تقرير صيانة كروز 5000 كيلو

[kamalsalem]

الله يطمنك تقريبا مفيش حد شكر فى الصيانه الا حضرتك دنا كنت هتجنن ياريت انت الى اخترت فرع الهرم والا الحكايه انت ورزقك برجاء الافاده وياريت الى شاف غير الكلام ده فى اى فرع اخر ياريت النصيحة والف مبروك على صيانة ال5000 وربنا يبركلك

يا عم الصيانة زي الفل... خد بالك عايز اقولك حاجة بسيطة... انت امتى بتلاقى نفسك فاتح النت بتدور على حد يدبرك؟ لما يكون عندك مشكلة وعايز مساعدة... ف قصاد لو قلنا ألــــف حالة التوكيل فيها قل بأصله أو عربية طلع فيها عيب صناعة... في ملايين ميعرفوش نايل موتورز وبيخلصوا ضمانهم مع التوكيل بكل سلاسة.. ف متتخضش العربية جميلة بسم الله ما شاء الله عليها وعملت سوق لنفسها وبقيت اشوفها كتير في الشارع دلوقتي والناس محدش بيشتكي ولا عمري شفت واحد واقف بيها عطلان ولا كلام كده.

بالنسبة للفرع انا قلتله عايز معاد... ف هو شايف انه من بيانات العربية عنواني في الهرم ف هو من نفسه قاللي المعاد يوم الخميس الساعة خمسة ونص (عشان الحسد برضه خد بالك) في فرع الهرم.. قلتله تمام.. وانت ممكن برضه تقوله خليني بعد الضهر... منها العربية تغير زيت في البرد احلى.. والناس اللي بتيجي بالنهار عندها مشاكل تكون مشيت.

وان شاء الله مش هتندم على اختيارك... العربية دي والله جميلة.

[TAMER2020]

لو سمحت يا استاذ كمال
ايه اخبار عفشه السياره معاك اصلى كل ما اروح معرض اسئل على الكروز يقولوا
ابعد عنها فيها المشاكل التاليه

• صوت الموتور عالى
• العفشه فيها دبه وبتفك من بعضها بسرعه ولازم تربطها كل شويه
• استهلاك البنزين عااااااااااالى
• التكيف ضعيف

يا ريت لو سمحت تنقلى تجربتك مع العربيه بالنسبه للنقط دى

[sasa76216]

100 الف شكر يا باشا ربنا يطمنك ويبعد عنك الحسد

[amribrahim]

لو سمحت يا استاذ كمال
ايه اخبار عفشه السياره معاك اصلى كل ما اروح معرض اسئل على الكروز يقولوا
ابعد عنها فيها المشاكل التاليه

• صوت الموتور عالى
• العفشه فيها دبه وبتفك من بعضها بسرعه ولازم تربطها كل شويه
• استهلاك البنزين عااااااااااالى
• التكيف ضعيف

يا ريت لو سمحت تنقلى تجربتك مع العربيه بالنسبه للنقط دى

مفيش مشاكل في الكروز خالص ممكن يكون المعرض عاوزك تشتري كيا أو حاجة تانية غير الكروز يستحسن إن الواحد ميسمعش كلام بتوع المعارض و خصوصاً المعارض الخاصة بتاع كلو ههههههة

[ahmedaglan]

اولا وقبل كل شيء الحمد لله وسبحان الذي سخر لنا هذا وما كنا له مقرنين وانا الى ربنا لمنقلبون

تم بحمد الله امبارح عمل اول صيانة في عمر زوزو... صيانة ال5000 كيلو

أولاً الحجز... تم عمل الحجز الاسبوع الماضي عن طريق الاتصال بالرقم المختصر لمنصور واختيار الصيانة... شاب في منتهى الادب سأل تحب الصبح ولا بعد الظهر... قلتله المهم اقرب معاد عشان عايز اسافر بالعربية وهي اصلاً عامله كتير... وتم الحجز ليوم الخميس (أمس) في فرع الهرم الساعة 5 ونص مساءاً... وتم ارسال رسالتين تأكيد على تليفوني بالمعاد والمكان

ثانياً الوصول للمكان... انا معرفش المكان ده بالنهار شكله ايه.. بس بالليل فعلاً صباح النضافة... وصلت ودخلت برقم الحجز اللي اتبعتلي على الموبايل.. وواحد مهندس اسمه هاني استلم العربية وسألني على المطلوب (الراجل مؤدب جداً الحقيقة).. انا طلبت الاتي:
1- عمل الصيانة الدورية وتغيير الزيت والفلتر
2- تربيط العفشة من باب الاحتياط
3- غسيل حوض الموتور
4- مراجعة السوائل وزيادة النواقص

