إسكندرية... شرم الشيخ بالميجان....؟؟؟؟

[Hany Saad]

إزيكم يا أحلى وحوش.....

زى ما إنتم عارفين أنا من إسكندرية و بفكر أعمل حركة جريئة و أسافر بالميجان لشرم الشيخ أنا و الأسرة.

طبعا قبل السفر إن شاء الله هكون مغير أربع فرد كاوتش بريدجستون جداد زى ما قلتلكم النقشة الجديدة الgr90.

لسه معايا 2500 كيلو قبل صيانة ال40000 فى التوكيل.

التكييف متظبط و كله تمام.

يارب بس الميجان تطلع أصيلة معايا و متهرجش فى السكة.

يا ريت تشاركونى إيه أبعد سفر عملتوه بالميجان و الأداء كان عامل إزاى......

مستنى مشاركتكم المفيدة دايما.......

[nab!l]

انا شايف ان حضرتك خايف ومقلق زياده عن اللزوم ومعندكش ثقة فى عربيتك
انا ركبت الميجان وعجبتنى اوى فى السفر
وفى ناس بتروح شرم بعربيه لادا وعادى
لو عربيتك حالتها كويسه ليه الخوف
اتوكل عل الله

[ramy_gamal]

اعتقد هتكون اصيله طبعا انا ناوى اروح شارم بالكليو وكان واحد صاحبى سافر شرم بعربيه زى عربيتى واستريح اوى ... توكل على الله وماتقلقش

[Mohd_Adel_Amin]

بإذن الله تشرفك ,حسب ما اعتقد اثنين من الوحوش نزلو بيها من السعودية وكانت اصيلة معاهم محمد مصطفى ورامي طنطاوي , وانا مرة سافرت بيها من اسكندرية لحد العاشر رايح جاي ومن ثم الى طنطا بدون توقف والتكييف شغال باستمرار وكانت ما شاء الله زي الفل ..

[Hany Saad]

انا شايف ان حضرتك خايف ومقلق زياده عن اللزوم ومعندكش ثقة فى عربيتك
انا ركبت الميجان وعجبتنى اوى فى السفر
وفى ناس بتروح شرم بعربيه لادا وعادى
لو عربيتك حالتها كويسه ليه الخوف
اتوكل عل الله

مش حكاية قلق و لا حاجة....بس الواحد بيخاف لحسن لا قدر الله حاجة من الحساسات و لا الكهربة تعطل فى السكة و معايا الأسرة..... فالرحلة تقبل عكننه لأنى على الطريق مش هلاقى حد ينقذنى.....


لكنى متوكل على الله و إن شاء الله هشارككم بالتجربة و مشكور على المشاركة

[Col. Eng. Khaled]

إعتمد على الله و لا تقلق

طلعت الطلعة دي في 2006 (من إسكندرية قبل ما أنقل القاهرة) قبل ما ربنا يكرمني بالميجان ، كان معايا لانوس 99 مش حارمها من حاجة ....... ما خذلتنيش .

إن شاء الله رحلة سعيدة ...... على شهر 7 إن شاء الله طالع على هناك .

- ياريت تعمل الصيانة قبل ما تطلع ، من إسكندرية لشرم حوالي 1400 كم رايح جاي ......... و الفسح مغرية هناك .

[Hany Saad]

بإذن الله تشرفك ,حسب ما اعتقد اثنين من الوحوش نزلو بيها من السعودية وكانت اصيلة معاهم محمد مصطفى ورامي طنطاوي , وانا مرة سافرت بيها من اسكندرية لحد العاشر رايح جاي ومن ثم الى طنطا بدون توقف والتكييف شغال باستمرار وكانت ما شاء الله زي الفل ..

أنا أبعد حاجة كانت العين السخنة بدون توقف من الأسكندرية و كانت زى الفل....و طبعا القاهرة كتير....

لكن المرة دة بعيدة شوية و طريق أول مرة أدوسه....أنا بفكر أروح القاهرة الأول أبيت و بعدين أطلع تانى يوم بدرى على شرم.....حاسس هيكون صعب أوى من إسكندرية لشرم دايركت....هتبقى متعبة لى و للعربية...و لا إيه رأيكم؟؟؟

يا ريت اللى سافر لشرم بالعربية يفدنى هل الطريق كويس و لا خطر....مشكورين يا وحوش......

[Hany Saad]

إعتمد على الله و لا تقلق

طلعت الطلعة دي في 2006 (من إسكندرية قبل ما أنقل القاهرة) قبل ما ربنا يكرمني بالميجان ، كان معايا لانوس 99 مش حارمها من حاجة ....... ما خذلتنيش .

إن شاء الله رحلة سعيدة ...... على شهر 7 إن شاء الله طالع على هناك .

