::: أعطـــال الميجـــان من مالكى السيارة :::

[fahd_628]

يا حوش انا لازم اكون صريح مع حبى الشديد جدا جدا جدا للميجان و لكن انا مقدرش اخبى حاجة طبعا و لازم اكون صريح 100 %

من كام يوم والدى كان ماشى بالعربية و لسة طالع من التوكيل و بعدين لقى نتشة جامدة جدا جدا جدا بيقولى اكنة خبط فى حاجة من تحت و مكتوب Check gearbox فا طبعا الوالد قام راجعلهم و طلعت المشكلة من سينسور فى الفتيس و تم التغيير فى الضمان و كله تمام الحمد لله

و طبعا الموضوع دة مأثرش خالص خالص على حبى للميجان لأن دة عادى وارد يحصل لأى عربية

[chato_eg]

شوف الأمور بتتم بسلاسة إزاى....لو توكيل تانى كان الموضوع بقى شغلانة تانية...و فى الآخر كل العربيات بتبوظ فيها حاجات لإنها آلة من صنع الإنسان..

[Hany Saad]

يا جماعة أنا حصل برضه معايا خبطه جامدة فى الgear Box و بعدين ظهر على الشاشة Check Gear Box و ده مشكلة Solenoid واصل بالgear Box و المشكلة دى رينو فرنسا مبلغه بيها الوكلاء و العيب ده موجود فى بعض السيارات المعروفة من رقم الشاسيه لأن أول ما حصل الوضوع ده أنا إتصلت بالتوكيل و سألنى عن رقم شاسيه العربية علشان يعرف أنا جوه الbatch المعيب و لا لأ.

[Hany Saad]

Dephaser Pulley Problem

يا جماعة بالنسبة للديفازر و دى تصنيع شركة Delphi الأمريكية و يوجد بها عيب فى التصنيع وارد به Memo من رينو فرنسا, أعتقد تم تلافى العيب إلى حد كبير فى موديلات 2009.

أعراض الديفازر خبطه جامده مع الدوران (كأنه صوت تكسير تروس فى المارش) و سعات تبطيل أول م السيارة تقوم فلازم تدوس بنزين على طول علشان متبطلش منك.

الديفازر أصلا عبارة عن حلقة بتدور بدخول الزيت جواها , علشان كده من أهم الأسباب اللى بتعجل بعطله هو عدم تغيير الزيت بإنتظام, إستخدام زيوت غير تخليقية (معدنية) عدم إستخدام السيارة بإنتظام (إستخدام بسيط) التدوير الكثير و المشاوير البسيطة (داخل المدينة).

الأخبار المفرحة إنه نزل منشور من رينو فرنسا بتغيير الديفازر تحت الضمان حتى لو السيارة خارج الضمان ( قمة الإحترام ).

[topgear]

صوت فى الابواب مع المطبات بتحس انوا العربيه مفكوكه
ده فى ال 2005
وهل الموضوع ده موجود فى ال 2007

[Ahmed Selim]

و ده عطل برضه يابوحميد ؟؟؟

أستعمل STP Silicon Spray من بنزينة أمارات مصر + و أنت فى الصيانة خليهم يربطوا الأقفال بتاعة الأبواب.

على فكرة....الموضوع ده بيحصل فى معظم الأوروبى.....بى أم قديم و أوبل 97 و أوكتافيا 2004.......الكلام ده من فترات كبيرة شوية مش لسه حاصل دلوقتى يعنى.

[topgear]

هوا فعلا مش عطل بس مشكلة بس انا حبيت اكتب المشاركه للتنبيه فقط
وانا سالت مهندس كار بويز وقالى دى مش هتختفى (بتختفى وترجع)........وانوا هوا حاول فيها فى عربيتوا مع زميلوا شغال فى رينو

وان شاء الله فى الصيانه الجايه هعملها
شكرا يا احمد باشا

[Ahmed Selim]

العفو يا باشا
هى فعلاً بتختفى و ترجع عشان السبب اللى قولتهولك.......و السبب نفسه ملهوش حل :)

[chato_eg]

الحل تعمل زى أسراب الطيور بتاعت Planet Earth ....هجرة...بس علشان تبقى متميز عن الطيور ماتخليهاش موسمية

[Ahmed Selim]

الحل تعمل زى أسراب الطيور بتاعت Planet Earth ....هجرة...بس علشان تبقى متميز عن الطيور ماتخليهاش موسمية

