ظبط التاكيهات

[ahmed_eng2001]

السلام عليكم ....
العربية شيفروليه بليزر 1980 .. المحرك 350 8 سلندر حرف فى

من فترة و انا ملاحظ ان صوت التاكيهات عالى و عاوزة ظبط .....

امس .... و انا ماشى ... فوجئت بان صوت العربية اتظبط لوحده و مبقاش فيه صوت التاكيهات ... بس لاحظت ان العربية فيها رعشة زى ما تكون متلتة
ربنا هدانى و فكيت غطا التاكيهات ... و فوجئت بان احد الشواكيش خرج من مكانه زى الصورة



السؤال الاول .... اظبط التاكيهات على كام ؟؟!!
السؤال التانى ..... حد يعرف طريقة الف بيها الكرنك او المارش و انا شايف التاكيهات ؟

[م/أحمد عبد الفتاح]

أنصحك تفك السلندرهيد وتريح دماغك وبالمرة تختبر الصبابات وتكشف على السوست والدلايل وتعمل روديه وتشوف إيه اللى خلى الشاكوش ينطر وتصلح اللازم وبالمرة تغير الجوان وتنعنش الدنيا :)

[م/أحمد عبد الفتاح]

نسيت اقولك على ظبط التاكيهات :
- حاتجيب الـ tdc بتاع الاسطوانة رقم ١ (بلوف الحر والعادم مقفولين )
- على الوضع ده حاتظبط خلوصات الاتى : صمامات الحر للأرقام ١، ٢ ، ٥ ، ٧ - صمامات العادم أرقام ١ ، ٣ ، ٤ ، ٨
- حاتلفف الكرنك لفة كاملة أو تجيب الـ tdc بتاع الاسطوانة رقم ٦ (بلوف الحر والعادم مقفولين)
- على الوضع ده حاتظبط خلوصات الاتى : صمامات الحر للأرقام ٣ ، ٤ ، ٦ ، ٨ - صمامات العادم للأرقام ٢ ، ٥ ، ٦ ، ٧
بكده حاتوفر وقت كبير جداً ومش محتاجه فيلر بالاحساس حاتظبط خلوص التاكيه يكون يادوب محمل سنة صغيرة وتربط الصامولة نص لفة - وحاحاول ادورلك على قيمة الفيلر اللى تظبط بيه

[م/أحمد عبد الفتاح]

ولو عاوز تعرف الـ tdc حاتفصل خرطوم ربع بوصه طوله حوالى ٤٠ سم وتركب ليه نبل تصنعه نحاس فى مخرطة من ناحية دكر زى سن البوجيه ومن ناحية دكر ربع بوصة وتوصل الخرطوم باللاكور اللى فصلته فى المخرطة كويس وبعدين تحط نقطة زيت على سن اللاكور اللى زى سن البوجيه وتركبه بالخرطوم حته واحدة مكان البوجية رقم ١ وتربطه بايدك ومن الناحية التانية من الخرطوم حاتحط بالونة من بتاعة العيد :) وتلفف الموتور بمفتاح محترم تركبله ماسورة علشان يديك عزم - واول ماتلاقى البالونة بدأت تتنفخ يبقى كده بلوف الحر والعادم مقفولين حاتقف وتشيل الخرطوم وتحط مفك طويل وتكمل لف للموتور حتلاقى المفك طالع معاك لغاية مالمفك يقف وماتخليهوش ينزل تانى - يبقى انت كده على الـ tdc بتاع الاسطوانة رقم ١

[م/أحمد عبد الفتاح]

شوف اللينك ده فيه حاجات يمكن تنفع معاك :

http://www.73-87chevytrucks.com/techinfo/7387CKMans//Service/ST_330_80_1980_Chevrolet_Light_Truck_Service_Manual.pdf

[ahmed_eng2001]

انا مش عارف اشكر حضرتك ازاى .....

انا بدور على مانيوال من فترة و مش لاقى ..... مانيوال 1000 صفحة ... ده انا حعيش فيه :) ربنا يباركلك و يسهلك كل عسير

[ahmed_eng2001]

أنصحك تفك السلندرهيد وتريح دماغك وبالمرة تختبر الصبابات وتكشف على السوست والدلايل وتعمل روديه وتشوف إيه اللى خلى الشاكوش ينطر وتصلح اللازم وبالمرة تغير الجوان وتنعنش الدنيا :)

المشكلة فى الوقت فعلا .... انا مش فاضى خالص اليومين دول .... ركبت ديسك و اسطوانة فى اكتر من 3 اسابيع !!!!

