل يا مان ووطبعا ساعتها المخ بيتوقف للحظات .. وربنا يستر

انا فهمت ان لو العربيه واخده غيار وعلى منزل مثلا واخده الاول
اولا: مهما كان زاويه الانحدار العربيه مش هتاخد اكتر من سرعه الغيار اللى متعشقه عليه
ثانيا: وده الاهم انها لاقدر الله لو بطلت على المنزل الغيار هيدورها لوحدها ده اصلا لو بطلت!!
فهمت صح ولا خبطت

[bee]

انا فهمت ان لو العربيه واخده غيار وعلى منزل مثلا واخده الاول
اولا: مهما كان زاويه الانحدار العربيه مش هتاخد اكتر من سرعه الغيار اللى متعشقه عليه
ثانيا: وده الاهم انها لاقدر الله لو بطلت على المنزل الغيار هيدورها لوحدها ده اصلا لو بطلت!!
فهمت صح ولا خبطت

العربية وهي آخده غيار مش هتجري منك في المنحدر هتكون حاكمها وخصوصا لو مدستش بنزين جامد ..

ولو بطلت ودست دبرياج وشلت رجلك واحده واحده هتدور طبعا .. لكن قصدي ان العربية لما بتبطل الفرامل بتحجر عشان السيرفو ..
في جميع الاحوال غلط انك تمور .. وابقى جرب تنزل المنزل وانت معشق وهتفهم قصدي ..

[maka]

انا مش هقدر ازود حرف عن اللى قالوه الاعضاء بس لو عوزتى حاجة فى الفيورا عموما انا تحت امرك لانى معى اختها

[aif]

الدروس النظرية على العربية مهمة جدا ... روحي مكام يكون فاضي شوية ومعاكي حد بيعرف يسوق .... واعملي كل الحركات بتاعت السواقة والعربية مبطلة .... اعرفي دوسة الدبرياج ... والفرامل .... اتعلمي تفصلي حركة الرجل اليمين عن الشمال وده مهم جدا .... يعني رجلك الشمال تكون دايسة دبرياج بينما اليمين بتتنقل بين الفرامل والبنزين
.....
وانتي واقفة بالعربية اتعلمي التحكم بالاشارات والانوار .... دربي ايدك على نقلات الفتيس .... ده ح يساعدك جدا لما تنفذي الكلام ده والعربية ماشية ...
لما تدوسي بنزين .... بلاش تدوسي بكامل قدمك ....خلي كعب رجلك مرتكز على الارض ... ودوسي بمشط رجلك على البنزين ... بالشكل دة ح يكون تحكمك في البنزين احسن كتير
لو تحبي تستعيني بمدربة محترفة ( كانت بتعلم زوجتي ) ممكن ابعتلك تليفونها ع الخاص
آخر نصيحة .... حطي اعصابك في ثلاجة مهما كثرت الكلاكسات والشتائم و المضايقات ... ويبقى احسن لو حطيتي ورقة على الزجاج الخلفي ... تعليم .... علشان اللي وراكي يبعد عنك وما يعملكيش توتر
بالتوفيق

[نور العمر]

أشكركم جدا جدا أخواني
اكتشفت الحقيقة المشكلة مش في السواقة المشكلة في المحيط بالسواقة
معظم الشوارع مكسرة .... النهاردة مثلاً كنت حلبس في عربية شمالي لما لاقيت بلاعة في وسط الطريق ممكن تطيرلي العجلة وحاولت أفاديها
المشاه بيمشو يتمخطرو قدام العربيات ... حتى القطط بقت باردة
ده غير المعاكسات والمضايقات
وانا عصبية ولاقيت السواقة حتعصبني زيادة .... وولادي معايا حاجة بتبقى لخمة بجد
ربنا يستر
الحمد لله بدأت آخد بالي من الفتيس وغياراته آخري تالت طبعاً ..... بدأت أخد بالي مدوسش بنزين وأنا بقلب الغيار ..... الفرامل بس بتقلقني والركنات مبعرفش أركن أفقي لازم رأسي ..
دعواتكو .... إدعولي أبطل كسر فوانيس كسرتلي ثلاثة حتى الآن ههههههههه

[bee]

