عايز اوبل بس تكون نضيفة جدا

[Ahmad Allawy]

والله بقي يابو حميد الموضوع ده نصيب..
عموما ادينا عرفنا..
وان شاء الله اكيد لو اي حد فينا وقع قدامه حاجة هيقولك من غير تردد..
وعلي فكرة لو حد لقي حاجة نضيفة و لقطة بيقول من غير حاجة..
الحمد لله هنا قلبنا علي بهض.. و الاولوية الاولي لرجالة المنتدي هنا قبل اي حد برة..
وعلي فكرة.. عادة يعني لو حد بيبيع من الناس الكبار هنا بيعمل تخفيض كويس لو اللي هيشتري من المنتدي هنا برضه..
وربنا يكرم ان شاء الله..

[farahat]

الله عليك يا فرحات بك..
كلام موزون وزي الفل..
انا فعلا عارف ان الشكل ده اسمه فيكترا بي بس انا مش باقول الاسم ده عشان في ناس كتير متعرفوش..و مش هتاخد بالها انا باتكلم علي انهي شكل..
وفاكر الاعلان اللي بتقول عليه ده كويس.. وكان بيعجبني قوي.. اصلي كنت ساعتها لسة صغير.. :)
بالنسبة بموضوع شكل الموديل من اول 2000 انا عارف الشكل بس مكنتش عارف ده من اول سنة كام..
كلام سعاتك تمام.. و عرفت منه كتير عن الفيكترا.. معلوماتي كانت ناقصة كتير وسعاتك كملتهالي كويس جدا..
وفي المقابل.. احب اقول لسعاتك المعلومتين اللي انا عارفهم عن عربيتي..
كورسا بي.. 1200 موديل 97 موتورها اس بي اي.. اللي هي سنجل بوينت انجيكشن (نص اننجيكشن علي رأي الناس..) نزل اول موديل من الشكل ده سنة 94 و كان علي ما اعتقد الماني 100% و بعده 95 وبعدين نزل موديل 97 وده غالبا كان تجميع اسباني..وكله نفس الموتور ونفس الامكانيات تقريبا عدا الايموبيلازر..(المفتاح المشفر..) فيها زجاج كهربا مرايات كهربا بدون تكييف بدون باور و فيها فتحة سقف..
نزل بعد كده موديل من اول 98 لحد 2000 هاتش باك برضه تكييف و باور و زجاج كهربا مش كله.. في عادي وفيها كهربا..(ملحوظة.. كلها الزجاج الكهربا امامي فقط)
وبدون فتحة سقف.. ومفيهاش ايموبيلايزر..مفتاح عادي يعني..
وبعدين نزل السيدان.. من اول 2003 لحد 2005 تقريبا.. علي ما اعتقد اسمها برة كورسا دي..
ودي برازيلي من الالف للياء الا الموتور و بعض الاجزاء..
في خلال الفترة بين بي و دي كان في كورسا سي وكانت هاتش باك لكن منزلتش مصر خالص.. وكانت فيها شبه من الاتنين بي ودي.. ومش عارف امكانياتها..
الدي بقي.. تقريبا كل الكماليات من تكييف و باور و 4 زجاج كهربا ومرايات كهربا و ووحدات رفع و سنتر و انذار بس مانيوال بس و بدون فتحة سقف..(مع العلم ان نزل منها برة فتيس ايزي ترونيك زي بتاع الاسترا حاليا و سمعت انه بيتباع استيراد للي عايز يركبه ومش غالي و كويس قوي....)
المفروض ان في كورسا شكل جديد نزلت برة مش عارف الحرف بتاعها ايه.. يمكن اي ولا حاجة..
وهي برضه هاتش باك و حلوة جدا.. وعاملة مبيعات كويسة قوي برة.. واحتمال كبير انها تنزل مصر في الفترة الجاية دي..
اتمني اني اكون افدتك و عرفتك معلومات جديدة زي ما انت افدتني جدا وعرفتني معلومات قيمة جدا بخصوصو الفيكترا..

أحمد باشا ، أشكرك جداً على معلوماتك إلي فعلاً أفادتني كتير بجد ، ملحوظة صغيرة بس إن الكورسا السيدان إلي في مصر إلي هي من 2003 لحد 2007 هي الكورسا C ، ال-D ابتدت من 2007 بس عشان كدة لسة مجتش مصر و شكلها من قدام ذي الفيكترا الجديدة فيها حتة نيكل فالشبكة من قدام زي كل موديلات 2007 فيكترا و استرا .

