الخلاصة 2 ... فى موضوع تعميير موتور بيجو 504 و 505 (العمرة ) ..

[kisho55555]

السلام عليكم ورحمه الله وبركاته

بالنسبة لى انا عامل عمرة لموتور عربيتى من حوالى سنتين الا كام شهر .. لغاية دلوقتى من غير مشاكل خالص فى الموتور ... وعملت بيه حوالى 25 الف كيلو .... بالتكييف 85 فى الماية ....


نبدا فى الموضوع .... يعتبر موضوع بيجو ال 504 او 505 هو من افضل مواتير بيجو فى التعميير وده يرجع لاسباب هنقولها بعد كدا وعلى الرغم من ان الفرق بينهم فى وش السلندر بحيث انه فى 504 كان الومنيوم لا يتحمل الحرارة بالدرجة الكافيه ....ولكن فى ال505 كاان افضل فى تحمل الحرارة العالية ..... هو ده الفرق الجوهرى ..

لكن باقى الموتور سواءفى ال504 او 505 .. هو هو ... ويمكن تغيير موتور 504 وتركييب موتور 505 فى مكانه عادى جدا .... وبدون اى تعديل مع مرعاه تعديل قولعد الفتيس فى حالة ال 5 سرعات لل 505 ... او حتى اتوماتيك ...

اهم حاجة فى موضوع العمرة هو الميكانيكى والصنايعية اللى معاه ..... فى واحد ميكانيكى مثلا يقعد العربيه عنده فى حدود الاسبوعين .. وده مستحيل ..

العمرة بالنسبة للبييجو تكون فى حدود اليومين فى حالة عدم وجود مخرطة ... و3 ايام فى حدود وجود مخرطة ... والمصنعية بتكون من 200 لغاية 400 .....

نبدا بالتكالييف والاسعار ...

1- كرتونة اوريجنال l .... ج 1670
2-طقم ديسك واسطوانة فايو اصلى فرنساوى .... ج 480
3-بلية دبرياج عالية .... ج40
4-بلف كاتينة اصلى فرنساوى .... 65
5-جوان وش سلندر ....50 (تمن 2 )
6-ابلاتين وكوندسر فاليو .... 18
7-طقم بوجيهات ngk يانانى ...28
8-لحان حديد ... 7
9-طبة حديد .. 10
10-فلتر زيت فاك ... 10
11- ريداتير سعودى 505 .... 475
--------------------------------------------
الاجمالى .....2853
المصنعية ....250
زيت ..........100
بنزين .......100
شوية قهوة ..50
مصاريف مستخبية .. 150
------------------------------------------
الاجمالى .....3503

.................................................. .................................................. .................................................. ..........*
نتتكلم فى شوية نقط مهمة :
----------------------------------
النقط اللى هنتكلم فيها دى عشان نفهم انا عملت الحاجات دى ليه و لو الميكانيكى معملهاش يبقى احنا فاهمين ....

1- تغيير الرداتير بواحد سعودى كبير ؟؟؟

بالعقل كدا .... درجات الحرارة كل سنة عمالة بتزيد وده طبيعى ... والعربيات دى شغالة من 30 سنة ... يبقى اكيد محتاجة تعديل للافضل .... وهو ده الافضل ... وكمان فى ناس بتعمل تعديل للريداتير بحيث يركبوا رداتير ميكروباص تويوتا الومنيوم وده افضلها ... وبيخى العربية باردة جدا سوا فى الصيف و غيره ..... وده افضلها ... لكن انا مدخلتش فى التعديل ده ... فمش هقجر اتكلم فى اوى ... عشان معرفش معلوماتى صح ولا غلط ..


2-تغيير الزيت بعد التليين ومعاه الفلتر ؟؟

الكباسات والشمايز بتكون لسه جداد بالتالى فانهم بيكونا ماسكين فى بعض جامد ... وبيتنج عن التليين بعض بردادة الحديد والشوائب .... ودى بتتجمع فى الفلتر والزيت ... ومينفعش تمشى بيه بعد التليين .... لانه خطر على باقى اجراء العربية..


