توصيــــف كامل للأوبتــــرا بالصـــور

[Mzeid]

ربنا يحفظهالك و يعطيك خيرها و يكفيك شرها و إن شاء الله ربنا يبارك لك فيها ..
بس نصيحة لوجه الله .. حافظ عليها لأن العربية حتى لو كانت فورد Tموديل 1908 بس نظيفة و حلوة هتفضل في عين صاحبها أحسن من 100 فيراري ..
:):)

[NaderNabil]

بجد شغل تمام جدا جدا جدا........ربنا يباركلك فيها و يملهالك خير و فرحة:)

انا فخور جدا بالمنتدي...كل يوم بيزداد ثراء و معلومات

[mahamedaraby]

الله عليك اخر تمام ياباشا

شرح وافى ومفصل ياريت يعملوا كده فى كل العريبات

[aif]

السلام عليكم
قبل ما نشوف الشنطة احب نشوف صورة للتابلوة وطفاية السجاير ... انا نسيت اصورها عشان انا مش بدخن ... لكن اكيد لها استعمالات تانية ... وفيها لمبة خضرا صغنونة
في اقصا الشمال في الصورة فيه حاجة زي سماعة صغيرة .. دي اللي بتعمل صوت التنبية لحزام الامان وترك المفتاح




ودة المفتاح يا هاني ياشا ... انا ما اقدرش اعز حاجة عن حبايبي
هو فية 3 زراير لا غير قفل وفتح وفتح الشنطة .. وصوت الانذار رفيع اوي مش زي باقي الانذارات الولف والsun 1





كدة بقي ممكن نشوف الشنطة

دي صورة عمومية للشنطة المساحة رائعة
وعلي اليمين ح تلاحظو السبت بتاع الناس اللي فوق الجراج ... كانو بيجيبو عيش



دي صورة تانية بعد طي ظهر الكنبة الخلفية لتوسيع الشنطة .. وهي ممكن تطوي ومقسمة الي ثلث و ثلثين بحيث ممكن تطوي جزء وتستخدم الباقي في جلوس شخص او شخصين
ونلاحظ استمرار وجود السبت .. يظهر ان البواب لسة ما جابش العيش




ولما نرفع الارضية بتاعة الشنطة من يد مخصوصة شيك اوي ح نلاقي المنظر الظريف دة .. الاستبن ... وحوله وبداخلة مساحة كبيرة ممكن تستخدم للتخزين ... وح نلاقي شنطة العدة السودا مربوطة ومحطوطة علي الجنب اليمين .. اما الكوريك فمثبت بمعرفة الادارة ... عند المكان بتاع الكالون من الداخل
والارضية مفروشة فوم زي ما انتو شايفين






آدي الكوريك من قريب


ودي شنطة العدة بمحتوياتها


ملف العجل ومفتاح ومفك مزدوج .. وملف الكوريك



اي خدمة يا رجالة ...
لو حد عندة اي استفسار يا ريت يقول عشان اصورهوله
يبقي كدة مش فاضل غير الموتور

السلام عليكم

[hanyathlon]

تسلم ايدك

يا سلام يا أستاذ احمد
تسلم ايدك بجد الصورة بتاعت المفتاح اللى بريموت كنت محتاجها ازااى
انت هدتنى كدة:d
و كمان تشكر اوى على تعبك و فعلا انت تعبت فى التصوير واضافة الموضوع و كل دة عشانا
بجد مش عارف اقولك اية متشكر اوى
وارجو التثبيت
عاوزين تثبيت عشان دة من اقوى الموضيع فى المنتدى
تثبيت

[aif]

السلام عليكم
............
باقي عندنا الموتور
دي صورة عامة من الامام لموتور السيارة




ودي البطانة بتاعة الكبوت من الداخل



دي البطارية وهي من النوع اللي مش محتاج صيانة ونوعها AC DELCO وجنبها قربة مياة غسيل الزجاج ام غطا أخضر ويظهر في الصورة مقياس زيت المحرك .. مكانه سهل وسلس ... يعني ايدك مش ح تتملي زيت لو استعملتة ... الموضوع دة كان بيعقدني في الشاهين .... كنت عشان اقيس الزيت ... يبقي لازم اطلع البيت تاني اغسل ايدي .. وبالمرة إخد دش واغير هدومي



ودي صورة من الجانب الشمال ( ناحية السائق ) يظهر بها قربة مياة الردياتير .. ام غطاء اصفر .. والمياة لونها احمر




ودي صورة من الناحية اليمين ... ويظهر بها مكان فلتر الهواء ... بجانب غطاء المساعد
ولو ركزتم أوي أوي في اقصي الشمال ... ح تلاقو الكاب الأحمر بتاعي .. لسة محطوط علي التابلوه


