301 من الحجز إلى الإستخدام..تقرير وافي

[abohend]

بسم الله الرحمن الرحيم
و به نستعين و عليه نتوكل

كنت وعدتكم بتقرير مفصل عن البيجو 301 مانيوال
و آسف على التأخير

قبل بداية التقرير بالله عليكم اللي يشوف أي صورة يذكر الله و يدعوا بالبركة

قال النبي صلى الله عليه و سلم:
إذا رأى أحدكم من نفسه أو أخيه ما يعجبه فليدع له بالبركة، فإن العين حق

التقرير هينقسم لعدة مراحل

1. مرحلة الإختيار و الحجز
2. مرحلة الإنتظار
3. مرحلة الإستلام
4. مرحلة الترخيص
5. مرحلة الإستخدام

مرحلة الإختيار و الحجز

العربية 1: بيجو 206 موديل 2001 مانيوال
تقييم عام: ممتازة و عملية و شيك و عصفورة و يا دوب بتدوق بنزين

أسباب التغيير:

• الحمد لله بقينا عيلة (بعد وصول الآنسة هند) و محتاج عربية عائلية من حيث مساحة الشنطة و الصالون
• العربية بدأت تفتح بقها و قطع غيارها مش متوفرة بسهولة و غالية نسبياً
• الرغبة في التغيير

المبلغ المتاح بعد حساب سعر البيع التقديري لل206: 110 ألف و ممكن يزيدوا ل115


الخيارات:
نيسان صني-أوتو
سيتروين سي إليزية-مانيوال
بروتون جين2 أوتو
أبترا أوتو
بيجو 301 مانيوال


تم الإستقرار على البيجو 301 بدون الخوض في تفاصيل حتى لا يتحول الموضوع لمقارنات


الإعتبارات أثناء المفاضلة

• الأمان
  
• جودة الخامات و التقفيل
• عائلية
• موتور قوي و سيارة إعتمادية
• قطع الغيار و الصيانة
• السعر
• نوع الفتيس (مانيوال-أوتو)
• قيمة مقابل سعر

و أخيرا بفضل الله تم الإستقرار على ال 301 مانيوال (الكلام ده في شهر 10 -2013)



و كان قدامي 3 خيارات

1. الحجز تبع التوكيل (عباد الرحمن سابا باشا)
2. الحجز مع موزع معتمد (نور الدين)
3. الشراء الفوري من المعارض بأوفر برايس

• التوكيل سعره كان 107900 مع الحرية في إختيار اللون
• نور الدين لما كلمته قال 110000
• المعارض مكانش متوفر فيها المانيوال و الألوان محدودة

توكلت على الله و رحت شفت العربية و ركبتها فالتوكيل (عباد الرحمن) يوم 30-10-2013
المندوب قال إن فترة الحجز هتكون من شهر و نص لشهرين و طلب مني إني أختار 3 ألوان لتسريع عملية الإستلام


روحت يومها و صليت إستخارة و إستقريت على الحجز مع التوكيل بالترتيب الآتي للألوان

1. شامبين
2. سيلفر
3. أبيض

سبب إختيار اللون

• ال301 عربية كنزة من الخلف و الألوان الغامقة رغم شياكتها بتوضح الكنازة دي أكتر (أسود-فراني-موكا)
  
• السكن بمنطقة مليئة بالتراب و عدم توفر جراج و بالتالي الألوان الفاتحة هتبقى أفضل (شامبين-سيلفر-أبيض)
  
• الأبيض خيار سئ بالشتاء عشان بيبان فيه الطينة إضافة لأنه مطفي مش ميتالك
• السيلفر تقليدي
  

لذا تم الإستقرار على الشامبين كخيار أول

رحت يوم الخميس 31-10-2013 و دفعت 10 آلاف جنيه مقدم حجز و المندوب أكد عليا بعدم بيع ال206 حتى وصول المركب بالعربية الجديدة (و دي نقطة إيجابية من جانب التوكيل)


و بكده تنتهي المرحلة الأولى و إن شاء الله المرحلة التانية قريب
نسألكم الدعاء بظهر الغيب
و بلاش أي ردود حتى إنتهاء التقرير للمحافظة على الإستمرارية في العرض


تحياتي

[abohend]

المرحلة التانية

مرحلة الإنتظار

زي مبيقولوا كتر الإنتظار يعلم الجفا

نزلت المانيوال بتاع العربية و بدأت أتعرف أكتر على السيارات بوجه عام و ال301 بوجه خاص عن طريق نايل موتورز و غيره من المواقع المصرية و الأجنبية

