أرجو أن كل اللي معاه رينو يشاركنا في الموضوع ده

[DViPER]

السلام عليكم
أنا جديد في المنتدي ده
وبصراحة عاجبني جدا
وحاسس انه فعلا منتدي محترم بأعضائه

أنا ناوي أشتري عربية

وبصراحة كنت مستبعد الميجان لان كان معلوماتي انها 130000 وطالع
ولما عرفت ان في منها ب 118000 يعني بدأت أطمئن شوية

أنا نفسي أعرف موديل اللي ب 118000 في ايه كماليات؟؟؟
هل كل الميجان التشغيل بتاعها بالكارت والزرار ؟

هل الزرار والكارت بيعطلو كتير ؟؟

هي مصنوعة في فرنسا ولا مكان تاني ؟؟

و أيه ميزة الهاتش باك عنها ؟؟

السحب أيه أخباره ؟؟

وأي معلومات تانية مفيدة عنها ؟؟

وايه هو محدد ومثبت السرعة ؟؟

عيوبها ؟؟

هي أحسن ولا السيات أبيزا ولا هيونداي ألانترا ولا بيجو 207 ولا نيسان تيدا وسامحوني لاني بقارن بلح الشام بعنب اليمن !!!

ولكم جزيل الشكر

[blazer]

و عليكم السلام
هو انا مش من ملاك العربيه انما الحمد له عارف المعلومات دى
بوص ياباشا الموديل اللى هو ب 118 الف دا اول فئه مانيوال (اقل كماليات)
ودى كمالياتها منقوله من موضوع استاذ dragonsmith

السلام عليكم،


الفئات تقريبا زي ما هي مع اضافات بسيطة:

1) المانيوال ودي فيها كل حاجة...6 وسادات هوائية - 4 زجاج كهرباء تاتش - ABS + EBD - مرايات كهرباء - كاوتش 15 بوصة و طاسات - ايموبيليزر - مثبت و محدد سرعة - باور ستيرنج كهربائي - كارت رينو و سنتر لوك و ريموت - ستائر للزجاج الخلفي و الزجاج الجانبي في الخلف - كمبيوتر للأعطال والمعلومات - مصابيح ضباب - تكييف هواء عادي - CD + MP3.
السعر - 118000 جنيه

2) الأوتوماتيك بنفس مواصفات المانيوال - ستيبترونيك 4 سرعات
السعر - 127000 جنيه

3) الأوتوماتيك السابقة و بيزيد عليها...المرايات ذات الطي الكهربائي و الكاوتش ال 16 بوصة و الجنوط السبور و التكييف الأوتوماتيك و مسند في الكنبة الخلفية.
السعر - 135000 جنيه

4) الموديل ده هيزيد فيه فتحة سقف و فرش جلد في قماش أو جلد كامل (أسود أو بيج)
السعر لسه متحددش.
شكرا جزيلا.

و بلنسبه لاستفسارات حضرتك ان الكارت او الزرار بتاع التشغي
لامبيعطلش وانما كل اللى بيحصل انك لو عرضته لمياه او رطوبه زى اى حاجه الكترونيه بيملح
ودا مبيحصلش لو حافظت عليه

وهى متجمعه فى تركيا و الهاتش فى فرنسا(و مفيش فرق بينهم خالص)
وهى اعتقد احسن من العربيت اللى قولت عليها زى الالنترا
و مينفعش تقارنها ب 207 /ابيزا لانها فئات تانيه
اما التيد هى صحيح نفس الفئه
بس موود تانى عائليه اوى
وربنا يوفقك

[blazer]

http://www.nilemotors.net/Nile/showthread.php?t=24062

واللينك دا هيساعدك فى كل اللى انت عاوزه ان شاء الله

[Ramy_Tantawi]

السلام عليكم.

أهلاً بحضرتك معانا ونورت المنتدى . هاحاول أرغي مع حضرتك في بعض النقاط اللي ذكرتها وان شاء الله اكون قدرت اساعد حضرتك.

