بيجو 301 والثبات

[a_nesta13]

بصراحه انا شايف ان العربيه ديه مفيهاش ريحه الثبات العربيه اول اما اوصل بيها مثلا 110 او 120 بحس ان العربيه مش راسيه علي الارض وخفيفه كده
غير ان انا في طريقي للشغل كل يوم فيه ملف موجود في الطريق الملف ده فيه خط بعرض الطريق كان محفور قبل كده تقريبا عرضه من 5-7 سم فطبعا زي ما احنا عارفين ان مكان الحفر ده لما اتصلح بقا منسوبه اوطي من الطريق
فا لما انا باخد الملف ده وانا علي سرعه بسيطه متعديش 40 او 50 بلاقي العربيه الكاوتش الامامي بيعدي مفيش اي مشكله بتحصل لكن اما يجي الكاوتش الخلفي يعدي من عليه بلاقي العربيه بتعوم من ورا بشكل محسوس جدا والعربيه بحس انها بتتحرك من ورا كانها زحفت بالعرض كده
ومثلا العربيه لو داست علي عين القطه اللي في الطريق بلاقي العربيه بتلعب كأنها مفككه من بعضة

وانا كان معايا جين 2 بصراحه مكنتش بحس بكده خالص
فهل ده عيب في العربيه ولا انا عربيتي اللي فيها مشكله

[Hunting_Eagle]

بيجو 301 عربية صغيرة للاستخدام داخل المدينة

مش بتاعة جري و حركات

و انا اعتقد ان ده الطبيعي بتاعها

خلينا نشوف الملاك رأيهم ايه

[hamaka]

متابع

[monamize4]

انا مقدرش احكم على ثبات ال 301 لانى مسقتهاش

لكن اقدر اقولك ان الجين فعلا ثباتها مميز
و بيتفوق على منافسين كتييييييييييير ف الفئة السعرية دى

[uoko000]

انا بحس بعدم الثبات بعد 120 فقط وانا فعلا خت بالى من لما اجى ساعات اعدى على عين القطة بس بسرعة عالية شوية بحس فعلا ان العربية بتعوم بس بتظبط نفسها تانى

[Adnfalcon]

ايه الكلام دا ؟
ابن خالتي سافر بيها 230 كم متواصله علي سرعات 150 - 170 وانا كنت بشد معاه طول الطريق لحد القاهره و محسش بالخطر نهائي
دا نزل بعجلتين فالرمله ع 150 ولم العربيه عادي
عموما هي عربيه ممتازه سوقتها عجبتني

[amrelsaqqa]

هى مش خفيفة بس مش طوبة ع الطريق يعنى ماتفكرش نفسك هتركب باسات يعنى
في نفس الوقت الثبات ممتاز لحد 120 ومعقول جدا ل140 وتبدأ تحس ان العربية خفيفة ( 1100 كيلو !!! ) عند 160 خصوصا لو في هوا

ولكن بردو مازالت احسن من عربيات اغلى منها بكتير زي الالنترا مثلا

موضوع النقلة اللى بتحس بيها ورا اعتقد كل التورشن بيم كدة بس ميزة العربية دى ان مفيش تنطيط على الفواصل والكلام ده وعلى فكرة مش بتعوم هى بتزحزح سنة بس وتقف و. انا كنت سالت عن الموضوع ده اول ما جبت العربية وحد هنا في المنتدى اكدلى ان اي عربية في اادنيا بتعمل كدة مع عين القط لو في ملف

المهم طبيعى تحس بفرق في الملفات عشان الجين مالتى لينك

[السعيد عيد]

