أسعار قطع غيار 316 الدبانه من موديل 91 الى 97

[m000dy]

بسم الله نبدأ
فى الفتره الاخيره اتحول اهتمام عدد لا بأس به من الناس لشراء البى ام 316 شكل اول الدبانه اللى هو من موديل 91 لموديل 97 وده لان سعرها اصبح فى حدود سعر عربية كورى مستعمله وكمان لانتشار المقوله اللى بتقول (انا اركب اسد عجوز ولا قرد بصحته) هههههههه بخلاف ان العربيات الجديده بنفس السعر تكاد تكون بتوفر الكماليات اللى فى البى ام موديل التسعينات بخلاف انها لو وفرت هذا الكم من الكماليات فمش هاتقدر توفر الامان والثبات اللى بتوفره البى ام بجميع انواعها وباختلاف موديلاتها
انا ليا اصحاب بدأو يبيعوا فى عربياتهم الزيرو ويشتروا بى ام 316 او 318 بالكتير عشان اسعار قطع الغيار بدأت فعلا تبقى اقل من عربيات كورى كتير ومثال على كده
واحد صاحبى راكب دايو لانوس موديل 2000 والله والله والله واحد صاحبنا كان مسافر بورسعيد سأل له على جوز فوانيس خلفى استيراد مالقيهم واما لقيهم عند واحد قاللو ب 500 جنيه فى الوقت اللى فوانيس البى ام الخلفيه لا يتعدى سعرها استيراد هذا ال 400 جنيه
باختصار انا حبيت اعمل موضوع يشمل اسعار قطع غيار ال 316 وبكرر موديل من 91 ل 97 فقط لانها هى اللى عليها الطلب ولان فى فرق شاسع بينها وبين موديل 98 وانت طالع ودى اسعار حاجات شفت صحابى بعنيا شاريينها ورجاء اللى عنده العربيه دى او يعرف اسعار قطع غيارها يقول على اللى يعرفه لتعم الفائده ولان ده هايساعد ناس كتير تاخد قرارها بخصوص شراء العربيه دى

- جوز ركب بمساعدينهم وياياتهم وطنابيرهم وكمان تيل الفرامل بتاع بلاده 600 جنيه
- جوز بطاحات جدااااااد ب 300 جنيه
- طرمبة بنزين اصليه جديده ب 600 جنيه
- موبينه استيراد ب 400 جنيه
- تيل فرامل امامى ب 160 جنيه ( ماعرفش نوعه بس كويس)
- تيل فرامل خلفى ب 220 جنيه ( ماعرفش نوعه بس كويس)
- عفشة كامله استيراد ب 2000 ل 2500 بتاعت ال 316
- وش لوحة تحكم التكييف التاتش ب 150 جنيه
- تعديل فوانيس خلفى كريستال ب 150 جنيه فى الحرفيين
- علامة الدبانه اللى فى وش الشبكه ب 100 جنيه استيراد
- سير كاتينه ب 120 جنيه

والبقية تأتى ان شاء الله

[emmer]

اخى الكريم جزاك الله خيرا على هذا الموضوع الشيق
ولكن عندي استفسار هل فعلا مقولة (انا اركب اسد عجوز ولا قرد بصحته)
افضل من ان تركب سيارة كوري زيرو فى حين انة ممكن فى ايامنا دي انك تجيب عربية صيني زيرو وانت اول واحد يركبها بسعر البي ام القديمة انا عارف انى فى اختلاف كلي بين ده وده لكن بما انك فتحت الموضوع فارجوا الرد وبرضة نخلية لعشاق البي ام
على فكرة انا معايا نوبيرا وبفكر جديا اغيرها ب bmw 316 موديل 94 بس خايف تكون مغامرة انا مش قدها
وشكرا مرة اخرى اخي الفاضل

[m000dy]

