مساعدة في شراء فلونس

[ArafatEHegazy]

السلام عليكم
الحمد لله بعد الاستخارة والمقارنات الشديدة بين الموديلات المختلفة ان شاء الله نويت انضم لقسم الرينو و أشتري فلونس تقسيط عن طريق البنك الوطني للتنمية , مصرف أبو ظبي. ان شاء الله استقريت على الفئة الثانية في الاتوماتيك اللي هيا ب 142 الف.
كنت عايز مساعدة من وحوش الرينو. عايز أعرف أحسن مكان أشتري منه ويكون عنده تسليم فوري. أنا قريت ان المصرية للسيارات الناس معاها مشاكل بعد التسليم وان في عربيات بيبيعوها جديده وتكون اتخبطط واتصلحت عندهم. أنا عايز مكان يكون مضمون وسريع التسليم.
كمان ايه اللي آخد بالي منه عند استلام العربية من المعرض. دي أول مره هستلم عربية زيرو.

[Mandible]

الحمدلله ان ربنا وفقك لكدة و مش هتندم ان شاء الله

بص .. من احسن الاماكن اللي تجيب منها هو الطارق في الدقي خلف معهد القلب رقمه 19850 .. انا وكتير من الاعضاء هنا جبنا من عنده و ماشاء الله معاملتهم حلوة جدا و بيعملك تخفيض حوالي 3 الاف جنيه يعني انا اشتريتها ب 139 من عندهم .. بيسلموك في يومين عشان بيخلصوا ورق العربية و شهادة البينات اللي في معارض بتخليك تعملها بنفسك اصلا
طبعا لما تيجي تستلم العربية لازم تلف عليها كويس و تشوف فيها خدوش و لا لأ و كمان تكون معاها كوريك و جنط مقاس 15 ( الاستبن بيجي 15 مش 16 ) و المسامير بتاعتها و كمان الاريال و كتالوج العربية و دفاتر الصيانة .. وبرده حاول تعمل تشيك سريع على زراير العربية .. النور و المساحات .. الخ

و ربنا يديك خيرها و يكفيك شرها و مبروك مقدما :)

[ArafatEHegazy]

شكرا على المعلومات المفيدة .... ان شاء الله هكلمهم وأشوف ايه الاخبار.
بالنسبة للإستبن .... هو اللي أنا فهمته ان مقاسة أصغر من بقية الاربع عجلات .... هل ده صحيح؟ مع اني موش مستوعب ليه الاستبن شكل والعجل شكل. وفي الحاله دي لازم يكون معاه مسامير مخصوصة غير مسامير العجل اللي راكب؟

[ArafatEHegazy]

أنا كلمت الطارق وقالي انه عنده عربية واحده من الفئة دي لونها أسود. وكمان قالي ان موديل 2012 هينزل كمان أسبوعين. هل حد عنده فكره عن أي اختلافات في الموديل الجديد.
أعتقد الواحد أفضل انه يستنى وياخد موديل 2012 .... على الاقل الرخصة يتكتب فيها موديل 2012 بدل 2111 ... يعني سنه فرق في عمر العربية عند البيع.

[MaZaGAngeE]

ان شاء الله هتفرج على العربية دي يوم الخميس من ضمن مجموعة اختيارات و لو ربنا قدرلي هجيبها , هوه الموديل ده اللي فيه فتحة سقف ؟

[azima21]

اولاً مبرك إنشاء الله العربيه,انا الحمد لله إشتريت من الطارق اللي في الدقي 1/5/2011 بصراحه الناس محترمه جداً بس خلي بالك و إنت بتشتري إنهم هايدو البنك بسعر 142 الف مش 139 الف زي اللي بيشتري من غير بنك فالأفضل إنك تجيب عرض سعر للبنك من اوتو سمير ريان او محمد ذكي ب139 الف علشان البنك و المعرض يضطرو إنهم يجيبوهالك بالسعر ده او من عند واحد تاني او حتى من عند سمير ريان او محمد ذكي.ثانياً خلي بالك العربيه بييجي معاها طقم دواسات,هو بصراحه فرش الارض و الدواسات شكلهم حلو و فخم بس لو ما عملتش فرش للأرض بسرعه مش هايستحملو خاااااااااااااالص.

[raedegypt]

السلام عليكم
الحمد لله بعد الاستخارة والمقارنات الشديدة بين الموديلات المختلفة ان شاء الله نويت انضم لقسم الرينو و أشتري فلونس تقسيط عن طريق البنك الوطني للتنمية , مصرف أبو ظبي. ان شاء الله استقريت على الفئة الثانية في الاتوماتيك اللي هيا ب 142 الف.
كنت عايز مساعدة من وحوش الرينو. عايز أعرف أحسن مكان أشتري منه ويكون عنده تسليم فوري. أنا قريت ان المصرية للسيارات الناس معاها مشاكل بعد التسليم وان في عربيات بيبيعوها جديده وتكون اتخبطط واتصلحت عندهم. أنا عايز مكان يكون مضمون وسريع التسليم.
كمان ايه اللي آخد بالي منه عند استلام العربية من المعرض. دي أول مره هستلم عربية زيرو.