ده رابط المانيوال
http://www.feline301.net/media/docs/...guide-2012.pdf

مرحلة الإنتظار كان المفترض تاخد شهرين على أقصى تقدير
لكن الواقع إنها خدت حوالي أربع شهور
من 31-10-2013 إلى 24-02-2014

كان في أكتر من عامل سببوا التأخير

1. ضغط الحجوزات
2. حجز الجيش
3. عدم توفر المانيوال
4. عدم واقعية التوكيل في وعوده للحاجزين

و إحقاقاً للحق الناس فالتوكيل كانوا محترمين و مقدرين التأخير و حاولوا يسلموني في دفعة شهر يناير لكن للأسف مكانش فيها مانيوال
عرضوا عليا الأوتو البيزلاين لون فيراني
قعدت أفكر فالموضوع لقيت 16 ألف فرق كتير و اللون كمان مكانش على مزاجي
ففضلت أنتظر
لحد آخر شهر يناير كان الإنتظار محتمل لأني مكنتش بعت ال206 و ساعتها المندوب قالي إن المركب هتيجي على أول فبراير فقلت خلاص هانت
أبيع دلوقتي على مهلي بدل مابيع مستعجل بالخسارة بعد المركب متوصل
و أتسرعت و بعت يوم 24-01-2014
من ساعتها بقى بدأت أحس بجد بجحيم الإنتظار و بهدلة المواصلات و إستغلال سواقيين التاكسي لحد مربنا فرجها يوم 24-02-2014 و بدأت مرحلة الأستلام

يتبع

[abohend]

المرحلة التالتة

مرحلة الإستلام

المنتظر إن التوكيل يكلمني
لكن الواقع إني أنا دايما اللي كنت بتصل و أطمن على الحجز وصل لأيه
و يوم الأحد 16-02-2014 رحت كملت الفلوس
و الإستلام كان بعدها ب8 أيام يوم 24-02-2014

إستلام العربية كان بدون أوراق
الحاجات اللي تبص عليها ساعة الأستلام

1. سلامة الجسم الخارجي من أي خدوش
2. حالة الصالون و الطابلوة
3. تجربة الكاسيت و التكييف و الأنوار و الشنظة و المفاتيح
4. التأكد من مستوى السوائل (مياة تبريد -زيت موتور-زيت فتيس)
5. التأكد من عمل المفاتيح (الريموت و العادي)
6. تغيير وضعية الكراسي (إرتفاع-ضهر-أمام و خلف)
7. قفل و فتح الأبواب و الشنطة
   

طبعا بالنسبة للهايلاين لازم يجرب الأبشن الزيادة اللي عنده
(بلوتوث-دراع المالتي-..)

هتستلم مع العربية

1. إستبن مقاس 15
2. كوريك
3. قاطرة
4. مفتاح عجل (و بالنسبة للهايلاين هتستلم كمان مفتاح لمسامير الحلية)
5. مفتاح ريموت و مفتاح عادة و الشفرة بتاعتهم (باركود لازم تحتفظ به)

بعدها ب9 أيام تقريبا الورق وصل

في الإستلام هتاخد الورق الآتي

1. الإفراج الجمركي
2. مبايعة من الشركة العالمية لشركة القاهرة
3. مبايعة من شركة القاهرة للمشتري
4. فاتورة باسم المشتري

الإفراج




مبايعة 1




مبايعة 2






الفاتورة




لازم تتأكد عند إستلام الورق من مطابقة رقم الشاسية بين المبايعات و الإفراج و الباركود اللي متعلق على زجاج السيارة الأمامي


الباركود على زجاج السيارة



هتلاحظوا تاريخ 13-01-2014 على الورقة الملزوقة
مش عارف هل ده تاريخ خروجها من المصنع و لا دخولها الميناء في أسبانيا و لا ايه بالضبط...مش عارف؟؟

لا أنسى نصايح و إرشاد العضو العزيز m.basha و A.elsobky قبل الإستلام
أحلى سلام لرجالة الإسكندرية اللي مبيتأخروش على حد


للأسف كان رقم الشاسيه في المبايعات مختلف عن الإفراج و الباركود
في المبايعات كان 5000xxx
لكن في الإفراج و الباركود كان 500xx


