ما هي بالضبط "عمرة الماتور ؟"

[roky]

ألأصدقاء الأعزاء
الجامدين جداً جداً ...
هي حاجة تكسف بس فعلا انا بسمع الموتور خفيف عاوز عمرة .. الموتور معمر جديد و لسه في التليين ..

أنا فاهم ان لما الماتور يفوت يكون كبس الموتور مش قد كده و مش بنستفيد بكل الوقود المحترق (ده العيب اللي يستلزم عمرة) لكن أيه اللي بيتعمل أثناء العمرة عشان نصلح العيب ده (هو ده اللي مش عارفه)

و ياريت كمان حد يقولنا ايه الفرق بين العمرة و النص عمرة
و أمتي نعمل عمرة .. و أمتي نغير الشنابر بس

و شكرااااااا

[agwaa]

بص يا عم roky

تعالى الأول علشان نفهم نطلع في رحلة داخل الموتور

الوحدة الأساسية للموتور ( من وجهة نظري على الأقل ) هو البستم ( المكبس ) وهو جزء إسطواني أشبة بكوب الشاي المتوسط ولو أمسكت بكوب الشاي بالوضع المقلوب ( أي قاعدة الكوب لأعلى ) هذا هو بالضبط وضع تركيب البستم داخل الموتور
واسمح لي هيفضل معايا كوب الشاي المقلوب طوال الرحلة .

كوب الشاي المقلوب دة ( اللي هو البستم و هم في الحقيقة 2أو 4 أو 6 أو 8 بساتم على حسب الموتور ) طول الوقت طالع نازل داخل غرفة أسطوانية أيضاً( وتسمى هذه الحركة بالحركة الترددية للبستم ) ولمنع تآكل هذه الغرفة مع الوقت تم وضع البستم داخل إسطوانة وسطية بين البستم والغرفة تسمى الشميز ( القميص ) ولعدم تآكل الكوب ( البستم ) أيضاً تم وضع ثلاث حلقات ( الشنابر ) في منتصف الكوب أحدهم مختلف قليلاً ( عريض قليلاً وبه ثقوب وهذا هو شنبر الزيت ووظيفته كحت الزيت من الشميز وعدم تسربه إلى أعلى البستم ( قاع كوب الشاي ) وهى غرفة الإحتراق .

داخل الكوب ( البستم ) يوجد ذراع يسمى ذراع التوصيل ( البييل ) وهو له طرفان طرف علوي ذو قطر صغير مثبت بالبستم وسفلي ذو قطر كبير يمسك بعمود المرفق وهذا الأخير يقوم بتحويل الحركة الترددية للبستم إلى حركة دائرية تستخدم في تحريك السيارة .

عند تآكل شنبر الزيت أو الشميز أو كلاهما يتسرب الزيت إلى أعلى دخولاً إلى غرفة الإحتراق ويحترق مع مكوني الإحتراق الأساسيين وهما الوقود والهواء وبالتالي يبدأالموتور في إستهلاك الزيت ونلاحظ ذلك عند قياس الزيت في الصباح وقبل التحرك بالسيارة وتجد نقص الزيت في مقاس الزيت ويظهر ذلك في العادم أيضا ( تلاحظ أن العادم أصبح لونه أسود مائلاً للزرقة ) وهنا نقول أن الموتور بدأ يفوت

في البداية ولأن التآكل خفيف نجد أن الدخنة السوداء خفيفة وتكاد تكون غير ملحوظة وبالتالي إستهلاك الزيت ولكن مع الوقت يزداد التآكل ويزداد إستهلاك الزيت ويزداد تفويت الموتور

نعود الآن لسؤالك

إذا كانت مشكلة الموتور عبارة عن تفويت فقط بسبب تآكل الشنابر فقط وإستهلاك في الزيت وبس إذن هنا القصة قصة طقم شنابر ونبقى بنتكلم في نصف عمرة

أما إذا كان الموضوع أكبر من كدة يعني موش دخنة سوداء وإستهلاك زيت وتفويت خفيف وبس لكن الموضوع كبر ودخلنا في أصوات غريبة داخل الموتور ويقال ترزيع في الموتور ( نتيجة تكسير في القطع الداخلية للموتور ) وتآكل في كراسي عمود المرفق ( هنا نحتاج لسبيكة ألومونيوم ) لتعويض التآكل في العمود وتآكل في كامة الزيت وبالتالي عدم وصول الزيت إلى كل الأماكن المطلوب تزييتها ونلحظ ذلك في إستمرار توهج لمبة الزيت في التابلوه ( تحتاج إلى خراطة الكامة عند خراط مواتير ) وتآكل في الشمايز ( تحتاج إلى خراطة ) وتآكل في أحد أطراف أذرع التوصيل أو في الطرفين ( يحتاج تغيير للبييلات )

