تجربتى مع زيت الفبريكه فى الفلوينس 2014

[yasser100]

اصدقائي الاعزاء . ليه تجربه مع زيت الفابريكه فى الفلوينس 2014 و فضلت مناقشتها للاستفاده و تبادل الاراء

انا اشتريت الفلوينس كانت عامله 15 كم و كان اول انطباع عن سحب الموتور و طلعته تقيل . و قلت العربيه لسه زيرو و ده طبيعى و بتلين .
و كان تشغيلها الصبح الاقى الموتور بينعر مش صوت موتور ابدا فى عربيه زيرو بالمكانيات دى و ﻻ بالسعر ده .
طلعتها من الثبات مش قوى و كان الاعضاء و انا منهم لما يكتبوا عن النقطه دى يقولوا اصل الاوروبى كله كده و كنت باستغرب ده الموتور و الفتيس يابانى . هو مين اللى مسئول عن
سحب العربيه غير الموتور و الفتيس ؟؟؟
خلصت اول 1000 كم سحب العربيه اختلف بس حاجه بسيطه و بدأت اشغل التكييف و الاقى العربيه بتنازع فى السحب و خصوصا فى المطالع زى الكبارى و الطرق اللى فيها اماكن عاليه
وﻻزم تكون واخد سرعتك قبلها و يا سلام بقا لو وقفت فى مطلع كوبرى و مشغل التكييف ..
قلت للتوكيل على الملاحظات دى و كشفوا عليها كمبيوتر و قالوا لى كله تمام و مافيش الهوا و السحب ده طبيعة العربيه دى و كنت متوقع طبعا الاجابه دى و ما دخلتش فى مناقشات بصراحه .
ﻻحظت ملاحظه تانيه انه الزيت لما علشان يرجع من اجزاء الموتور و يتجمع فى الكارتيره و يتقاس صح بياخد 3 او اربع ايام من ركن العربيه .
ركزت على نقطة الزيت و بخبربتى فى الناحيه الكيميائيه و اللزوجات بدات ابحث فى الموضوع و عرفت من التوكيل انهم بيستخدموا زيت توتال 5w40 و ده بالنسبه للزوجه بس الله اعلم هل دى اللزوجه بتاعة زيت الفابريكه و ﻻ ﻷ ؟ لانهم مش همه اللى بيحطوه هنا .
بحثت عن مواضيع زيت الفابريكه و ده المعلومات فيه قليله و لكن النتيجه اللى وصلتلها انه زيت صفاته التخزينيه بتكون اعلى من مواصفاته التزييتيه و طبعا ده علشان يراعى ظروف الشحن فى المراكب و الرطوبه و اختلاف المناخ ما بين الدوله المصنعه و الدول اللى هاتتباع فيها العربيه و ما يعرفوش كمان العربيه هاتتباع و هاتتركن و هيه زيرو فتره اد ايه .
و اتصلت بنيسان كتوكيل هنا و عالميا و عرفت منهم انه لزوجة الزيت المنصح به لكل الحديث من مواتيرهم 5w30 و انه زيت الفابريكه يتغير بعد 1000 كم و رينو بتقول بعد 10000 كم مش عارف ليه . بيتعاملوا مع العربيه كانها فلوينس 1 او ميجان .
اخدت قرارى بتغيير الزيت على 1400 كم و قلبت الدنيا على اى نوع زيت لزوجه 5w30 مش لاقى و بعت ايميل لشركة توتال العالميه و اتصل بى مندوب من فرعهم هنا و اعتذر لى
انه ناقص دلوقتى لانه توكيلات كتير بتسحبه للعربيات الحديثه و قال لى بس توكيل رينو بياخد 5w40 بس . قلت له عارف لان اغلب العربيات عندهم عليه ما عدا الفلوينس الجديده و الميجان 3 . المهم فى الرحاب لقيت بالصدفه مركز لموبيل و عنده موبيل 1 5w30 و اشتريته و على فكره ما تفرقش اسماء شركات الزيت معايا كتير لانه اغلبهم واحد . اتصلت بمركز فرنش موتورز فى الرحاب علشان يكون تبع التوكيل و طلبت تغيير الزيت و الفلتر و تم .
كان عندى مشاوير اعملها فى حدود 70 كم بعد التغيير و الاقى العربيه حاجه تانيه خااااالص غير اللى كنت راكبها قبل التغيير. كانها بتقول لى انا الفلوينس الحقيقيه يا باشا .
و اتفرجوا على جمال و هدوء و نعومة الموتور اليابانى و الطلعه و السحب من الثبات اتغيروا ازاى و صوت الموتور فى التشغيل الصبح . و اقيس مستوى الزيت تانى يوم مش 4 ايام و ﻻ الهوا فى المقياس .

