استلمت الحمد الله كروز 2014 هاي لاين واستفسار عن لوك الدريكسيون

[Ahmed_Ta21]

السلام عليكم
بفضل الله استملت بالامس
طبعاً الواحد مش قادر يوصف الجمال
بسم الله ماشاء احساس بالفخامة والثبات تحفة تحفة تحفة خاصة في الملفات تخش بسرعة عالية جدا وتبقي مطمن
التكيف مشغله طول اليوم تلاجة بمعني الكلمة لدرجة ان نمت في العربية وانا سايق:)
الفرامل مفيش كلام كنت علي 85 تقريبا وواحد قرر يقف فجاة ويدخل شمال بدون اشارة ضربت فرملة واحدة لقيت العربية في مكانها
احساس بالاطمئنان جدا وانت سايق
اضائة المقصورة جميلة وممتعة وكل الناس قاعدين يتفرجوا عليها وانا ماشي
العزل تحس انك في عالم اخر ومتسمعش اي حاجه جمبك (الكاوتش اللي صوته محسوس شوية)

العربية مع التكيف مفيش تاثير والتسارع كويس جدا ومش بطة بلدي والكلام ده
بلاش مزايدة ومبالغة الموتور ممتاز وتسارعه كويس لما حبيت افتح وشديدت استجابته سريعة

الخلوص ممتاز جدا ومش بتحك الحمد الله

العربية دي باختصار خسارة لو محدش اقتناها
عيبها بس حاجه واحدة ان مفيهاس سنسور بارك ولاطي للمرايات لو كان فيها تبقي كده مش محتاجه حاجه

عاوز بس استفسار لان قلقان

لما بنشيل المفتاح فيه lock للدريكسيون بلف الطارة ناحية الشمال مثلا لغاية يعمل تكة كده
احيانا لما بشيل المفتاح واجي الف علشان اعمل الـlock بلاقي الدريكسيون مش راضي يتحرك لايمين ولاشمال كانه lock

حطيت المفتاح بدون ما ادور حركته شوية ناحية الشمال وشيلت المفتاح وجيت اعمل اللوك عمل معايا
ولو دورت العربية وبطلتها وجيت اعمله بلاقي برضه مش راضي يلف ويعمل اللوك ده بلاقي زي الخرسانة مش راض يتحرك وكأنه اتعمله لوك

انا مش فاهم حاجه هل الدريكسيون بيعمل لوك اتوماتيك ولا لازم الطارة تبقي علي زاوية معينة علشان يعمل اللوك ده ولاكده فيه مشكلة؟

ياريت تطمنوني ضروري

[SYD]

الف مبروك العربية
ربنا يباركلك فيها ويكفيك شر الحسد

اعتقد ان حضرتك لما بتطفي العربية وبتشيل المفتاح بتكون علي الحظ علي وضع اللوك وبالتالي من غير ما تلف يمين او شمال بيكون عامل لوك

انا شخصياً بعملها في عربيتي لأني حافظ وضع الدريكسيون بالظبط اللي بيعمل عنده لوك
وبالتالي وانا لسة مدور والباور شغال بلف الدريكسيون لحد وضع اللوك وبعدها ببطل العربية وبشيل المفتاح بلاقيها عاملة لوك من غير ما احتاج للف الدريكسيون يمين او شمال
بس للأمانة لما بظبط الدرييكسيون علي وضع اللوك - لما باجي اشيل المفتاح بسمع صوت اللوك من الكونتاكت

تحياتي

[ashouhdy]

الف مبروك ياباشا وربنا يديك خيرها ويكفيك شرها

و خلي بالك عشان ثباتها دة مغرى جدا للجرى


بالنسبة للوك والله انا بتيجي معايا حظ !

بس العربية فيها ايموبيلايزر فمتقلقش

وعايزين تقييم تفصيلي لاحساسك بالعربية متكروتناش

[mohamedadel86]

ياباشا الف مبروووك ربنا يباركلك فيها ويبعد عنك عيون الناس
ان شاء الله احصلك عن قريب
بس زي مادكتور شهدي قال عايزين تقرير جامد كده بلاش كروته :)

[JOKER_KLEN]

اللف مبروك عليك وربنا يحفظلك عليها ويكفيك شر الطريق

[Eng_Moh.Dewair]

الف مبروك يا باشا ربنا يديك خيرها و يبعد عنك شرها . و بردو عاوزين نعرف انطباعك عنها و اللون ايه و احساسك بالعربيه :)

[mastr_n]

الف مبروك يا باشا ربنا يديك خيرها و يبعد عنك شرها

[Hosam_Optrawy]

الف مبروك ربنا يباركلك فيها

[J A G U A R]

ربنا يباركلك فيها ويحفظهالك
وعايزين تقرير

[K.Ossama]

ألف مبروك
ربنا يديك خيرها ويكفيك شرها

[Mohyeldin1974]

فعلا عربيه شكلها محترم وبحاول اقنع حمايا بيها لانه عاجباه الاسترا ىبقلوا نفس الملتور والفتيس تقريبا
اخبار استهلاك البنزين ايه والوسع الداخلى وحجم الشنطه

