اغير نوع الزيت ولا لاء ؟؟؟؟

[هيثم الدسوقى]

السلام عليكم

انا دلوقتى عاوز ارسى على نوع زيت يكون كويس للأوبل كورسا 94 دلوقتى العربية عدت ال 100 الف كيلو و ملاحظ ان ناس كتير هنا بتقول ان بع ال 100 الف كيلو مينفعش نحط للعربية زيوت طويلة المدى .

انا كنت بزود زيت شيل xhp 3000 كيلو بس ما اعرفش بقى هل أداء العربية يتحسن لو غيرته ولا لاء .

اقتراحاتكم ايه وخصوصا انى مش لاقى الليكوى مولى فى المحلة .

وياريت تحددولى النوع ولون الجركن بتاعه وسعره وبيقعد فترة قد ايه وايه المحبذ للعربية اللى عندى دى ؟؟

[Elawany13]

لو مقتنع باليكولى مولىوعاوز تجيبه
ليهم فرع فى طنطا

[هيثم الدسوقى]

انا ما اعرفوش ومسمعتش عنه غير هنا

بس انت ايه رأيك فيه

[egyption2012]

لو اقتنعت بـ ليكو مولي
تقدر تعرف افضل نوعية زيت عندهم لعربيتك من خلال الصفحة ده
LIQUI MOLY - Motor Oils, Additives, Car Care - Oil Guide

[Mohab555]

ارشحلك زيت لكوى مولى سوبر فورمولا بيمشى 5000 كم و الجركن 4 لتر ب 120 جنية

[هيثم الدسوقى]

يعنى الليكوى مولى دا فعلا احسن زيت فى مصر دلوقتى ولا الشيل ؟؟

[Amr Axel]

بالرغم اني مجربتش ليكوي مولي بس الناس بتقول فيه اشعار لكن مبقتنعش الا لما اجرب و طبعا لأن كل عربية ع حسب ممكن عربية ترتاح مع زيت و ممكن لأ لكن في حالة عدم الحصول ع ليكوي مولي
اذن جرب شيل HX5 15w50 المفترض ان ده يناسب المواتير اللي تعدت 100 الف و الأفضل تغير الزيت كل 5000 بالكتير حفاظا ع الموتور

[Dr.M_baz]

شيل الأصفر ممتاز .. وممكن برده كاسترول ماجنيتك ده نصف تخليقي بس قليل شويه.

[Hesham.H]

شل الاصفر ... زيت كويس جدا ومش غالى ١٢٠ جنيه وبغيره على ٤٠٠٠ كيلو وبينزل نضيف
تحياتى

[Elawany13]

انا ما اعرفوش ومسمعتش عنه غير هنا

بس انت ايه رأيك فيه

أنا مجربتهوش
اخويا مجربة فى التيدا مرتين
زيت كويس وعادى زيه زى غيره .. مفيش فرق ملحوظ

عن نفسى كنت بستعمل موبيل بس زهقت من ارتفاع اسعار موبيل كل شوية بدون اى سبب
فحولت الى شيل

اشتريت عبوة سيراتيك من ليكوى مولى هجربها فى تغيير الزيت اللجاى مع شيل الاصفر ان شاء الله

[S O P H O S]

بصراحة انا راي شيل الاصفر بردوا
زيت معقول فكل شئ من وجهة نظري
مجرد راي ..

[هيثم الدسوقى]

انا كنت باغير الموبيل على 3000 كيلو

بس الميكانيكى القديم كان بيقولى انى اغير زيت على 1000 كيلو احسن للعربية دا فعلا احسن؟؟

وهو برضه انا عاوز اغير للشل لان اسعاره فى المتناول مش زى الموبيل

[Elawany13]

رقم تغيير الزيت رقم غير ثابت
التغيير بيكون حسب طبيعة السواقة وحالة الماتور ونوع الزيت
أنا كنت بجيب موبيل الجركن الابيض اللى بيقولوا بيقعد 2000 كم ومكنتش بنزله الا بعد 4000 كم ولما بزهق منه
وكان الميكانيكى لما يكشف عليه يقولى الزيت زى الفل ونظيف وحالته ممتازة

[هيثم الدسوقى]

انا شايف الناس كلها بتقول الشيل الاصفر كويس


بس هو السؤال الاهم دلوقتى ياريت حد يورينى صورة للون الزيت اللى لازم ينزل لانى بانزل الزيت عندى وهو لسه فى صفار ومش سواد كامل يعنى , بيكون فيه البريق الاصفر يعنى وانا اصلا اول لما باحط الزيت وبامشى بالعربية ولو عشرة كيلو حتى بالاقى لون الزيت بيغير وبيسود ودا الطبيعى عشان رواسب المحرك والزيت القديم .