الى خلى الشاكوش ينطر ان الصامولة بتفك لوحدها .... علشان نظام اللوك بتاعها قديم ... و بيوسع مع الزمن ... مش عاوز اقول انه اى كلام يعنى :)

و كان نفسى اصور الصامولة الجديدة علشان اوضح نظام اللوك بتاعها ... بس ايديا كانت متبهدلة زيت
على العموم ... الصامولة بيكون فيها زى خبطتين من الجانبين ... بيخلو شكل الصامولة من فوق بيضاوى شوية ... فتقفش فى المسمار و انت بتربط

الصامولة الجديدة بالطبق بتاعها ب 50 جنيه !!!!!!! انا كنت بفكر اغير كل الصواميل بتاعة الشواكيش .... بس طبعا غيرت رايى لما سمعت سعر الصامولة الواحدة

كنت عملت طقة شنبر من فترة و اتأكدت من اداء الصبابات و السوست و بالطبع طقم جوان كامل جديد

[ahmed_eng2001]

ولو عاوز تعرف الـ tdc حاتفصل خرطوم ربع بوصه طوله حوالى ٤٠ سم وتركب ليه نبل تصنعه نحاس فى مخرطة من ناحية دكر زى سن البوجيه ومن ناحية دكر ربع بوصة وتوصل الخرطوم باللاكور اللى فصلته فى المخرطة كويس وبعدين تحط نقطة زيت على سن اللاكور اللى زى سن البوجيه وتركبه بالخرطوم حته واحدة مكان البوجية رقم ١ وتربطه بايدك ومن الناحية التانية من الخرطوم حاتحط بالونة من بتاعة العيد :) وتلفف الموتور بمفتاح محترم تركبله ماسورة علشان يديك عزم - واول ماتلاقى البالونة بدأت تتنفخ يبقى كده بلوف الحر والعادم مقفولين حاتقف وتشيل الخرطوم وتحط مفك طويل وتكمل لف للموتور حتلاقى المفك طالع معاك لغاية مالمفك يقف وماتخليهوش ينزل تانى - يبقى انت كده على الـ tdc بتاع الاسطوانة رقم ١

هو ده الكلام الجميل

انا جربت انى استخدم سن بوجيه قديم بعد ما اشيل منه الخزف الى فى قلبه ... بس لم انجح حتى الان
بس فكرة جيدة جدا

[م/أحمد عبد الفتاح]

هو ده الكلام الجميل

انا جربت انى استخدم سن بوجيه قديم بعد ما اشيل منه الخزف الى فى قلبه ... بس لم انجح حتى الان
بس فكرة جيدة جدا

تاخد بوجيه وتطلع على الخراط وهو يعملك الادابتر ده نحاس من ناحية سن دكر زى البوجيه بالظبط ومن ناحيه التانية سن ربع بوصه npt عادى
وعموما سن البوجيهات فى الغالب بيكون يا ١٤ x ١,٢٥ او ١٨ x ١,٥ -انا بافصل الاتنين فى مخرطة عندنا فى اسكندرية ب ١٥ جنيه يعنى الواحد بسبعة جنية ونص

[ahmed_eng2001]

حدور على خراط جنبنا و اخليه يعمل النبل ده :)

سؤال بعد اذنك ....البلف الى فى مسطرة البنزين ... الى بيتقاس منه ضغط الطرمبة .... زى البلف بتاع شحن الفريون بتاع التلاجات ؟

سؤال كمان فى السريع يا باشا

ايه موضوع الكلاتش فان ده؟؟؟ المروحة عندى ملحومة فى طنبورة طرمبة المياه !!!!فاكيد كدة الكلاتش بتاع المروحة ملغى ....
ايه رأى حضرتك ... اشترى كلاتش جديد و لا اسيب المروحة على كدة ؟؟؟

[م/أحمد عبد الفتاح]

حدور على خراط جنبنا و اخليه يعمل النبل ده :)

سؤال بعد اذنك ....البلف الى فى مسطرة البنزين ... الى بيتقاس منه ضغط الطرمبة .... زى البلف بتاع شحن الفريون بتاع التلاجات ؟

سؤال كمان فى السريع يا باشا

ايه موضوع الكلاتش فان ده؟؟؟ المروحة عندى ملحومة فى طنبورة طرمبة المياه !!!!فاكيد كدة الكلاتش بتاع المروحة ملغى ....
ايه رأى حضرتك ... اشترى كلاتش جديد و لا اسيب المروحة على كدة ؟؟؟

