فلوانس vs ميجان II ....فئة الديناميك...الإضافات و النواقص...

[bukla]

السلام عليكم و رحمة الله و بركاتة يا احلى اعضاء فى احلى منتدى
احب اشكر كل من شارك فى النقاش المثمر اللى فى الموضوع دة لانة فعلا ركز ضوء قوى على مواصفات و امكانيات درة رينو الحالية (فى مصر) الفلوينس
و اتمنى ان النقاش يكون مثمر لتوضيح كل ما يخص العربية للسادة الاعضاء فى المنتدى ككل اللى ممكن يكون فية كتير منهم بيفكر يغير عربيتة و بيدور بين الاقسام علشان يوصل للمعادلة الصعبة بالترتيب اللى بيختلف من شخص لاخر بالنسبة لى الاعلى كفائة ثم الاجمل شكل ثم الاحسن سعرآ بالاضافة الى اعلى اوبشنز
اتمنى التوفيق للجميع
على فكرة فية تطوير فى الفلوينس متقالش حابب اضيفة و هو ان الايرباجز امتلائة بالهواء لة ثلاث درجات علشان فيها حساس بيقيس قوة الاصطدام لا قدر الله و على قد الخبطة بتبقى درجة الامتلاء

[ecybrarian]

يا سيد wawoo ردك على المهندس هاني محمد مجتزء بشكل كبير جدا..على طريقة ولا تقربوا الصلاة...المهندس هاني كان واضح جدا وقال إن التوكيل مركز مع اللوجان على حساب الفلوينس...يعني الرقم بتاع الجمارك دا محتاج تفصيل كام منهم لوجان وكام فلونيس..المهندس هاني يقصد بيع اللينيا (فيات) مقابل بيع الفلوينس وليس كل الرينو مقابل كل الفيات...بس حضرتك ما لم ترد على الأهم..فاسمح لي اسألك بوضوح..هل من الممكن ان تعدد لنا في نقاط عناصر تطور الفلوينس الهندسي فقط؟

[magedfarid]

ديزاين الكبوت مخلى دراعات المساحات ساقطة لتحت قوى....فلو حاولت ترفع الدراعات بإيدك كالمعتاد علشان تنظف الزجاج مش هينفع و دراع المساحات هيتحاش فى الكبوت....

الحل إنك تنزل عصاية تشغيل المساحات للأسفل بعد غلق العربية هتلاقى المساحات إتحركت و بقت فى وضع رأسى و ساعتها تقدر ترفعها و تبعدها عن الزجاج......

طبعا المشكلة الكبرى لو إنت كنت مستعجل و ركنت بسرعة تجيب حاجة و جه السايس الغشيم إياه و حاول يرفع دراعات المساحات بقوة ساعتها أكيد أكيد الكبوت هيبوظ الكبوت فى المنطقة دى........

شكرا جزيلا

[Hany Saad]

الميجان السابقة السيدان كانت محاولة من رينو للدخول للاسواق المتوسطة و تصنيع سيارة سيدان مناسبة للاسواق الناشئة و كان قرار تجميعها فى تركيا لهذا السبب فى الاساس و كانت المصانع التركية فى بدايتها و كنت خبره هذة المصانع فى اولها ..و معظم المشاكل كانت نتيجة عدم ملائمة الموديل السابقة لظروف التشغيل العجيبة فى دول العالم الثالث ....مش بسبب عدم كفائة المهندسين و المطورين بدليل ان النسخة الاوروبية الهاتش باك كانت بلا مشاكل تقريبا لانها من المصانع الاوروبية و لكن هناك فرق كبير فى السعر ..
الان المصانع التركية مستواها فى التصنيع و التجميع ارتفع خلال هذة السنين و دة واضح جدا فى مستوى الفلوينس و الميجان الجديدة ..و بالفعل الشركة بتفكر جديا تنقل كل انتجها الان اللى المصانع التركية ..


و عشان كدة الفلوينس تم تطويرها بمساعدة الدول دى و عشان تلائم ظروف التشغيل دى و هو دة سبب الاستعانة بخبرات من دولة زى تركيا و زى كوريا و الخبرة اليابانية و دة لا يعيب شركة رينو فى شىء بما انها تمتكل معظم هذة الخبرات و المصانع الان ..

و لمعلوماتك الفلوينس متوفرة فى اسواق اخرى بعدة مواتير و هناك عدة اختيارات فى ناقل الحركة و كذلك معظم الكماليات اللى انت بتقول انها اتشالت متوفرة بشكل او باخر..و طبعا الاختيارات دى مش حتنزل مصر بسبب ان السعر حيكون وقتها مش مناسب و مش منافس فى السوق المصرى ...

