ال esp ما له و ما عليه

[lanos2004]

ياريت الى عايز يتكلم عن esp يجربه الاول فى اى عربية...وبعد كده يعمل موضوع كامل عليه لو عايز و هنسمعه

مجربه فى باسات كأن واحد بيسوق معاك

[bassem.naguib]

كل ملاك النيسان تيدا سيدان بيشتكو جداً أن العربية بعد سرعة 120 كم/ساعة و لو كان فيه شوية هوا على الطريق بيكون عندهم إحساس أن العربية زى المرجيحة و بتعوم و لازم يتبت أيده فى الدريكسيون علشان العربية متلعبش و بيكون سايق على هذه السرعة و هو مش مطمن و مش مبسوط....أنا بتكلم على handling
للعربية و فى الطوالى مش حتى فى ملفات.....

هل فى رأى حضرتك لو صاحب النيسان ركب منظومة ال esp فى عربيته، سوف يتحكم فى سيارته و تبطل تعويم و يسوق على سرعة 180 كم/ساعة و هو ساند الدريكسيون بأيده زى مثلاً كأنه سايق أوكتافيا و لا باسات؟

ماشي يا باشا .. ما فيه عوامل ثبات تانية ودي ذكرتها في أول الموضوع .. ومذكورة في الموضوع اللي مشيرة أبو يحي .. ومنهم طبعاً ال ESP ولكن مش كله .. وده اللي وضحته في مشاركتي اللي فاتت أنه عامل من العوامل المساعدة بجانب عوامل تانية بتعمل في منظومة واحدة

الأجابة و أعتقد حضرتك هتشاركنى الرأى لن يضيف ال esp أى درجة ثبات أو شعور بالأمان للسيارة و لكن لو لا قدر الله العربية أنحرفت فعلياً (خطأ تقدير سائق) سوف يقوم النظام بالتدخل و التعديل

لم يضيف فعلاً درجة ثبات إلا في الملفات أو المواقف الحرجة .. وذلك لافتقادها عوامل ثبات أخرى .. لأن الثبات زي ما اتفقنا بيتدخل فيه عوامل كتيرة وبتعمل في منظومة واحدة .

وعن تجارب شخصية في عربيتي أقولك حتضيف .. وخاصة في الملفات اللي ممكن تخشها بسرعة عالية وبكل أريحية .. على طريق السخنة مثلاً وبعض الملفات في داخل المدينة
ولو مفيش النظام ده فيها برضه في السواقة الطوالي حتبقى متزنة (زيها زي الفلوانس أو أي سيارة أخرى تتمتع بعوامل الثبات)



السؤال هل أنت كسائق لهذه السيارة و مع وجود النظام أصبحت مستمتع بالسيارة و بال handling و بالشعور بالتحكم التام؟؟؟ هنا مربط الفرس


تم الرد أعلى لافتقاد منظومات الثبات الأخرى أو أحدها بدرجة كبيرة

هدفى من الموضوع كان: لكل مشترى جديد...من فضلك تأكد من الثبات الأساسى للسيارة عن طريق العوامل اللى ذكرتها فى الموضوع و فيه زملاء كتير أجدر منى كتبوا فيها من قبلى.. و سوقها و أطمن أن العربية ثابتة فعلياً كأساس ثم بعد ذلك أستميت فى الحصول على ال esp كعامل هام جداً فى سيارتك.....و العكس ليس صحيحاً....لن يعطى ال esp لعربية مش ثابتة و لا هو من عوامل الثبات...مش المفروض فى الطبيعى و القيادة العادية أن العربية/esp تعدلى أتجاهى و لكن فى الطوارىء فقط و هو ده الهدف من النظام....نظام أمان فى حالة خطأ السائق أو وجود مشكلة على الطريق....

بمعنى أوضح الكاوتش العريض نظام ثبات دائم للسيارة فى كل الأوقات أما ال esp هو نظام طوارىء فى المواقف الصعبة....ثبات الكاوتش هيأثر على متعتك فى القيادة و ثقتك فى سيارتك على السرعات ال esp مش هيعمل كده لأنك ممكن قوى تبيع العربية قبل ما تجربه و لو مرة......

