التكييف (بداية ونهاية)

[samaty]

السيارة مكيفة
التكييف تلاجة
كلام بنسمعه ولا نفهم منه غير ان راكب السيارة لديه كمالية تجعله لا يحس بالحر في الطيف
إزاي
دوس على الزرار شغل التكييف
طيب التكييف بيشتغل إزاي
دا اللي عايزين نعرفه مع بعض
خطوة بخطوة
طبعا مشوار التكييف دا بيبدأ من الزرار اللي في التابلوه
الزرار ده بيوصل كهرباء يشغل بيها التكييف
نبدأ بالتكييف
اول مكون فيه هو كومبريسور الضغط أو الكباس
دا شكله

ودا مكانه في الموتور

وبدون تفاصيل معقدة
الكباس ده باختصار عامل زي المنفاخ
السير اللي واصل ليه من موتور العربية شغال علي طول
لكن الكباس مش شغال على طول
جواه دراع مغناطيسية بتوصل حركة الطنبورة لقلب الكباس وتفصلها عن طريق الكهرباء ودي اللي بنسميها الكلاتش
لما تدوس مفتاح التكييف المفتاح بيوصل كهرباء للكلاتش دا يقوم معشق الطنبورة مع قلب الكباس فيشتغل
جوا بقى عبارة عن عمود كرنك صغير كده وبستم واحد واتنين سكس بلف عاملين زي الصبابات
لما يور بيسحب الغاز من ناحية ويخرجه من الناحية التانية والعملية دي اسمها عملية الضغط
وعلشان تتأكد من كفاءة الكباس وإنه بيضغط
هتسد فتحة الكباس بابهام ايدك اليمين وبايدك الشمال هتلف الطنبورة في اتجاة الساعة 3 لفات
زي الصورة دي

المفروض إن فتحة هتحس فيها بضغط هوا بيطرد صابعك ولو شلت صبعك مرة واحدة تسمع صوت الهوا
والفحة التانية تحس فيها بشفط هوا
لو حسيت بده يبقى الكباس شغال
لو مفيش حاجة يبقى الكباس مفوت
الكباس جواه حماية ميكانيكية ضد الضغط العالي
علشان لم تكون العربية على أر بي إم عالي لفترة طويلة ( سفر مثلا)
الكباس هيشتغل بسرعة كبيرة والضغط ممكن يزيد ويضرب شجرة التكييف
فيه حاجة بقى اسمها بلف الضغط
دا شكله

لو بصيت عليه كويس هتلاقيه عبارة عن ماسورة وجواها مسمار وسوستة
هوا ده بلف الضغط
البلف ده بيكون قافل علي فتحة موجودة في خرج الكباس لو الضغط زاد عن حد معين بيتغلب علي قوة السوستة فيقوم البلف ده يفتح علشان يسرب الضغط الزيادة لدخل الكومبريسور
البلف ده لو ضعف ضغط الكومبريسور بيقل والتكييف كفائته بتقل أو تنعدم
لكن لو حجر بيفضل قافل دايما وبالتالي الضغط بيزيد ويحصل تسريب وتلف في أضعف نقطة في شجرة التكييف أو الكباس يفوت أو يتحرق

[إبراهيم المصرى]

مشكوووووور والله يعطيك الف عافيه

[samaty]

الفريون اللي خارج من الكباس بتكون درجة حرارته عالية نتيجة الضغط الواقع عليه
وفيه شوية حاجات مهمة عايزك تاخد بالك منهم
الضغط كل ما يزيد تزيد درجة الحرارة يقل تقل درجة الحرارة
الغاز علشان يتحول لسائل لازم يفقد حرارة (يسخن اللي حواليه)
السائل علشان يتحول لغاز لازم يكتسب حرارة (يبرد اللي حواليه )
طيب دلوقتي الفريون خارج من الكباس بضغط عالي وحرارة عالية
هيروح علي حاجة اسمها المكثف ( سربنتينة التكييف)
طبعا من اسم المكثف يبقى هيكثف الغاز ويحوله لسائل
طيب يبقى لازم الفريون الغاز يفقد حرارة علشان يتحول لسائل علشان كده مروحة السربنتينة شغالة تبرد السربنتينة والفريون اللي جواها يقوم يخرج من السربنتينة في صورة سائل حرارته اقل من حرارة الغاز اللي داخل السربنتينة
طبعا كلنا عارفين السربنتينة اللي موجودة قدام الرادياتير ومش محتاجة صور وعلي كده نفهم انه كلما زاد كفاءة التبريد في السربنتينة ( تنظيف السربنتينة - التأكد من عبور الهواء من خلالها - كفاءة المروحة ) زادت كفاءة المكيف

