عيب الفرامل في 301

[Ashraf Fawzy]

الف سلامة عليك بس موضوع الفرامل دا ميتسكتش عليه لأن دى تانى حالة بعد أ. أشرف واضح ان فيه خطأ فى التصنيع لو احنا فى بلد محترمة كنت هتلاقيهم سحبوا كل العربيات للاصلاح .. كده الموضوع بقى مقلق بالنسبة للى سايقينها وبالنسبة للى عايزين يشتروها زيي من الآخر لسان الحال بيقول اشتريها ورزقك على الله يا صابت يا خابت

"وبالنسبة للى عايزين يشتروها زيي من الآخر لسان الحال بيقول اشتريها ورزقك على الله يا صابت يا خابت" حضرتك بالجملة دى جبت من الأخر بالنسبة لكل من هو مقدم على شراء العربية, و لو إتكلمنا عن المستوى الفنى للتوكيل فى إصلاح مشاكل العربية و المستوى الخدمى و تحمل المسؤلية من جانب التوكيل الناتجة عن عيوب صناعة (سواء فى الفتيس أو الفرامل أو غيرهم), فحدث و لا حرج. اللى هايمدح فى التوكيل هايقولك عليه "سئ زى باقى توكيلات مصر".

و من باب العلم بالشئ الحالات اللى إتعرضت لحادثة بسبب مشكلة فرامل أكثر بكثير من حالتى و حالة المهندس أحمد,و على سبيل المثال و ليس الحصر:

مجموعة من ملاك البيجو 301 اللى إتعرضوا لحادث بسبب خلل فى وحدة الفرامل

https://www.facebook.com/permalink.php?story_fbid=839929142762225&id=804661146289025

http://www.nilemotors.net/Nile/427077-301.html

ضيف عليها إن التوكيل بيستخدم تيل تالف ممكن يؤدى لهروب الفرامل فى أى لحظة (اعمل بحث سريع على المنتدى هنا, و كان فيه شكوى جماعية تم تقديمها للتوكيل بخصوص التيل بالإضافة لمشاكل جماعية تانية) و كان تبرير التوكيل إن التيل خالى من الإسبيستوس و عشان كدا بيصفر و بيخلص بسرعة, و موضوع إن التيل يخلص بسرعة مش مشكلة, المشكلة إنه لا يقوم بوظيفته كما ينبغى لردائة خاماته. و نتذكر جميعاً مشكلة التيل و الطنابير اللى ظهرت فى بعض عربيات نيسان الجديدة و إقرار النيابة العامة بوجود مشكله فيهم.

للإسف كثير من الناس مش مدركين إن التيل التالف ممكن يؤدى لهروب الفرامل فى أى لحظة بدون ماتقدر تحدد فترة زمنية (زى إن العربية بقالها معايا سنة) أو مسافية (أنا عامل بالعربية 20000 كيلو), التيل مش وحدة ميكانيكية عشان يظهر عيبها مع كل إستخدام, التيل ده من المفترض إن بيتم تصنيعه من خامات تجعله قادر على القيام بوظيفته و هيا توفير معدل قياسى من الإحتكاك بالطنابير تحت ظروف العمل القصوى (زى درجة حرارة التيل و الطنابير الناشئة عن الإحكتاك المتقطع و المتواصل) لإيقاف السيارة على مسافة ما.

و للإسف موضوع تكرار مشاكل الفرامل فى ماركات مختلفة بيدل بصورة قاطعة على غياب الدور الرقابى, بالإضافة للمعاناة اللى بيمر بيها أى حد يحاول يوصل لحقه بالقانون من مماطلة و تسويف و تكون النتيجة تنازل كثير من الناس عن حقهم و يرضوا بإنهم يصلحوا العربية برا أو يبيعوها كعربية حوادث أو يخلوا التأمين يغطى تكاليف تصليحها فى التوكيل (و الله أعلم ساعتها مشكلة الفرامل بتتصلح مع تصليح العربية و لا التوكيل بيسيب الناس ماشيين بنفس المشكلة).

