رحلتى فى بيع العربيه ... موضوع خارج السيارات !!!

[haisam ali]

السلام عليكم ورحمه الله وبركاته
النهارده جايلكم بموضوع كالعاده ( من مواضيعى الممله ) بس أنتوا عارفين بقى انا بحب افضفض معاكم فى أمور العربيات وخلافه :-

طبعا انا كنت من فتره كتبت هنا فى المنتدى انى ببيع عربيتى الاوبل فيكترا ٢٠٠٣ ( cd ) وربنا لوحده اللى يعلم انى كان نفسى اى حد هنا فى المنتدى هوه اللى ياخدها بس انا عارف انى كنت رافع السعر شويتين تلاته بس ده اقسم بالله من نظافه العربيه بجد .. المهم ماطولش عليكم طبعا كان كلمنى كذا اخ هنا فى المنتدى عليها وكان الموضوع كله بيتلخص فى ان سعرها غالى وبس وتقريبا الحالات مبقتش تفرق كتير ...

فانا من تجربتى الشخصيه فى بيع العربيه عايز انقلكم مدى سوء اللى انا مريت بيه :-

١- مفيش اى حد بقى بيصدق اللى انت بتقوله نهاءى حتى لو حلفت بالله ( ودى بجد كارثه )

٢- بيتساوى الانسان الفاهم فى العربيات وخصوصا الاوبل مع الانسان اللى بيتاجر او عادى يعنى بيركب كورى وخلافه ( ودى كارثه ثانيه )

٣- كميه الشك اللى بتبقى باينه فى عين المشترى وتحسه عايز يقولك انت حرامى وانا عارفك نصبت عليا قبل كده ( ودى كارثه ثالثه )
المهم ماطولش عليكم أخدت بنصيحه الكبير ( الاستاذ فادى محمد ) ونزلتلها اعلان على كونتاكت وبرضه مرضتش ارفع صور عشان مش بحب الموضوع ده ومعظمكم هيفهمنى ليه ...

بدأت الاتصالات تيجى يمكن من اول ساعه ... كل اللى بيتصل بيتكلم فى السعر بس هوه السعر وبس وموضوع العربيه ده مش قصه يعنى المهم انت اخرك كام

وبدأت أبعت صور لناس على الواتس أب وافهم فيهم بجد ياجماعه العربيه حاله بسم الله ماشاء الله فوق الممتازة وحبيبى Hesham h هوه شايفها ويقولكم عليها ... المهم أبعت صور لده وده وده وبعت بتاع ٦ مرات صور للعربية ... وحصل اللى كنت متوقعه العربيه بدأت تعمل حجات غريبه جدا والحمد لله على كل شىء ظبطتها برضه عشان اللى ياخدها يفضل يدعيلى العمر لان الحجات دى بتفضل بجد ياجماعه

وكان بيجيلى اتصالات غريبه جدا واغربها من الاسكندرانيه ... طبعا انا من رشيد والمسافه بينى وبين اسكندريه حوالى ٥٠ كيلو على الطريق الدولى عالطول حاجه زى الفل ... تلاقى الاسكندرانى بيسال كانت منين .. ياعم مانا كتب فى الإعلان انا منين .. ويقولك طاب ماتجيلى ... ياعم اجيلك اذاى هوه مش انت اللى بتشترى ... واغرب سوءال عنيف واجهنى .. هيا مرور ايه ؟؟؟ فتقوله مرور دسوق يقولك لا انا بحسبها هنا فى اسكندريه ... هههههههههههههههههه يعنى هوه المفروض انا اجيلك وافرجك عليها وانقلهالك لحد بيتك وارخصهالك فى مرورك عشان تشتريها ... ياجماعه ده الواحد راح مره لحد بنى سويف والاسماعيليه عشان اشترى عربيات سليمه وكانت بتطلع مضروبه كمان بعد المشوار ... ياجماعه العربيه السليمه تسوى فلوس وتعب كتير اوى مهما كان مكانها .. لأنك هتتعب اسبوع وهتنام مستريح العمر كله ..

لحد ما تصل عليا أنسان محترم جدا وابن ناس وفاهم ... قالى العربيه ايه ظروفها حكيتله ان انا جايبها ليا ومكنتش هبيعها بس عشان ظروف السفر وكده وحجات من دى وأنى بدور على واحده cd بقالى سنين وكده زى مافهمتكم

قالى تمام انا هاجى ابص عليها .. المهم جالى وهوه من القاهره اتفرج مبدأياً على العربيه وقالى تمام بسم الله ماشاء الله وقالى بس انا عايز اكشف عليها وكده

قولتله تمام .. قالى يومين كده وهجيب اسم مركز فى اسكندريه يكشف عليها ... طبعا انا تخيلت انه هيروح اى مركز خدمه او ورشه بالبلدى يعنى وانا بينى وبينكم مش بحب شغل الصنيعيه ده والتفعيص والقصص دى ومش بحب أفرج العربيه لحد بس انا واثق جدا الحمد لله من حاجتى وعايز اطمن المشترى

