التخفيض الجمركي على السيارات الاوروبية -- حسبة بسيطة

[mailo]

انه يتم وضع ضرائب عاليه على العربيات ولكن سعر البنزين بيكون مدعوم والرخيص بيكون رسومه معقوله

العربية الجديدة مابتستهلكش بنزين زي القديم
ليه بقى أنا ادفع جمرك عالي وعربيتي استهلاكها 7/100 عشان واحد معاه عربية خردة بتقول صفيحة في ال 100

[Mohamed_89]

موضوع ممتاز
بس هل فعلا بيتم تخفيض الجمارك سنوياً بنسبة 10% من قيمة الجمارك المفروضة لإن الواحد مش حاسس بالموضوع ده وانا مبتكلمش في الحالات اللي بيحصل فيها تغيير للتصميم زي من لانسر بومة مثلاً لشارك لان طبيعي ان السعر يزيد انا بتكلم عن مثلا حالات زي السيفك مثلاً من 2007 : 2011 نفس الشكل المفروض ان موضوع االتخفيض الجمركي يكون ملموس فيها؟

[Missie]

الموضوع له عيب و ميزة..

الميزة, ان هايبقى سهل ان اى حد يجيب عربية جديدة بسعر معقول بدل الأسعار العجيبة دلوقتى, انا بادخل أشوف اسعار العربيات بره مصر ضغطى بيعلى D:
و طبعاً ده هايسهل ان مثلاً زى ما m20ahmed قال الناس اللى ساكنة فى المدن الجديدة يروجوا و يرجعوا و يخفوا الضغط من على البلد..
ده غير ان الواحد يترحم من المواصلات فى البلد اللا أدمية دى..

العيب و اللى مالوش حل تقريباً..
مفيش مكان !!
بمعنى, فى الامارات مثلاً عشان يبنوا اى مبنى لازم التصميم يكون فيه مكان لجراج الناس تركن فيه..
عدولى هنا فى مصر كام مبنى فيه حاجة زى كده؟؟ قليل أوى..
يعنى احنا فى الشارع عندنا الواحد مش بيركن, بجد بمعنى الكلمة الواحد بيرمى عربيته فى اى مساحة فاضية عشان مفيش مكان لركنة, هابقى ارفعلكوا صورة للمنظر D:

تانى حاجة, فى اى حتة فى العالم الناس بتصمم الشوارع عشان تستحمل ل 50 سنة قدام على الأقل.. تصميم الشوارع هنا يستحمل 3ايام و نص بالكتير قدام..

الشوارع ضيقة و استحالة تستوعب كميات العربيات دى, و انتوا اكتر ناس عارفين الزحمة فى مصر شكلها ايه.. يعنى تخيلوا مثلاً شارع فيصل العربيات لو زادت فيه بنسبة 30% أو 40% D:

المدن الجديدة اه حل بس مش هايخفف الأزمة أوى عشان احنا عندنا مصيبة اسمها المركزية, كل حاجة فى العاصمة, معظم الناس شركاتها متمركزة فى مناطق معينة...

القانون ده لو اتطبق مرة واحدة بجد انا شايفة ان هاتبقى كارثة, اذا كان مبيعات 2011 وصلت 178 الف عربية تقريباً و بالاسعار دى, لو اتشالت الجمارك هاتوصل كام؟؟؟!!

الحل.. لا يوجد حل قريب, لازم ثقافة شعب تتغير, بدل ما كل واحد يركب عربيته , كل مجموعة فى منطقة مثلاً يركبوا مع بعض و يبدلوا العربيات (اضعف الايمان), يبقى فيه بدائل أدمية بدل الاوتيبيسات المتهالكة و الميكروباصات اللى عايزة الحرق و المترو اللى احسن الواحد يمشى بدل ما يركبه =/ عشان الناس تستخدمها..

و لو اتطبق القانون ده, لازم يتطبق تكهين العربيات القديمة, المصريين عندهم عادة عجيبة فى الاحتفاظ بالاشياء كانما اصبحت جزء من روحهم (و مش فى العربيات بس).. و لو قلنا العربيات القديمة موجودة علشان ناس كتير مكانش معاها حق العربيات الجديدة, مش هايبقى فيه حجة بعد كده !!

الحكومة اللى ربنا ينتعها بالسلامة و تيجى تبدأ عمليات ترميم للشوارع و توسيعها لو أمكن و الاهم التشجيع على الانتقال لأماكن تانية زى المدن الجديدة, و تبقى فيه تسهيلات للشباب بقى و للشركات عشان تفتح فروع جديدة هناك, اى حاجة بس يفضوا البلد شوية =S

اه, و ياريت يلغوا التوك توك D:

سورى طولت عليكم بس الموضوع شدنى..

[Missie]

...

[maskeen]

التخفيض يسرى على السيارات الاوروبيه فقط يااخ Missie ولذلك السيفيك لن تتاثر
انا هاضرب مثل ممتاز
الباسات والدى اشتراها زيرو 2007 ب 230
الان بعد 5 سنين من ارتفاع سعر الصرف بتتباع الشكل الجديد ي 235 يعنى تقريبا بدون زياده
وده معناه انخفاض فى السعر لان الجنيه قيمته قلت من 5 سنين فاتت
الامر كمان يسرى على ال 180 وال 310 والاودى A4 كلهم سعرهم تقريبا ثابت من 4-5 سنين