3- تغيير بلف سير الكاتينة ؟؟؟

البلف ده شغال مثلا من 20 سنة .... فلازم يتغيير مع العمرة عشان صوت الموتور يبقى ناعم .... ده غير انه لو باظ هتتضطر تفك وش الكتينة تانى وشغلانة وتدفع مصنعية .... يبقى خلينا فى الامان ونغييره ...


4-تغيير قواعد الموتور ؟؟

طالما الموتور اترفع يبقى من الافضل انك تغيير كل حاجة تحته .... ومن ضمنها القواعد لانها اكيد نشفت ...


5-ليه انا اشتريت كرتونة عمرة كاملة .؟؟؟

لانها افضل مليون مرة من انى ابعت الشمايز والكباسات المخرطة وترجع تتملى وتتخرط من اول وجديد ...واكيد ان الشمايز الجديدة هتكون خامتها افضل بكتير من اللى هيتعمل فى المخرطة ... وعشان اريح دماغى من اى لعب ..وكمان هتلاقى شغل نظيف بعد كدا .. عبارة عن فك وتركيب مش اكتر ..


6-ليه انا مغيرتش الموتور بواحد استيراد ؟؟؟

لكذد سبب .... ممكن اى حد يكون عنده الاسباب دى ..
1-اى موتور عبارة عن بظيخة مقفولة .... محدش يعرف اللى جواها حتى المستورد .... كل اللى يعرفه انها موديل كذا تيقى حلوة .... ده غير ان التجار بقوا يستهبلوا فى الاسعار وتلاقى ان الموتور من غير الفتيس ب 6-7 وبالفتيس ب 8-9 .... والانجكشن منه موجود بالهبل ب 6 بالفتيس ... ده غير لو ان الموتور جاى بالتكييف بيكون سعره تانى خالص .. وفى الاخر ممكن تلاقيه بعد سنه او اتنين بقى زى بتاعك ... محتاج عمرة ..

2- العربية عندى رقم ماتورها هو هو رقمه الشاسيه ... وده دليل قاطع ان العربية لسه بموتورها ..

3-العربية عندى مش رشة دواخل ...

4- كنت بالفعل اتفقت على موتور 6 سلندر بالفتيس والكرونة وكل حاجة للبيجو بالعفشه بتاعت ال 8 سلندر .... وفى الاخر تراجعت بسبب البنزين والضريبة .... ومش هتكون عربية عملية زى مانا عايزها ... هتكون عربية رياضية وخلاص ....


7- ليه تمن الاسطوانة والديسك غاليه ... ؟؟؟

لان الفاليو .... موجود على سطها طبقة من النحاس تمنع التاكل بتاع الاسطوانة بالتالى عمر اطول وكفءة احسن ....وتعتبر من افضل الانواع الموجودة فى مصر ...وموجودة فى علبة صفرا

فى انواع تانية ... تقريبا ب 350 جنيه .. مش فاكر اسمهم وبيكونوا فى علبه زرقاء...


ده كل اللى انا فاككره حاليا ..... لو افتكرت اى حاجة هقولها على طول .. ومستعد لاستفسارات الاعضاء ...

[kisho55555]

من مقتبسات الاعضاء ..
اقتباس

السلام عليكم و رحمة الله و بركاته

وعليكم السلام ورحمه الله وبركاته ...

اقتباسألف شكر على الشغل النار الممتاز ده, جزاك الله كل خير و ربنا يباركلك فى العربية فى التكييف.
اللهم أمين ...

اقتباسأنا كانت عندى العربية البيجو ال505 مو 1980 القديييييييييييييييييمة بتاعتنا, المكنة بتاعتها خفيفة, يبقى لازم أعمل عمرة الأول و بعدين أركب التكييف, صح و لا لأ؟؟؟؟
ده اساسى عشان المكنة كدا اساسا سحبها ضعيف ... فلما يركب التكييف هتلاقى العربية عمالة تطفى وكمان مش قادرة تجيب سرعة ....

ان شاء الله هعمل موضوع عن عمرة العربية بالكامل ... والله المستعان ..

[kisho55555]

اقتباسيا باشا, الله يباركلك و يكرمك و يجازيك خير و يباركلك فى العربية و تكييفها.

أنا زى ماقلتلك, أنا محتاج أنى أعمل عمرة الأول لموتور البيجو ال505 مو 1980 اللى معانا و بعد كده ناوى باذن الله أنى أركب تكييف.