و ده أتسبب في تأخير 3 أيام لحد الورق ميتصلح فالقاهرة و يتختم و يرجع الأسكندرية تاني
الفترة دي كانت أنسب فترة للترخيص عشان لسه المرور كان متخبط و معندوش تعليمات محددة بترخيص موديل 2015 من عدمه
لكن عقبال الورق متصلح كان المرور جاله تعليمات بعدم الترخيص حتى وصول منشور رسمي بترخيص موديل 2015
المنشور لسه واصل إمبارح يعني بعدم إستلام الورق بحوالي أسبوعين و دي نقطة سلبية جدا في حق الوكيل
مش معقول أستلم عربية و أفضل راكنها مش عارف أرخصها
و ده كان من أسباب ضياع حقي لما العربية إتخبطت
لأني قانونا مخطئ لقيادة سيارة بدون لوحات
و أقل شئ التوكيل يعمله في حالة زي دي إنه يوفر نمر تجارية للمتضررين



نصيحة هامة: إستلم عربيتك بمجرد وصولها عشان لو مستلمتهاش هتفضل فالمعرض الناس تفتح و تقفل فيها و تركبها و تبهدل دواساتها و زرايرها (نصيحة دكتور A.elsobky)



و بكده تنتهي مرحلة الإستلام
يتبع

[osos007]

تقرير اكثر من هائل ووافى التفاصيل ... وربنا يباركلك فيها ويديك خيرها ويكفيك شرها
ونتمنى بقه تكتبلنا تقرير محترم كده عن انطباعك عن العربيه كمستخدم بقه

[abohend]

المرحلة الرابعة

مرحلة الترخيص

الحمد لله تم الترخيص
الملاحظ إن التكاليف بتختلف من مرور للتاني و دي حاجة أنا مش فاهمها

كان في خطأ متكرر بيقع فيه عامل المرور أثناء أخذ البصمة و هو إنه بيزق خرطوم الرادياتير ناحية مروحة الرادياتير و ده بيتسبب فقطعه و تسرب مياه التبريد و بالتالي سخونة العربية
راجعوا الموضوع ده للعضو Ashraf Fawzy

http://www.nilemotors.net/Nile/408494-301.html

و عشان كده أنا صورت الجزء ده (على حسب فهمي) كام صورة عشان الناس تاخد بالها و هي بترخص







طبعا في جزء من الخطأ يقع على الشركة المصنعة
لأن الطبيعي أن يكون في شبكة على أي جزء متحرك فحوض العربية
ممكن حد يتعور لو مش واخد باله
و ال206 كان فيها الشبكة دي و أظن معظم العربيات فيها شبكة عشان تمنع حاجة زي كدة

تفاصيل الترخيص مش هقدر أدخل فيها عشان مش أنا بنفسي اللي رخصت
لكن الإجمالي 1500 (ترخيص 3 سنوات و تأمين و ضرايب و طفاية و مثلث و شنطة طبية)
125 جنيه ترفيه عشان الأسم موجود بالمرور بيمتلك سيارة لأني منقلتش ملكية ال206 بعتها بتوكيل
غير بقى إكرامية المخلصاتي اللي رخص (إديتو البطاقة و هو تعامل)
أصبروا شوية على الجزء الخامس عشان هيبقى في صور كتير إن شاء الله

تحياتي

[ابو لؤى]

متابع

[د/سامح]

متابع

[Hema_Basha]

تقرير رائع من انسان محترم وربنا يديك خيرها ويكفيك شرها

[ahmed salah90]

ربنا يرزقك خيرها و يكفيك شرها

[ِA.Elsobky]

باشمهندس محمد أبو هند الراجل المحترم
ربنا يباركلك فى عربيتك و يكفيك شرها و يديك خيرها يا رب و ألف ألف مبروك
و مبروك على الترخيص يا باشمندس

[Mohamed_301]

والله يا ابو هند انت انسان محترم جدا وانا يشرفنى انى اتعرف عليك وخصوصا اننا ولاد بلد واحده :))
وتقريير رائع جداا ربنا يجازيك عنه خيير ويباركلك فى العربية ويبعد عنك كل شر منها ومن عين الناس ان شاء الله
ومتباااابع بأهتمااام جداا

[abohend]

الناس ردت برضه!!

يظهر بعض الأعضاء مخدتش بالها من طلبي بعدم كتابة ردود لحد إستكمال الموضوع
كده أنا مضطراً هعمل المرحلة الخامسة في موضوع منفصل إن شاء الله

ردوا براحتكم بقى
باب الرد مفتوح...

[ِA.Elsobky]

ما اتا بصراحه بعد اما شوفت الكلام المفصل و الوافى دا انا مقدرتش امسك نفسى من ان انا ارد

[Mohamed_301]

والله يا ابو هند انا اول واحد شاف الموضوع ومكنش حد رد لسه بس قرأته اكتر من مرة ومقدرتش بقى ههههههههه معلش ماتزعلش بقى
وتقبل مروورى :))

[eslam.maghawry]

انا ملتزم بالتعليمات اهو ومش هرد :d