[ابو هنا]

السلام عليكم ا / اشرف
انا نفسي اوصل لاجابة سوالي يعني اه التوكيل بيستخدم تيل فاسد ؟
هل هو التيل الي بيجي مع العربية من الاول ؟
ولا التيل الي التوكيل بيغيرة في الصيانة ؟
علشان انا العربية عامل بيها 15000 كم ولسة مغيرتش التيل في التوكيل . يا ريت حد يفدني علشان لو كدة اكبر دماغي من التوكيل واوفر فلوسي واصين بره

[Ashraf Fawzy]

السلام عليكم ا / اشرف
انا نفسي اوصل لاجابة سوالي يعني اه التوكيل بيستخدم تيل فاسد ؟
هل هو التيل الي بيجي مع العربية من الاول ؟
ولا التيل الي التوكيل بيغيرة في الصيانة ؟
علشان انا العربية عامل بيها 15000 كم ولسة مغيرتش التيل في التوكيل . يا ريت حد يفدني علشان لو كدة اكبر دماغي من التوكيل واوفر فلوسي واصين بره

نظراً لظروف خارجة عن الإرادة مش هاقدر ارفق الصور و اللينكات الخاصة بمشاكل التيل, لكن هاتلاقي الصور فى الموضوع بتاع حادثتى فى اخر 5 صفحات و اعمل بحث سريع هنا على مشاكل تيل بيجو 301 بحيث تكون ملم بالموضوع.

أولاً عدد كبير جداً من البيجو 301 نزلت بتيل تالف و اتغير عند عدد كبير من الملاك قبل الـ 10000 كيلو و رجعوا تانى غيروه قبل الـ 20000 كيلو و بتبدأ تسمع صوت صفارته عند 3000 لـ 3500 كيلو, يبقى التوكيل بيستخدم نفس النوعية أو عنده شحنه بيخلص منها و إن شاء الله هايخلص علينا بيها و حسبنا الله و نعم الوكيل, اللى عايز يلعب فى مواصفات, يلعب فى نوع الكومبريسور, نوع السماعات, نوع الكشافات حتى, لكن توصل لأجزاء وحدة الفرامل !!!

مشكلة الفرامل اللى ظهرت عندى و عند ناس تانية ماكنتش مشكلة تيل تالف و بس, كان فيه مشاكل فى أداء وحدة الإيه بى إس, و طبعاً حضرتك عارف اللينكات الخاصة بيا و الخاصة بالناس اللى عملت حوادث قبل و بعد حادثتى بسبب ضعف عمل وحدة الإيه بى إس و وجود مشكله فيها.

و طبعاً بما إن كل شئ فى العربيات الحديثة بيتم من خلال وحدة الكمبيوتر و السوفتوير بتاع العربية بما فيها التحكم فى وحدة الفرامل, و بما إن كل شوية نسمع عن ناس عملت تحديثات للعربية و بيشتكوا إن أداء العربية بقى سئ, فمبقاش حد عارف مشاكل العربية نابعة من إيه و لا إيه, من التيل و لا وحدة الإيه بى إس و لا السوفتوير و لا منهم كلهم مع بعض. و ده شئ متوقع تلاقيه فى عربية تسمع عنها كلام من موظفين فى التوكيل يحمل معنى "إحمدوا ربنا إنكم راكبين عربية بيجو بالسعر ده".

ختاماً, لو التيل ماشى معاك تمام لغاية دلوقتى يبقى الحمد لله إنت من الناس اللى حظهم كويس, و مقدرش أقولك تغير التيل فى التوكيل أو لأ, الطبيعى إنك تغيره فى التوكيل لإن من المفترض إن التوكيلات بتستخدم أفضل قطع غيار و عشان لا قدر الله لو ظهرت مشكلة عندك فى وحدة الفرامل مايبقاش حجة عليك, لكن الواقع إن التوكيل بإجماع القاعدة العامة من ملاك العربيات البيجو وصل لأدنى درجات المنحدر فى مستوى التعامل و الأمانة مع عملائه و أكيد حضرتك متابع أراء ملاك العربية, و الناس اللى بتقول في مراكز معتمدة ذات مستوى جيد, هاقولك المراكز دى مش بتستورد قطع الغيار, التوكيل هوا اللى بيستوردها. ربنا يوفقك لأفضل الحلول و يحفظنا جميعاً مما إبتلانا.

[ابو هنا]

جزاك الله عني كل خير . واعانك على بلواك