أنا كنت سمعت أن البساتم اللى موجودة فى السوق هنا فى مصر نوعين, التركى و تقريبا فرنساوى, أكيد هيكون الفرنساوى أفضل, مش كده و لا ايه؟؟؟, أصل أنا كمان كنت سمعت أن أفضل بساتم فى العالم, هى لشركة ألمانية اللى هى الmahle و دى أنا نفسى أجيب منها بساتم للعمرة بتاع العربية, ألا ماتعرفش دول بييجوا منين؟؟؟؟؟ أنا ناوى ان شاء الله لما أفضى من المشاغل اليومين الجايين دول, أنى أنزل مرة بورسعيد أحاول أدور عليهم و ربنا لاييسر الأمور .
الله يبارك فيك ....

بالنسبة للعمرة ... ان شاء الله كنت ناوى اعمل موضوع خلاصة عن العمرة اللى انا عملتها ...

سريعا كدا ... متجيبش غير الكرتونة بتاعت العمرة الفرنساوى المغلفة بكيس ..... ودى بتكون موجودة جديدة كاملة ... من شنابر وشمايز وكباسات ... وكمان حتى الجوانات والفلتر بتاع الزيت ....

ومتروحش تجيبها من بورسعيد .. هاتها من الزقازيق او القاهرة بس ....

[kisho55555]

اقتباسبس أنا كنت بسأل على الMAHLE لأنها ألمانى و بتتعمل للعربيات الHigh performance و لو كان بينزل منها للبيجو جديد يبقى قشطة لأن الألمانى لا يعلى عليه و كنت مستعد أجيبهم حتى لو كان الطقم ب 2000 جنيه , أنا لسه مسألتش بذمة أوى لأنى لحد آخر الشهر مشغول فى بعض الأمور.
الشركة دى شركة عالمية ... وبتعمل لعربيات الناسكار وكمان اللى بتطلب ... والشركة دى عملتها مرة واحدة لعربية 504 لونها لبنى استرالى او تقريبا امريكى وكمان كانت Custom Made For 8V ومش للاربعة سلندر ....

خلى بالك ان الفرنساوى الاصلى ممكن تعدى دلوقتى ال 2000 جنيه ... انا عملتها من سنة واشتريتها ب 1850 جنيه ...

ومتدورش على اى نوع تانى خالص .... الفرنساوى فرنساوى ... ده غير ان عربيتك استوك ومش ناوى تركب NOS . Turbo Kit ..

[kisho55555]

اقتباسأنا فعلا, كنت بفكر أنزل بورسعيد, بس ليه حضرتك بتنصح أنى ماجيبهاش من بورسعيد و أنى أجيبها من القاهرة أو الزقازيق, هو بتاع بورسعيد ممكن يكون مغشوش و لا حاجة, أنا كنت بفكر فى بورسعيد على أساس أنى سمعت من كتير من الأخوة الأعضاء هنا فى المنتدى أن بورسعيد عموما أرخص من الحرفيين فى القاهرة؟؟؟؟

انا من مدن القناة (السويس - اسماعلية - بورسعيد ) .. احسن حاجة تروح تجيبها من القاهرة ..... او الزقازيق ...

[/QUOTE]طاب و لو هجيبهم من القاهرة, أجيبهم من عند مين؟؟؟؟[/QUOTE]

مش عارف ... لانى بعت واحد يدور عليه فى مصر وهو اللى جابها .... ممكن يكون كسب منى 100 -150 .. مش مشكلة .. بس هو يفهم فى الحاجات دى اكتر منى .. لان فى منها مغشوش جامد ... ومنها حتى الصينى ومكتوب عليه اتحاد اوروبى او فرنساوى ...

[kisho55555]

أنا فعلا سألت على الطقم الجديد الفرنساوى الأصلى هنا فى المنصورة عند عادل سراج و لقيته ب 1900 جنيه و لقيت الأنواع التانية زى التركى و الصينى و الفرنساوى اللى مش أصلى بيلعب بين ال500 و ال700 جنيه.

ان شاء الله, أجيب الفرنساوى و أعمله على آخر الصيف كده.

