peugeot 504

[محمد ابراهيم 1]

الدكتور بتاع جامعه القاهره نفسى اعرف وزنها إذاى
العربيه قديمه والتصميم ده ثورى آنذاك كانت بتجيب سرعات مكانش حد يتخيلها فى الوقت ده
انا كنت بجيب 140 بعربيتنا ومكنتش بحس انها خفيف للدرجه دى وربنا شاهد على كلامى

504 مميزاتها أكثر بكثير جدا جدا من عيوبها

[hazem_khidr]

طب انا ححكي موقف حصل ليا بال 504 بس كنت صغير عندي يدوب 7 سنين لكن فاكره كويس.
كنت مع خالي و رايحين القاهره نجيب والدي من المطار علشان كان مسافر المهم و احنا فوق كوبري قليوب باين او حاجه زي كده راحت العجله اللي قدام الشمال بقي مش نامت و لا ضربت.........لا دي طارت من العربيه!!!!!!!!!!
اه و الله طارت من العربيه و خالي فضل ماسك الدركسيون و مكلبش فيه لحد ما وقفها و هيا من غير عجله اماميه.المهم الناس اتجمعوا و الفرده لما فكت من العربيه اتحشرت في الحاجز الاسمنتي اللي في الطريق و ستر ربنا ما طلعتش علي الطريق التاني و دخلت في حد معدي.المهم الناس جابوها و ركبوها(فكو مسمار من كل فرده و ركبوها بتلات مسامير) و واحد من اللي واقفين راح يجربها و رجع لان خالي كانت اعصابه خلاص راحت و كملنا طريقنا الحمد لله.
ف لو العربيه دي سيئه للدرجه مكنتش استحملت دا كله طبعا ستر ربنا في الاول و الاخر هو اللي انقذنا لكن لو عربيه تعبانه مكنتش استحملت كده و مشيت تاني كأن لم يكن

[Islam_galal]

السلام عليكم
مع احترامي للجميع لكن النعش الطائر و الثبات و ال7 كجم عند 100كم/س و ال 0 كجم عن 120 كم/س
كل الكلام علي البيجو 404 و لا يسري علي الـ 504
انا لي تجارب شخصيه مع عربيه موديل 79 و حالتها كويسة
العربية تحفة و ثبات رائع و تعتبر سابقة عصرها بكتير و لا زالت حتي الآن لها طعم عن عربيات كتير موديل 2007

[waleedabbas]

الموضوع بتاع سبعة كيلو يا جماعة مش عارف منتشر ليه
انا ليا واحد صاحبى مهندس سيارات وعمه استاذ ورئيس قسم ميكانيكا سيارات فى جامعة عين شمس
وكل ماكان يسمع الكلمة يقعد يضحك ويقول انا نفسى اعرف ازاى المصريين حسبوها وعرفوا ان وزنها 7 كيلو علميا مفيش حاجة اسمها كده
وكلمة النعش الطائر دى جت بسبب ان العربية كانت فى وقتها سابقة عصرها وسريعة جدا وكان السواقين وقتها مش واخدين عليها وكانوا بيعملوا بيها حوادث من قوتها وسرعتها مش بسبب عدم اتزانها
وحصلى موقف شبيه جدا بال حصل مع استاذ حازم بس العجلة ضربت مش فكت وكنا 6 فى العربية ومسافرين اسكندرية وكان ساعتها والدى ماشى على 120 والحمد لله العربية عامت شوية بعد ما العجلة ضربت بس الحمدلله فى مكانها لغاية ماوقفت
لكن اتزان العربية بالنسبة لعصرها معقول جدا

[hazem_khidr]

لكن اتزان العربية بالنسبة لعصرها معقول جدا

اتزان معقول و اللي احسن منها بقي كمان ال 505 كانت تحفه بكل المقاييس و عربيه مكلبشه في الارض بطريقه فظيعه و برضه نفس موتور ال 504 التحفه بس مالهاش حظ .كان معانا واحده اواخر التسعينات و كانت حكايه الراحه و لما اتباعت زعلت عليها جدا.
من الحاجات اللي بلاحظها بقي ان عمرك ما تلاقي عربيه بيجو من القدام دول راكنه علي جنب الطريق و صاحبها فاتح الكبود و بيصلحها!!!!!!!!!!