أنا نفسي أعرف موديل اللي ب 118000 في ايه كماليات؟؟؟
هل كل الميجان التشغيل بتاعها بالكارت والزرار ؟

الميجان اللي ب118.000 هي أول فئه في الميجان ومانيوال وليست اوتوماتيك وعموماً اللينك ده فيه رصد لمويدل الميجان 2008 والكماليات الموجوده به .

http://www.nilemotors.net/Nile/showthread.php?t=6450

كل الميجان نظام تشغيلها كارت وزرار Start / Stop سواء مانيوال او اوتوماتيك سيدان او هاتشباك.

هل الزرار والكارت بيعطلو كتير ؟؟

لم يظهر اي مشكله عند ملاك الميجان هنا في المنتدى بخصوص الزرار والكارت مفيش فيه مشاكل باستثناء مشكله واحده واجهت أخونا العزيز استاذ فرحات وقام باصلاحه بنفسه بحكم عمله في مجال الالكترونيات خلاف ذلك لم تظهر اي مشاكل للكارت مطلقاً .

هي مصنوعة في فرنسا ولا مكان تاني ؟؟

الميجان مصنوعه في فرنسا ولكن التقفيل والتجميع هو اللي اختلف الهاتشباك تجميع فرنسي السيدان بمختلف فئاتها تجميع تركي .

و أيه ميزة الهاتش باك عنها ؟؟

مثل ميزة اي سياره منها سيدان وهاتشباك .......يحسب للهاتشباك طبعاً الطابع الرياضي اقل وزناً خلاف ذلك لا فرق جميع التجهيزات كا محرك وانظمه الكترونيه وانظمة امان في السيارتين واحد.

السحب أيه أخباره ؟؟

المانيوال غير الاوتوماتيك يحسب للمانيوال سحب اشد قليلاً من نظيرتها الاوتوماتيك وده طبيعي في أي عربيه...........لكن تقديري المتواضع لموضوع السحب في الميجان انه متوسط ماقدرش اقول سيء ........لكن لا يرقى للسحب الرياضي ..وهو في نظري لايق على هيبة العربيه ووزنها وحجمها .

وايه هو محدد ومثبت السرعة ؟؟

الأول في نظامين في الميجان مثيت سرعه speed limiter والنظام التاني نظام الملاحه الآلي Cruise Control هاتكلم على النظامين ان شاء الله وكيفية تشغيلهم .

1- نظام مثبت السرعه :- هذا النظام يعمل على المحافظه على السرعه المطلوبه اللي حضرتك محتاج تمشي عليها يعني على الطرق السريعه مثلا حضرتك مسافر في طريق عليه رادار وكتير مننا مع طول المسافه واجهاد السفر الواحد رجله بتتقل على البنزين سنه وممكن يسرح النظام ده هانقول ان حددنا السرعه على 100 حضرتك طول ماانت مااشي العربيه هاتجيب سرعه لغاية 100 بعد كده مش هاتستجيب لضغط على البنزين وبالتالي مهما سرحنا هاتفضل السرعه على السرعه سابقة المعايره.

كيفية تشغيل النظام :- زرار تشغيل النظام مكانه تحت على الشمال تحت الدركسيون قليلاً بجانب زرار تظبيط اضاءه العدادات هنضغط على الزرار هتلاقي العداد في لمبه برتقالي هتنور على اقصى يمين العدادات تحت وفي شاشة الكمبيوتر هيكتب speed limiter هانيجي دلوقتي لزراير التحكم الموجوده في الدركسيون وهم 4 ( 2 على الشمال وعلاماتهم + و - وطبعاً وظيفتهم واضحه وهي معايرة السرعه + للزياده و - للنقص ) ( 2 على اليمين ودول علاماتهم كالآتي اللي فوق علامته R ودي من Remember ودي معناها تشغيل النظام اوتوماتيك على السرعه السابقة المعايره والحفظ في الكمبيوتر . الزرار التاني علامته O و دي من Off وده بيعمل على اطفاء النظام بشكل مؤقت بمعنى ان النظام هايطفي وهاترجع العربيه عادي بس الكمبيوتر هيفضل محافظ على السرعه المخزنه فيه بحيث ان ضغطه واحد على زرار R يرجع النظام يعمل على طول اوتوماتيك على السرعه اللي حضرتك معايرها.