الفرنساوى وبس ..... وكويسين ب 1900 .... وانا هسال لك عليهم فى اسماعلية واقولك على اخر الاسعار ...

بس قولى عربيتك GL,Gr,Sr ؟؟؟؟

ولو فرق سعر كبير ممكن اجيبهم لك من هنا ...

[kisho55555]

كل الاقتباسات من كلام الاستاذ Masrati....

كل الردود من ردودى ....

[MASERATI]

السلام عليكم و رحمة الله و بركاته

ألف شكر يا باشا و جزاك الله كل خير و ربنا يباركلك فى العربية و يرزقك خيرها و يكفيك شرها.

و فعلا, مبلغ 3500 جنيه فى أنك ترجع موتور العربية زيرو من أول و جديد, يعتبر مش غالى خالص.

بس, أنت ليه جبت الأبلاتين و الكوندنسر العاديين بتوع البيجو ال504, هما كانوا عندى فى ال505 نازلين معاها لأنها مو 1980 و أنا اشتريت من القاهرة الأبلاتين الالكترونى ب175 جنيه و ركبته بدل الأبلاتين و الكوندنسر العادين اللى كانوا فيها و ما شاء الله, فرق كتير جدا فى سحب و تجميع العربية, مشكلته بالنسبالى, أنه مش موجود فى المنصورة و بالتالى لو -لا قدر الله- ضرب, هأضطر أنى أمشى بالأبلاتين و الكوندنسر العاديين تااااااااااااااااانى لحد ما أجيب أبلاتين الكترونى جديد و المشكلة دى طبعا مش موجودة عند اللى ساكنين فى القاهرة, فأنا قررت, أنى هفضل ماشى بيه لحد -ما بعد عمر طويل أوى- يضرب و هروح أجيب الاسبراتير الالكترونى بالموبينا بتاعته بالأسلاك بالمشط بتاعه اللى هما بينزلوا فى ال505 الطيارة موديل ال1985 فما فوق, هما بيعملوا على بعض من 500-550 جنيه, و أركبهم و بالشكل ده, يبقى أنا فى الSafe side و كل ما المشط يبوظ كل كااااااااااااااام سنة, أروح أجيب مشط
جديد و خلاص من أى حد بتاع بيجو هنا فى المنصورة و خاصة أنى لقيت الأبلاتين العادى اللى بيتباع عندنا هنا فى المنصورة, شكله كده مضروب و بيبوظ بعد شهر و يمكن أقل و أكيد سعر المشط مهما كان هيكون أوفر من الكام أبلاتين اللى أنا هغيرهم خلال نفس الفترة, ده غير أن الأبلاتين لما بيضرب, العربية بتبقى زبالة و عاوزه الحرق و أكيد أنت عارف, زى ما بأعمل فى عربيتنا الشاهين, كل كام سنة, يبوظ المشط اللى فيها و أغيره ب120 جنيه من عند أى حد بتاع فيات فى المنصورة. أنا متهيألى أنك لو ركبت الأسبراتير الالكترونى ده عندك بالحاجات بتاعته, هيفرق فى أداء العربية جدا جدا و خاصة أنك -ما شاء الله- المكنة عندك حلوة و مظبوطة.

أنا بعد اذنك نقلت اللينك فى الموضوع بتاع التكييف, عشان اللى مايلاقيهوش بسهولة, يلاقيه مع التكييف .

شكرا و جزاك الله كل خير

[kisho55555]

ألف شكر يا باشا و جزاك الله كل خير و ربنا يباركلك فى العربية و يرزقك خيرها و يكفيك شرها.

الشكر لله وحده ... شكرا ليك

و فعلا, مبلغ 3500 جنيه فى أنك ترجع موتور العربية زيرو من أول و جديد, يعتبر مش غالى خالص.

فعلا ولا حاجة بالنسبة للاسعار المكنات الاستيراد .... وغلو الاسعار ....طبعا الموتور هيرجع زيرو بمعنى زيرو ...

بس, أنت ليه جبت الأبلاتين و الكوندنسر العاديين بتوع البيجو ال504, هما كانوا عندى فى ال505 نازلين معاها لأنها مو 1980

اقو لك انا ليه ... لان بعد العمرة هتقعد تلين يومين ورا بعض .... فالبتالى اى ابلتنين وكوندسير هتيغير بعد كدا...

