مشاكل البيجو 301

[maio_do]

بسم الله الرحمن الرحيم

السلام عليكم ورحمه الله وبركاته

الموضوع معمول للمشاكل اللى لاحظتها بعد العشر الاف كيلو وانا عربيتى عامله 11 الاف مش معنى كده ان العربية وحشه وانى بقول عيوبها يبقى كلها عيوب انا عامله علشان ماعنديش وقت اعمل تقرير شامل عن العربية فهقول المشاكل واخواتى ملاك ال 301 يقدروا يضيفوا او ينفوا حاجه مفيش مشكلة بس علشان اللى هيشترى جديد يعرف اية المشاكل اللى ممكن تقابله ويحلها

هبدا بالبسيط بس برده مهم علشان ميحصلش مع الناس زى ماحصل معايا

1-خرطوم المياه ومشكلته وانت بترخص عند رفع البصمة عامل البصمة ممكن يدوس عليه ويغير مكان ويتقرب للمروحه ويتقطع فاى واحد بيرخص ستروين او 301 يخلى باله ان الخرطوم فى مكانه

2-صوت الماتور العالى وده بالنسبة ليا مش عاملى مشكلة لانه بيحفزنى زى الموتسكيلات الريس كده ولو قافل الازاز ومعلى الصوت على 15 نص درجة الصوت بيبقى صوته مش ظاهر وممكن تركب عزل هتلاقى الاخوة متكلمين عليه

3-التكييف اديله 60 % بالنسبة لليابانى بالنسبة للسواق والراكب جنبه كويس مش ممتاز

4-تيل الفرامل بمجرد ماتسمع صوت صفارة روح التوكيل وطالب بتغيره يقولك شوية تراب قوله شيله وخلى صوت الصفارة يروح ومتسبش حقك ومش دى المشكلة الكبيرة

5-سحب العربية اعتبره جيد بالنسبة للى بيحب التسارع الصراحه مجربتش اجرى بيها او اقرص عليها فى الطلعه ادائها راضينى بس من 0 ل100 بحس انه متوسط وللتاكيد مجربتش ادوس كيك دوان او استخدم الوضع الرياضة ولا حتى المانيول ولما اجرب هقول علشان ابقى واضح ومحدش يقولى اديك بتقول الماتور ضعيف انما التسارع من 100 لحد 180 كويس جدا وبيجمع بسرعه

لحد دلوقتى كل المشاكل اللى فوق منقيمش بيها العربية بنسبة كبيرة اهم مشكلتين هما اللى جايين

التوكيل واستهباله اسعار التوكيل واسعار قطع الغيار زيها زى الاكسنت ار بى وفيه حاجات ارخص وتقدر تراجع الموضوع ده

http://www.nilemotors.net/Nile/418448-a.html

انا مكملتش الموضوع لانى لقيت فيه كلام كتير وقلت ماشغلش دماغى خصوصا ان وحوش البيجو موجودين وانا مش فاضى اليومين دول لانى مشغول شوية

نرجع للتوكيل بيستهبل فى اية ؟ يقولك هغيرك كذا مثلا قبل معاده المهم تكون فاهم انت بتعمل اية ومحدش هيقدر يضحك عليك يعنى كان عايز يدفعنى 850 فى صيانه ال 10 الاف ويغيرلى فلاتر دخلت المنتدى وكلمت ابراهيم وسالته وقالى المفيد وخليته ميغيريش حاجة وبعدها فيه سعر مصنعية ماعجبنيش قولتلهم مش هدفع كده يبقى خلصت موضوع التوكيل واعتقد زيه زى غيره من التوكيلات

المشكلة الكبيرة وهى مشكلة النتشة واللى مبتروحش مع السوفت وير واللى هى غالبا مشكلة فى الفتيس بالتفصيل المشكلة بتجيلك على الغيار التانى تحس ان العربية بتنتش نتشة واحده رجة واحده يعنى مفيش تقطيع اكتر من مرة ولما سالته قال كلام ميكانيكا كده ومفهمتش وقالى انت بتدوس بنزين مرة واحده