المهندس استلم العربية (طبعاً يؤخذ عليهم انه مكانش معايا اي شيء يثبت حالة العربية وهي داخلة.. يعني لو طلعوها على حصيرة ومدغدغة مليش عندهم حاجة)... الساعة كانت 6 الا ربع والراجل قاللي 8 تستلمها.. ليه ده كله يا عم قاللي سيبنا نروقلك العربية

ثالثاً الانتظار... المكان منتهى النضافة والناس منتهى الادب.. وفي كافتريا متأجرة لكافيه محترم (باسكوا) واسعاره حلوه جداً... خدت الكافيه واتفرجت على الاسماعيلي وهو بينفذ في سموحة الصح... بعدين نزلت الورشة اتفرج... كان في عربية كروز سودا داخلة على حصيرة ملهاش وش... العربية مخبوطة عدل بين الفانوسين بالظبط ومطربقة لحااااد البلوكة... والفانوسين سلام.. الخبطة عدل في وش العربية.. محدش رضي يقولي هي ليه كده... والعربية اوتوماتيك والكنترول بتاعها شغال بس مش بتدور... وشفت الاسترا والكورسا الجداد.. تحف الصراحة وكله داخل بمشاكل فتيس :pointiy2[2]:

رابعاً الاستلام... العربية خلصت في معادها بالدقيقة... وتم عمل كل اللي انا طلبته فوق مع تنضيف فلتر الهوا والغسيل... وتم تربيط كرسي السواق عشان انا من الوزن التقيل... وملأ قربة المساحات ومراجعة السوائل... العربية خارجة من الورشة في منتهى النضافة ومتغلفة بلاستيك على الكرسي والطارة ودواسة في الارضيه وتم ختم كتيب الضمان

التكلفة 261 جنيه شامل المصنعية والضريبة... الزيت موبيل 1 بتاع ال10000 كيلو... يعني الصيانة الجاية مفيش غيار زيت... وبناء على طلبي فعلاً ملزقوش ستيكر موبيل 1 اللي بيبقى على الزجاج الخلفي ده

النتيجة... واضح انه فلتر الهوا كان عنده انتفاخ تراب لأن سحب العربية بقى جبااااار... سألتهم على السوفتوير الجديد قالوا مفيش جديد بعد اللي عندي... لسبب ما كمان الفتيس استجابته متحسنة جداً... يا ترى زيت الفتيس كان ناقص وزودوه من سكات؟ الله اعلم

المهم الناس محترمة والعربية مبسوطة... والحمد لله

الف مبروك علي الصيانة يامعالي الباشا وربنا يحفظهالك من كل سوء ويحفظك منها ويحفظك من شر عيون الناس

[kamalsalem]

لو سمحت يا استاذ كمال
ايه اخبار عفشه السياره معاك اصلى كل ما اروح معرض اسئل على الكروز يقولوا
ابعد عنها فيها المشاكل التاليه

• صوت الموتور عالى
• العفشه فيها دبه وبتفك من بعضها بسرعه ولازم تربطها كل شويه
• استهلاك البنزين عااااااااااالى
• التكيف ضعيف

يا ريت لو سمحت تنقلى تجربتك مع العربيه بالنسبه للنقط دى

مشاكل ايه يا اخواننا... طب بالله عليك قوللي الناس اللي معاها العربية (مس بتوع المعارض) حد اشتكى منها؟

العربية دي عيبها الوحيييييييييييييييد انه كان نفسي يبقى في اوبشنز اكتر بنفس السعر

العفشة بتنعم مع الاستعمال... بس هي ثابتة فوق الوصف ما شاء الله... والتعليق ورا منفصل وتكنولوجيا (على فكرة العربية دي متصممة في المانيا بفريق مهندسين امريكان والمان)

صوت الموتور مزيكا... هو غريب... بس مش عالي.. وبعدين ده في الحرق بس... يا راجل ده انا هركبلها فلتر سبور عشان استمتع اكتر بصوتها

استهلاك البنزين على حسب مشيك... لو حرقت عليها خد منها جري السنين بس البنزين مش هيعمر... بس انا للمرة المليون بحلف انها كسرت ال300 كيلو بصفيحة على الصحراوي

التكيف ضعيف من انهي ناحية... انا طول الصيف اللي فات ماشي بالترموستات قريب من السخن... والمروحة على تاني سنة... مع اني يا باشا متربي في الخليج ومتعود اعيش في تلاجات

ده كدة وانا عامل 6000 كيلو والناس بتقول بتنعم اكتر مع ال10... فالحمد لله الحمد لله الحمد لله

وبعدين كفاية شكلها... كل يوم وانا طالع ببص عليها واقولها استودعك الله الذي لا تضيع ودائعه ما شاء الله عليكي.