تمام اتفق .. ولكن أيضاً عن تجارب ممكن تسرح وأن سايق وتقول أنا دخلت الملف ده ازاي أو تفاديت العائق ده ازاي في حالة لو معاك ESP


بالنسبة للغرز يا باسم بيه و أوعى تكون سواقتك غرز على الضيق أكاد أجزم و بناء على طريقة عمل النظام أنه هيهدى العربية علشان يعدلها لو غرزة سريعة على العاصى....و طبعاً لاحظ أن فيه عربيات أخرى النظام بيهدى الموتور مش بس فرامل
حضرتك عندك النظام ده فى الكورولا....جرب فى طريق مفتوح على سرعة و خد شمال يمين على ضيق و تأكد أن النظام أشتغل و شوف هيهدى معاك العربية و لا لأ مع أنك هتكون عايز كل عزمها فى حالة الغرزة....

بصفة عامة أنا اتبع نظرية الخبرة في القيادة والمهارات المكتسبة ولا أجازف ولا أضع نفسي في مواقف غير محسوبة .

وده في رأي العامل الأول من عوامل الأمان (بعد الله سبحانه وتعالى) أني ابقى شايف امكانيات العربية اللي راكبها أيه ومجازفش وأعمل حاجات ممكن تخذلني فيها

منتظر ردك باسم بيه

تحياتى ليك

خالص تحياتي

[تامر.محمد]

اللي فهمته و خلاصة الموضوع ان الesp نظام وظيفته انه (يلحق) العربية في حالة انها تخطت حدود ما يسمح بيه ثباتها الفعلي و اعادتها لسيطرة السائق مرة تانية

عربية زي السيراتو 2010 مثلا لو كان فيها نظام زي ده كان فرق معاها كتير جدا في حوادث التعويم اللي حصلت فيها مع ناس كتير

لو فيه حاجة اضافية قولوا لي

[Hany Saad]

خالص تحياتي

باسم باشا....بما أنك بتسأل كتير و بتحب تفهم فأنا أسمحلى هعمل زيك....

حضرتك ذكرت أن فى ملفات السخنة النظام أشتغل....تقصد طريق الجيش للسخنة و لا طريق الزعفرانة؟

طريق الجيش اللى سرعته الرسمية 120 كم/ساعة ده بالنسبة للميجان أو للفلوانس مفيش أى مشاكل بتاتاً فى أى من ملفاته....أنا بتكلم عن 120 كم/ساعة مش أكتر لأنى مجربتش أعلى و لسه راجع منه من شهر

طريق الزعفرانة اللى عامل زى التعبان و فرده واحدة رايح راجع أنا عمرى ما بجازف و باخد الملفات أكتر من 90 و ده علشان أنا مش بثق فى أى عربية مهما كانت...أنا معايا أسرة و الموضوع مفهوش غلطات أو أستهوان

هل حضرتك تقصد أن النظام أتفعل معاك فى طريق الجيش فى الملفات و يا ترى عند سرعة كام؟

برجاء التوضيح

[Hany Saad]

اللي فهمته و خلاصة الموضوع ان الesp نظام وظيفته انه (يلحق) العربية في حالة انها تخطت حدود ما يسمح بيه ثباتها الفعلي و اعادتها لسيطرة السائق مرة تانية

عربية زي السيراتو 2010 مثلا لو كان فيها نظام زي ده كان فرق معاها كتير جدا في حوادث التعويم اللي حصلت فيها مع ناس كتير

لو فيه حاجة اضافية قولوا لي

تامر باشا...لقد أصبت كبد الحقيقية زى ما بيقولوا.....هو ده بالظبط فايدة النظام.....كلمة " يلحق"

مش نظام ثبات مستمر و لكن نظام بيلحق التعويم....بيلحق المشكلة بعد لما تقع لكن مش بيحسسك أن سايق عربية صخرة فى الملفات و خش يا عم على الملف على سرعة 200 و لا يهمك العربية فيها ESP

طبعاً سيبك من الهرى بتاعى و تعالى نشوق موسوعة وايكيبيديا كاتبة إيه:


Electronic stability control (ESC), also referred to as electronic stability program (ESP) or dynamic stability control (DSC), is a computerized technology [1][2] that improves the safety of a vehicle's stability by detecting and reducing loss of traction (skidding).[3] When ESC detects loss of steering control, it automatically applies the brakes to help "steer" the vehicle where the driver intends to go. Braking is automatically applied to wheels individually, such as the outer front wheel to counter oversteer or the inner rear wheel to counter understeer. Some ESC systems also reduce engine power until control is regained. ESC does not improve a vehicle's cornering performance; instead, it helps to minimize the loss of control. According to Insurance Institute for Highway Safety and the U.S. National Highway Traffic Safety Administration, one-third of fatal accidents could be prevented by the use of the technology

الموسوعة بتقول: ESC does not improve a vehicle's cornering performance; instead, it helps to minimize the loss of control

و ترجمتها: لا يحسن النظام من خصائص السيارة فى الملفات!!!!!! و لكن يساعد على التقليل من فقد السيطرة.....