لانى بخلص فى حدود ال 80 لتر على السلانسية ..... فكنت لازم اغيرهم ومعاهم البوجيهات ...

و أنا اشتريت من القاهرة الأبلاتين الالكترونى ب175 جنيه و ركبته بدل الأبلاتين و الكوندنسر العادين اللى كانوا فيها و ما شاء الله, فرق كتير جدا فى سحب و تجميع العربية, مشكلته بالنسبالى, أنه مش موجود فى المنصورة و بالتالى لو -لا قدر الله- ضرب, هأضطر أنى أمشى بالأبلاتين و الكوندنسر العاديين تااااااااااااااااانى لحد ما أجيب أبلاتين الكترونى جديد و المشكلة دى طبعا مش موجودة عند اللى ساكنين فى القاهرة

دول اللى ركبيت عند ابو حسنى وكمان عمرو السقا ... وهما قالولى كتير عليه ... بسانا مش مقتنع بيه لانه كدا كدا هو الاسبراتير واحد بالتالى مش هتزيد قوة الكهربا فى العربية .... يعنى دى بتالع القصور فى الكهربا فقط ... ولكن مش بتزود الكهربا ...

انا مسالتش لسه عليه خالص ومعرفش اسعاره وهل موجود عندى ولا لا....

فأنا قررت, أنى هفضل ماشى بيه لحد -ما بعد عمر طويل أوى- يضرب و هروح أجيب الاسبراتير الالكترونى بالموبينا بتاعته بالأسلاك بالمشط بتاعه اللى هما بينزلوا فى ال505 الطيارة موديل ال1985 فما فوق, هما بيعملوا على بعض من 500-550 جنيه, و أركبهم و بالشكل ده, يبقى أنا فى الsafe side و كل ما المشط يبوظ كل كااااااااااااااام سنة, أروح أجيب مشط

ان شاء الله هو ده اللى انا هعمله ..... بس انا كنت ليه طالع من العمة فى حدود 3500 وبعدها دخلت فى تكييف ب 3000 وبعدها دخلت فى كاوتشات وجنوط ب 3500 ودلوقتى هدخل فى دهان وسمكرة... فانا فعلا مقطوم ظهرى .... وكل لما احاول ارفعه شويه... ارجع انزل تانى ...

فلازم اشم نفسى شوية .... لان فى احتمال يكون فى مفاجاة عربية اخرى ....

خطورة المشط الكهربى ..... انه لو لقدر الله ضرب منك وانت مثلا على الطريق مش هتعرف تعمل حاجة ولا هتعرف تمشى ... عشان كد الافضل العادى ... لانه هيقطع معاك... بس هتكون العربية بتمشى ...

[kisho55555]

خاصة أنى لقيت الأبلاتين العادى اللى بيتباع عندنا هنا فى المنصورة, شكله كده مضروب و بيبوظ بعد شهر و يمكن أقل

لو هو فعلا بيوظ كل شهر ,,,, يبقى فى مشكلة فى التركيب او الاسبراتير .... انا بجيب نوع فرنساوى فى علبة زرقا وشفافة ...

أكيد سعر المشط مهما كان هيكون أوفر من الكام أبلاتين اللى أنا هغيرهم خلال نفس الفترة,

لو بيبوظ عندك بالسرعة دى يبقى طبعا احسن .... لكن عندى ساعات بيقعد سنة مثلا او اقل ... ده الطبيعى ... خلال الفترة دى بظبط تكهات فقط...

ده غير أن الأبلاتين لما بيضرب, العربية بتبقى زبالة و عاوزه الحرق و أكيد أنت عارف

حصلت معايا مرة واحدة .. ومش عايز اقول لك.... بس كان عيب تركيب لان الميكانيكى لزقه اوى ... فلدع بسرعة ...

أنا متهيألى أنك لو ركبت الأسبراتير الالكترونى ده عندك بالحاجات بتاعته, هيفرق فى أداء العربية جدا جدا و خاصة أنك -ما شاء الله- المكنة عندك حلوة و مظبوطة.