اسئلتك حلوة جدا ومحتاجه دماغ جامدة فى العربيات علشان توصل انك تسأل الاسئلة دى .
اول حاجه موضوع البلف اللى فى مسطرة البنزين :
ببساطة البلف ده بيطلق عليه شرادر فالف وده عامل زى بلف العجل بالظبط بس مصمم للتعامل مع السوائل وليس الهواء - وده وظايفه انك ممكن تاخد منه الهوا بتاع خط البنزين بانك تضغط على الابرة وكمان انك تقيس ضغط طلمبة البنزين علشان تعرف اذا كانت شغالة ولابايظة - السن بتاعه ده موضوع كبير قوى وبيطلق على السن ده an وهو بيستخدم فى السفن والطائرات الحربية بكثرة علشان كده اسمه الكامل army navy يعنى باختصار an ومقاسه مختلف من ماركة لماركة وان كان فى عربيات كتير بيبقى مقاسه 4an وده ترجمته 20-7/16 وفى بعض العربيات بيبقى 24-5/16 وبعض العربيات اكبر من ال 7/16 - موضوع ان بلف خرطوم شحن الفريون ينفع عليه ولا لا مجربتش بصراحة وان كان السن بتاع بلف الفريون بيسموه acme تقريبا بس انه يركب عليه ولا لأ مش عارف .
بالنسبة لكلتش المروحة فده بيبقى جواه سائل سليكونى وساعات كمان حاجه عاملة زى ثرموستات حرارى ( بفكرة ثرموستات المكوة ) ووظيفة الكلتش انه بيشغل المروحة لما يكون الموتور سخن بدرجه معينة او لما بيكون سرعة الموتور واطية وبيفصل لما سرعة الموتور بتزيد (حسب التصميم بتاعه ) ويخلى المروحة تلف عالفاضى بتأثير تيار الهوا الناتج من سرعة العربية وهى ماشية على طريق سفر مثلا - المهم الخلاصة انه بيقلل التحميل على الموتور علشان مايتعبش - اللى بيحصل عندك طالما انه المروحه ملحومة عالطلمبة يبقى المروحة شغالة على طول ومش بتفصل فده بيزود الحمل على الموتور ويزود استهلاك البنزين

[م/أحمد عبد الفتاح]

بالنسبة لانك تركب كلتش ولا لأ - الحكم هنا طلمبة الميه هل بتبوظ كتير ولا شغالة تمام معاك ومابتجبش ميه من الحشو - لو الموضوع متظبط معاك والعربية ماشية كويس ومش بتسخن والطلمبة بتعيش معاك كتير يبقى سيبها زى ماهى

[ahmed_eng2001]

اسئلتك حلوة جدا ومحتاجه دماغ جامدة فى العربيات علشان توصل انك تسأل الاسئلة دى .
اول حاجه موضوع البلف اللى فى مسطرة البنزين :
ببساطة البلف ده بيطلق عليه شرادر فالف وده عامل زى بلف العجل بالظبط بس مصمم للتعامل مع السوائل وليس الهواء - وده وظايفه انك ممكن تاخد منه الهوا بتاع خط البنزين بانك تضغط على الابرة وكمان انك تقيس ضغط طلمبة البنزين علشان تعرف اذا كانت شغالة ولابايظة - السن بتاعه ده موضوع كبير قوى وبيطلق على السن ده an وهو بيستخدم فى السفن والطائرات الحربية بكثرة علشان كده اسمه الكامل army navy يعنى باختصار an ومقاسه مختلف من ماركة لماركة وان كان فى عربيات كتير بيبقى مقاسه 4an وده ترجمته 20-7/16 وفى بعض العربيات بيبقى 24-5/16 وبعض العربيات اكبر من ال 7/16 - موضوع ان بلف خرطوم شحن الفريون ينفع عليه ولا لا مجربتش بصراحة وان كان السن بتاع بلف الفريون بيسموه acme تقريبا بس انه يركب عليه ولا لأ مش عارف .
بالنسبة لكلتش المروحة فده بيبقى جواه سائل سليكونى وساعات كمان حاجه عاملة زى ثرموستات حرارى ( بفكرة ثرموستات المكوة ) ووظيفة الكلتش انه بيشغل المروحة لما يكون الموتور سخن بدرجه معينة او لما بيكون سرعة الموتور واطية وبيفصل لما سرعة الموتور بتزيد (حسب التصميم بتاعه ) ويخلى المروحة تلف عالفاضى بتأثير تيار الهوا الناتج من سرعة العربية وهى ماشية على طريق سفر مثلا - المهم الخلاصة انه بيقلل التحميل على الموتور علشان مايتعبش - اللى بيحصل عندك طالما انه المروحه ملحومة عالطلمبة يبقى المروحة شغالة على طول ومش بتفصل فده بيزود الحمل على الموتور ويزود استهلاك البنزين