استاذ emmer الدايو نوبيرا بالذات مع احترامى الشديد من اسوء العربيات الكورى فى العفشه والفتيس الاوتوماتيك وطنابير الفرامل حضرتك مستنى تكون اسوء من كده ايه عشان تغيرها هى ان كان فيها ميزه فانها من العربيات الثابته على الطريق فى الكورى ومافتكرش هاتقارن بثبات البى ام
كل الموضوع ان المستعمل حضرتك مابتعرفش استعماله قبلك كان ازاى عشان كده بتتاكد من حاجتين اساسيتين فى البى ام
الاساسيات زى اى عربيه والموتور (نوعه عشان بيفرق فى اسعار قطع الغيار) بخلاف كده الموديل اللى بنتكلم عليه ممكن تتغاضى عن حاجات سهل انها تتجاب
وماتنساش حضرتك ان الحاجه بتتجاب مره واحده عشان كده اذا ربنا كرمك بحاجه كويسه اول حاجه تعملها تغير السيور والفلاتر وفوقهم طرمبة الميه وطرمبة البنزين بكده مبدأيا العربيه مش هاتقف معاك خالص ان شاء الله وبعد كده كله سهل
تكملة لاسعار قطع الغيار

- فوانيس الاشارات الجانبيه بالغمازات ب 45 جنيه جديده

[sedmam]

الله عليك فعلا الكلام ده صح انا معايا 316موديل 1998 والاسعار دى ويمكن ققل شويه فى بعض الحاجات بس المهم انك لو هتشترى استيراد تكون واخد بالك الحاجة كويسه ولا لا وربنا يوفقكم

[rompo10]

اسعار معقوله

[m000dy]

الله عليك فعلا الكلام ده صح انا معايا 316موديل 1998 والاسعار دى ويمكن ققل شويه فى بعض الحاجات بس المهم انك لو هتشترى استيراد تكون واخد بالك الحاجة كويسه ولا لا وربنا يوفقكم

وشهد شاهد من اهلها هههههههههه
لو العربيه اللى مع حضرتك اخر الدبانة القديمه ارجو انك تساعد اخوانك بوضع اسعار قطع الغيار اللى اشتريتها
وشكرا لمرورك

اسعار معقوله

وحقيقية

[TheBuccaneer]

فوانيس خلفيه ب 500 - 600 جنيه > أستيراد >
وصلة عمود كردان ب 350 جنيه < أستيراد >
بطاحات أماميه خاصه ب E46 و ليس ال E36 و هى أفضل من بطاحات ال E36 ب 500 جنيه < أستيراد >
طرمبة باور ب 1550 < جديده > - أو 850 جنيه < أستيراد >
شكمان محرك 18iS موديلات ما فوق ال 1996 المعروف ب M44B19 ب 2000 جنيه < أستيراد >
فتيس أتوماتيك ب 5000 جنيه < أستيراد > - تحويل من أتوماتيك لمانيوال فى حدود سعر 2500 - 3000 جنيه.
بودى بلف < قلب و روح الفتيس > لفتيس أتوماتيك وهو نفس الموجود بفتيس ال E46 الأتوماتيك بالضبط ب 1500 - 2000 جنيه < أستيراد >
طنابير خلفيه بوش ب 650 جنيه < جديده > و تيل خلفى بوش ب 380 جنيه < جديد > ( طبعا فيه أسعار أخرى مثل التى ذكرها صديقنا بالبدايه للطنابير و التيل لكن هذا أفضل نوع موجود, و للأمانه إن وجد طنابير استيراد بحله جيده و ليس بها شفه داخليه أفضل من الجديد ).
زوج مقصات خلفيه أستيراد بالطنابير و بدن مساعدين ب 800 جنيه ( عفشه 6 سليندر )
4 بوجيهات < 4 شمعه حسب المحرك الموجود معى > ب 150 جنيه.
فلتر هواء ب 60 جنيه تقريبا.
كارتيرات رفارف أماميه ب مثلاثاتهم ب 370 جنيه تقريبا < أستيراد >.
عداد 240 ب 350 جنيه < أستيراد >.
زوج باغات زجاج لفوانيس فوجات ب 50 جنيه.
أيرماس ب 750 جنيه < استيراد > - و ب 1250 جنيه < جديد > ( لكن للأمانه الأستيراد أفضل من الجديد لأنه مضمون و التقفيل بينهم واضح انه فى صالح الأستيراد ).
حصيرة الفتيس الموجود بها علامات ال S - E - M ب 450 جنيه < جديده >.
فرش سقف كامل ب 400 - 450 جنيه.
زوج مساحات أصليه لل E36 ب 140 جنيه < جديده > - زوج مساحات تعديل و أفضل فى الخامه و درجة التحمل و الحجم ب 280 جنيه < جديده >.
زجاج أمامى ب 500 جنيه.
2 محرك مرايات ب 150 جنيه < أستيراد >.