لو منك اشترى الالنترا كورى 100% . عربيه فلونس كورى تجميع تركى وعليها علامه رينو . الرينو لازم توكيل علشان تتصلح مش اى حد يفهم فيه .بعكس الهيونداى اى ميكانيكى بيصلحها وقطعها برة متوفرة . صالون الالنترا وشكل السيارة خامات وتقفيل انا مش ها اتكلم انت روح المصريه وشوف الاتنين ومش لازم تشترى منهم بس لانهم تحت سقف واحد لسهوله الاختيار والمقارنه وقارن بنفسك والله يوفقك فى الاختيار



لم يقوم العضو الفاضل صاحب الموضوع بالحديث عن السيارة هيونداي النترا, و لم يذكر انه يقارن بينها و بين سيارة اخرى,
و لم يضع الموضوع في قسم المقارنات من الأساس, ولا يجوز التقليل من سيارة لصالح اخرى مهما كانت, و ذلك يعتبر خروج
واضح عن صلب الموضوع الاساسي مما يتعارض مع قوانين و قواعد المنتدى خاصة انك في قسم رينو و ليس هيونداي !!!

العضو صاحب الموضوع يسأل عن السيارة رينو فلوينس فقط و في قسم رينو, اذن لا مجال للحديث عن غيرها احتراماً لرغبته.

سيتم الاكتفاء بتنبيهك, و نرجو ان لا تخالف قواعد المنتدى مرة اخرى بالخروج عن صلب الموضوع.

لجنة فض المنازعات 3

8/9/2011
3:38am

[Ahmed.Ali]

لو منك اشترى الالنترا كورى 100% . عربيه فلونس كورى تجميع تركى وعليها علامه رينو . الرينو لازم توكيل علشان تتصلح مش اى حد يفهم فيه .بعكس الهيونداى اى ميكانيكى بيصلحها وقطعها برة متوفرة . صالون الالنترا وشكل السيارة خامات وتقفيل انا مش ها اتكلم انت روح المصريه وشوف الاتنين ومش لازم تشترى منهم بس لانهم تحت سقف واحد لسهوله الاختيار والمقارنه وقارن بنفسك والله يوفقك فى الاختيار

اساسا اش جاب لجاب

[raedegypt]

اساسا اش جاب لجاب

هههههههه . جاب لجاب ايه !!!!!! .. سامسونج تجميع تركى وعليه علامه رينو افضل من العملاق الكورى الهيونداى هههه ضحكتنى شوف الخبر دة ونشوف مين الصح
أعلنت شركة رينو عن سحبها لـ 35 الف وحدة من طراز سامسونج sm3 2010 والمسوق محلياً تحت علامة رينو حاملاً إسم رينو فلونس .عملية السحب جاءت كرد فعل ثانى من بعد اعلان رينو توقف عمليات بيع هذا الطراز لحين البت فى تلك المشكلة ، والمشكله أنه ظهرت عيوب مصنعية فى صمام سحب الغازات الزائدة فى تانك الوقود مما أثر بشكل غير مباشر على دورة المحرك .

[تامر.محمد]

الرحمة , انا كرهــــــــــــــــــــــــت حاجة اسمها هيونداي

[MaZaGAngeE]

هههههههه . جاب لجاب ايه !!!!!! .. سامسونج تجميع تركى وعليه علامه رينو افضل من العملاق الكورى الهيونداى هههه ضحكتنى شوف الخبر دة ونشوف مين الصح
أعلنت شركة رينو عن سحبها لـ 35 الف وحدة من طراز سامسونج sm3 2010 والمسوق محلياً تحت علامة رينو حاملاً إسم رينو فلونس .عملية السحب جاءت كرد فعل ثانى من بعد اعلان رينو توقف عمليات بيع هذا الطراز لحين البت فى تلك المشكلة ، والمشكله أنه ظهرت عيوب مصنعية فى صمام سحب الغازات الزائدة فى تانك الوقود مما أثر بشكل غير مباشر على دورة المحرك .