أشكرك مرة تانية على معلوماتك المفيدة جداً دي ، و يا سلام بقى كمان لو حطيت رينج السعر لكل موديل من دول و كدة نبقى عملنا موضوع متكامل عن الأوبل المستعمل في مصر و ربنا يقدرنا دايماً على خدمة المنتدى والناس الحلوة إلي فيه

[farahat]

يا جماعة شكرا جدا علي الكلام الكبيييييييييير ده فعلا كلام مفيد جدا و عرفني حاجات انا ماكنتش عارفها فعلا كلام مفيد و الواحد يعرف حاجة عن العربية اللي عايز يجيبها بس ممكن تفيدوني لو تعرف حد عنده حاجة حلوة

يا باشا لو عايز أي معلومات تاني إسأل إنت بس ،
بالنسبة للفيكترا أنا رايي عشان تجيب حاجة نضيفة تجيب الموديل من 2000 و tale3 و د ال-1600 منوال منه هتلئيهة في حدود ٧٠ ألف ، و هتلاقيها لسة مش متبهدلة
دور على contactcars هتلائي حاجات كتير معروضة ، كمان بص بصة كدة على الوسيط و روح و اتفرج لحد ما تلاقي حاجة نضيفة ، و لو حد من المنتدى هنا يعرف حاجة نضيفة أكيد مش هيبخل و هيقولك على طول
و ربنا يوفقك للخير إن شاء الله

[ENG\AHMED]

على فكرة الموتور الايكوتيك موجود من موديلات 2000 (الشكل الجديد-الكشافات الكريستال) الاوتوماتيك سواء 1.6 او 2.0

سؤال معلش بما ان الناس هنا عارفة الاسعار لان بقالى فترة مش متابع الاسعار قوى :))
معايا اوبل فكترا 98 و1.6 مانيوال ..فابريقة برة و جوة (البوية نضيفة مش متيهدلة هي طافية شوية بس و بلمعها كل فترة) قطع غيار اصلية لحد لمبات الفوانيس اوسرام المانى-صيانة بالتوكيل او عند ميكانيكى برة كان شغال فى التوكيل بس قطع الغيار بتبقى من التوكيل-بطارية فارتا المانى جافة 70 بالضمان (تمنها دلوقتى حوالى 1100)-كاوتش كونتينينتال جديد(الاستبن البريدجستون الفابريقة بتاعها)-مساعدين جديدة-طقم سرفيس فاضل فية حوالى 35000 او 40000 كم مش فاكر كام بالضبط-العربية ماشاء الله حالتها نضيفة اوى
هى مش للبيع بس عايز اعرف تعمل كام دلوقتى لأن مش متابع الاسعار بقالى فترة وسامع ان اسعار الفكترا نزلت...وهل دة طبيعى علشان الفترة دى السوق نايم ومع الصيف والاجازات هتعلى ولا اية؟؟

[delmero]

فيكترا 99

بص يا سيدي.....انا رايي انك تشوف حاجة موديل 99 او 98 فيكترا.....حتزود على السعر اللي معاك شوية بس الوديلات دي من افضل موديلات الفيكترا
بالنسبة للموديلات من 2000 و لفوق انا سمعت ان الموديلات دي صيانتها غالية و قطع غيار الموتور فيها و الحساسات غالية جدا جدا ....و دا راي من واحد صاحب معرض قطع غيار للاوبل .... ربنا يوفقك و اهم حاجة ماتتسرعش

[ahmedmaklad]

انا كمان سمعت كدة

انا سمعت عن كدة انا كمان سمعت ان احسن موديل في الفكترا هو 99 انا في واحد معايا في الشغل معاه فكترا 99 هي نضيفة و بيقول بيعملها صيانة في التوكيل بس مش مقتنع بيها اوي لانة قبل كدة كان بيقولي انها بتسخن و دى كانت اول مرة اسمع عن فكترا بتسخن
انا عايز اسال حاجة هي الشنطة مش بتفتح من جوه في الفكترا و بعدين انا كنت عايزها يا ريت مرايات كهربا و كلها كهربا مش عارف دة موجود في موديل 99 و لا في موديل اية

[ENG\AHMED]