و البقية ان شاء الله تأتى!!!.

[mrmedo]

كفاية الدخلة بتاعة الميكانيكى دة مشراكنى فى الدخل بتاعى

[m000dy]

فتيس أتوماتيك ب 5000 جنيه < أستيراد > - تحويل من أتوماتيك لمانيوال فى حدود سعر 2500 - 3000 جنيه.

فتيس 316 مانوال عامل 700 جنيه فقط والاوتوماتيك ب 1200
صاحبى غير الفتيس الاوتوماتيك وقلبها عاده كلفته بالتعديل 950 جنيه فقط والكلام ده بعد العيد الكبير مباشرة ب 15 يوم

أيرماس ب 750 جنيه < استيراد >

الاير ماس من بق الراجل واحنا واقفين معاه قال 500 جنيه ودى اول كلمه

طرمبة باور ب 1550 < جديده > - أو 850 جنيه < أستيراد >

على حسب كلام صاحبى اللى معاه ال 316 ال 96 طرمبة الباور عامله 600 جنيه

طبعا انا واخد بالى ان حضرتك راكب 318 مش و 16 وده بيوضح بعض الفروقات الصغيره فى الاسعار لصالح ال 316 طبعا وان كانت ال 318 تستاهل الفرق ده
ثانيا والاهم كفاية مجهود حضرتك ودخولك واستقطاع هذا الكم من وقتك عشان تفيد اخواننا هنا وانا اكيد من ضمنهم
ثالثا و اضح ان حضرتك ركيب بى ام عشان دايما بتدور على الاحسن وعارف ايه هو وبتجيبه
ربنا يحفظلك عربيتك ويكفيك شر العيييييييييييين
الالمان قدروا على الطريق ماقدروش على العين هههههههههههه والله الناس بتحسد اللى راكب البى ام اما يعرفوا بس انه راكب بى ام من غير مايشوفوها حتى وشوفت بعينى محدش قاللى ههههههههههه
ربنا يهدى ويعطى كل الناس يارب

[m000dy]