طيب مش عارف ليه التوكيل مصمم على التغيير بعد 10000 كم . برغم انه اتخن عربيه شوفتها بعد 5000 بس و معظمهم على 1000 ؟
لزوجة زيت الفابركه العاليه دى قد تكون مضره . العربيات الحديثه خلوص البساتم فيها قليله و بتحتاج لزوجه معقوله علشان تعمل تزييت صح .
ليه التوكيل حتى مش بيستعمل اللزوجه المنصح بها 5w30 و على فكره فى الكتالوج مش مكتوبه نهائي .
لزوجة زيت الفابريكه ده معديه حتى ال 5w40 قد تكون 50 او 60 .

تحياتى و انتظر منقشاتكم :)

[abdulkhaleq]

احييك انك شغلت دماغك

[Moratoz]

علي فكره أنا كنت بفكر في الفلوانس وكان موضوع نقص الزيت وحاله تانيه في الدركسيون مش فاكرها سبب مت أسباب عدم التعجيل في شرائها وكذلك الفتيس ال cvt لأن في ناس أخبرتني أني لازم اجربه الاول لأن مش كل الناس بتتبسط منه

وطبعا تقديري علي تفكيرك البناء وعلي فكره رينو قالت ان العيب كان في سبب مبخر او حاجه زي كده
وياريت حضرتك تنقلي تجاربك في سول قتها وفتيسها

[Adnfalcon]

فعلا معظم عربيات موديل 2014 بتنصح ب زيوت 5w 30

[Ramadan Kader]

انا كمان عربيتي فورد فيستا قديمه ولما بأعلى بالزيت الموتور بيتحول لموتور عربيه سبق برغم قدمه فنصيحه لما تلاقى مشكله فالموتور و الكمبيوتر مكتشف المشكله دي روح غير زيت الأول و بعدين قرر لو فرقت خلاااااص مفرقتش يبقى مخسرتيش غير تمن الزيت لان الكمبيوتر ففكري مقفش العيب و لما كلمت موبيل هنا فى مصر وهم بصراحه كلموني برده فعل سريعه جدا واكنت أيام عيد هم الى نصحوني أغير لزيت موبيل ال 5w40 و ده طبعا مناسب جدا لعربيتي .
و شكرا جدا على المشاركه دي.

[yasser100]

علي فكره أنا كنت بفكر في الفلوانس وكان موضوع نقص الزيت وحاله تانيه في الدركسيون مش فاكرها سبب مت أسباب عدم التعجيل في شرائها وكذلك الفتيس ال cvt لأن في ناس أخبرتني أني لازم اجربه الاول لأن مش كل الناس بتتبسط منه

وطبعا تقديري علي تفكيرك البناء وعلي فكره رينو قالت ان العيب كان في سبب مبخر او حاجه زي كده
وياريت حضرتك تنقلي تجاربك في سول قتها وفتيسها

تجربتى دى حضرتك ما لهاش علاقه بموضوع نقص الزيت . نقص الزيت كانت قصه تانيه و انتهت و كان للاسف راجع لعدم خبرة التوكيل بالموتور و ده على لسانهم . و ما كانش فيه عربيه واحده كان فيها عيب فى موتورها كموتور و لكن ما عرفوش المشكله فين الا لما فكوه و بعتوه فرنسا . بس كان اللى حصل حصل خلاص .
الفتيس ال cvt الجديد بالنسبه لى ممتاز فى اداؤه و توفير البنزين و دى نقطه بتختلف من شخص لشخص فى طريقة سواقته و علشان تطمن لأداءه احجز ميعاد من التوكيل و جرب العربيه و احكم بنفسك