برضه الطابع العام هو دقة التقفيل وشياكته ... وده في نظري عامل مهم جدا من العوامل اللي ادت الي اختياري لهذه السيارة
كدة مش ناقص غير التقييم ... ولو لقيت صور تانية مفيدة ح ارفعها
السلام عليكم

[HRH_Sameh]

ههههههههههههه موضوع لذيذ ورائع بجد
تسلم

[ابو سيف]

على فكرة مينفعش كدة يا ابو ابراهيم

كان فيه صورة من الصور واضح فيها التابلوه جدا و لكن للأسف قمت انت بشيل الكاب الاحمر بتاعك اللى كسبته من ليبتون و الاقيك حاطه على الكرسي اللى جمب السواق(لمحت طرفه كدة بالعافيه) ممكن اعرف السبب الحقيقي وراء هذه الفعله ؟:d:d:d:d


ههههههههههههههههه يا باشا ربنا يباركلك فيها

[m7md_hany2]

أنا كمان كسبت الكاب و كمان تي شيرت و لسة هاخدهم ....... حاجة ببلاش كدة :d:d:d

وشكرا علي التقييم و الصور و أنا عامة بقول أنها عربية كويسة بالنسبة لسعرها بس التسارع بتاعها و التجميع و العزم.....ما شاء الله يعني الصراحة .... بس بحس أنها ناشفة قوي من جوة الصراحة
ربنا يباركلك فيها و يكفيك شرها ..... :)

[aif]

بعد ما فحصنا السيارة فحص دقيق بالصور
نأتي الي الأهم وهو التقييم
الأول ح اعمل درجات للتقييم عشان الامور تبقي واضخة
جيد
جيد جدا
ممتاز
رائع

انا طبعا ما حطيتش متوسط وسيئ لأن ما اعتقدش ان سيارة زيرو ومن ماركة محترمة ممكن يكون فيها شيئ يوصف بالسوء ... مش بس الاوبترا لكن جميع الماركات المعروفة والمحترمة ذات التاريخ

نبدأ بالشكل : شكل العربية يتراوح من ممتاز .. الي رائع ... وده بيرجع للنظرة الشخصية وانت عاوز عربية انطباعها اية .. شبابي والا عائلية والا وقورة
العربية مافيهاش بهرجة اكتر من اللازم ..ومافيهاش زوايا حادة كتير ... يعني انسيابية ... بالنسبة لعمري و لطبيعة شغلي فهي مناسبة تماما ... يعني انا عمري 44 سنة .. لازم العربية تكون مناسبة لي .. ما ينفعش اركب جين 2 مثلا ... مش ح تكون لايقة عليه

السيارة من الداخل : ممكن تاخد درجة ممتاز .... زاوية الرؤيا الامامية ممتازة الي رائعة .. وانت قاعد بتكون شايف الدنيا كويس جدا ... الرؤيا الخلفية جيد جدا ... لكن مش محتاج تركب بارك سينسور ...
انا بآخد علي السيارة من الداخل ان الفرش لونه ثابت في السيارة المانيوال مهما كان لونها الخارجي ... انا عربيتي لونها بيج والفرش رمادي برضه ...
الكابينة مريحة جدا تاخد ممتاز ... اضاءة التابلوه رقيقة جدا ومناسبة ومش متعبة للعين وكل الكماليات في متناول يدك ... ما عدا ازرار تحكم المرايات ... بتكون بعيدة شوية ... لو كانت عند المخدع اللي علي ايدك الشمال مع زراير الزجاج كانت ح تكون احسن
الكماليات ممكن تتقيم بجيد جدا ... مش ممتاز ... ليه ؟؟
المفروض كان فية شوية حاجات تكون موجودة .. لكن عشان يضغطو التكاليف ويقدرو ينزلو السيارة بسعر منافس يظهر انهم طنشوا ...
مافيش تحكم بمستوي الاضاءة في الفوانيس الامامية واقصد الاضاءة لأعلي واسفل مش بشدة الاضاءة
السنتر لوك مالوش زرار خاص به ... يعني لازم تفتح السنتر وتقفله من السقاطة بتاعت باب السائق
ما فيش اي تحكم الكتروني من عجلة القيادة ... مافيش تحكم في الصوت مثلا والا الراديو .. مافيش حاجة تقولك استهلاك البنزين شكله ايه ... مافيش ترموميتر لقياس الحرارة في الداخل والخارج
مافيش كشافات شبورة في المانيوال ... موجودة في الاتوماتك بس
ملفيش CD في الكاسيت ... وان كان الكاسيت رائع وفية امكانيات رائعة .. والايريال المدمج في الزجاج الخلفي دة رائع وعاجبني جدا ... مش محتاج الايريا يطلع وينزل ويعطل ويتعب وعاوز ايسانسير ..الخ
التكييف ممكن ياخد من ممتاز الي رائع شأنه شأن التكييفات في الكوري عموما .. هو بكرة مش تاتش لكن أداءه رائع ومخارج الهواء مناسبة جدا ... لكن مافيش مخارج هواء في الكنبة الخلفية .. العربيات الشيك بيكون فيها مخارج هواء بين الكرسيين الاماميين .. عند الطفاية كدة
لكن اللي جالس ورا بيشعر بالتكييف بيكون متكيف ومش حران ... وعموما التقييم الحقيقي للتكييف ح يكون في الصيف