مشكلتى معاها انى لما بكبس بتيجى على الرابع مثلا ودى بتبقى مشكلة كبيرة لو جت فى عرزة وللاسف جت فى غرزة من يومين وانا على الدائرى بتطلع من عربية ووالعربية بتنقل على التالت نتشت وتحس انها وقفت ورجعت جمعت فى ثوانى وممكن فى وقفتها دى لقدر الله تحصل حادثة ربنا يسترها علينا وعليكوا

كده خلصت يا جماعه تقرير المشاكل واكتر مشكلة معايا النتشة والتيل اللى ان شاء الله هغيره فى الضمات بمشكلة مع التوكيل وهبقى اقولكوا عملت اية ونشوف موضوع النتشة ده هيخلص على اية

مش عايز اكد ان العربية دى عيوبها بس ومش معنى كده انها وحشه او متستهالش لا هى جميلة واحسن من سعرها بس الموضوع معمول للمشاكل بس علشان الجديد يعرف كل حاجة ويحدد وقتها يشترى اية

وفى الاخر برده تانى العربية جميلة وانا عن نفسى راضى عنها غير مشكلة النتشة دى وان شاء الله تتحل

[ابو هنا]

مشكلتى معاها انى لما بكبس بتيجى على الرابع مثلا ودى بتبقى مشكلة كبيرة لو جت فى عرزة وللاسف جت فى غرزة من يومين وانا على الدائرى بتطلع من عربية ووالعربية بتنقل على التالت نتشت وتحس انها وقفت ورجعت جمعت فى ثوانى وممكن فى وقفتها دى لقدر الله تحصل حادثة ربنا يسترها علينا وعليكما

هو ده العيب الوحيد عندي في العربية

[maio_do]

مشكلتى معاها انى لما بكبس بتيجى على الرابع مثلا ودى بتبقى مشكلة كبيرة لو جت فى عرزة وللاسف جت فى غرزة من يومين وانا على الدائرى بتطلع من عربية ووالعربية بتنقل على التالت نتشت وتحس انها وقفت ورجعت جمعت فى ثوانى وممكن فى وقفتها دى لقدر الله تحصل حادثة ربنا يسترها علينا وعليكما

هو ده العيب الوحيد عندي في العربية

يعنى انت عندك نفس مشكلة النتشة وبتجيلك على الرابغ؟

[m mosalam]

نفسى اعرف تكييف بيجو 301 هل هو وحش ولا يبرد السيارة خصوصا مع دخول الصيف والجو بدا يحرر هل التكييف بيخنئ فعلا العربية ياريت اللى يرد اللى جرب التكييف فعلا

[Mohamed_301]

نفسى اعرف تكييف بيجو 301 هل هو وحش ولا يبرد السيارة خصوصا مع دخول الصيف والجو بدا يحرر هل التكييف بيخنئ فعلا العربية ياريت اللى يرد اللى جرب التكييف فعلا

التكييف على 1 بليل ممكن يسقعك
التكيف ع 2 الصبح هتشغله تلت ساعه هتبقى عايز تنزله على 1
عموما التكيف جميل
انا جربته مره واحده بس

[Ahmed_Ta21]

مشكلتى معاها انى لما بكبس بتيجى على الرابع مثلا ودى بتبقى مشكلة كبيرة لو جت فى عرزة وللاسف جت فى غرزة من يومين وانا على الدائرى بتطلع من عربية ووالعربية بتنقل على التالت نتشت وتحس انها وقفت ورجعت جمعت فى ثوانى وممكن فى وقفتها دى لقدر الله تحصل حادثة ربنا يسترها علينا وعليكما

ممكن توضيح اكتر للنقطة دي من فضلك

[Ahmed_Ta21]

التكييف على 1 بليل ممكن يسقعك
التكيف ع 2 الصبح هتشغله تلت ساعه هتبقى عايز تنزله على 1
عموما التكيف جميل
انا جربته مره واحده بس