انا فعلا نويت ... وان شاء الله هدور عليه بسعر احسن من كدا.... وانا عرف انه هيفرق جامد وخصوصا مع التكييف... ومش هيبقى فى كركرة ولا حاجة وهتلاقى العربية بتجرى بغباء ... لانه هيعلى كهربا العربية الى 36 الف .....

ربنا يسهل الاقى واحد ....

أنا بعد اذنك نقلت اللينك فى الموضوع بتاع التكييف, عشان اللى مايلاقيهوش بسهولة, يلاقيه مع التكييف

مفيش مشكلة يا جميل .... كلنا اخوات... وده للفايدة العامة ...

شكرا و جزاك الله كل خير

الشكر لله وحده...

[kisho55555]

اخر سؤال ... حضرتك منين من المنصورة ؟؟؟؟

وتعرف سمنوط ولا لا ؟؟؟؟

[MASERATI]

اخر سؤال ... حضرتك منين من المنصورة ؟؟؟؟

وتعرف سمنود ولا لا ؟؟؟؟

السلام عليكم و رحمة الله و بركاته

أنا من المنصورة, من شارع جيهان, ساكن فى مساكن الجامعة.

طبعا أعرف سمنود, بعدى عليها و أنا رايح المحلة الكبرى.

بالنسبة للمشط بتاع الأسبراتير الألكترونى, هوا فعلا, لو باظ و أنا ماشى عالطريق, العربية هتعطل, بس أنا لما أجيبه ان شاء الله, ناوى أخلى معايا واحد احتياطى فى مكان جاف و ليكن فى درج التابلوه مثلا.

بالنسبة للأبلاتين الألكترونى اللى راكب عندى دلوقتى بدل الأبلاتين و الكوندنسر العاديين, أنا حسيت بالفرق, أنى لما بأدوس بنزين مرة واحدة, العربية بتجمع بسرعة و مفيش الكركرة و الهزة اللى كانت بتحصل الأول دى.

بس, أنا فعلا اتسرعت لما جبته ب175 جنيه و هو مش موجود فى المنصورة و كان الأفضل ليا أنى أزود فوقهم بتاع 350 جنيه كمان و أجيب الاسبراتير الالكترونى على بعضه بالموبينا بتاعته بالأسلاك بكل حاجة, على الأقل المشط كان هيبقى موجود فى المنصورة, يالله, خير, قدر الله و ما شاء فعل.

[MOUSTAFA_SAAD]

هو البيجو القديم حاجته غاليه كده ولا ايه

[kisho55555]

هو البيجو القديم حاجته غاليه كده ولا ايه

حاجات اليسجو اسعاره متوسطة ...

لكن لو قارنتها بايام زمان ... ممكن تقول انها غليت .....

[kisho55555]

طبعا أعرف سمنود, بعدى عليها و أنا رايح المحلة الكبرى.

يعنى كام كيلو من بورسعبد للمنصورة ....؟؟؟
وكام كيلو من بورسعيد لسمنوط ؟؟؟؟

بس أنا لما أجيبه ان شاء الله, ناوى أخلى معايا واحد احتياطى فى مكان جاف و ليكن فى درج التابلوه مثلا

كدا يبقى تمام ... ولما تنوى ابقى قولى جبته بكام ...

بالنسبة للأبلاتين الألكترونى اللى راكب عندى دلوقتى بدل الأبلاتين و الكوندنسر العاديين, أنا حسيت بالفرق, أنى لما بأدوس بنزين مرة واحدة, العربية بتجمع بسرعة و مفيش الكركرة و الهزة اللى كانت بتحصل الأول دى.

هى دى فايدته فقط ... لكن الاسبراتير الالكترونى حاجة تانية خالص...

بس, أنا فعلا اتسرعت لما جبته ب175 جنيه و هو مش موجود فى المنصورة و كان الأفضل ليا أنى أزود فوقهم بتاع 350 جنيه كمان و أجيب الاسبراتير الالكترونى على بعضه بالموبينا بتاعته بالأسلاك بكل حاجة, على الأقل المشط كان هيبقى موجود فى المنصورة, يالله, خير, قدر الله و ما شاء فعل.

قدر الله ما شاء فعل .... وان شاء الله نويت اجيبه انا كمان .... بس كمان شوية والله المستعان ..


لو فى اى استفسارات عن العمرة ... قول وان شاء الله اساعدك ...