كفاية الدخلة بتاعة الميكانيكى دة مشراكنى فى الدخل بتاعى

بص ياباشا خدتها نصيحه من واحد راكب بى ام وهانقلهالك
اوعى اوعى اوعى تخش على حد بصدرك وتقول انا عاوز حاجه بى ام ولا انا راكب بى ام
ده كانه جواز المرور لجيبك وبدون حساب والكلمة البايخه اللى هاتسمعها كتير ( اللى راكب بى ام ياباشا مايسألش على قطع غيار )
اولا: من ناحية الميكانيكى اول ماتجيب العربيه لازم لازم تتلسع وتتلسع وتتلسع لحد ماترسى على حد بيفهم وحنين مش تتلسع وتلف وترجع تقول اصله احسن واحد ( لا يلدغ المؤمن من جحر مرتين) لا فى احسن بس احنا اللى مابندورش او بنستسهل ونقول انا ادفع زياده بس يتعمل الشغل صح وده اللى بيخليهم يستقوو القلب على اللى راكبينها
ثانيا: فى حالة توافر الشرط الاول تاخد قطعة الغيار وتقول للمكيانيكى ادور عليها ازاى يعنى خليه يقوللك سماتها او ابعادها واما تروح عند حد خد الجديده قيسها على القديمه (معظم قطع الغيار بتبقى كده يعنى تقيس ابعاد المسامير على بعض بعد ما تتأكد انهم نفس الشكل والرسمه) واوعى تخش على بتاع قطع الغيار تقوله عاوز طرمبة بى ام ولا سير بى ام ولا بلية بى ام (البليه دى ليها قصه عاقولهالكو فى الاخر) انت تخش تقوله انا عاوز زى دى هايقوللك دى بتاعت بى ام قوله ماعرفش مش بتاعتى واحد باعتنى اجيبهاله ومحددلى رينجها يقولك طب رينجها كام قوله هو حضرتك اللى بتبيع ولا انا
ثالثا: الحاجات الصغيره مابتبقاش محتاجه متخصص بى ام ولكن محتاجه صنايعى بيفهم زى شغل الكهربا البسيط انوار عدادات توصيل لمبات او تغييرها ودى تدور على حد صنايعى فى حته معقوله ( والله واحد صاحبى كان هايتخيط فى موبينه وراح لكهربائى قلب له حاجه فى الموبينه خللى اللى تحت فوق واللى فوق تحت وقالله قدامك كمان 10 سنين لحد مادول يبوظوا زى اللى تحت وفى الاخر خد 10 جنييييييييييه) بقى فى حد بيصلح بى ام بعشرة جنيه !!!!
اخيرا بقى موضوع البليه: زى ماحضارتكو عارفين ان البلى ساعات بيبقى غالى بغباء زى بلى عجل الاوبل فيكترا الواحده بتعمل 2200 جنيه فى التوكيل وبتعمل بره 1500
والحل
بكل بساطه تطلع على توكيل skf بتاع رولمان البلى هاتلاقى هناك البلى الالمانى ايه ون والانجليزى والايطالى والصينى كمان بس ايه ون بردو
اتخن بليه لن تتعدى ال 150 جنيه والمانى على ابوها وهى هى بشكلها بوزنها بغباوتها ( كانت غبيه اما كانت غاليه انما دلوقتى سماح بقى ههههههههه ) يلله حته بربع اهى شالله ماحد حوش وادعو لاخوكم

[MOSHAKS]

ماشاء الله عليكم موضوع تمام التمام فعلا اسد عجوز بس مش عجوز والله يرفع لها القبعه اينما وجدت وفى اى زمان
تسلم ايديكم

[novo]

ممكن حد من المشرفين يفدنا في موضوع تثبيت البيان ده علشان الفائده العامه

[Seifmando]

موضوع متميز جداً
أنا كمان بفكر الايام دي انى اغير من الفيرنا واجيب 316 مو 97
هتبقوا خدمتونى لو عرفتونى سعر العربية ذات نفسها فى رينج كام ( لو حالة متوسطة او ممتازة)

[TheBuccaneer]

موضوع متميز جداً
أنا كمان بفكر الايام دي انى اغير من الفيرنا واجيب 316 مو 97
هتبقوا خدمتونى لو عرفتونى سعر العربية ذات نفسها فى رينج كام ( لو حالة متوسطة او ممتازة)

السلام عليكم. إذا كانت السياره فابريكه بالكامل هتجد السعر يتراوح بين 80000 - 85000 جنيه < على الرغم من وجود سياره موديل 97 معروضه بموقع كونتاكت كارز مكتوب إنها فابريكه بالكامل و حتى الأكصدامات لم ترش و مطلوب بها 92000 جنيه. طبعا سعر خيالى بالنسبه لموديل 97 و لونها زيتى لأن بنفس السعر تقدر تشترى e46 1999 - 2000 > لكن سعرها الحقيقى إذا كانت فابريكه مثل ما ذكرت بالأعلى. إذا كانت الحاله متوسطه تجدها تبدأ من 70000 جنيه فيما فوق.

[Seifmando]

شاكر جداً لسرعة ردك يا thebuccaneer
الا صحيح هو يعنى ايه thebuccaneer