دي حكاية قديمة و مش على الموديلات اللي بتنزل مصر
لو سمحت مفيش أي داعي تطلع اشاعات و كلام غلط ممكن يشوش على الناس
العربية كويسة و مناسبة جدا و كلامك غلط

[MaZaGAngeE]

الرحمة , انا كرهــــــــــــــــــــــــت حاجة اسمها هيونداي

و انت كمان , لو مفيش غيرها مش هركبها بسببه

[Mandible]

لو منك اشترى الالنترا كورى 100% . عربيه فلونس كورى تجميع تركى وعليها علامه رينو . الرينو لازم توكيل علشان تتصلح مش اى حد يفهم فيه .بعكس الهيونداى اى ميكانيكى بيصلحها وقطعها برة متوفرة . صالون الالنترا وشكل السيارة خامات وتقفيل انا مش ها اتكلم انت روح المصريه وشوف الاتنين ومش لازم تشترى منهم بس لانهم تحت سقف واحد لسهوله الاختيار والمقارنه وقارن بنفسك والله يوفقك فى الاختيار

يبني متبطل بقى تخش في كل حتة في المنتدى تعد تمدح الالنترا بتاعتك الكوري دي .. انتا بتحلل لنفسك الفلوس عشان اتدبست فيها و لا ايه ؟؟ انت ذات نفسك عارف من جواك ان الفلوانس ست ست الالنترا الكوري البلاستيك دي بس مش عايز تعترف .. و احنا مش محتاجين نخش معاك في مناقشات عشان احنا عارفين ان عندنا عربية من افخم العربيات في مصر .. بطلو غيظ و حقد بقى اعوذ بالله .. قالك هيونداي قال .....

[ArafatEHegazy]

لو منك اشترى الالنترا كورى 100% . عربيه فلونس كورى تجميع تركى وعليها علامه رينو . الرينو لازم توكيل علشان تتصلح مش اى حد يفهم فيه .بعكس الهيونداى اى ميكانيكى بيصلحها وقطعها برة متوفرة . صالون الالنترا وشكل السيارة خامات وتقفيل انا مش ها اتكلم انت روح المصريه وشوف الاتنين ومش لازم تشترى منهم بس لانهم تحت سقف واحد لسهوله الاختيار والمقارنه وقارن بنفسك والله يوفقك فى الاختيار

جزاك الله خيرا على النصيحة
والله أنا كنت في حيرة شديدة خلال الشهر اللي فات بين كذا عربية ومنهم الالنترا الجديدة. وفعلا روحت كذا مره عند المصرية وشفت العربيتين على الواقع. هي الالنترا عربية محترمة والتصميم الجديد فعلا جذاب والمساحات الداخلية واسعة بشكل ملفت عن الموديل اللي قبلة. بس بعد مقارنات فضلت الرينو على الالنترا (مع ان المنافسه كانت شديدة والحيرة كانت أشد) للاسباب الاتية:
1. التوكيل أفضل ... أنا شخصيا أفضل التعامل مع التوكيل للحفاظ على السيارة والحفاظ على وقتي لأني موش هقدر اتابع الصنايعية و الف وأدور عليهم... حتى لو التوكل أغلى بس أفضلي. وان شاء الله ناوي أروح التوكيل حتى بعد انتهاء الضمان. فموضوع التوكيل ده موضوع مهم جدا.
2. شكل الفلوينس أريحلي .. يمكن أنا بحب الشكل الهادي للعربيات. وطبعا دي كلها أزواق.
3. حسيت ان خامات الفلونس في التقفيل أفضل. يمكن دا احساس. هي جوده التقفيل في العربيتين ممتازين.
4. طبعا الكوري يتفوق في سعر إعادة البيع. بس أنا موش ناوي أبيع قريب وموش من النوع اللي بيفكر في إعادة البيع عند شراء سيارة.
5. أنا من الناس اللي تحب السيارات الذكية وذات الامكانيات الكمبيوترية العالية. ود واضح في سيارات الرينوا ... في ناس كتيره بتعتبر ده عيب لأنه ممكن يسبب أعطال. لكن أنا شخصيا بحس بالرضى لما أكون راكب عربية وفيها تكنولوجيا وإمكانيات عاليه.
6. عند مراجعة أسعار قطع الغيار والصيانة لاقيتعا معقولة لحد كبير. ممكن تكون أغلى من عربيات تانيه ..بس موش مبالغ فيها.
7. موتور الالنترا أسرع في الاستجابه ... ودا موش مؤثر معايا ... أخوك من النوع الهادي في السواقة واللي بيلتزم بالسرعات المحددة :b4_048: يعني موش هجري ولا هشد ولا هحرق.

يميز الالنترا في وجه نظري هو وجود ألوان اكتر وكمان التابلوة الفاتح بيبقى تحفه وأشيك بكتير. كنت أتمنى ان الفلوينس يبقي فيها تعدد الوان اكتر.

[raedegypt]

دي حكاية قديمة و مش على الموديلات اللي بتنزل مصر
لو سمحت مفيش أي داعي تطلع اشاعات و كلام غلط ممكن يشوش على الناس
العربية كويسة و مناسبة جدا و كلامك غلط

سيدى الفاضل ايه الغلط؟؟ عربيه سامسونج كورى تجميع تركى وعليها علامه رينو !!!! ولا نضحك على بعض ونقول فرنساوى