و لكن بالفعل الفلوينس بهذة الكماليات و بهذة الموصفات تقدم باقة متميزة و تكنولوجيا جديدة بسعر معقول ينافس جدا فى السوق المصرى و تحقق المعادلة الصعبة بين سيارة اوروبية التصميم بسعر مناسب ..و بالفعل هناك مابيعات جيدة بالسوق المصرى و العربى و هو مالم تحققة الميجان 2 المعجزة التى لن تتكرر فى رايك على مدى سنوات....

اعتقد كدة انا وضحت رايى بشكل كبير و الفلوينس موجودة و بسهولة جدا يمكن التعرف على الفرق و التطوير اللى حصل على كل المستويات بداية من التصميم و الخامات و هندسة السيارة نفسها .

طبعا أنا كنت ناوى أقفل الموضوع على كده....لكن حضرتك عمال تسترسل و بتحكيلنا على حاجات مش موجودة فى العربيات اللى بين إيدينا دلوقتى و كأنك إنت المالك و نحن القراء.....أنا قبل ما أقول أى كلمه فى أى موضوع خاص بالسيارات لازم أجرب علشان أقول رأى بموضوعية...و ده فعلا اللى عملته سواء لما عملت مقارنة فى الكماليات أو قلت إنطباعى عن الtest drive لكن مينفعش إن حضرتك متكنش جربت لا دى و لا دى و عمال تقولنا كلام من الinternet يختلف تماما عن الواقع.....لاحظ إن فيه ناس كتير بتبنى قرار الشراء على مناقشتنا زى الأخ الأستاذ طارق و حسيت إن من دورى إنى لازم أقول الصح .....

الميجان السابقة السيدان كانت محاولة من رينو للدخول للاسواق المتوسطة و تصنيع سيارة سيدان مناسبة للاسواق الناشئة و كان قرار تجميعها فى تركيا لهذا السبب فى الاساس و كانت المصانع التركية فى بدايتها و كنت خبره هذة المصانع فى اولها

ده على أساس إن الميجان I من 1995 كانت بتتجمع فى تركيا...و كانت أعطالها لا تذكر بالنسبة للميجان II.

و معظم المشاكل كانت نتيجة عدم ملائمة الموديل السابقة لظروف التشغيل العجيبة فى دول العالم الثالث

يا ريت حضرتك توضحلنا إحنا ملاك الميجان II المشاكل اللى نتجت نتيجة عدم ملائمة الموديل لظروف التشغيل العجيبة فى دول العالم الثالث.......

مش بسبب عدم كفائة المهندسين و المطورين بدليل ان النسخة الاوروبية الهاتش باك كانت بلا مشاكل تقريبا لانها من المصانع الاوروبية و لكن هناك فرق كبير فى السعر ..

طبعا الأستاذ هانى المحترم ردعلى الجزئية دى و برده هرجع و أقول يا ريت اللى يتكلم يكون جرب هذه و تلك حتى لا يضر باقى الأعضاء...

بالنسبة لمشاكل الميجان تنحصر كلها فى عيوب موردين و ليس فى مشاكل تصميم أو تطوير أو خلافه....

شركة Delphi الأمريكية كانت عندها مشاكل فى ترس الديفيزر و أعترفت بيها و الكويلات كان فيها مشاكل من المورد فى الدفعات الأولى إلخ......نفس الكلام ده كان موجود فى النسخة الهاتش باك لأن الموردين همه نفسهم و ليس لتركيا أى دخل من قريب أو بعيد بغلطات الموردين....ده غير إن الإنتاج من بداية 2008 كان مفهوش غلطة بعد تلافى كل عيوب الموردين السابقة.......

حاول حضرتك تعمل مقارنة بين الميجان I و الميجان II من جميع النواحى علشان تعرف إحنا بنتكلم على إيه من ناحية التصميم الثورى اللى عملته رينو فى كل حاجة فى الميجان II ثم قارن الميجان II بجميع المنافسين الكلام ده كان سنة 2004.

و إعمل نفس الشىء بين الميجان II و الفلوانس و ساعتها بس هتعرف إحنا كنا مستنيين إيه من رينو.........

[wawoo]

...و ده فعلا اللى عملته سواء لما عملت مقارنة فى الكماليات أو قلت إنطباعى عن الtest drive لكن مينفعش إن حضرتك متكنش جربت لا دى و لا دى و عمال تقولنا كلام من الinternet يختلف تماما عن الواقع.....لاحظ إن فيه ناس كتير بتبنى قرار الشراء على مناقشتنا زى الأخ الأستاذ طارق و حسيت إن من دورى إنى لازم أقول الصح .....

