تقرير صيانة كروز 5000 كيلو

[kamalsalem]

اولا وقبل كل شيء الحمد لله وسبحان الذي سخر لنا هذا وما كنا له مقرنين وانا الى ربنا لمنقلبون

تم بحمد الله امبارح عمل اول صيانة في عمر زوزو... صيانة ال5000 كيلو

أولاً الحجز... تم عمل الحجز الاسبوع الماضي عن طريق الاتصال بالرقم المختصر لمنصور واختيار الصيانة... شاب في منتهى الادب سأل تحب الصبح ولا بعد الظهر... قلتله المهم اقرب معاد عشان عايز اسافر بالعربية وهي اصلاً عامله كتير... وتم الحجز ليوم الخميس (أمس) في فرع الهرم الساعة 5 ونص مساءاً... وتم ارسال رسالتين تأكيد على تليفوني بالمعاد والمكان

ثانياً الوصول للمكان... انا معرفش المكان ده بالنهار شكله ايه.. بس بالليل فعلاً صباح النضافة... وصلت ودخلت برقم الحجز اللي اتبعتلي على الموبايل.. وواحد مهندس اسمه هاني استلم العربية وسألني على المطلوب (الراجل مؤدب جداً الحقيقة).. انا طلبت الاتي:
1- عمل الصيانة الدورية وتغيير الزيت والفلتر
2- تربيط العفشة من باب الاحتياط
3- غسيل حوض الموتور
4- مراجعة السوائل وزيادة النواقص

المهندس استلم العربية (طبعاً يؤخذ عليهم انه مكانش معايا اي شيء يثبت حالة العربية وهي داخلة.. يعني لو طلعوها على حصيرة ومدغدغة مليش عندهم حاجة)... الساعة كانت 6 الا ربع والراجل قاللي 8 تستلمها.. ليه ده كله يا عم قاللي سيبنا نروقلك العربية

ثالثاً الانتظار... المكان منتهى النضافة والناس منتهى الادب.. وفي كافتريا متأجرة لكافيه محترم (باسكوا) واسعاره حلوه جداً... خدت الكافيه واتفرجت على الاسماعيلي وهو بينفذ في سموحة الصح... بعدين نزلت الورشة اتفرج... كان في عربية كروز سودا داخلة على حصيرة ملهاش وش... العربية مخبوطة عدل بين الفانوسين بالظبط ومطربقة لحااااد البلوكة... والفانوسين سلام.. الخبطة عدل في وش العربية.. محدش رضي يقولي هي ليه كده... والعربية اوتوماتيك والكنترول بتاعها شغال بس مش بتدور... وشفت الاسترا والكورسا الجداد.. تحف الصراحة وكله داخل بمشاكل فتيس

رابعاً الاستلام... العربية خلصت في معادها بالدقيقة... وتم عمل كل اللي انا طلبته فوق مع تنضيف فلتر الهوا والغسيل... وتم تربيط كرسي السواق عشان انا من الوزن التقيل... وملأ قربة المساحات ومراجعة السوائل... العربية خارجة من الورشة في منتهى النضافة ومتغلفة بلاستيك على الكرسي والطارة ودواسة في الارضيه وتم ختم كتيب الضمان

التكلفة 261 جنيه شامل المصنعية والضريبة... الزيت موبيل 1 بتاع ال10000 كيلو... يعني الصيانة الجاية مفيش غيار زيت... وبناء على طلبي فعلاً ملزقوش ستيكر موبيل 1 اللي بيبقى على الزجاج الخلفي ده

النتيجة... واضح انه فلتر الهوا كان عنده انتفاخ تراب لأن سحب العربية بقى جبااااار... سألتهم على السوفتوير الجديد قالوا مفيش جديد بعد اللي عندي... لسبب ما كمان الفتيس استجابته متحسنة جداً... يا ترى زيت الفتيس كان ناقص وزودوه من سكات؟ الله اعلم

المهم الناس محترمة والعربية مبسوطة... والحمد لله

[aymanmaly]

مبروك الصيانة
و عقبال صيانة ال 500000
و ربنا يديك خيرها و يبعد عنك شرها
و يجعلة عامر

[Bassem Raafat]

مليون مبروك يا كمال باشا على الصيانه وعقبال صيانة المليون .