المهم لقيته بيكلمنى وبيقولك انا جاى فى الطريق وحجزت عند منصور اوبل فرع العامرية ( التوكيييييييل )

وهنا توقف القلب عن العمل وقعدت أقول توكيل ايه دى عربيه بقالها ١١ سنه على الطريق وشغاله كتير

بس ماينفعش أقول لا عشان كده يبقى انا راجل مش تمام وعربيتى مش تمام وانا الحمد لله كنت واثق جدا بفضل ربنا طبعا وبفضلكم ان العربيه زى الفل مافيهاش غلطه وقولت ياد ياهيثم حتى لو طلع فيها حاجه اديك تبقى عرفت ايه اللى هتعمله وماتبيعهاش بقى ... لانى الصراحة كنت بتلكك عشان مابيعهاش وعايز ارفعها بس عشان زى مافهمتكم جراجى رطوبه عاليه جدا وكنت خائف عليها

طلعلنا على التوكيل واستلموا العربيه مننا وقعدوا فى الفحص ده بتاع ٣.٥ ساعات وانت طبعا على اعصابك ... وبعديها طلع المهندس قابلنا وقالى هيا عربيتك قولتله اه ... بينى وبينكم قولت العربيه دى معدومه بقى لما سال كده

المهم بصلى وقالى بسم الله ماشاء الله .. العربيه دى زى الفل احنا فحصنا كل حاجه وكل حاجه تمام ماعدا

١- قواعد الموتور اللى انا غيرتها مرتين ... ومش عارف ليه هيا مش مظبوطه
٢- سير الدينامو عايز يتغير
٣- عدد ٢ مساعد خلفى خفيف ... ودول مافيهومش اى حاجه كل القصه انى كنت محمل العربيه تقيل قبل منها بيوم فزى ماتقولوا المساعد رشح زيت خفيف ... لانى روحت للعفشجى قالى زى الفل ولاتسمع كلامهم
٤- قطعه المونيوم من اللى هيا العازل فوق الشكمان دى ناقصه ودى مش منى والله
٥- قطعه فبر بتركب فى الاكصدام الامامى عشان تدار الدينامو من تحت ودى برضه مش منى ومكنتش اعرف عنها حاجه لانى ماشوفتهاش اصلا
٦- رش خارجى لعربيه بالكامل ... ودى طبعا انا قائل عليها والعربيه دى ياجماعه بسم الله ماشاء الله اللى يشوفها يقول زيرو واسألوا ال h

الحمد لله جه صاحب العربيه بعديها بيومين أخدها منى وخلصنا الحمد لله وربنا يباركله فيها يارب ...

وانا من خلال الموضوع الطويل الممل بتاعى ده ياجماعه كنت عاوز انقلكم التجربه دى عشان كذا نقطه :-

ليه مابقيناش نصدق بعض بالطريقه دى ... يعنى ليه وصلنا لكده
العربيه السليمه ياجماعه والمصروف عليها تستاهل انك تشتريها وتتعب وتروحلها لو فى أسوان
ضرورى جدا تكشف فى التوكيل

أسف جدا للاطاله وكل عام وانتم بخير

ومازلت أكرر وأكرر انى مرابط معاكم هنا فى الجروب حتى يفرقنى عنكم الموت باذن الله ... عشان افضل اطحن فيكم مواضيع من الشيقه بتاعتى دى

[exelence]

موضوع شيق بصراحه و مبروك عليك بيع العربية و عقبال الجديدة ان شاء الله

[ayman hamdy]

مبروك عليك يا هيثم البيع ومبروك على المشترى العربية الجميلة دى
تقبل تحياتى

[Mamoud salah H]

محدش بيقدر غير قليل اوي اوي وانا لسة كنت زيك في نفس الدوامة بس متوفقتش في البيع بسبب بخس الاسعاار
وان كل الي عايز يشتري عايز ياخد كل حاجة بالفبوس الي معااه

ومع اني كنت بكتب كل حاجة في الاعلان وبالتفصيل الممل وايه الي محتاج يتصلح وايه السلييم ومسبتش حاجة مقولتهاش ومع ذلك الاقي الي بيتصل بيا ويقولي العربية محتاجة ايه وحالتها ايه وافضل احكي نفس القصة وفي الاخر يقولي طيب شكرا او يفاصل في السعر وينزل الارض ويقفل

وكل كوم والي يديني معااد واستنااه والغي مواعيدي عشان البيه يشرفني وفي الاخر ميجيش ولا حتي يكلف نفسه مكالمة تليفون يقول انا مش جاي وافضل انا مستني بقي

وترتب علييه اني مبعتش العربية لاني مش مرغم وكنت بغير عشان اركب اوتوماتيك واعلي الموديل شوية
وبدأت في رحلة شد العربية

وفي النهاية الف مبروك البيع وربنا يكرمك في حاجة احسن منها

[أحمد جودة]