بعد وظايف الأزرار نيجي لي ازاي نشغل ؟ بالترتيب كالآتي
1-نضغط على الزرار اللي تحت على الشمال الأول حتى نجد الاضاءه البرتقالي تظهر في العداد والكبيوتر يكتب speed limiter
2- نضغط على زرار + اللي في الشمال اوتوماتيك الكبيوتر هايحدد سرعتك الحاليه كام وليكن مثلا حضرتك شغلت النظام على سرعه 80 الكمبيوتر هيكتب 80 وطبعا لك حرية الاختيار وقتها باستخدام ال + و - لتحديد السرعه المطلوبه وهو دقيق للغايه في ده نتصور اننا عملنا بزرار + لغاية 100 هتفضل العربيه طول ما في تسارع تطلع من 80 لغاية ال 100 بعد كده مهما كان التسارع مش هيفيد والسرعه هاتثبت على ال 100 .

ملحوظه النظام ده بيعمل فقط بعد سرعه 30 كم/الساعه الملحوظه التانيه وهي مهمه جداً في بعض الأحيان على الطرق الصحراويه بنحتاج نزيد السرعه بصوره مفاجأه لتخطي شاحنه كبيره او حاجه وطبعاً النظام ده هايكون عائق لده !! لأ ابدا مجرد ماتحس انك محتاج تتسارع بصوره مفاجأه وتكسر السرعه المثبته اضغط بصوره سريعه على دواسة البنزين للأخر فوراً الكبيوتر هيفهم ان في مشكله وهيفصل اوتوماتيك محدد السرعه وتتجاوز سرعتك عادي بعد كده مجرد ما ترجع تهدي السرعه لي 100 تاني النظام اوتوماتيك هايرجع يشتغل.

النظام التاني هو نظام الملاحه الألي أو Cruise Control :- وده الحقيقه مشابه للنظام السابق لكنه أوسع شويه من سابقه وهو انه بيعمل على انه يجيب السرعه المطلوبه ويحافظ عليها يعني مع النظام ده مابنحتاجش لدواسة البنزين في حاجه هو بيتسارع لوحده ويجيب السرعه المطلوبه ويثتب عندها اوتوماتيك .

الأزرار المستخده هي نفس الأزرار في النظام الأول ونفس الاستخدام دون اختلاف.

التشغيل :
1-نضغط على الزرار اللي تحت على الشمال الأول لكن المره دي الاختلاف في علامة النظام هاتطلع في نفس المكان اقصى اليمين في العداد لكن المره دي لونها أخضر والكمبيوتر هيكتب cruise control
2- بالضغط على زرار + هيبدأ النظام بالعمل الاوتوماتيكي لكن برضه على نفس سرعتك وبالتالي مش هاتحس بحاجه الأول هنضغط + عشان نوصل السرعه على الشاشه لي 100 بس يرجى الحذر هذه المره لئن لما هنزود السرعه دلوقتي الكمبيوتر اوتوماتيك هيتسارع عشان يوصل ليها وتسارع الى حد ما سريع وبالتالي ياريت نكون على طريق فاضي ومافيش قدامنا حد المهم نفرض اننا حددنا 100 اوتوماتيك هتلاقي العربيه بدون ماندوس بنزين ولا اي حاجه بتجيب ال 100 وبتقف عندها وتثبت عليها بدون بنزين النظام ده مريح جدا خصوصاً في الطرق السريعه .

بعض الملاحظات على النظام :-
هل النظام دقيق في تحديد السرعه ؟ نعم للغايه لدرجة ان في طرق السفر بيكون في كباري ومطالع ومنازل ومناطق الهوا فيها شديد شويه ومناطق تانيه الطريق نازل فيها وكده .... مجرد ماتيجي على منزل او كوبري حتى والسرعه هاتزيد هتلاقي الكمبيوتر لوحده حس بكده وقاوم التسارع وثبت على 100 والعكس يعني على 100 وطالع كوبري السرعه هاتقل ! لأ ابداً الكمبيتور بعد لحظات هتلاقيه اوتوماتيك تسارع زياده عشان يعوض السرعه المفقوده نتيجه مطلع الكوبري او مقاومة الهوا أو ايا كان السبب ويوصل ل 100 ويثبت......
النظام قد يكون مخيف لئنه سيصور لنا انه واحد دايس ينزين وخلاص لأ طبعاً النظام حساس جداً وأي ضغط على الدبرياج او الفرامل وقد يكون في الاوتوماتيك تغيير النقله مبطل للنظام فوراً ويتوقف النظام عن العمل بصوره مؤقته ويعود للعمل مره أخرى بعد الضغط على زرار ال R

أخيراً وليس أخراً التحكم وايقاف النظام اللي كاتبه فوق للحالات الطارئه لا قدر الله لكن لو في الطبيعي زراير الابطال والتفعيل على يمين الدركسيون قريبه جداً مننها طول ما ماسكين الدركسيون وبالتالي الضغط على O يعمل على ابطال النظام و R يعمل على اعادة العمل .