[KHALED AYMAN]

مبروك يا كبير ...عقبال صيانه ال 200 الف (وتبيعها بقى كفايه) ههههههه
بس قولى ..مشاكل فتيس فى الاسترا الجديده خالص خالص ؟؟ ولا الى قبلها ..الايزى ترونيك

[kamalsalem]

مبروك يا كبير ...عقبال صيانه ال 200 الف (وتبيعها بقى كفايه) ههههههه
بس قولى ..مشاكل فتيس فى الاسترا الجديده خالص خالص ؟؟ ولا الى قبلها ..الايزى ترونيك

لأ مشاكل الفتيس ف عربيتك انت بس هههههههههه

العربيات اللي كانت داخلة تعمل فتايس كانت الاسترا الشكل اللي نزل مع الفيكترا البي... والGtC وكان فيه كورسا الجديدة خالص خالص برضه فيها رجة في الفتيس

كان في استرا الجديدة اوي دي... اللي شبة الi30 لامؤاخذه كانت واقفة وعليها شبر تراب بس مش معلقة نمر.. سألتهم مالها دي قالولي خد عربيتك وامشي

[totaman]

مبروك يا باشا الصيانة

وفعلا مش عارف العربية بتطلع من الصيانة حاجة تانية

مش عارف بيعملو فيها ايه

[abou-yahia]

مبروك الصيانه
اخبار بقيه عيله الشيفورليه ايه
اصل انت مجبتش سيره عربيه غير الاوبل
يا عم متنساناش

[mhmdalsaadany]

مبروك يا كيمو وعقبال ال100000 ان شاء الله

[damasry]

الف مبروك يا باشا وعقبال صيانة ال٥٠ الف للكروز والايفو ;)

[TAMER2020]

الف مبروك السياره يا باشا و عقبال صيانه المليون يا رب
واضح من كلام حضرتك ان التوكيل ممتاز عكس ما كل الناس بتقول
ربنا يهديه و يستمر على المستوى ده دايما

[Mzeid]

مبروك الصيانة
و ربنا يبارك لك فيها و تفضل بحالة ال 5000 كيلو على طول

[kamalsalem]

مبروك الصيانه
اخبار بقيه عيله الشيفورليه ايه
اصل انت مجبتش سيره عربيه غير الاوبل
يا عم متنساناش

شيفروليه... همممم

الاوبترا ليه عالية كده من ورا؟ بطريقة تخض.... وايه كمية الافيو اللي في التوكيل دي

وبعدين استغربت من الناس اللي مركبة زينون وانذار وجايين يصلحوا في الضمان.. هو مش كده العربية أوت؟

موضوع انه التوكيل وحش دي الصراحة.... كمان الجو هناك بالليل والناس متعاونين

واللي يعصلج بس مدام الدنيا بييس... انا بييييييس

[mhmdalsaadany]

علي فكره الزنون والانذار دول يطلعوا العربيه من ضمان الكهربا فقط وممكن لو المهندس مش عايز يرخم عليك يعديها عادي ودا علي لسان المهندس محمود في المقابله اللى فاتت وكمان كان الدكتور هشام مكي سأل في التوكيل على البارك سنسور والسنتر وقالوله جو اهد يعني اتكل علي بركه الله

[kamalsalem]

طب هننزل لا مؤاخذه نركب الزينون امتى

حد يعرف الهايلاين البارك سنسور بتاعها بيطلع داتا فين؟

[sasa76216]

الله يطمنك تقريبا مفيش حد شكر فى الصيانه الا حضرتك دنا كنت هتجنن ياريت انت الى اخترت فرع الهرم والا الحكايه انت ورزقك برجاء الافاده وياريت الى شاف غير الكلام ده فى اى فرع اخر ياريت النصيحة والف مبروك على صيانة ال5000 وربنا يبركلك