كل ده بنتكلم في عمرة كاملة ونحتاج إليها عند عدم إستجابة الموتور ( التفويت كبير جداً ) مع سماع أصوات غير طبيعية من الموتور وعند قياس كفاءة الموتور نجد أنها أقل من 50%

يبقى العمرة الكاملة

خراطة :
الشمايز _ عمود الكامة _ البلوك الخاص بالشمايز _ عمود المرفق _ صمامات الوقود والعادم وعمل لهم قواعد ودلائل

تغيير :

السبيكة الخاصة بعمود المرفق _ البييلات _ طقم الشنابر _ طقم البساتم

أرجو أن أكون قد أجبت على تساؤلك

وفي مرة قادمة إن شاء الله سأرجح الشرح بصور

م / أحمد يوسف

[muslimah_dentist]

استفدت كتير من اجابة حضرتك.

جزاك الله خيرا

[roky]

ياخي مش عارف اقولك ايه
فقد أحسنت القول والمقال .. وأوضحت لنا الحال
و أسمحلي أطمع في كرمك و سخاوتك... بمتابعة الموضوع بتوضيح نقطتين كده - ده اذا ماكانش يضايك سعادتك

تبعاً للأعراض اللي وصفتها سعادتك ... اقدر اشخص الحالة عندي أنها نص عمرة ... لكن فضولي اعرف شوية حاجات عن العمرة الكاملة


اللي انا فاهمه ان الشيميز ده أسطوانه مفرغة .. ممكن تتأكل .. طب هانوديها للخراط يعملها ايه ؟؟ لو خرطها هاتوسع و تبقي أوسع من الشنبر ، و كده نبقي "بنزود الطينة بله؟" ... ولا هو ممكن يعالج التأكل بحاجة زي "المعجون" كده؟

و ياريت اذا كان عند سعادتك اي تقدير للنص عمرة لعربيتي الـ 127 تاخد قد ايه وقت ... و ياحبذا أستيمياشن كده قد ايه فلوس

و افر تحياتي و التقدير

بالمناسبة ... مستني الصور علي فارغ الصبر

روكي

[himatros]

تسلم ايدك يااجوا والله انا عمال اتعلم منكم كل حاجة وعاوز افيدكم باي شي والله بس ايه هو الشئ ده

[agwaa]

ياخي مش عارف اقولك ايه
فقد أحسنت القول والمقال .. وأوضحت لنا الحال
و أسمحلي أطمع في كرمك و سخاوتك... بمتابعة الموضوع بتوضيح نقطتين كده - ده اذا ماكانش يضايك سعادتك

تبعاً للأعراض اللي وصفتها سعادتك ... اقدر اشخص الحالة عندي أنها نص عمرة ... لكن فضولي اعرف شوية حاجات عن العمرة الكاملة


اللي انا فاهمه ان الشيميز ده أسطوانه مفرغة .. ممكن تتأكل .. طب هانوديها للخراط يعملها ايه ؟؟ لو خرطها هاتوسع و تبقي أوسع من الشنبر ، و كده نبقي "بنزود الطينة بله؟" ... ولا هو ممكن يعالج التأكل بحاجة زي "المعجون" كده؟

و ياريت اذا كان عند سعادتك اي تقدير للنص عمرة لعربيتي الـ 127 تاخد قد ايه وقت ... و ياحبذا أستيمياشن كده قد ايه فلوس

و افر تحياتي و التقدير

بالمناسبة ... مستني الصور علي فارغ الصبر

روكي

عم روكي صباح الفل وألف شكر ليك

مافيش مضايقة ولا حاجة أحنا كلنا في خدمة بعض

بالنسبة لموضوع الشمايز هي فعلا غلطة مطبعية هي بتتغير لكن الخراط بيخرط البلوك على مقاس الشميز الجديد وبعدين ما إنت عارف كل حاجة أهه ما شاء الله يعني

أما نصف عمرتك تاخد وقت حوالي يومين لو الميكانيكي حرك ونشيط

أما التكلفة هحاول أعرفها وأقولك

[agwaa]

تسلم ايدك يااجوا والله انا عمال اتعلم منكم كل حاجة وعاوز افيدكم باي شي والله بس ايه هو الشئ ده