يعنى: " يلحق"

أتمنى تكون معلومتى وصلت

تحياتى

[bassem.naguib]

باسم باشا....بما أنك بتسأل كتير و بتحب تفهم فأنا أسمحلى هعمل زيك....

حضرتك ذكرت أن فى ملفات السخنة النظام أشتغل....تقصد طريق الجيش للسخنة و لا طريق الزعفرانة؟

طريق الجيش اللى سرعته الرسمية 120 كم/ساعة ده بالنسبة للميجان أو للفلوانس مفيش أى مشاكل بتاتاً فى أى من ملفاته....أنا بتكلم عن 120 كم/ساعة مش أكتر لأنى مجربتش أعلى و لسه راجع منه من شهر

طريق الزعفرانة اللى عامل زى التعبان و فرده واحدة رايح راجع أنا عمرى ما بجازف و باخد الملفات أكتر من 90 و ده علشان أنا مش بثق فى أى عربية مهما كانت...أنا معايا أسرة و الموضوع مفهوش غلطات أو أستهوان

هل حضرتك تقصد أن النظام أتفعل معاك فى طريق الجيش فى الملفات و يا ترى عند سرعة كام؟

برجاء التوضيح

تمام يا باشا في طريق الجيش وعلى سرعات عالية .. وفيه موضوع في تويوتا بكدة ..

والكلام اللي تحتيه خط هو أساس السواقة على الأقل بالنسبة ليا .

[bassem.naguib]

تامر باشا...لقد أصبت كبد الحقيقية زى ما بيقولوا.....هو ده بالظبط فايدة النظام.....كلمة " يلحق"

مش نظام ثبات مستمر و لكن نظام بيلحق التعويم....بيلحق المشكلة بعد لما تقع لكن مش بيحسسك أن سايق عربية صخرة فى الملفات و خش يا عم على الملف على سرعة 200 و لا يهمك العربية فيها ESP

أكيد مش نظام ثبات مستمر .. ولكنه بيلحق التعويم (لف العربية أو خروجها عن مسارها) " أثناء " حدوثها .. وليس " بعد " حدوثها .. وذلك وفقاً لحسابات بتحصل في أقل من ثانية .

والأكيد برضه أنه بيحسسك أنك سايق عربية صخرة (لو توافرت فيها عوامل الثبات الأخرى بشكل أو بأخر وليس ال ESP وحده كافي)


طبعاً سيبك من الهرى بتاعى و تعالى نشوق موسوعة وايكيبيديا كاتبة إيه:


Electronic stability control (ESC), also referred to as electronic stability program (ESP) or dynamic stability control (DSC), is a computerized technology [1][2] that improves the safety of a vehicle's stability by detecting and reducing loss of traction (skidding).[3] When ESC detects loss of steering control, it automatically applies the brakes to help "steer" the vehicle where the driver intends to go. Braking is automatically applied to wheels individually, such as the outer front wheel to counter oversteer or the inner rear wheel to counter understeer. Some ESC systems also reduce engine power until control is regained. ESC does not improve a vehicle's cornering performance; instead, it helps to minimize the loss of control. According to Insurance Institute for Highway Safety and the U.S. National Highway Traffic Safety Administration, one-third of fatal accidents could be prevented by the use of the technology

الموسوعة بتقول: ESC does not improve a vehicle's cornering performance; instead, it helps to minimize the loss of control

و ترجمتها: لا يحسن النظام من خصائص السيارة فى الملفات!!!!!! و لكن يساعد على التقليل من فقد السيطرة.....

يعنى: " يلحق"

أتمنى تكون معلومتى وصلت

مش حيحسن من أداء السيارة في الملفات ... مش عارف الجملة دي مش مقتنع بيها خاااالص .. وبالتجارب مع العديد من الأعضاء مش معايا أنا بس

تحياتى

[mostafa magdy]

أصدقائي الأعزاء .. جميعكم ..
الباش مهندس هاني .. المنسق المحترم الذي أكن له كل إحترام ..
حبيبي الغالي باسم .. أخويا الكبير ..
الناس الحلوه كلها و رقصني يا جدع :D

انا بتعلم منكم جميعا .. بدون مبالغه ..
الأوكتافيا كان فيها كل عوامل الأمان .. بما فيها ال Esp و كانت عربيه ولا أروع لحد الوقتي عمري ما بكسر علي حد معاه أوكتافيا .. إحتراما للعربيه .. اه والله زمبؤلكو كده ..
ثبات وهمي و خرافي ..