علل.......أو فسر


أيه يا عم هانى الطلاسم دى؟

[chato_eg]

المشكلة فى التراب ....
و دى حاجة مستديمة....مهما هتنضف و تحط Silicon Spray برضه هترجع نفس المشكلة
سبب المشكلة ( التراب ) مالهوش حل غير الحل بتاع الهجرة...يعنى الواحد ياخد عربيته و يطفش من البلد أو على الأقل القاهرة ...
إنت شكلك لسه ما شفتش الفيلم بتاع Earth إللى كنت بتسأل عليه امبارح

[hasan777]

انا حطيت نقطة زيت في الكوالين بتاعت الابواب و الصوت راح في الحال والموضوع دة من 6 اشهر فاتوا والصوت مجاش تاني

[Ahmed Selim]

المشكلة فى التراب ....
و دى حاجة مستديمة....مهما هتنضف و تحط Silicon Spray برضه هترجع نفس المشكلة
سبب المشكلة ( التراب ) مالهوش حل غير الحل بتاع الهجرة...يعنى الواحد ياخد عربيته و يطفش من البلد أو على الأقل القاهرة ...
إنت شكلك لسه ما شفتش الفيلم بتاع Earth إللى كنت بتسأل عليه امبارح

فعلاً لسه مشفتهوش.....أصل النت عندى فى البيت بعافية شوية.

انا حطيت نقطة زيت في الكوالين بتاعت الابواب و الصوت راح في الحال والموضوع دة من 6 اشهر فاتوا والصوت مجاش تاني

ده حل تانى طبعاً بس أنا عن نفسى محبش ألجأله.........شكراً يا باشا

[easy2002]

والله يا جماعة مع اني عضو جديد بس أنا جربت الميجان دي مع 3 عربيات والتلاتة هاتش باك وكمان خليجي
موديلات 2004.2005.2006
ولسه بايع ال 2005 من حوالي كام شهر كده
تجربتي مع العربيات بصراحة العربية اللي هيا موديل 2004 كانت أسوأهم ال 2005 مظهرش فيها مشاكل كتير غير ان انا غيرت كوتشين ادام كونتيننتال زي اللي كانوا جايين معاها ب 870 جنيه الفرده وكان فيها مشكلة في المساعدين الخلفي وديته لعفشجي عادي طلعه ونظفه ورجعه وقعدت معايا سنه قبل ما ابيعها مفيهاش حاجة وطبعا المشكلة بتاعت المساعد كانت من الركنة بتاعتها في جراج في بلد أرياف لمدة شهرين ونصف لحد ما خلصت امتحاناتي ورحت رخصتها
غير كده في صيانة ال 40000 غيرت تيل فرامل امامي ومساحات امامية برده وعلى كده محصلش فيها حاجة لحد ما بيعتها

2006 لم يظهر بها عيوب حتى الآن

2004 وهيا مع والدي ف السعودية وهيا دي بصراحة اللي كرهتني في كل الميجان وخلتني عايز أبيع الاتنين اللي باقيين
أول عيب ظهر فيها كان الحوار بتاع حساس الكامة ده ده طبعا كان بعد ركنتها 3 شهور (أجازة والدي كان في مصر والعربية مركونة ف جراج مفتوح ف السعودية) وكان ف الفترة دي عواصف ترابية التوكيل هناك قالوا لوالدي ان المشكلة من كده

تاني عطل فيها هوا مواتير الزجاج غيرنا ال 4 مواتير

بعد كده طلع حوار الكويل وغيرنا اتنين حتى الآن

مع العلم ان الرسالة بتاعت Check Gear Box طلعت وكان العيب ف الكويل مش ف الجير بوكس

وبعد كده غيرنا 2 مساعد خلفي.

وبس والعربية ماشية تمام بس انا ملاحظ حاجة غريبة فيها ان البور بتاعها أتقل من العربيتين التانيين مع العلم انها طاسة مش جنط
والاتنين التانيين جنوط

أغلب الأعطال تم تغييرها ف الضمان ماعدا 2 ماكينة زجاج الكويلز البطارية

[Amr_Moh]

معنا الكلام دة يوحوش إن العيوب كنت أغلبها في موديلات ٢٠٠٤ إلهيا أصلاً مش موجودة كتير فمصر و بعض ٢٠٠٥