هو الصبح محتاج تستني 20 دقيقة علشان التكيف يبرد العربية؟
يعني مجرد مابتفتح التكيف بيبرد في قد ايه بالظبط وتبدا تحس بيه؟ اصل 20 دقيقة شايفها كتير بصراحة

[Mohamed_301]

هو الصبح محتاج تستني 20 دقيقة علشان التكيف يبرد العربية؟
يعني مجرد مابتفتح التكيف بيبرد في قد ايه بالظبط وتبدا تحس بيه؟ اصل 20 دقيقة شايفها كتير بصراحة

التكيف اول ما تفتحه ع 2 وتحط ايدك لمده دقيقه ايدك هتلج يعنى بعد 5 دقايق بالكتير هتلاقى العربيه كلها سقعت ولو شغلته ع 3 اكيد ف دقيقتين (بس انا ماجربتش ع 3 ) اكتفيت ب 2 وعشان العربية لسه جديده ومشغلتهوش الا مره واحده

[m mosalam]

هل جربت التكيف بياثر على السحب

[Mohamed_301]

هل جربت التكيف بياثر على السحب

بص انا اول ما شغلت التكيف مشيت بيه 300 متر تقريبا كان كويس
وكنت واقف ف اشاره وانا طالع منها لاقيت العربيه اترجت جامد بقت تروح يمين وشمال وفوق وتحت اتصدمت وبدوس نص الدواسه مابتسحبش طفيته (كان لاول مره اشغل التكيف) ومشيت 100 متر تانى ووقفت كنت مستنى حد المهم بعد شوية مشيت وشغلته لاكتر من ساعتين محصلش حاجة ... ليه عملت كدة معرفش ومشغلتهوش بعدها بس فى الساعتين دول التكييف كان جميل جدا والسحب متأثرش خالص بالتكيف بس دة كل اللى حصل ومش لاقى اى اجابه للى حصل وياريت اللى يعرف يقولى
واللى مايعرفش يخلى باله بقى وربنا يستر

[scientist9508]

بسم الله الرحمن الرحيم

أرجو من الإخوه إفادتى بخصوص مشكلة الفيتيس لأن نفس المشكله بالوصف الدقيق موجوده فى السياره الشقيقه لها و هو سيترووين سى-إليزيه

واضح إنها مشكلة فى تصميم الفتيس. . . . و أنا ملاحظ إن السيارات الفرنسيه الجديده كلها فيها مشاكل فيتيس فى بعض الموديلات
1 - بيجو فى الموديل 301
2 - سيتروين فى سى-إليزيه
3 - رينو فى فلوينس

و لكن رينو كانت الأسرع فى حل المشله . . . الموديلات الجديده من الفلوينس نازل فيها فيتيس نيسان قاشقاى

أتمنى تتحل المشكله حتى لا تتأثر سمعة البيجو

[m mosalam]

هل نتشة الفتيس لها علاج بتنزيل سوفت وير اخر وهل كل الملاك بيحسوا بالنتشة دى ولا بتختلف على حسب قيادة السيارة

[عمرو بندق]

شكرا للسادة الأعضاء المحترمين لتوضيح المشاكل بس أنا شايف أن صوت الموتور مش عالى و بعد 30 ثانية بيقل الصوت أكتر و بالنسبة للتوكيل و أستهبالة فجميع التوكيلات بتستهبل .... أما بالنسبة للنتشة فأنا لاحظتها عند الغيار الثانى بس قلت يمكن أكون بيتهيألى .... فى النهاية أنا مبسوط أنى من ملاك البيجو و السيارة جميلة جدا و عيوبها لا تذكر

[Ahmed Amin]

مشكلتى معاها انى لما بكبس بتيجى على الرابع مثلا ودى بتبقى مشكلة كبيرة لو جت فى عرزة وللاسف جت فى غرزة من يومين وانا على الدائرى بتطلع من عربية ووالعربية بتنقل على التالت نتشت وتحس انها وقفت ورجعت جمعت فى ثوانى وممكن فى وقفتها دى لقدر الله تحصل حادثة ربنا يسترها علينا وعليكما

هو ده العيب الوحيد عندي في العربية

متدوسش كيك داون,
الأفضل أنك تنقل علي الاستيب ترونيك علي طول, وأدي عصاية الفتيس زقة ناحية ال (-)
وهتلاقيها جابت تالت لو كنت رابع,, أو هتجيب تاني لو كنت عال تالت.

