المساعدين ضربوا

[tayson54]

يا شباب انا كنت في اوتوماستر بكشف علي العفشه وبربط عليها فالمهندس مصطفي في الأستقبال بعد الكشف علي العربيه قالي ان ال4 مساعدين جايبين زيت ...انا عربيتي لسه 27 الف كيلو معقول المساعدين ال4 يضربوا بالشكل ده والعربيه لسه زيرو امال لما هتقدم شويه هيحصل ايه
المهم انا شايف ان سعر المساعدين في التوكيل غالي (ال4 ب 2095 جنيه)وشكلهم مساعدين سكه ممكن يضربوا تاني بمنتهي السهوله فهل فيه اي حد هنا مر بنفس المشكله دي وجاب مساعدين من بره كويسين احسن من بتوع التوكيل دول ؟
ده غيرالتيل الأمامي اللي لسه مغيره في صيانه ال15 الف وبعدين بيقولي النهارده ان التيل عايز يتغير تاني ...هو انا بكله بسناني كل 12 الف اغير تيل وكل 25 الف اغير 4 مساعدين ...علي رأي فيلم عسكر في المعسكر يا اخي توكا

[Dr_Smart]

هي العربيه ايه ؟

[tayson54]

متأسف...اوبترا

[totaman]

الله يطمنك يا ريس
ربنا يستر والله
بس ممكن اسال حضرتك سؤال
هل استخدامك هوة اللى عمل فى العربية كدة؟؟؟؟
والعربية موديل كام ؟؟؟؟

[Abdo_Eldesokey]

أنا رأيي غير وركب مساعدين اسبور مونرو أو أي نوع الأعضاء ينصحوك بيه

وأهو تبقى استفدت من التغيير

ومفيش حاجة تخسرها لأن الأوبترا كده كده عفشتها ناشفة

[shock]

لو انتا لسا في الضمان
خليهم يغيرولك المساعدين علي حسابهم
اصل مش مش معقولة ال4 يضربوا مرة واحدة كدا

[tayson54]

استعمالي للعربيه هو اكتر حاجه هتجنني ده انا محافظ عليها جدا وباخد وقتي جدا وانا بعد اي مطب او حفره لدرجه ممكن العربيات ورا تعد تزمر علشان اخلص وبعد كل كده يحصل كده طب ما كنت فحت العربيه بقه مكنش حصل اكتر من كده
موضوع تغيير المساعدين في التوكيل عليه شد وجذب كتير لانهم بيقولوا ان المساعدين خارج الضمان وفيه ناس بتقول عليها ضمان لحد 20 الف بس لكن عموما انا هروح في صيانه ال30 واتبتت في التوكيل لما اشوف اخرتها ايه
بالنسبه للمساعدين المونروا هل ممكن الاقي مقاس مساعدين الأوبترا فيهم وتمنهم كام تقريبا لل4 ؟ والعربيه موديل 2008

[tayson54]

انا دورت علي مواضيع المساعدين لقيت الناس بترجح مونرو او كوني والأغلب بيقول كوني افضل يا تري حد جرب اي واحد من دول علي الأوبترا يقول لنا اخبارهم ايه ؟

[shock]

هو انا المهندس قالي كدا برده
المساعدين لحد 20 الف بس
انا اعرف واحد معاه افيو 2007
وكان مغير الاربعة وهو عامل 56 الف
هيا المشكلة انك تتمسك بحقك في الضمان

[hesham_shousha]

مساعدين ايه ياجماعه
انا المساعدين فى عربيتى الغلبانه بقالها اكتر من عشر سنين وحالتها الحمد لله لسه كويسه جدا
لكن التيل كل 12 الف ممكن حسب الاستخدام

[tayson54]

يا باشا انا في عربيتي اللادا القديمه عاشت معايا 12 سنه غيرت فيها المساعد مره واحده لحد ما بعتها وكانت عفشتها زي الفل كنت مركب ليها بيض بوما الماني كان ب600 جنيه (غيرته مره في 12 سنه وحبت بوما برده)وكان عامل شغل في العفشه تحفه ...انا مش عارف اتحصر ولا اعمل ايه بالظبط

[shady_hamdy]

انا معايا افيوا كل كام شهر اكتشف ان فى مساعد ضارب زيت المساعدين الى رراكبة اى كلام حتى الى فى التوكيل اخرها 5000 كم بس المشكلة ان فى ناس كتير المساعدين بتكون ضاربة و مش حسين باى حاجة

[tayson54]

انا نزلت دورت علي مساعدين في الحرفيين وف شارع دمشق لكن للأسف مفيش مساعدين يركبوا علي الأوبترا غير المساعدين بتوعها سألت علي kyb ومونرو او حتي اي حاجه مفيش .
طبعا كان موجود gm الكوري بحوالي 1800 جنيه لل4 مساعدين
وكان فيه مساعدين gm صناعه صيني ب 1500
وكان فيه كمان مساعدين صيني لكن مش gm لكن يركبوا علي الأوبترا بحوالي 1000 جنيه لل4 مساعدين .
الكل اجمع ان المساعدين الكوري اغلبيته مضروب غير وجود العيب الشهر في المساعدين اللي بيخليهم يضربوا زي ما حصل معايا كده
لذلك بفكر جديا بنسبه 95% اني اجيب المساعدين الصيني اللي ب1000 جنيه علي اساس انهم ارخص من الكوري ب70% تقريبا وفي كل الأحوال سواء اشتريت الكوري او الصيني هيضربوا (متوسط تشغيل سنه تقريبا) يعني كسبت سعر ارخص وريحت دماغي .
لو فيه حد عنده اوبترا اشتري لها اي مساعد تاني كويس ياريت يقول عليه ويفدني قبل ما اشتري (هشتري بعد اسبوع ان شاء الله) بحيث ابقي انا كده درست الموضوع من كل الزوايا ومخسرتش حاجه .

[auto5truck]

أنا رأيي غير وركب مساعدين اسبور مونرو أو أي نوع الأعضاء ينصحوك بيه

وأهو تبقى استفدت من التغيير

ومفيش حاجة تخسرها لأن الأوبترا كده كده عفشتها ناشفة

لو انتا لسا في الضمان
خليهم يغيرولك المساعدين علي حسابهم
اصل مش مش معقولة ال4 يضربوا مرة واحدة كدا

أنا مع الرأى القائل بالمساعدين المونرو لأنهم فعلاً جيدين جداً عن تجربة.

و ما فيش حاجة أسمها مساعدين بتتغير فى الضمان لأى سيارة كانت لو عاملة كيلومتر واحد فقط هيقولك دة سؤ أستخدام.

الحقيقة فية واحد زميلى غير أتنين مساعدين أمامى بعد حوالى 22000 كم لكنة معتاد يجتاز طريق مدق وسط الجبل ما بين طريق الفيوم و كفر الجبل مرتين يومياً.

عن نفسى أنا الأوبترا معايا عاملة 36000 كم و مش بحاسب عليها قوى يعنى فى المطبات و مافيهاش أى حاجة و الحمد لله.

[tayson54]

هي بتبقي قمسه ونصيب والحمد لله علي كل حال
والله بسمع عن عربيات Bm وبتغير قطع غاليه جدا بعد كام شهر بتبقي عيب تصنيع فممكن ده اللي يكون حصل معايا