محركات الايكوتك و حساس درجه حراره الهواء وقدره المحرك المهدوره

[ashourashour]

الموضوع ده يخص المحركات الايكوتك من اوبل او مثيلاتها في محركات مصنعي سيارات اخري غير اوبل



الموضوع هيدور حول حساس مهم من حساسات المحرك و هو حساس درجه حراره الهواء الداخل للاسطوانات
واللي بيمر من خلال فلتر الهواء وبعد كدا في ماسوره كاوتش للبوابه ثم المانفولد الى الاسطوانات

الحساس ده مكانه على الماسوره بين الفلتر والبوابه زي ما واضح في الصوره بالاعلى واسمه Intake air temperature sensor



وفكره عمله ان مقاومته بتتغير مع تغير درجه حرارته


الكنترول محتاج يعرف درجه حراره الهواء الداخل و يبني عليها القرارت الاتيه:

1- في تغيير نسبه الوقود بتغيير اشاره الرشاشات بالزياده او النقصان



طبعا زي ماكلنا عارفين الاحتراق المثالي بيكون بخلط الهواء مع البنزين بسبه تقريبا 1:14
1 بنزين
14 هواء

ولو نسبه البنزين زادت بيكون مخلوط غني و بينتج عنه تلوث وانبعاثات و نقص في قدره المحرك و استهلاك عالي للبنزين وتلف علبه البيئه ان وجدت و بوجيهات سوده عليها كربون كتير

لو نسبه الوقود قلت بيكون مخلوط فقير وبينتج عنه ضعف في قدره المحرك و ارتفاع درجه الحراره و اكسجين في العادم و بوجيهات ناصعه البياض

على فكره لو المخلوط كان فقير بنسبه طفيفه جدا هينتج عنه اعلى اداء للمحرك لكن للاسف درجه الحراره هتزيد


كنترول المحرك مسؤل عن ضبط النسبه دي و بيستعين بمعلومات من حساسات كتير اهمها حساس درجه حراره المحرك و كميه الهوا الداخل للمحرك ولكن الموضوع ده هنتكلم فقط عن تاثير اختلاف درجه حراره الهواء على نسبه الخليط لنفس كميه الهواء الداخله للمحرك

عدد جزيئات الاكسجين في كميه محدده من الهواء البارد اكتر من عدد جزيئات الاكسجين الموجوده في نفس كميه الهواء الساخن !!
يعني لو ثبتنا نسبه البنزين و كميه الهواء : في حاله الهواء البارد هينتج مخلوط فقير واكسجين في العادم و في حاله الهواء الساخن ينتج مخلوط غني و كربون في العادم
لذلك لزم تعديل نسبه البنزين بناءا على درجه حراره الهواء الداخل وعدم انتظار استشعار حساس الاكسجين للعادم ليتم تعديل الفيول تريم


2- تعديل توقيت الاشتعال بالتقديم او التاخير



طبعا المقصود هو توقيت الشراره المترجم بزاويه عامود الكرنك في شوط الانضغاط واللي في الغالب بيكون 10 درجات قبل النقطه الميته العليا او قبل اخر مشوار البستون للاعلى لكن بيتم التقديم والتاخير بناءا على الظروف التي يتعرض لها المحرك

عند التقديم الزائد للشراره يحدث انخفاض في قدره المحرك و يحدث الصفع او النوك او التسقيف و كمان ممكن ارتجاف في المحرك عند الضغط عليه وارتفاع في درجه الحراره

عند التاخير الزائد للشراره تنخفض قدره المحرك بشده الاحساس بالخمول والكسل الشديد للمحرك بالرغم من الضغط على بدال البنزين 100% و تزيد درجه حراره المحرك و انخفاض السحب بشده على السرعات البطيئه للمحرك و تحسنه على السرعات المرتفعه للمحرك

طبعا كل سرعه للمحرك مع اختلاف الظروف زي الحمل عالمحرك و درجه الحراره يلزم تعديل التوقيت بالتقديم او التاخير بضع درجات

مثلا لو العربيه مفيش فيها حموله والجو بارد و دواسه البنزين مضغوط عليها برفق شديد مفروض يتم نقديم الاشعال الى اقصى درجه مسموحه

لو العربيه محمله و الجو حر ودواسه البنزين مضغوط عليها بعنف يجب تاخير توقيت الاشتعال الى اقصى درجه مسموحه

في حاجه مهمه جدا القدره الحصانيه والعزم للمحرك وجهين لعمله واحده بمعنى ان لو واحد زاد التاني يقل

مع تقديم الشراره بيزيد الهورس باور و بيقل التورك والعكس مع تاخير الشراره بيزيد العزم وبيقل في المقابل القدره الحصانيه