انا الحقيقية مش عارف انت لية مش مستحمل اى راى مختلف عن رايك و معتبر اى راى اخر هو الراى الغلط لان رايك فقط هو الراى "الصح " زى ما بتقول ..

و حضرتك تعرف اية عنى و لا عن تجاربى عشان تقرر و تجزم انى لا جربت دى ولا دى ولا امتلك دى ولا دى ..و لا انا لازم اعمل موضوع بكل تجربة و كل خبرة و كل سيارة امتلكتها فى حياتى عشان حضرتك تقتنع انى جربت او امتلك..

الحقيقية انى بقول كلامى برضو بناء على تجارب و خبرات كتير" مش مجرد كلام من الانترنت " و اعتقد ان معظم الاعضاء فى المنتدى عندهم القدرة والخبرة الكافية على بناء قرارتهم بشكل خاص من النقاش من دون وصاية من احد عليهم ...

[Hany Saad]

انا الحقيقية مش عارف انت لية مش مستحمل اى راى مختلف عن رايك و معتبر اى راى اخر هو الراى الغلط لان رايك فقط هو الراى "الصح " زى ما بتقول ..

و حضرتك تعرف اية عنى و لا عن تجاربى عشان تقرر و تجزم انى لا جربت دى ولا دى ولا امتلك دى ولا دى ..و لا انا لازم اعمل موضوع بكل تجربة و كل خبرة و كل سيارة امتلكتها فى حياتى عشان حضرتك تقتنع انى جربت او امتلك..

الحقيقية انى بقول كلامى برضو بناء على تجارب و خبرات كتير" مش مجرد كلام من الانترنت " و اعتقد ان معظم الاعضاء فى المنتدى عندهم القدرة والخبرة الكافية على بناء قرارتهم بشكل خاص من النقاش من دون وصاية من احد عليهم ...

طبعا أنا معرفش حضرتك و لا حاجة عنك و لا عن تجاربك....لكن أنا بتكلم عن أرائك.......إنت بتكلمنا عن مصروفات هائلة و بحث و تطوير و مهندسين إتصرف عليهم و شركة عريقة و معامل و تطوير هندسى بقالة سنين و الناس دى بقالها سنين بتعمل إيه و كأنك مدير إدارة البحث و التطوير فى رينو فرنسا....و بتكلمنى عن ماركة العربية اللى معايا بقالها 5 سنين و من قبلها كليو من 2001....يعنى بقالى مع رينو 10 سنين

أنا صحيح معرفش إنت جربت إيه...لكن الكلام اللى بتقوله ده بعيد كل البعد عن الواقع اللى أنا جربته و عايشه كل يوم.

طيب لو أنا مش مستحمل أرائك كمان المهندس هانى اللى معاه الهاتش باك و قالك إن كل اللى بتقوله مش مظبوط بالنسبة للمشاكل أو للسعر و الأستاذ هشام بيسأل حضرتك عن التطور الهندسى فى الفلوانس الملحوظ من الجميع و برده لسه حضرتك مردتش عليه....و أنا بسألك عن عادات السواقة الغريبة فى العالم التالت اللى عملت مشاكل فى الميجان ii و برده لسه مرديتش عليه....


المنتدى منبر حر للجميع و لا يوجد حكر على أراء أى شخص و لكن يجب أن يكون الكلام من واقع ملموس و متجرب مش كلام قريناه.... مش ممكن أروح قسم الأوبل و أقولهم حاجات فى عربياتهم و هما بيأكدولى إن الكلام ده مش موجود و برده مصمم أكمل....و لو حد فتح بقه يبقى متحيز و لا يقبل الرأى أخر......

علشان أتكلم عن تطوير يبقى أركب و أجرب القديم و بعدين أركب و أجرب الجديد و أنا اللى أجرب مش الصانع بيقول..أنا المشترى السواق اللى أقول حصل تطوير و لا لأ.....لكن مش أقول أكيد كل السنين دى مش بيلعبوا و الفلوس اللى إتصرفت و الكلام ده.....