ودوس هتطير بيك,, وبعد ما تخلص الحاجة اللي كنت بتعديها أنقلها عال d تاني
وهيا هتاخد رابع أو الغيار المناسب بالنسبة للسرعة اللي ماشية عليها في لحظتها.

[Ahmed Amin]

بسم الله الرحمن الرحيم

أرجو من الإخوه إفادتى بخصوص مشكلة الفيتيس لأن نفس المشكله بالوصف الدقيق موجوده فى السياره الشقيقه لها و هو سيترووين سى-إليزيه

واضح إنها مشكلة فى تصميم الفتيس. . . . و أنا ملاحظ إن السيارات الفرنسيه الجديده كلها فيها مشاكل فيتيس فى بعض الموديلات
1 - بيجو فى الموديل 301
2 - سيتروين فى سى-إليزيه
3 - رينو فى فلوينس

و لكن رينو كانت الأسرع فى حل المشله . . . الموديلات الجديده من الفلوينس نازل فيها فيتيس نيسان قاشقاى

أتمنى تتحل المشكله حتى لا تتأثر سمعة البيجو

بيجو وستروين يعتبرو شركة واحدة, لأن بيجو أشترت ستروين من زمان وبقي فيه مجموعه أسمها psa ودي اللي بتدير الشركتين.
عشان كدا هتلاقي تحت كبوت البيجو والستروين نفس الموتور ونفس الفتيس ونفس العفشة ونفس كل حاجة في العربيتين ماعدا التصميم الخارجي وبعد الداخلي فقط

أما رينو فهي شركة لوحدها, ومن فترة رينو أشترت حصة كبيرة في نيسان حوالي 37% من حصة نيسان عشان نيسان كانت بتنهار وبتقع,
وبعدها بكام سنة لما نيسان فاقت شوية أشترت حصة من رينو, وبقت رينو ونيسان يعتبرو مجموعة زي Psa بتاعت بيجو وستروين.

بالنسبة لفتيس الفلوانس هوا مش فتيس 4 غيارات, وهوا مش تكنولوجياً جديدة من نيسان ولا هيا صلحت فيه عيوب.
الفتيس اللي في الفلوانس فتيس أوتوماتيك cvt ودا مش فيه غيارات ثابته زي المانيوال او الاوتوماتيك ال ٤ او ٦ سرعات وعشان كدا مفهوش أي مشاكل ولا أحساس بالنقلات.
الفتيس دا كان موجود في الانسر بومة من 2007 وقبل 2007 في عربيات كتير.

الفتيس بتاع البيجو وستروين أوتوماتيك تيب ترونيك 4 سرعات متحددين مش cvt
والفتيس بتاع بيجو وستروين من تصميمهم من زمان وبتاعهم, ورينو كانت أخدته أيام الميجان وكان أسمه DP0 مع تغييرات بسيطة, وفي البيجو كان أسمه Al4 من خر التسعينات, وفي الموديلات الحديثة دلوقتي أتعالج فيه عيوب كانت موجودة وبقي الكود بتاعه AT8
فيه نتشة غير محسوسة عند النقلة للتاني علي سرعة قليلة عشان عزم الفتيس أعلي من عزم الموتور, بدليل إن بيجو وستروين هما العربيتين الصالون اللي ممكن يقطرو وزن وراهم أكتر من أي عربية أوتوماتيك تانية في السوق بنفس سعة الموتور والفئة السعرية.

أتمني أكون وضحت الفرق ما بينهم,
تحياتي ليك.