[waleedabbas]

اتزان معقول و اللي احسن منها بقي كمان ال 505 كانت تحفه بكل المقاييس و عربيه مكلبشه في الارض بطريقه فظيعه و برضه نفس موتور ال 504 التحفه بس مالهاش حظ

فعلا يا باشا معاك حق عربية ممتازة جدا ومن احسن عربيات بيجو هى ال 505 وعوضوا فيها فعلا موضوع الاتزان بتاع ال 504 مع نفس الموتور التحفة على فكرة صاحبى مهندس الميكانيكا ده شغال فى توكيل فولكس دلوقتى ولما كان فى الكلية كانوا بيدرسوا موتور ال504 ده وبيسموه المعجزة وانه لغاية النهاردة ماتعملش موتور زى ده
بس مش عارف ليه ال 505 مالهاش حظ وبالرغم من كده ال معاه مش بيفكر يبيعها خالص ولو بيبع تلاقيه ماسك فى سعر عالى ومش بيتنازل
يعنى موديل 80 تلاقيها 40 الف ومتنزلش عن 38
وموديل 90 مثلا تلاقيه ماسك فى 65

من الحاجات اللي بلاحظها بقي ان عمرك ما تلاقي عربيه بيجو من القدام دول راكنه علي جنب الطريق و صاحبها فاتح الكبود و بيصلحها!!!!!!!!!!

فعلا ماشاء الله ملحوظة غريبة وحقيقية فعلا

[hazem_khidr]

بس مش عارف ليه ال 505 مالهاش حظ وبالرغم من كده ال معاه مش بيفكر يبيعها خالص ولو بيبع تلاقيه ماسك فى سعر عالى ومش بيتنازل
يعنى موديل 80 تلاقيها 40 الف ومتنزلش عن 38
وموديل 90 مثلا تلاقيه ماسك فى 65

مالهاش حظ علشان احنا بنحب القديم بنقول علي ال504 جدع من ال 505 و الزلموكه احلي 100 مره من العيون .و دا اللي حصل مع ال 505 بس اللي بيميز حيركب ال 505 و هو مغمض دا كانت ليها فتره طويله اسعارها اقل من ال 504!!!!! تخيل دي بقي.....
عربيه فعلا كانت معانا و الله ما زعلتنا رغم ان مكنش حد مهتم بيها ابدا

[ahmed1981]

انا كنت بجيب 140 بعربيتنا ومكنتش بحس انها خفيف للدرجه دى وربنا شاهد على كلامى

من غير ما تحلف يا ديدو أنا مصدقك
كان عندنا واحدة إستيشن 80 وحاليا عمي عنده واحدة زيها بالضبط 81
كل الكلام اللي بتقولوه عليها صح
لكن في حالة لما الكاوتش يضرب وإنت ماش بسرعة نسبيا (100 مثلا) العربية بتعمل عمايل محصلتش (تمسك الطريق ترئيص على الونجين شوية يمين وشوية شمال :D )
وده عن تجربة أكثر من مرة الكاوتش ضرب معايا على سرعات مختلفة (100 & 120 & ......)
وأنا لا أنقص من قدرها لكن أقول هذا العيب الخطير للأمانة عن تجارب شخصية :shock:
ولكن عن السرعة والموتور فأنا ركبتها مع واحد ماشي على 160 (خايفين طبعا بس برضه :D 160)
وعمري لما كنت بسوقها وأشد بيها عمر ما حد كان يعرف يجاريني في التسارع
(لكن أنا كما أقول المزايا قلت أيضا أهم العيوب بحيث لو إشتراها أحد بناء على تقييماتنا يعرف إن أهم حاجة الكاوتش يكون 100% دائما ويراجع عليه دائماً لأن الغلطة فيه وحشة)