طيب السواق اه شعوره في الحالتين ؟

العربيه اللي بتميل لتقديم الشراره بيكون الضغط على دواسه البنزين خفيف مش بتحتاج تضغط الدواسه جامد بالبلدي كدا بتسندلها بنزين بتجري بس لو كبستلها بنزين مره واحده فالغالب هتسمع تسقيف وحاجه تانيه العربيه بتستجيب اكتر على سرعه المحرك المنخفضه وبتقل الاستجابه على سرعات دوران المحرك المرتفعه و بيوفر في البنزين ومناسب للسواق الرايق

العربيه اللي بتميل لتاخير توقيت الشراره بتحس المحرك كسول جدا عالسرعات المنخفضه و بيتحول مع السرعات المرتفعه كمان متسمعلوش تسقيف ابدا واستجابته عالسرعات المنخفضه سيء و عالسرعات المرتفعه ممتاز ومينفعش تسند بنزين لازم تحمل رجلك عالبدال شويتين و استهلاك بنزين عالي نسبيا مناسب للقياده الرياضيه والحرق

طبعا ايام الزمن الجميل كنا بنظبط توقيت الاشتعال بلف الاسبراتير في اتجاه دوران الشاكوش لتاخير الشراره و عكس اتجاه دوران الشاكوش لتقديم الشراره



دلوقت المسؤل عن ضبط توقيت الاشتعال كنترول المحرك




ملخص سريع
هواء بارد داخل للمحرك:
1-يتم زياده نسبه الوقود للحفاظ على قدره المحرك مع الحفاظ على النسبه الصحيحه للمخلوط
2-يتم تقديم توقيت الشراره فلا خطوره من حدوث صفع

هواء ساخن داخل للمحرك:
1-يتم تقليل نسبه الوقود الحفاظ على النسبه الصحيحه للمخلوط مع انخفاض في قدره المحرك
2-يتم تاخير توقيت الشراره لان احتمالات حدوث صفع كبيره جدا

طبعا افضل وضع ان الهواء يكون بارد
( و بيستخدم في كدا الكولرز اللي بتركب مع التيربو لان التيربو بينتج عنه هوا سخن دا موضوع تاني مش هنتكلم فيه دلوقتي )
طبعا كدا واضح ان اي خلل في قراءات حساس درجه حراره الهواء الداخل للمحرك هيغير اداء المحرك
بمعني ان لو القراءه اقل من القيمه الفعليه نسبه البنزين هتزيد عن المفروض و توقيت الاشتعال هيتقدم عن المفروض
لو القراءه اعلى من الحقيقه نسبه البنين هتقل عن المفروض و توقيت الاشتعال هيتاخر عن المفروض

هتكلم دلوقتي بالخصوص عن الفكترا سي .... اظن ملاكها عرفوا هيا بتحب تقدم الشراره ولا تاخرها !!!؟

المهم الملاحظ ان قراءه درجه حراره الهواء الداخل للمحرك اكتر من الفعليه بكتير !!!!!! ؟؟؟؟
والسبب التاثر بالسخونه الموجوده في حوض المحرك الناتجه عن المحرك

القراءه بتكون 70 درجه او اكتر او اقل في الواقع الحراره بتكون 35 مثلا

النتيجه بتكون:
تاخير شراره بدون داعي تؤدي لكسل المحرك جدا عالسرعات المنخفه !
زياده استهلاك البنزين بسبب التاخير في توقيت الشراره
مش بتسند بنزين لازم تمشي دايس دوسه حلوه
فقد قدره من المحرك

طيب اه العمل ؟؟

قدامك حلين
1-تنقل مكان الحساس بالضفيره لاول مكان يدخل منه الهواء عند الشبكه ....
2-يتم توصيل مقاومه عالتوالي مع الحساس لترحيل او طرح قيمه ثابته من قراءه الحساس وبالتالي تعادل درجه حراره الهواء الداخل الحقيقيه او اقل من الحقيقيه بنسبه بسيطه

النتيجه عن تجربه !!! اختلاف في الاداء كبير جدا .. اخيرا بسند للفكترا سي بتطير ! استجابه احسن بكتير على سرعه دوران المحرك المنخفضه !! استهلاك البنزين قل عشان تقديم الشراره ! الاحساس بالايزيترونك اختلف !

احنا مدحكناش عاى كمبيوتر الموتور .. الموتور كان بيستلم قراءه خاطئه و بيبني عليها قرارات غلط

ممكن حد يقول انت كدا هتخلي الكنترول يقدم توقيت الشراره هيحصل صفع و تكسير للبستونز
الجواب لا طبعا عشان في حساس الصفع عالبلوك بياخر الشراره عند استشعار اي صفع بالمحرك

ممكن حد يقول كدا نسبه البنزين ممكن تزيد و هتبوظ علبه البيئه و تستهلك بنزين اكتر
هقوله حساس الاكسجين والفيول تريم فنكشن ؟ اللي بتطرح او تجمع قيمه ثابته على نسبه البنزين بناءا على قراءه حساس الاكسجين

الخلاصه كل اللي هيحصل ان توقيت الاشتعال هيميل للتقديم بخلاف الوضع القديم اللي كان بيميل للتاخير

مين عايز يجرب ؟؟؟

طبعا الموضوع ينطبق على اي عربيه حساس درجه حراره الهواء الداخل للمحرك بيقرا اكتر من درجه الحراره الفعليه بكتير نتيجه تاثره بدرجه الحراره المنبعثه من المحرك


طولت عليكم !