عزل الصوت داخل الكابينة ممتاز لكن مش رائع ... يعني اعتقد ان فيه عربيات افضل منها في هذه النقطة
اجمل ما في الكابيتة هو المساحة دي تاخد اكتر من رائع .. الكابينة واسعة جدا سواء من الامام او الخلف او الشنطة
اماكن التخزين رائعة وكتير وأماكنها مناسبة وخاصة ان التابلوه اللي علي اليمين مكيف .. لو معاك دوا .. انسولين ... حاجة ساقعة .. بيبقي عملي جدا
عموما الكماليات اللي موجودة في العربية بالنسبة لي كافية جدا وانا كنت عارف الكماليات دي قبل الشراء ..

نيجي بعد كدة للموتور
السحب زي الفل ياخد ممتاز
الموتور ياخد ممتاز صوته هادي لكنه مسموع ... يعني صوته لذيذ .. علي رأي سبعاوي .. بيزأر ...مش بيطلب النجدة ...
انا عموما مش متضايق من صوته .. صوته بيعطيك شعور بالقوة والثقة
الفتيس سلس جدا وياخد من ممتاز الي رائع ... المارشدير بجانب الغيار الاول وله سوسته لأعلي بصباعك عشان ما تنقلش غلط
انا عموما مش خبير أوي في المحركات فطبعا ح اسيب الحكم علي فنيات المحرك لمن هم اكتر خبرة مني

نيجي بقي للثبات دي بقي تاخد رائع
السيارة ثابتة الي درجة رائعة علي السرعات وخاصة في الملفات ... انا لما حبيت اجرب الموضوع دة مشيت علي 150 وأخدت ملفات بالسرعة دي في طريق السخنة الجديد .. العربية زي الفل ومغرية للسرعة ... عن لسان واحد صديقي كان راكب مع واحد صاحبه اوبترا وماشي بيها 190 والعربية زي الفل وثابتة وما فيهاش مشاكل ... لكن ان عمري طبعا ما ح امشي بالسرعة الخزعبلية دي
العفشة بتاعت العربية مش ناعمة اوي زي الكورولا مثلا ..لكن هي تاخد ممتاز مش رائع ودة بسبب ارتفاعها عن الارض ووزن العربية
ارتفاع السيارة عن الارض ممكن ياخد من ممتاز الي رائع ... بصراحة انا تعمدت آخد بيها مطبات صناعية متعددة وكان في السيارة 3 كبار فوق ال100 كيلو وطفلين ... ما فيش ولا حكة ... انا منتظر لما يكون معايا حمولة كاملة عشان يكون الحكم في أسوأ الظروف وبعدين اقول اذا كانت تاخد رائع والا ممتاز بس
والنقطة دي بتحقق معادلة صعبة جدا .. هي ان السيارة عالية عن الارض وفي نفس الوقت ثابتة في الملفات وعلي السرعات

الباور بتاع العربية ممتاز وسلس جدا
استهلاك البنزين لسة شوية بعد ما اكمل 2000 او 3000 كيلو عشان يكون القياس مظبوط

انا حاولت أكون محايد وما أجاملش عربيتي .. وأقول السلبيات قبل الايجابيات وأتمنى اكون وفقت في ذلك

من الآخر
انا مش ندمان علي اني اشتريت العربية دي
لو حد عنده أي استفسار انا تحت امركم
شكرا لجميع الزملاء اللي شرفوني سواء بالمرور او التعليق او التشجيع
والسلام عليكم ورحمة الله وبركاته

[محمد قاسم]

شككككككككككككككككككككككككررررررررراا

[د.محمود صلاح]