الفلوينس .. برده عربيه ثابته و محترمه .. جدا إلي أقصي الحدود ..
و زي ما قال الباش مهندس هاني الموقر .. العربيه كانت هتبقي أحسن بيه ..
تحياتي و دمتم للنضال :D

[mostafa magdy]

بالمناسبه بس .ز أنا خدت طريق الزعفرانه علي سرعات ما بين ال 100 و ال 120 و كنت مشغل ال Cruise Control و مره أو إتنين اللي قللت فيهم السرعه ل 100 في المنحنيات ..
و العربيه بسم الله ما شاء الله زي الفل ..
ربنا يبارك لنا جميعا و لكم في عربياتكم ..
خاااااااااااالص تحياتي ..

[bassem.naguib]

أهم نقطة فيما هو لصالح ال esp انه بيعرفنا بشخصيات جديرة بالاحترام وبالمعرفة في نقاشاتها المحايدة وعلى رأسهم م. هاني سعد اللي اتمنى أشوفه في أقرب وقت إن شاء الله .

[miceg]

بس تتفق معايا ولا تختلف يامستر باسم
ال ESP أصبح كابوس في المتدى من كثرة تناوله
وطول عمره الناس مش مهتمه بيه
انتو بتوع الكورولا اللي بتنكشونا بال ESP بتاعكو ومعظم المبررات غير مرضية
ولما صدقتو ان تويوتا بعد عمر طويل نزلتلكو الخاصية دي فالعربيات
وطلعتو الكبت اللي كنتو محرومين منه منذ سنين ههههههههههههههههههههه
أيهما تفضل : عربية ثابته - ولا عربية بها ESp
انا باخد غورز بسرعات عالية وضيقه وأخونا دكتور مصطفى مجدي كان معايا ويشهد على كلامي
والعربية مافيهاش ESP ولو فيها مش هيتشغل عمال على بطال لأن فالاصل السيارة ثابته
عربية بها ESp من غير ثبات هيبقا غير عملي وهتفتقد متعه القيادة والهاندلينج
عربية ثابته مع خاصية ESP يبقا دي المعادلة الصبعه وهو ده إلاعجاز التصنيعي :D
ربنا يبارك فعربياتكو جميعااااااا ولو اني نفسي أركب عواميد إتزان ومبصتش العربية بتنزل بيها ولا لا
وان كان م هاني ممكن يفتينا وبتوع الكورولا يفتونا لان دول ليهم عامل كبير جداااااا في ألاتزان عن تجربه
واوعدك لو الفلوانس مش فيها البارات دي يبقا ساعتها ال ESP ده مش فارق معانا بربع جنيه :D

[Hany Saad]

أهم نقطة فيما هو لصالح ال esp انه بيعرفنا بشخصيات جديرة بالاحترام وبالمعرفة في نقاشاتها المحايدة وعلى رأسهم م. هاني سعد اللي اتمنى أشوفه في أقرب وقت إن شاء الله .

حبيبى يا باسم باشا....الشرف كله ليا و فعلاً من القلب النقاش مع حضرتك له طعم جميل....النقاش العلمى الموضوعى بعيد أى تعصب لأى عربية مهما كانت....أنا سقت عربيات فيها esp خلال السفر فى الخارج و سقت فى مصر كتير و لكن و بكل أمانة لم تتاح لى الفرصة أن ال esp يشتغل أو يتفعل معايا فى موقف و ده يمكن ناتج عن طبيعة سواقتى الشبيهه لسواقة حضرتك و اللى هيه التحفظ و عدم المخاطرة أو الأعتماد على مواصفات السيارة و خصوصاً فى طرق مصر......