بصراحه انا شايف ان العربيه ديه مفيهاش ريحه الثبات العربيه اول اما اوصل بيها مثلا 110 او 120 بحس ان العربيه مش راسيه علي الارض وخفيفه كده
غير ان انا في طريقي للشغل كل يوم فيه ملف موجود في الطريق الملف ده فيه خط بعرض الطريق كان محفور قبل كده تقريبا عرضه من 5-7 سم فطبعا زي ما احنا عارفين ان مكان الحفر ده لما اتصلح بقا منسوبه اوطي من الطريق
فا لما انا باخد الملف ده وانا علي سرعه بسيطه متعديش 40 او 50 بلاقي العربيه الكاوتش الامامي بيعدي مفيش اي مشكله بتحصل لكن اما يجي الكاوتش الخلفي يعدي من عليه بلاقي العربيه بتعوم من ورا بشكل محسوس جدا والعربيه بحس انها بتتحرك من ورا كانها زحفت بالعرض كده
ومثلا العربيه لو داست علي عين القطه اللي في الطريق بلاقي العربيه بتلعب كأنها مفككه من بعضة والله الواحد بيسمع كلام غريب دانا بركب مكنه( موتوسيكل) وزنه ميجيش 200 كيلو وبمشي 110 و120 وعادي وبخد ملفات ع 80 و90 وعادي مش عارف ازاي عربييه 4 عجلات ووزنه فوق 1 طن وبتعوم

وانا كان معايا جين 2 بصراحه مكنتش بحس بكده خالص
فهل ده عيب في العربيه ولا انا عربيتي اللي فيها مشكله

[eng-ahmed alaa]

الحمد لله انا بمشى على 150 طريق ميت غمر المنصورة مفيش حاجة من الكلام ده بتحصل العربية ثابته الاسفلت اللى بيبقى مش مزبوط فحضرتك بتحس بكده

[a_nesta13]

علي فكره ياجماعه انا شاري العربيه في السعوديه في الرياض يعني هناك الطرق كويسه جدا
وانا مش مقتنع ان انا لما ادوس علي عين القطه لازم العربيه تلعب لاني كان معايا قبلها ياريس 2010 ومكنتش بحس بأي حاجه من اللي قولتها ديه خالص

[Ahmed.Essam]

الحمد لله انا بمشى على 150 طريق ميت غمر المنصورة مفيش حاجة من الكلام ده بتحصل العربية ثابته الاسفلت اللى بيبقى مش مزبوط فحضرتك بتحس بكده

150 على طريق ميت غمر المنصورة ده مستحيل ده كله مطبات وحفر غير في منطقة واحدة فقططط والطريق فيها مستقيم ومتسفلت ودي الحتة الوحيدة في الطريق اللي متسفلتة حلو كده وطبيعي لما تمشي في خط مستقيم بالعربية متحسش بحاجة ... ده لو عربية عامت وانت ماشي في خط مستقيم تبقى مش عربية تبقى عجلة على كده

[eng.m7md.ali]

العربية اكيد فيها مشكلة .. الكاوتش مش مظبوط او العفشة عايزة تربيط او ظبط زوايا

البيجو ثباتها كويس

بس الفرق هنا بينها وبين الجين2 ان البيجو من ورا دنجل مش مقصات وده في الملفات مش حلو وكمان موضوع الفرق اللي في الطريق ده بسبب الدنجل بردو

[maio_do]

مش معاك فى كلامك العربسة ثابتها كويس جدا

[a_nesta13]

العربية اكيد فيها مشكلة .. الكاوتش مش مظبوط او العفشة عايزة تربيط او ظبط زوايا

البيجو ثباتها كويس

بس الفرق هنا بينها وبين الجين2 ان البيجو من ورا دنجل مش مقصات وده في الملفات مش حلو وكمان موضوع الفرق اللي في الطريق ده بسبب الدنجل بردو

ياريت توضحلي ايه الفرق بين الدنجل والمقصات

والفرق بين نظام التعليق في الجين 2 والبيجو

[Akram.Gamal]

بص يا باشا
انا معرفش انت عامل كام كم بس معلومه العربيه عفشتها هتفضل ناشفه فتره علي ماتلين تقريبا من 5000 ل 10000 كم علي ماتبدأ تحس ان العفشه بقت ناعمه و بتاخد و تدي ع الطريق
النقطه التانيه ظبط ضغط الكاوتش ع 30 او 32
النقطه ال3 اتأكد ان العفشه متربطه ف التوكيل لان وصف حضرتك ده بيدل ع عدم تربيط
وشكرا