هى درجة حرارة التشغيل الطبيعية اللى العربية متصممة عليها عالية (يعنى العربية لحد 98 متقلقش منها)العادى بتاعها 90 او اقل شوية من غير تكييف , بالتكييف بتقل شوية عن كدة
والشنطة فى الفكترا بتفتح وتقفل مع السنتر بالريموت بتضعط على مكان المفتاح من برة بس علشان تفتح...موضوع المرايات الكهربا موجودة فى كلو من اول 2000 قبل كدة فى ال 2.0 بس...بس موضوع المرايات دة مش مشكلة بتركب عادى و فى منها بتقفل بالريموت كمان..المهم حالله العربية
ال 1.6 الزجاج الخلفى عادى مش كهربا

[Ahmad Allawy]

تصحيح يا فرحات بك بخصوص الكورسا..
الكورسا سي اللي نزلت برة مش هي اللي نزلت مصر خالص..
ودي كانت هاتش باك.. و شبه الكورسا بي شوية.. بس شكلها احلي بكتير..
فيها شبه من السيدان اللي نزلت مصر.
واللي عرفته سعاتك بقي ان الكورسا اللي نزلت مصر دي مش كورسا اصلا..
يعني دي عربية اتعملت في البرازيل تماما من الالف للياء.. غالبا يعني..مش متأكد قوي من المعلومات..
والعربية تبع جي ام.. يعني مش اوبل اصلا.. ونزلت مصر تحت اسم اوبل حركة تسويقية يعني..
عشان اسم شيفروليه مكانش لسة واخد شهرة او دعاية في مصر زي دلوقتي..
واسم اوبل ليه مكانته عن المصريين..

[ahmedmaklad]

انتوا بتتكلموا على الكورسا و نسيتوني

انتوا بتتكلموا على الكورسا و نسيتوني

[Ahmad Allawy]

لأ منقدرش ننساك يا باشا..
الكلام كله علي الفيكترا بس انا كان عندي تعديل بس في الكلام اللي كنت قولته و باقوله لفرحات..
تصحيح مش هيخرجنا برة الموضوع متقلقش.. :)

[farahat]

أحمد باشا توضيح بسيط بس ، شركة اوبل هي أوحد من مجموعة شركات GM ، و GM group دي ليه فروع في كل بلاد الدنيا تقريباً ، يعني ممكن تجمع كورسا في البرازيل و تبعها في مصر ، و تجمع Aveo في مصر و تبعها في الصين و تجمع أي موديل في أي حتة و تبيع في حتة تانية ، كل موديل و ليه ظروفه حسب عوامل الإنتاج ، و دي متفرقش معانا حاجة لأن نفس الشركة بتطبق نفس شروط الجودة في كل فروعها .

بخصوص الكورسا C ، هي نفس الشكل إلي نزل عندنا منه السيدان انما في أوربا نزل منه الهاتشباك و هتلاقي نفس المقدمة و الفوانيس و كل حاجة وحدة ما عدا الشنطة

[farahat]

أستاذ أحمد مقلد ، احنا منقدرش ننسق طبعاً ، بس الحوار خدنا كدة شوية :)

هي الفيكترا عموماً بتسخن بالنسبة للجو المصري ، و دي حاجة معروفة و طبيعية لأنها متصممة للأجواء الاوربية ، انما مش بتسخن لدرجة مشاكل يعني
أما موضوع ال-99 و حساسات ال-2000 , أنا لي رأي ، لو الموتور بتاع ال-2000 و طالع مش ecotec يبقى هو هو نفس الموتور بتاع 99 يبقى مفيش مشكلة ، لكن ال-ecotec هو إلي حسساته كتير و غالية و د طبيعي لأنه ٢ كامة و MPI و هورس بور أعلى ، و كل حاجة تمنها فيها

[ENG\AHMED]

محدش رد بردو على موضوع سعر العربية :)

[ahmedmaklad]

انا عارف

محدش نسيني انا عارف بس انتوا عارفين لما يكون الواحد في حاجة في دماغة و عايز يخلص منها و خايف اني اشتري حاجة غلط

[Ahmad Allawy]

اتقل كده شوية يا احمد بك..
ومتنساش ان نصيبك هيصيبك..
هتلاقيها جت قدامك لحد عندك من غير ما تدور انت عليها..
ربنا يسهل ان شاء الله..