خلاص يا فندم كل ملاك الميجان ii سواء السيدان أو الهاتش باك موافقين حضرتك على كل كلمة قلتها.....الفلوانس هى التطور الثورى الصاروخى لنخبة من مهندسى اليابان و كوريا و تركيا و فرنسا و مش عارف مين تانى شارك فى الخلية دى لتلافى أسواء إنتاج حدث فى تاريخ شركة رينو (طبعا بقصد الميجان ii السيدان الشعبية مش الهاتش باك الأوروبية ) و إضافة تطورات هندسية ثورية تكنولوجية هلامية ملحوظة للجميع (إلا أنا) من شأنها معالجة أخطاء الماضى الخرافية.......

[smartchoice]

كل الشركات حصلها هزة جمدة بعد الأزمة العالمية و علشان كده كلها بتحاول تقوم تانى
و ده واضح جدا من تركيز رينو فى تصنيع سيارات رخيصة و أقتصادية علشان تحقق مبيعات كبيرة تقدر تسند بيها نفسها
و ده واضح فى اللوجان و الداستر و الفلوانس وده كويس و فى مصلحتنا
و يا شباب بلاش الحدة فى الكلام و كل واحد حر فى رأيه و ربنا يوفقنا جميعا للى فيه الخير

[Hegazio]

هي الناس قافشة علي بعض كده ليه؟
هو من حيث رينو بتطور .. فهي بتطور فعلا .. الفلونس دي مش تطوير ميجان دي عربية مختلفة تماما لكن الميجان هاتشباك هي تطوير الميجان 2 و قبلها ميجان 1 و قبلها رينو 9 ايام ما كانت بتسمي ب أرقام
معلوماتي غير المؤكدة ان شايه الفلونس هو شاسيه الرينو سافران اللي متابع الشركة دي يعرف قد ايه هي نزلت عربيات غيرت مجري التطور بس للأسف فاشلين اعلاميا و اللي يعرف كارلوس غصن بيعمل ايه و عمل ايه زمان لما يشوف رينو ماشية ينحني
الخلاصة .. طبعا الفلونس فيها تطوير في تفاصيل اكبر من اللي مكتوب و الناس تفهمه و فيه تطوير سوفتوير عالي جدا بس برضه للأسف الموديلات اللي جابها الوكيل مصر مش اعلي حاجة
بس ان جيت للحق .. هي الميجان 2 كانت نقلة في تاريخ هذه الفئة .. و الفلونس نقلة اقل من حيث الاتساع التطويري

[ecybrarian]

الخلاصة .. طبعا الفلونس فيها تطوير في تفاصيل اكبر من اللي مكتوب و الناس تفهمه و فيه تطوير سوفتوير عالي جدا بس برضه للأسف الموديلات اللي جابها الوكيل مصر مش اعلي حاجة
بس ان جيت للحق .. هي الميجان 2 كانت نقلة في تاريخ هذه الفئة .. و الفلونس نقلة اقل من حيث الاتساع التطويري

الخلاصة...الله عليك يا حجازي..ما هو دا إللي قاله Meggieboy من الأول وإللي احنا كلنا بنحاول نقوله بس الظاهر مش عارفين نلخص زي مانت عملت

[chato_eg]

الفلونس نقلة اقل من حيث الاتساع التطويري

يا نهار أبيض يا نهار أبيض...شعر ده يا اخواتى....إيه المصطلحات الجامدة دى يا دكترة....الوحوش دول مليانين مواهب دفينة

أنا ما قدرتش أعدى الجزء ده بدون تعليق...أصلى أول مرة أسمعه و كمان أتى فى الوقت الملائم تماما

[Hegazio]

الخلاصة...الله عليك يا حجازي..ما هو دا إللي قاله meggieboy من الأول وإللي احنا كلنا بنحاول نقوله بس الظاهر مش عارفين نلخص زي مانت عملت

يا نهار أبيض يا نهار أبيض...شعر ده يا اخواتى....إيه المصطلحات الجامدة دى يا دكترة....الوحوش دول مليانين مواهب دفينة :ob_mak1[1]:

أنا ما قدرتش أعدى الجزء ده بدون تعليق...أصلى أول مرة أسمعه و كمان أتى فى الوقت الملائم تماما :b4_388:

شكرا يا جميل .. كلك ذوق
ماشي ياعم هاني .. بعض مما عندكم
علي فكره .. الفلونس حتيجي تركن جنب اختها الشهر الجاي او اللي بعده بالكتير .. مستني استلقط واحده 2010 ب 100 الف و 110 بالكتير ( اذا لم اجد حلول افضل ) و حابيع الاسبرانزا مع انها جميلة و الله و بتخدم ف مواقف كتير
لكن ميجي !!! مش حابيعها ابدا

[chato_eg]

لكن ميجي !!! مش حابيعها ابدا

إللى ركب الفرنساوى ...مش هيسيبه تانى....