و أنا اصلا ناوى من هنا ورايح هغير الزيت بنفسى لان بتوع الزيت كلهم بيغيروه بالشفط وبيكسلوا يفتحوا الطبة اللى تحت ودا طبعا مش بينزل الرواسب اللى بتكون فى الكرتيرة
وعاوز اجيب مفتاح تغيير فلتر الزيت عشان اغيره بنفسى ولا لازم بتاع الزيت هو اللى يغيره ؟؟
لانى لقيته عندى سهل التغيير بس مش عارف بقى هو محتاج فن فى تغييره ولا لاء

[Amr Axel]

انا شايف الناس كلها بتقول الشيل الاصفر كويس


بس هو السؤال الاهم دلوقتى ياريت حد يورينى صورة للون الزيت اللى لازم ينزل لانى بانزل الزيت عندى وهو لسه فى صفار ومش سواد كامل يعنى , بيكون فيه البريق الاصفر يعنى وانا اصلا اول لما باحط الزيت وبامشى بالعربية ولو عشرة كيلو حتى بالاقى لون الزيت بيغير وبيسود ودا الطبيعى عشان رواسب المحرك والزيت القديم .

و أنا اصلا ناوى من هنا ورايح هغير الزيت بنفسى لان بتوع الزيت كلهم بيغيروه بالشفط وبيكسلوا يفتحوا الطبة اللى تحت ودا طبعا مش بينزل الرواسب اللى بتكون فى الكرتيرة
وعاوز اجيب مفتاح تغيير فلتر الزيت عشان اغيره بنفسى ولا لازم بتاع الزيت هو اللى يغيره ؟؟
لانى لقيته عندى سهل التغيير بس مش عارف بقى هو محتاج فن فى تغييره ولا لاء

خلي بالك لأن شيل الاصفر فيه كذا لزوجة يعني فيه 20w50 و فيه 15w50 و فيه غيره طبعا لكن معتقدش انهم منتشرين و انا أفضل الـ15 عشان يبقي اخف شوية و يوصل للاجزاء أسرع

لون الزيت لو الزيت فعلا كويس و بيقوم بوظيفته في تنظيف المحرك هتلاقيه نازل غامق

بخصوص التغيير طبعا الموضوع بسيط اهم حاجة مفتاح الطبة شوف الطبة عندك مفتاح مقاس كام
و فلتر الزيت ليه مفتاح برده و هتلاقيه منه نوعين واحد بجنزير و واحد بأفيس الاتنين كويسين و بيتوسعوا و يضيقوا ع حسب الفلتر لكن المهم الاستخدام الصح عشان الفلتر ميتعوجش او يتكسر او يتزحلق

اهم حاجة تستني لما العربية تبرد شوية عشان الزيت هيكون مولع و تجيب طبق بلاستيك ميقلش عن 4 لتر بس ميكونش عالي عشان لما ينزل تحت العربية و تفك الطبة
و الفلتر كذلك تفكه باستخدام مفتاح الفلتر تحطه حوالين الفلتر و بينه و بين الفلتر ممكن حتة قماشة و تدوس عليه شوية كانك بتدوس ع بنسة عشان يمسك بس و تقدر تفكه و تفك واحدة واحدة ... اهم حاجة متنساش الفلتر اللي هتركبه نفس المناسب للعربية
بعد تصفية الزيت خالص تاخد الزيت اللي نزل و تفرغه في المكان اللي هيكون مخصص لتفريغ الزيت عندك
و ترجع تربط الطبة واحدة واحدة بايديك بس خلي بالك عشان متركبش معووجة
و اما فلتر الزيت تاخد نقطة زيت من الجديد و تمشيه ع الفلتر من فوق كله و بعدين تربطه بايديك و تخلي بالك برده عشان يركب صح و بعد ما تربطه ع الاخر بايديك تقرط عليه شوية بمفتاح الفلتر لكن مش اوي و واحدة واحدة عشان الفلتر ميتعوجش او يحصله اي حاجة و بعدين بفوطة امسح اي زيت حوالين الطبة او الفلتر عشان لو فيه تسريب تشوفه
بعدين تحط الزيت بقمع و لازم تكون العربية بتاخد كام لتر عشان متحطش زيادة بدون ما تقصد و بعد ما تخلص تقفل الغطا
و تدخل تدور العربية لكن متدوسش ع البنزين لحد ما الزيت يمشي و يوصل للفلتر و غالبا هتلاقي لمبة التشيك انجن نورت لو نورت متدوسش الا لما تطفي لو منورتش استني يجي 20 - 30 ثانية
و بعدين دوس بنزين مرتين تلاتة و انزل بص اذا كان فيه زيت بينزل من الفلتر او الطبة و لا لأ لأن احيانا الفلاتر ممكن يكون فيه عيب تصنيع تلاقي الفلتر بينزل زيت من عند الشفة
و بطل العربية و قيس بعدها مستوي الزيت و تابع تاني يوم لو فيه اي زيت نزل تحت العربية

ممكن تفتكر ان الموضوع طويل بس القصة ديه كلها تخلص في 10- 15 دقيقة بالكتيير :)