خالص تحياتى لشخصك الكريم و روحك الطيبة الودودة

[hany63]

فعلا لفظ يلحق العربيه بعد ما يكون العومان ابتدى ده المظبوط عشان الواحد للحظه قلبه بيكون وقع في رجله و يلقى الدنيا اتظبطت لوحدها
و واحد صاحبي كان بيجري بالسيفيك الجديده في ملفات السخنه على ١٨٠ كانت العربيه ضهرها وسط الملف بيخرج عن الحاره و هوا ما يعرف بمصطلح ديل السمكه و على حد تعبيره كان بيحس باتنين صعايده بيشيلوا ضهر العربيه و يرجعوه تاني لمساره
تحياتي للجميع

[bassem.naguib]

بس تتفق معايا ولا تختلف يامستر باسم
ال ESP أصبح كابوس في المتدى من كثرة تناوله
وطول عمره الناس مش مهتمه بيه
كون أن الناس ابتدت تتكلم عنه وتهتم بيه هو وغيره من عوامل الأمان .. ده في حد ذاته نقلة ايجابية في ثقافة المستهلك المصري

انتو بتوع الكورولا اللي بتنكشونا بال ESP بتاعكو ومعظم المبررات غير مرضية
ولما صدقتو ان تويوتا بعد عمر طويل نزلتلكو الخاصية دي فالعربيات
وطلعتو الكبت اللي كنتو محرومين منه منذ سنين ههههههههههههههههههههه
مش حقولك غير كلمة واحدة .. " اتقي الله " ههههههههههه

أيهما تفضل : عربية ثابته - ولا عربية بها ESp
انا باخد غورز بسرعات عالية وضيقه وأخونا دكتور مصطفى مجدي كان معايا ويشهد على كلامي
والعربية مافيهاش ESP ولو فيها مش هيتشغل عمال على بطال لأن فالاصل السيارة ثابته
عربية بها ESp من غير ثبات هيبقا غير عملي وهتفتقد متعه القيادة والهاندلينج
مقولناش حاجة .. أنت شفتني معترض على النقطة دي .

عربية ثابته مع خاصية ESP يبقا دي المعادلة الصعبه وهو ده إلاعجاز التصنيعي :D
هو ده اللي بقول عليه .. وطبعاً عامل الأمان الأول أنك ماشي بالعربية على الطريق في رعاية الله .. مننساش النقطة دي لأنها أهم واول نقطة

ربنا يبارك فعربياتكو جميعااااااا ولو اني نفسي أركب عواميد إتزان ومبصتش العربية بتنزل بيها ولا لا
وان كان م هاني ممكن يفتينا وبتوع الكورولا يفتونا لان دول ليهم عامل كبير جداااااا في ألاتزان عن تجربه
واوعدك لو الفلوانس مش فيها البارات دي يبقا ساعتها ال ESP ده مش فارق معانا بربع جنيه :D


صعيدي يا خالد صعيدي .. هههههههههه مع أني صعيدي زيك .

حبيبي يا خلوده

حبيبى يا باسم باشا....الشرف كله ليا و فعلاً من القلب النقاش مع حضرتك له طعم جميل....النقاش العلمى الموضوعى بعيد أى تعصب لأى عربية مهما كانت....أنا سقت عربيات فيها esp خلال السفر فى الخارج و سقت فى مصر كتير و لكن و بكل أمانة لم تتاح لى الفرصة أن ال esp يشتغل أو يتفعل معايا فى موقف و ده يمكن ناتج عن طبيعة سواقتى الشبيهه لسواقة حضرتك و اللى هيه التحفظ و عدم المخاطرة أو الأعتماد على مواصفات السيارة و خصوصاً فى طرق مصر......

خالص تحياتى لشخصك الكريم و روحك الطيبة الودودة

فعلا لفظ يلحق العربيه بعد ما يكون العومان ابتدى ده المظبوط عشان الواحد للحظه قلبه بيكون وقع في رجله و يلقى الدنيا اتظبطت لوحدها
و واحد صاحبي كان بيجري بالسيفيك الجديده في ملفات السخنه على ١٨٠ كانت العربيه ضهرها وسط الملف بيخرج عن الحاره و هوا ما يعرف بمصطلح ديل السمكه و على حد تعبيره كان بيحس باتنين صعايده بيشيلوا ضهر العربيه و يرجعوه تاني لمساره
تحياتي للجميع

مع تحفظي على أنه بيشتغل أثناء أو بعد وده مش موضوعنا .. ولكن هو ده اللي بقول عليه برضه .. تحس أن ضهر العربية بيلم معاك في الملفات وده اللي حصل معايا .. وده بيديك ثقة طبعاً في العربية .. مع التحفظ على السرعات العالية اللي ملهاش أي لازمة أصلاً .

[lanos2004]

esp دة حلو للدفع الخلفى
الامامى دوس بنزين العربيه هتتشد وتتعدل---مجرب كتير-