[abou-yahia]

ashouhdy

سؤال مباشر في الصميم

لو شيلنا esp من الكروز ايه رايك فيها

مقارنه بنظائرها في السوق

لانك تقريبا الوحد اللي حيرد رد موضوعي علي الحته ديه

لاني سعيد جدا ان اخير الكروز بقه ليها مكانه عند الناس

تحياتي

[Ahmed_Ta21]

شكرا علي الردود الجميلة
عاوز ارد عليكم رد تفصيلي واعملكم تقرير لكن الواحد نفسياً مدمر لان عملت حادثة علي كوبري اكتوبر
كنت بوصل ولدتي للعمل اللي قدامي ماشي علي 100 تقريباً وقف فجأة لوجود حجر طبعاً ضربت فرملة مرة واحدة العربية وقفت في مكانها اللي ورايا دخل في الاكصدام نزلت
اولاً اوضح ليكم ان اكصدامها قوي جدا لان هو عنده الفانوسين اتكسروا والشبكة عنده اطبقت
انا عندي اللي حصل خدوش (وعليها لون بوية عربيته) وتطبيقة بسيطة من تحت خالص

الراجل نزل يحاول يصالحني ويراضيني وانا مكتوم من جوايا

سألت دلوقتي واحد قالي دي حاجه بسيطة جدا انا فاكر ان فيه كارثة قالي دي تترد علي البارد وتتملع ببولش وانتهينا
قولتله بعد التلميع هيكون فيه خدوش بسيطة قالي هنضطر نرش وانا شايف ملهاش لازمة وسيبها تاخد العين

نفسياً انا مدمر لان شكلها كان شبه الـ المرسيدس وهي باللون الاسود ومع الطول مدي احساس بالفخامة وكانت بتلمع من وري وشكلها راقي اوي

انا مأمن عند شركة اسكان
اعمل ايه انا صعبان عليا مش عايز فيها خدش واحد عايزها ترجع زي الاول
فكرت اشتري اكصدام جديد
شوروا عليا الصح ايه دلوقتي وشركة التامين لو هعمل حاجه الاجراءات بتكون ازاي
لان عقلي مش عارف يفكر
قاعد اقول يارب الزمن يرجع بالواحد

[abou-yahia]

سيبها تاخد العين

[ashouhdy]

ashouhdy

سؤال مباشر في الصميم

لو شيلنا esp من الكروز ايه رايك فيها

مقارنه بنظائرها في السوق

لانك تقريبا الوحد اللي حيرد رد موضوعي علي الحته ديه

لاني سعيد جدا ان اخير الكروز بقه ليها مكانه عند الناس

تحياتي

عشان اجاوب علي السؤال ... اخرك كام في الفلوس؟ اخرك اخرك حتي لو حتقسط.

شكرا علي الردود الجميلة
عاوز ارد عليكم رد تفصيلي واعملكم تقرير لكن الواحد نفسياً مدمر لان عملت حادثة علي كوبري اكتوبر
كنت بوصل ولدتي للعمل اللي قدامي ماشي علي 100 تقريباً وقف فجأة لوجود حجر طبعاً ضربت فرملة مرة واحدة العربية وقفت في مكانها اللي ورايا دخل في الاكصدام نزلت
اولاً اوضح ليكم ان اكصدامها قوي جدا لان هو عنده الفانوسين اتكسروا والشبكة عنده اطبقت
انا عندي اللي حصل خدوش (وعليها لون بوية عربيته) وتطبيقة بسيطة من تحت خالص

الراجل نزل يحاول يصالحني ويراضيني وانا مكتوم من جوايا

سألت دلوقتي واحد قالي دي حاجه بسيطة جدا انا فاكر ان فيه كارثة قالي دي تترد علي البارد وتتملع ببولش وانتهينا
قولتله بعد التلميع هيكون فيه خدوش بسيطة قالي هنضطر نرش وانا شايف ملهاش لازمة وسيبها تاخد العين

نفسياً انا مدمر لان شكلها كان شبه الـ المرسيدس وهي باللون الاسود ومع الطول مدي احساس بالفخامة وكانت بتلمع من وري وشكلها راقي اوي

انا مأمن عند شركة اسكان
اعمل ايه انا صعبان عليا مش عايز فيها خدش واحد عايزها ترجع زي الاول
فكرت اشتري اكصدام جديد
شوروا عليا الصح ايه دلوقتي وشركة التامين لو هعمل حاجه الاجراءات بتكون ازاي
لان عقلي مش عارف يفكر
قاعد اقول يارب الزمن يرجع بالواحد

انت لحقت تاخد العين

انا اول امبارح الحمد لله ميكروباص روقلي الرفرف لحد الباب .. حكة من اول لحد الباب ... طبعا جزء من البوية اتشال ولسة انا سايب البوية بتاعتة عايها عشان الحسد يهبط حبتين

فااكيد سيب خبطتك شويتين. وقدام شوية ابقي غطيها بأي بوليش او قلم بوية اسود