عيوبها....

سيارة تحتاج الى اهتمام ومراعاه ومحافظه.......زيارة التوكيل بصفه مستمره ...الحفاظ على الصيانه وجميع متطلباتها في مواعيدها الصحبحه....هي دي مش عيوب لكن عند بعض الناس هو شيء مجهد وقد يكون عيب .......عموماً لو عملت اللي قلت عليه حضرتك هايكون معاك سياره ان شاء الله تفتخر بيها ويصيبك حالة العشق الدائم من ملاك هذه التحفه ان شاء الله.

العيب التاني هو سعر اعادة البيع ولكن في تحسن واضح هذه الايام في المشكله دي لكن برضه سعر اعادة البيع مقارنة بعربيات كتير هو قليل .


كفايه كده انهارده وان شاء الله نعمل المقارنات بكره ويكون باقي الوحوش تواجدوا ويكملوا لحضرتك الموضوع..........ووفقك الله في الاختيار السليم ان شاء الله ولا انسى ان اذكر حضرتك بكثرة الاستخاره وان شاء الله كل شيء يكون تمام وبخير.

[Amr_Moh]

[QUOTE=Ramy_Tantawi;440783]السلام عليكم.



العيب التاني هو سعر اعادة البيع ولكن في تحسن واضح هذه الايام في المشكله دي لكن برضه سعر اعادة البيع مقارنة بعربيات كتير هو قليل .


ana 7ases keda bardo

[DViPER]

ربنا يكرمكم والله
ريحتوا قلبي
وفي أنتظار المقارنة

[DViPER]

طيب هي المانيوال بتاعتها صحيح 6 سرعات غير المارشيدير ؟؟؟

[Amr_Moh]

طيب هي المانيوال بتاعتها صحيح 6 سرعات غير المارشيدير ؟؟؟

5 na2lat bas

[DViPER]

أنا كنت شوفت فيديو ليها علي اليو تيوب ناس بتطير بيها مش بتجري

اللينك أهوه

http://www.youtube.com/watch?v=T7W1Hzklb3k&feature=related

[blazer]

بص على الفيديو دا

http://uk.youtube.com/watch?v=e6d8zbJA5Lw&feature=related

[DViPER]

ده جنان ده ولا ايه
هي فعلا تقدر تجيب كده
أقصد ال 1600 اللي بتنل مصر ؟؟؟

[DViPER]

طيب اللي معاه العربية دي صرف عليها كام صيانة تقريبا من يوم ما جبها ؟؟؟

[blazer]

بس دا ماتور 2000cc 136hp
بس الماتور اللى بينزل عندنا بيجيب لحد 210 وومكن اكتر لو اتغير فلتر الهواء بفلتر رياضى

[Ahmed Selim]

طيب اللي معاه العربية دي صرف عليها كام صيانة تقريبا من يوم ما جبها ؟؟؟

أسعار الصيانات الدورية موجودة فى
أسعـــــار الصيـــانة و قطــــع الغيــــار الأصليـــة للميــــجان II

تقدر تحسب أنت هتدفع أد أيه حسب تقديرك للكيلومتر اللى هتعمله غير كده مفيش حد عمل حاجة تانية غير أحياناً كويل ضرب عند بعض موديلات 2005 وكان بيتغير فى الضمان ولو خلص الضمان الكويل ب 550 جم


و معظم الناس محصلش معاهم مشاكل عويصة فى عربياتهم وبرضه ممكن تراجع اللينك ده هتلاقى فيه كل المشاكل اللى قابلت أصحاب الميجان وحلوها أزاى وبكام
أعطـــــــال الميـــــجان II من مـــلاكهـــا و إصلاحــــها

[DViPER]

جزاكم الله خيرا