- ياريت تعمل الصيانة قبل ما تطلع ، من إسكندرية لشرم حوالي 1400 كم رايح جاي ......... و الفسح مغرية هناك .

مشكور يا جنرال....شجعتنى على الموضوع أكتر....كده برده تكون عندنا فى إسكندرية و تهاجر للقاهرة


كانت تبقى فرصة حلوة لو قابلت حضرتك هناك لكن تتعوض إن شاء الله.

يا ترى حضرتك أخدتها دايركت (طبعا مع الوقوف المتقطع للإستراحة و خلافه) و لا بيت فى القاهرة الأول و بعدين طلعت من هناك؟ أصلى معايا طفلين 6 و 2 سنة و بصراحة خايف يملوا من طول الرحلة.

يا ترى إيه أخبار الطريق....أصلى أول مرة أدوسه و يا دوبك كده عارفه بالشبه....يعنى تقريبا نهاية طريق مصر الإسماعيلية الصحراوى و بعدين نحود ناحية رأس سدر و الفردان و نرجع لتحت ساحلى على طول لغاية شرم الشيخ.

طبعا اللى بقوله ده نظرى بحت و أكون شاكر لأى مساعدة.

[Col. Eng. Khaled]

ربنا يبارك في حضرتك و نتقابل إن شاء الله على خير

إتحركت من إسكندرية 7 ص و صلت تقريبا 4 م

إسكندرية - القاهرة - طريق السويس (مش الإسماعيلية) ، من بعد البوابة يو تيرن مع أول دخلة يمين

لغاية نفق الشهيد أحمد بدوي ....... بعد الخروج من النفق السير مع العلامات الإرشادية لراس سدر .... إلخ .

وقفة قصيرة للتفويل و بعض المشتروات من ماركت محطة البنزين بعد بوابة طريق السويس و قبل النفق .

إستراحة 30 دقيقة في سدر ، تكملة السير حتى شرم و الإستمتاع بالمناظر الطبيعية .

إن شاء الله و حضرتك راجع حتكون أخدت على طبيعة المنحنيات المفاجئة .

[nab!l]

مش حكاية قلق و لا حاجة....بس الواحد بيخاف لحسن لا قدر الله حاجة من الحساسات و لا الكهربة تعطل فى السكة و معايا الأسرة..... فالرحلة تقبل عكننه لأنى على الطريق مش هلاقى حد ينقذنى.....


لكنى متوكل على الله و إن شاء الله هشارككم بالتجربة و مشكور على المشاركة

يعنى الحساسات مش هتعطل الا فى المشوار ده
دوس ياريس وطمنا

[د.محمود صلاح]

توكل على الله ... انا سافرت بيها من القاهرة الى المنيا ( موطني ) من المطار ومحمل شنط في الشنطة و4 أشخاص وفي عز الحر والمكيف شغال وعلى سرعة 150 وما كحيتش مني .

[chato_eg]

بالسينيك مع أحمد كمال على مقعد القيادة طبعا
القاهرة - شرم الشيخ - القاهرة فى نفس اليوم رايح راجع...
No Problem @ ALL

عربيتى...أختى الصغيرة و معاها والدتى و جدى و جدتى و بالشنطة مليانة على الآخر....راحوا رأس البر...و رجعوا على الطريق الساحلى و بورسعيد - الإسماعيلية - القاهرة...مش فى نفس اليوم طبعا...لكن الرحلة كانت آمنة و أول مرة جدتى ما تشتكيش من السرعة مع إن أختى كانت أول مرة تشوف ال 130 و هى إللى على الدركسيون

توكل على الله يا باشا....العربيات دى اتعملت علشان متعة الرحلات...تروح و ترجع بالسلامة

[marwan_147]

سيبها لله............

[yasserelsayad]

انا روحت بيها مرة من القاهرة لشرم عادى جدا دوس وماتقلقش

دا انا مرة روح القاهرة - مارينا - اسكندرية - مارينا والقاهرة تانى ورا بعد على طول عشان كنت بنتقل حجات من الشقة للشاليه فا اعتقد ان الموضوع مع العربية هيكون مفيش فيه مشكلة وساعة الرحلة دى العربية كانت عاملة حوالى 78 الف كيلو

[Mohd_Adel_Amin]

توكل على الله يا باشا....العربيات دى اتعملت علشان متعة الرحلات...تروح و ترجع بالسلامة

فعلا يا هاني الميجان ليها طعم خاص في الرحلات , احنا المكتب عندنا احيانا بنطلع سفريات لأماكن كثير وبتكون العربيات جاية من المالك او المقاول كلها متعبة في السفر سواء كانت كورولا او اوكتافيا او لانسر , في المرة اللي سافرنا بعربيتي الكل كان مبسوط جدا من أداءها في السفر وكانو مرتاحين فيها اكثر من ال c180 بتاعة الدكتور .. تخيل ؟؟