أشكركم جدا جدا أخواني
اكتشفت الحقيقة المشكلة مش في السواقة المشكلة في المحيط بالسواقة
معظم الشوارع مكسرة .... النهاردة مثلاً كنت حلبس في عربية شمالي لما لاقيت بلاعة في وسط الطريق ممكن تطيرلي العجلة وحاولت أفاديها
المشاه بيمشو يتمخطرو قدام العربيات ... حتى القطط بقت باردة
ده غير المعاكسات والمضايقات
وانا عصبية ولاقيت السواقة حتعصبني زيادة .... وولادي معايا حاجة بتبقى لخمة بجد
ربنا يستر
الحمد لله بدأت آخد بالي من الفتيس وغياراته آخري تالت طبعاً ..... بدأت أخد بالي مدوسش بنزين وأنا بقلب الغيار ..... الفرامل بس بتقلقني والركنات مبعرفش أركن أفقي لازم رأسي ..
دعواتكو .... إدعولي أبطل كسر فوانيس كسرتلي ثلاثة حتى الآن ههههههههه

3 بس .. يا ما شاء الله
ابقى عرفينا طريقك عشان ناخد احنا طريق رأس الرجاء الصالح مش مشكلة بس نرجع بفوانيسنا .. هههههههههه

[نور العمر]

:k48::k48: دي أقل حاجة عندي mr:bee

[M_Nabil]

هيه لو جت على فوانيس بس مش مشكله المهم الموضوع ميطورش عن كدة هههه والركنة واحدة واحدة هتظبط معكى وربنا يوفقك :)

[derfo]

شوفي حضرتك ...فيه شوية اساسيات لازم نراعيها مادام احنا اكيد في مصر:
1. الناس في الدنيا كلها بتاخد بالها من السواقة عشان ما تغلطش او تعمل حادثة ، في مصر خدي بالك من اخطاء غيرك اكتر. اكتر من 50 في المية من اللي بيسوقوا على الطريق آخرهم يسوقوا فيها او يسوقوا العبط على الشيطنة بس مش يسوقوا عربيات. الرخص اللي بتطلع بوسايط وهكذا. المهم خلى بينك وبين اللي قدامك مسافة أمان كافية وتوقعي انه يعك : يدي اشارة يمين وهوه داخل شمال، يقرر يقف فجأة ، يقرر يغرز فجأة الخ.

2. لو داخلة يمين او شمال ادي اشارة قبل الدخول ب50 متر تقريبا ومش معنى انك اديتي اشارة يبقى تدخلى وخلاص. خلي بالك من البروفيشنال اللي وراك لأنه ساعات ما بيشوفش الاشارة ولا بتفرق معاه.

3. في اليو تيرن حاولي تاخدي اكبر قطر ممكن. يعني لو وراك فاضي او مساحة كافية ارمي يمين شوية وخدي الدوران من على بعد. والمفروض انك تدخلى الحارة اللي جاية يمين بس في الغالب عندنا ادخلى الشمال لأن اللي جاي طوالي غالبا بياخد يمين لما يلاقي يو تيرن وبيزعل قوي ويزمر كتير لما يلاقيكي داخلة يمين.


4. لو فيه اشارة حمرا بعدها هتاخدي يوتيرن او هتدخلي شمال مثلا خليكي في الحارة الشمال عشان اللي وراكي ممكن يبقى داخل طوالي وطبعا لأن الوقت غالي جدا جدا جدا عندنا هتلاقيه منزعج قوي لو كنت في الوسط مثلا وحابة تدخلي شمال.

5. ما تقلقيش من استخدام الدبرياش كتير في الاول . كده كده هتستخدميه في التموير او الغيار. عشان كده ركزي انك تفرملي صح وتتحركي من البظء للسرعة صح. مع الوقت كل حاجة هتتظبط.

6. بصي للي بيسوقوا على الطريق...خصوصا النص نقل والميكروباسات إلا من رحم ربي...اكيد مش احسن منك في حاجة واكيد لهم في كل حاجة في الدنيا الا السواقة . ده هيفيدك انك تثقي في نفسك اكتر واكتر ..بس برضه خدي بالم من البروفيشينالز..تحياتي

نكتة عاى الماشي سمعتها وانا في امريكا:

كان فيه سايح راكب مع سواق تاكسي في القاهرة ...كل ما يلاقي الاشارة حمرا يدوس ولا كأن فيه حاجة . السايح قاله ايه يا انت اشارة حمرا تقف. قاله ياباشا ماتقلقش انا بروفيشنال.يلاقي اشارة ممنوع الدخول الراجل يصرخ يقوله ياباشا ماتقلقش انا بروفيشنال. الراجل اتجنن. المهم على اول اشارة خضرا السواق وقف. السايح قاله حبيبي خضرا يعني اطلع : قاله ياباشا لا يكون بروفيشنال غيري جاي كده ولا كده ولا كدهه..

[MRBEBO]

بس ايه رايكم يا جماعة بالنسبة للمبتدئين في السواقة

مش افضل يجيبوا عربية اتوماتيك

اعتقد هتبقى اسهل بمراحل عن المانيول ولا ايه رايكم ؟؟