تحت أمرك يا باشا

أحنا هنا أخوة وحبايب واللي مليان يملأ على اللي فاضي

وكفاية وجودك ومرورك وذوقك

[roky]

يا agwaa باشا مش عارفيين نودي جمايلك فين

[igneous]

عمرة الموتور

طب انا لسه عامل عمره المفروض اقصي سرعه امشي بيها اد ايه و لمدة كام يوم و الزيت اغيرو بعد كام كيلو ( انا اقصدي بعد العمره)
و شكرا

[igneous]

عمرة الموتور

طب انا لسه عامل عمره المفروض اقصي سرعه امشي بيها اد ايه و لمدة كام يوم و الزيت اغيرو بعد كام كيلو ( انا اقصدي بعد العمره)
و شكرا

[aymansaad]

شكرا للعضو agwaa
يا ريت حد يقولى ازاى نقيس كفاءة الموتور ؟ واين؟

[hossam_elwani]

اعتقد ان الى حيدخل فى عمره كاملة يجيب موتور استعمال افضل من الخرط وخلافة لان العمرة بكل مراحلها دقيقة للغاية ومعتقدش ان العربية حترجع حالتها زى الاول

[nasroo]

طيب انا الميكانيكي قال لي محتاج طقم شنبر رغم ان العربية مابطلعش دخنة- دلوقتي حضرتك بتقول الشنبر ده بيكون جوه البستم ايه اللي يخلينا نغيره طالما هو جوه البستم
على حسب مافهمت من شرح حضرتك بالترتيب كده من جوه لبره بيكون الشنبر-البستم- الشميز-الغرفة(اسمها ايه دي) صح كده؟

[agwaa]

عم روكي صباح الفل وألف شكر ليك

مافيش مضايقة ولا حاجة أحنا كلنا في خدمة بعض

بالنسبة لموضوع الشمايز هي فعلا غلطة مطبعية هي بتتغير لكن الخراط بيخرط البلوك على مقاس الشميز الجديد وبعدين ما إنت عارف كل حاجة أهه ما شاء الله يعني

أما نصف عمرتك تاخد وقت حوالي يومين لو الميكانيكي حرك ونشيط

أما التكلفة هحاول أعرفها وأقولك

تصويب آخر

بعد ما دخلت في عمرة إتضح لي الآتي في نقطة الشميز :-

الشميز
_ إما يكون منفصل وإذا حدث به تأكل ( عتب ) فيتم تغييره
_وإما يكون هو نفسه البلوك الذي يتحرك فيه البستم وهنا إذا حدث به تآكل ( عتب ) يتم خرطه ( مسحه ) عند خراط ويتم مسح الأربعة شمايز أي يؤخذ البلوك كله إلى الخراط ويمسح الأربعة إسطوانات بمقاس معين ( 010 لو تم إزالة 1 مم أو 020 أذا تم إزالة 2 مم )و في كل حالة يتم شراء طقم شنبر وطقم بساتم بنفس المقاس الذي تم المسح عليه

[agwaa]

طب انا لسه عامل عمره المفروض اقصي سرعه امشي بيها اد ايه و لمدة كام يوم و الزيت اغيرو بعد كام كيلو ( انا اقصدي بعد العمره)
و شكرا

أولاً : أنا آسف على التأخير ولكني سأقوم بالرد للصالح العام
بعد العمرة مباشرة نقوم بتليين الموتور وذلك بحرق 20 لتر بنزين والسيارة متوقفة في مكانها ..
ويفضل أن يكون الجو بارد أي في الشتاء أو يتم ذلك ليلاً في الصيف ( من بعد الغروب حتى الصباح ) وفي أثناء ذلك :
- يلاحظ أمبير الحرارة ويتم تزويد الرادياتير بالماء عند نقصانه
- يجب عدم توهج لمبة الزيت وفي حالة توهجها يطفأ الموتور ويتم مراجعة الميكانيكي فوراً
بعد الإنتهاء من إستهلاك صفيحة البنزين كاملة يتم السير بالسيارة على سرعة لا تزيد عن 50 كم داخل المدينة ولا تزيد عن 60 كم في الطرق السريعة وذلك لعدة أيام
ويفضل أن تأخذ بها مشوار طوالي 100 _ 150 كم والعودة بها وذلك على سرعة لا تزيد عن 60 كم

بالنسبة لتغيير الزيت بعد العمرة أو نصف العمرة يفضل ألا تنتظر عليه طويلاً
رأيي الشخصي بعد 500 كم في العمرة الكاملة وبعد 1000 في نصف العمرة