[samaty]

دلوقتي الفريون خارج من السربنتينة في صورة سائل متوسط الحرارة وبيمشي في الماسورة اللي إنت بتلاقيها دافية (أيوة الماسورة الدافية هي الماسورة اللي خارجة من السربنتينة) بيدخل الفريون على حاجة اسمها المجفف
المجفف دا عبارة عن حوض بيدخل ليه الفريون ويخرج تاني
طيب معمول ليه
تخيل لو إن الفريون فيه أي شوائب لما تعدي هنا هترسي في قاع الحوض ومش هتكمل مع الفريون الخفيف وعلشان كده سموه المجفف لانه بيخلص الفريون من شوائب الزيت او المياه او أي رايش خفيف ممكن يجي مع الفريون
كمان جواه حساس الفريون ودا عبارة عن حساس بيفصل الكهرباء عن الكباس لو مفيش فريون

[samaty]

خرج الفريون من المجفف هيروح لحاجة اسمها الاكبنشن فالف أو صمام التمدد
أبسط تشبيه له هوا إنه فونية
عارف لما تروح المغسله وتلاقي المياه خارجة من مسدس المياه زي الرزاز .... إيه اللي خلاها كده
طبعا لإنها عدت من ضغط مرتفع إلى ضفط منخفض من خلال فتحة ضيقة ( زي رشاش الإنجكشن بالضبط)
أو زي البخاخة
أهي دي وظيفة الاكبنشن فالف ( صمام التمدد )
بيبخ الفريون السائل علي شكل رزاز جوا ثلاجة التكييف
وكمان له وظيفة مهمة جدا وهي التحكم في سرعة سريان الفريون في دورة التبريد
دا شكل الاكبنشن فالف اللي موجود في تكييف العربية


وهنعرف شرح مبسط على نموذج للإكبنشن فالف نعرف طريقة عملة وأهميته

نلاحظ هنا ان الاكبنشن فالف عبارة عن صمام تؤثر عليه اربعة ضغوط مختلفة
p1 وهذا الضغط قادم من أنبوبة مقفلة من الفريون تكون ملتصقة بخط سحب الفريون الخارج من الثلاجة ومتجه إلى الكباس
كلما زادت حرارة الفريون الخارج من التلاجة زاد هذا الضغط وكلما قلت الحرارة قل الضغط
وهو يضغط باتجاه فتح الصمام
p4 وهو الضغط القادم من خط الطرد القادم من الكباس وهو يضغط باتجاه فتح الصمام
p3 وهو الضغط الواقع من الياي ( السوستة) الموجودة بداخل الاكبنشن فالف وهو يضغط باتجاه قفل الصمام
p2 وهو ضغط الخارج من الثلاجة والمتجه إلى الكومبريسور وهو يضغط في إتجاه فتح الصمام
للحديث بقية

[amz2011]

موضوع رائع

[amz2011]

لو سمحت هو الزيت بتاع الكباس بيتزود من انهى حته

[امير حسين]

ما شاء الله عليك ربنا يزيدك من علمة

[haisam ali]

الله يفتح عليك يا شيخ ابراهيم ..... موضوع ممتاز بجد

[mohamed-adly]

الله ينور ياشيخ إبراهيم

[hilal]

ما شاء الله
ربنا يشفي بنتك ويزيدك علما

[احمد فهمى]

ممتاز ومفيد جداً هنضيفو فى ورشة اوبل وهنقل نسخه للقسم التعليمى

[samaty]

لو سمحت هو الزيت بتاع الكباس بيتزود من انهى حته

لو فكيت الفلنشة هتلاقي تحتها مسمار الزيت

[ayman hamdy]

الله ينور عليك ويزيدك من علمه ويشفي لك بنتك وتفرح بيها
تحياتى

[samaty]

الله ينور عليك ويزيدك من علمه ويشفي لك بنتك وتفرح بيها
تحياتى

اللهم آمين هي وبنات المسلمين
شكر الله لك