والله كلامك جميل وموضوعك مميز أنا كمان والله كنت بفكر ابيع عربيتي وبعد ماعملت عنها اعلان على كونتاكت عدلت الاعلان وكتبت كل صغيرة وكبيرة عن العربية وخاصة عيوبها علشان اللى جاي يشتريها ميدعيش عليا بعكس لما كنت بشتري العربية كنت بروح على وصف الاعلان بلاقي عربية تانية خالص وتعبانه ..... عموما الصدق والصراحة افضل طريق حتي لو دة كان ممكن يخليك متبعهاش

[hdmrdash]

مبروك على البيع

[Mecha]

ردا علي الاخ هيثم
عشان احنا في ارض كدب وخداع وغش وتدليس وخلف العهود
ارجع خمسين سنه فاتوا وروح خمسين سنه جايه هي هي
اللي قايم من السجاده زي اللي ماسك الازازه الا من رحم ربي
رب ارحمنا من نفوسنا البغيضه

[amr elsisi]

مبروك يا هيثم
قبل ما اشتري الاوبل كان معايا لانوس
مكنتش عجباني خصوصا في السفر
المهم كان فيها كام حتة باروما اتعملو واترشت العربية حزام كامل من غير السقف
والفرش الداخلي زي الفل وبطارية جديدة
وكل الي كان يجيلي واقول لة علي نظافة العربية
اكتر كلمة بتغزني انت بتعمل لنفسك يا استاذ
يعني الناس بتساوي بين النظيفة والمعفنة
علشان كدة ممكن تلاقي اغلب الي بيبيع بيبيع العربية وهيا معفنة من غير اي اعتناء
علشان حتصرف وتيجي تقول لة كذا وكذا
انت عامل لنفسك يا استاذ

[haisam ali]

فعلا ياهندسه ... انت عامل لنفسك يا أستاذ

[shiko85]

السلام عليكم ورحمه الله وبركاته
وعليكم السلام ورحمة الله وبركاته
فانا من تجربتى الشخصيه فى بيع العربيه عايز انقلكم مدى سوء اللى انا مريت بيه :-

١- مفيش اى حد بقى بيصدق اللى انت بتقوله نهاءى حتى لو حلفت بالله ( ودى بجد كارثه )
لان للأسف فيه ناس كتير بيحلفوا بالله كدب لمجرد انه يقنعك بالشراء مش عارفين خطوره ده ايه
٢- بيتساوى الانسان الفاهم فى العربيات وخصوصا الاوبل مع الانسان اللى بيتاجر او عادى يعنى بيركب كورى وخلافه ( ودى كارثه ثانيه )
اللى بيشترى كل اللى بيفكر فيه العربيه هتخلص بكام
٣- كميه الشك اللى بتبقى باينه فى عين المشترى وتحسه عايز يقولك انت حرامى وانا عارفك نصبت عليا قبل كده ( ودى كارثه ثالثه )
لان السوق معظمه نصب و غش و زى ما حضرتك قولت كنت بيتروح تشوف عربيات و تطلع ملهاش اى علاقه باللى كان بيتقال عليها
انا شوفت نصب و كدب و غش فسوق العربيات عمرى ما شوفت زيه فحياتى
عربيات راشه و باين الرش و البائع يقولك فابريكا
عربيات مانيوال و بقت اوتوماتيك و بيضحكوا على الناس
غير العربيات اللى مغيره نص او ربع
فعلا الواحد لازم يشك فأى حد و بيتعامل مع الأمين زى النصاب

[mohamed-adly]

كلام سليم وواقع ...

وانا لما كانت معايا الفيكترا قبل ماجيب الكورسا جالي اكتر من شخص كان كل واحد يقعد يفتي ولما اقوله انا عايز فيها نهائي مثلا 10 قروش تلاقيه يقولك دي اخرها 5 قروش

لحد ماكلمني واحد بيركب اوبل واتفرج ع العربية وبعدها بكام يوم جه هو وواحد اتفرجله ع العربية وخدها ومشفتوهوش من بعدها بقيت انا بتصل عليه اطمن ع العربية *_* عشان وحشاني بس

[mostafa3000]

الف مبروك

[Mamoud salah H]

والله انا لسة واحد مكلمني علي العربية النهاردة الصبح وقالي جاي اتفرج عليها الساعة 4 واكد عايا واكدت علييه ونزلت غسلت العربية ونضفتها ولغيت كذا مشواار عندي وفي الاخر مجااش ولا حتي كلفنفسه يتصل يقول انا اسف مش هقدر اجي وضيع عليا اليوم علي الفاضي

[ENG\AHMED]

فكرتنى .. لو انا حكيت هكتب مواضيع
ملخص الكلام الناس بقت تحب اللى بحور وينصب عليها انما تيجى معاه فى العدل وتتعامل باحترام مبيعجبش
وعلشان كده الحرامية والنصابين هم اللى مرتاحين فى البلد دى

[Abo_Mazen]

ردا علي الاخ هيثم
عشان احنا في ارض كدب وخداع وغش وتدليس وخلف العهود
ارجع خمسين سنه فاتوا وروح خمسين سنه جايه هي هي
اللي قايم من السجاده زي اللي ماسك الازازه الا من رحم ربي
رب ارحمنا من نفوسنا البغيضه