الف مبروك على العربية وبما انى ركبتها لمدة شهرين - 2007 اوتوماتيك - اسمح لى اضيف على ما ذكرته بعض خبراتى عنها :
بها 4 سماعات وليس بها تويترات حيث انى فكيت فرش الباب وشفت بنفسى
درج الطفاية بتاعة السجاير مضاء بشكل جميل وتفضى الطفاية عن طريق نزع بطانة الدرج وليس سحب الدرج كله
المفتاح غير مشفر ويمكن عمل اى نسخه ب 5 ج وفتح الباب بها وتشغيل السيارة والتحرك بها برغم اطلاق صفارة الانذار بمعنى ليس بها جهاز شل حركة السيارة وبالتالى قمت بتركيبة فى عربيتى آنذاك - جهاز انذار بريموت آخر غير اللى فى المفتاح عشان العربية ماتدورش الا بعد الضغط على الريموت -
سقاطات الابواب تقع للداخل بسهوله بسبب عبث الاطفال ..خذ بالك
الدهان سريع التقشر
الكاسيت بيقدم أغنيه أغنيه , عند الضغط على تقديم او تاخير بيبحث عن الفراغ اللى بين الاغنيتين ويقف

[aif]

الف مبروك على العربية وبما انى ركبتها لمدة شهرين - 2007 اوتوماتيك - اسمح لى اضيف على ما ذكرته بعض خبراتى عنها :
بها 4 سماعات وليس بها تويترات حيث انى فكيت فرش الباب وشفت بنفسى
درج الطفاية بتاعة السجاير مضاء بشكل جميل وتفضى الطفاية عن طريق نزع بطانة الدرج وليس سحب الدرج كله
المفتاح غير مشفر ويمكن عمل اى نسخه ب 5 ج وفتح الباب بها وتشغيل السيارة والتحرك بها برغم اطلاق صفارة الانذار بمعنى ليس بها جهاز شل حركة السيارة وبالتالى قمت بتركيبة فى عربيتى آنذاك - جهاز انذار بريموت آخر غير اللى فى المفتاح عشان العربية ماتدورش الا بعد الضغط على الريموت -
سقاطات الابواب تقع للداخل بسهوله بسبب عبث الاطفال ..خذ بالك
الدهان سريع التقشر
الكاسيت بيقدم أغنيه أغنيه , عند الضغط على تقديم او تاخير بيبحث عن الفراغ اللى بين الاغنيتين ويقف

يااااه انت واحشنا جدا يا دكتور محمود ... والله مفتقدينك جدا
ربنا يرجعك بالسلامة
بالنسبة لملاحظات سيادتك
اعتقد ان فية شوية تغييرات من 2007 ل 2008
المفتاح مشفر فعلا ولما تقفل العربية بالريموت ممكن تفتح بالمفتاح العادي وبدون فضايح ... الانذار بيتلغي لوحده .. والتوكيل اكدلي الموضوع دة وقالولي ان رقم كود المفتاح موجود علي القطعة المعدنية اللي مع المفتاح واعتقد عشان يطلعولك مفتاح بيبقي غالي جدا ... ولو بريموت بيبقي في حدود 1000 جنيه
وعموما انا ح احاول اشوف حد عنده اوبترا واحط المفتاح بتاعة في الكونتاك ... عشان اشوف الانذار ح يشتغل والا لأ
وبالنسبة للكاست فيه كمان خاصية التكرار ... يقعد يعيد في الاغنية كل ما تخلص ... وفية تويترات في الابواب جنب اكرة الباب النيكل لكن مش متأكد هل هي شغالة فعلا والا كوموفلاش ومنظر بس
والكاست فيه ايكولايزر وشوية لعب
والكاسيت بيقدم ويأخر اغنية اغنية لكن فيه زرار تاني بيقدم ويأخر لآخر الشريط .. انا جربت اإتنين
والراديو به 5 موجات 3 fm و 2 am وكل موجة ممكن تخزن 6 محطات
شكرا للملاحظات
تقبل خالص تحياتي وانا سعيد جدا بمشاركة حضرتك

[YoussefMostafa]

بجد مجهود رائع احييك عليه
(بالنسبة لموضوع ال n73)
لوحضرتك نزلت الصورة من علي صفحة النت وجبت arrow الماوس (منغير متضغط علي اي حاجة) علي الصورة هيجيب بيانانت الصورة ومن ضمنها camera model

[aif]

بجد مجهود رائع احييك عليه
(بالنسبة لموضوع ال n73)
لوحضرتك نزلت الصورة من علي صفحة النت وجبت arrow الماوس (منغير متضغط علي اي حاجة) علي الصورة هيجيب بيانانت الصورة ومن ضمنها camera model

ايوه كدة انا اطمنت
ده انا عمال اتلفت ورايا ... قلت انت بقي مراقبني .. والا شايفني من القمر الصناعي .. والا في حد بيفتن عليا :D