[ashouhdy]

ماشاء الله اية المعلومات دى :)

انا مفهمتش غير اخر جزء بتاع ال 70 و هى 35 بس الكلام كبير و 100 100

[hilal]

إيه الجمال ده
دي محاضرة ولا أروع
في أسلوب مبسط ، بطريقة السهل الممتنع
ربنا يبارك في علمك ،
وأنا بفكر في طريقة لتوصيل الهواء البارد إلى مكان الحساس بدلا من نقل مكان الحساس نفسه
تحياتي واحترامي لشخصك الكريم

[ashouhdy]

إيه الجمال ده
دي محاضرة ولا أروع
في أسلوب مبسط ، بطريقة السهل الممتنع
ربنا يبارك في علمك ،
وأنا بفكر في طريقة لتوصيل الهواء البارد إلى مكان الحساس بدلا من نقل مكان الحساس نفسه
تحياتي واحترامي لشخصك الكريم

يبقي انت كدة مفهمتش كلام الراجل

المشكلة مش في الهوا ... المشكلة في مكان الحساس نفسة قرب حوض الموتور فبيقرا نااار

[ashouhdy]

سؤال معلش

حد شال علبة ال resonator اللى تحت فلتر الهوا ؟

[pioneerahmed]

الكلام دة نظريا صح
بس سؤال لية المصنع عامل مكان الحساس هنا؟

[hilal]

الكلام دة نظريا صح
بس سؤال لية المصنع عامل مكان الحساس هنا؟

أضيف لسؤالك السؤال التالي:
ليه المصنع عامل مواسير التكييف بجوار فرن الشكمان في أوبل فيكترا؟
أعتقد انه عدم توفيق في التصميم

[pioneerahmed]

ممكن دة يكون عيب تصميم في الاوبل
لكن بردو عيب تضميم في كل العربيات انهم يحطو الحساس دة في قلب الموتور؟؟؟ اشك بصراحة

[hilal]

يبقي انت كدة مفهمتش كلام الراجل

المشكلة مش في الهوا ... المشكلة في مكان الحساس نفسة قرب حوض الموتور فبيقرا نااار

أنا بنيت الاقتراح السابق ، قياسا على وجود فتحة في مقدمة السيارة لسحب الهواء البارد إلى علبة فلتر الهواء ، و قلت ربما يمكن تنفيذ نفس الاسلوب لتوصيل الهواء البارد لمكان الحساس ، فهل الفكرة سليمة أم خاطئة؟

[MaaM]

الله ينور يا أبو عاشور
بس يعني ايه كلمة "العربيات اللي بتميل"
هل تقصد بسبب مكان حساس قياس درجة حرارة الهواء الداخلة ؟

واقتراحك هايل يا دكتور هلال

[MAHMOUDKOZZIKA]

الله ينور عليك كالعادة مواضيعك بتختارها بعناية وشرح ولا أجمل ولا أروع من كده

وللتاكيد على كلامك اى حد معاه الفكترا سى أو ساقها وجرب طلعتها وركب أسترا أتش يعرف الفرق ما بين الطلعة فى الأتنين وكان طبيعى الواحد يستغرب ازاى الفكترا سى بجلالة قدرها مبتسحبش فى طلعتها او بتاخد وقت ولازم تتقل رجلك على البدال حبتين مش زى الاسترا هى لمسة واحده تلاقى العربية فركت معاك بس دلوقتى بعد الشرح ده اكيد كل الناس عرفت الفرق ده جاى منين .

[MaaM]

ايوة ، بس في الأسترا البرازيلي الطبيعي بتاعها انها من دوسة بتنط من على الأرض ، لكن في أوقات كتير كانت بتاخد وقت عقبال ما تسحب ، زي اكنها مخنوقة
مش ممكن يكون دا بسبب قراية الحساس الغلط باردوا ؟

[besso]

طب فيه احل اسهل من وجهه نظرى

نعزل خرطوم الهواء كله لحد البوابه وبكده ضمنت بردو ان الحساس ياخد القراءه الفعليه للهواء اللى هو هايبقى بارد بردو

[Mr Rami]

يعطيك الف عافيه - موضوع اكثر من رائع

[فادى محمد]

الله ينور يا هندسه
فكره تركيب مقاومه ع الحساس تطرح من قيمته رقم ثابت شايفها اففضل من تعديل مكانه