[hazem_khidr]

لكن في حالة لما الكاوتش يضرب وإنت ماش بسرعة نسبيا (100 مثلا) العربية بتعمل عمايل محصلتش (تمسك الطريق ترئيص على الونجين شوية يمين وشوية شمال

اي عربيه لو الكاوتش الامامي ضرب علي السرعه دي حتبقي مشكله كبيره مش حاجه سهله خالص حتي لو مرسيدس.

وعمري لما كنت بسوقها وأشد بيها عمر ما حد كان يعرف يجاريني في التسارع
(لكن أنا كما أقول المزايا قلت أيضا أهم العيوب بحيث لو إشتراها أحد بناء على تقييماتنا يعرف إن أهم حاجة الكاوتش يكون 100% دائما ويراجع عليه دائماً لأن الغلطة فيه وحشة)

طب جربت تشد بيها قدام 132 2000 فايقه :)

[modux]

يا جماعة مش هقدر اقولكوا غير انها كانت و ما زالت عربية 100100 بكل المقاييس
هاتلي عربية موديل السبعيات فيها كل الاوبشنز دي غير المرسيدس !!!!

انا بابا فضل يبع واحدة و يشتري غيرها لحد سنة 2002

و مان و ما زال يحلف بيهاااا

[hazem_khidr]

اكيد طبعا يا modux عربيه سابقه عصرها و الا ماكنتش نجحت النجاح دا كله في مصر .اعيب عليها بس الشكل بتاعها مش بحبه اوي لكن هيا كعربيه مالهاش حل الصراحه

[ahmed1981]

[quote="hazem_khidr"]

اي عربيه لو الكاوتش الامامي ضرب علي السرعه دي حتبقي مشكله كبيره مش حاجه سهله خالص حتي لو مرسيدس.[/

للأسف الكاوتش الخلفي كان هو اللي بيضرب دائماً

واللي بيحصل لو الكوتش بتاعها ضرب مش زي أي عربية تانية بتبدع في الرقص على الواسع :D
(شيء طبيعي لو الكوتش فرقع في أي عربية إنها تعوم حتى لو مرسيدس بسسسسسسسسس مش زي ال 504)
أنا ليا تجارب معاها ومع غيرها وربنا يحفظنا جميعاً

وبرضه لو حد ليه تجربة شخصية مع ال 504 لما كوتشها يضرب وبيقول إنها مبتبقاش مشكلة وبتبقى عادية يقول وأنا أول واحد أصدقه ويا ريت لو كان جرب نفس الظروف مع سيارة مماثلة عشان يقول الفرق عن تجربة

[hazem_khidr]

بس متهيالي ان الاستيشن حيبقي ثباتها اقل من السيدان ولا اللي انت فرقعت منك الفرده كانت سيدان برضه؟

[ahmed1981]

بس متهيالي ان الاستيشن حيبقي ثباتها اقل من السيدان ولا اللي انت فرقعت منك الفرده كانت سيدان برضه؟

إستيشن يا باشا

ومرة من المرات بعيد عنك وعن السامعين والقارئين عجلة ضربت والعربية رقصت وسخنت من الرقص ودماغها عليت وأصرت تلف لفتين في الهواء وتستقر بعد ذلك على جانب الطريق بس للأمانة بعد كام قلبة وقفت على رجليها زي الأسد :D ولله الحمد

[تامر.محمد]

إستيشن يا باشا

ومرة من المرات بعيد عنك وعن السامعين والقارئين عجلة ضربت والعربية رقصت وسخنت من الرقص ودماغها عليت وأصرت تلف لفتين في الهواء وتستقر بعد ذلك على جانب الطريق بس للأمانة بعد كام قلبة وقفت على رجليها زي الأسد :D ولله الحمد

يا خبر ابيض