الله ينور عليك .... و ادينا بندور و بنحاول نتعلم

معلومات جديدة و جميلة ... ربنا يباركلك .... ان شاء الله انا حجرب مقاس بلف ال an على بعض العربيات
موضوع قياس ضغط طرمبة البنزين مهم جدا ... علشان اغلب الميكانيكية بيحبوا يجربوا ... انا كنت عملت عداد راكب على تى ربع بوصة .. بس ده محتاج تفك الخرطوم الى داخل للمسطرة ..

معنى كلام حضرتك ان ال كلتش بيفصل و يعشق المروحة حسب درجة حرارة الموتور ... طيب لما الكلتش بيعشق .... بيخلى المروحة تدور بنفس سرعة الموتور و لا ازيد من سرعة الموتور ؟؟ انا كنت سمعت ان فيه كلاتشات فيها سرعتين !!!! ايه مدى صحة الكلام ده ؟!!

هل ممكن اركب اى كلاتش طالما ابعاده مناسبة ؟

طرمبة الميه كويسة حتى الان ... بس انا عاوز اركب الكلاتش و اجربه :)

السؤال الاهم ... شفت فيديوهات على تغيير موضوع الكلاتش ده خالص و استبداله بمروحة تبريد كهرباء ... ايه رأى حضرتك فى الموضوع ده ؟
معلش انا بتقل عليك بس الواحد بيحب يتعلم :)

[م/أحمد عبد الفتاح]

هى عموما ادابترات ال an بتتباع برة مصر عادى وبكل المقاسات بس بالنسبة للادابتر بتاع البنزين لازم يكون فيه ابرة علشان تفتح بلف الشرادر - وفعلا الناس هنا كلها بتفتى ولاعندهم اجهزة محترمة ولا الهوا المهم يبقى عنده سكانر ويطخ مع ان السكانر مش بيصلح او مس بيوصف العطل وسببة هو بس زى العداد بيقولك فيه مشكلة هنا ولازم انت تبحث فى المشكلة دى ببعض الاجهزة الاخرى زى مثلا جهاز قياس ضغط طلمبة البنزين وعلى سبيل المثال انت ممكن تعرف بنسبة كبيرة العطل فين قبل ماتدور العربية لو فتحت الكونتاكت بس ولقيت الضغط رفع وبعدين ابتدى ينزل بسرعة يبقى طلمبة بنزين ولو رفع ونزل بالراحة يبقى رشاش .
بالنسبة للكلتش بتاع المروحة فيه نوع فيه سائل سليكون بس وده بيفصل لما سرعة الموتور تعلى- وفيه نوع فيه بالاضافة لسائل السيليكون ثرموستات زى بتاع المكوة لما الموتور يسخن يشغل المروحة حسب سخونة الموتور - ولما بيكون الكلتش معشق المروحة تماما بتبقى سرعة المروحة زى سرعة طلمبة المية بالظبط - وفيه كلاتشات متغيرة السرعة ودى بيبقى فيها سينسور رايح منه معلومة درجة الحرارة بتاعة الموتور للكمبيوتر بتاع العربية وبعدين الكمبيوتر يدى اشارة للكلتش يلفف المروحة بالسرعة المناسبة للحرارة دى - بس الغالب هو النوع الاول والتانى - موضوع المروحة الكهربا دة بتتركب اضافة للمروحة الميكانيكية لان المروحة الميكانيكية لاغنى عنها فى العربيات الدفع الرباعى والعربيات اللى مواتيرها كبيرة وبالطول

[م/أحمد عبد الفتاح]

موضوع انك تركب اى كلاتش فده مش عارف جدواه بس اللى اقدر افيدك بيه ان العربيات التويوتا الدفع الرباعى الكلاتش بتاعها من النوع اللى ممكن يتفك وتغير السائل السيليكونى بتاعه وهو المفرووض يكون سيليكون ٣٠٠٠ او ٤٠٠٠ وفيه ناس بره بتغيره لسيليكون ٦٠٠٠ و ٧٠٠٠ والنتيجه احسن من ال ٣٠٠٠ - بس طبعا الموضوع ده اعتقد مش موجود فى مصر - حاول تجرب بتاع التويوتا يمكن ينفع معاك بس اعتقد انك لازم تغير المروحة علشان الثقوب بتاعة مسامير تثبيت المروحة فى الكلتش اكيد مش حاتنفع معاك