[yasser100]

انا كمان عربيتي فورد فيستا قديمه ولما بأعلى بالزيت الموتور بيتحول لموتور عربيه سبق برغم قدمه فنصيحه لما تلاقى مشكله فالموتور و الكمبيوتر مكتشف المشكله دي روح غير زيت الأول و بعدين قرر لو فرقت خلاااااص مفرقتش يبقى مخسرتيش غير تمن الزيت لان الكمبيوتر ففكري مقفش العيب و لما كلمت موبيل هنا فى مصر وهم بصراحه كلموني برده فعل سريعه جدا واكنت أيام عيد هم الى نصحوني أغير لزيت موبيل ال 5w40 و ده طبعا مناسب جدا لعربيتي .
و شكرا جدا على المشاركه دي.

شكرا لمشاركتك و فعلا موضوع لزوجة الزيت دى مهمه جدا و خصوصا فى الحديث و كل مدى خلوص البساتم بيقل علشان يطلع اكبر عزم فى العربيه عند عدد لفات موتور اقل . لدرجة انه فيه زيوت نازله 5w20 و 0w20 . و موضوع لزوجات الزيت ده موضوع طويل و شاق و كل اللى اقدر اقوله انه الكلام اللى بيتقال من عمال البنزينات و الميكانيكيه عن تقيل للصيف و خفيف فى الشتا كلام فااااارغ بدون الدخول فى تفاصيل طويله . النهارده موبيل فى الجورنال بتعلن عن توافر زيت 5w30 لانه فعلا مش موجود و التوكيلات ساحباه

[ehab gamal]

طيب و بالنسبة للتوكيل هل يرضي اني اغير الزيت بعد 1000 و احط الزيت اللي انا عايزه ولا هيقولي اني كده برا الضمان و يخليني اتخانق معاه :d

[yasser100]

طيب و بالنسبة للتوكيل هل يرضي اني اغير الزيت بعد 1000 و احط الزيت اللي انا عايزه ولا هيقولي اني كده برا الضمان و يخليني اتخانق معاه :d

ما فيش حاجه اسمها تغير نوع زيت من شركه لشركه تكون بره الضمان. انا لما غيرت رحت مركز معتمد من عندهم و ركبت الفلتر من عندهم علشان ما فيش حد يفتح بقه و قبلها كنت عندهم و قلت لهم على ملاحظاتى و ما عملوش جديد . لما يفهموا فى الموتور و طبيعة العربيه نبقا نتكلم . ده باسأل المهندس بتاخد كام لتر زيت بيقول لى 5 و هو فى الكتالوج 4 و اللى نزل منها 4 بالظبط و بعدين من امتى بنسمع انه تغيير نوع زيت او تغييره كله يطلع بره الضمان ؟؟؟ فين ضمانهم المكتوب و شروطه ؟ ما عنديش استعداد اغامر بفلوسي علشان احتكارات و ملاحظات الناس اللملاك ملاحظينها

[heeshooheeshoo]

إسمح لى أولا أن أسجل إعجابى بهذا الموضوع وأحييك على الجرأة فى إقتحامك لموضوع إحتكار التوكيل لماركة معينة من الزيت لأسباب أكاد أجزم أنها تجارية بحتة ولا علاقة لها بمواصفات فنية ، لاسيما أن معظم التوكيلات الموجودة فى مصر لا تمانع فى قيام العميل بشراء الزيت بمعرفته طالما يطابق المواصفة الموصى بها من الصانع .

والعجيب أن شركة نيسان نفسها - صانعة المحرك - تنتهج أسلوب حرية العميل فى إختيار ماركة الزيت . والأدهى من ذلك أنه يمكن ان تجد مركز خدمة معتمد من نيسان يتعامل بزيت توتال وآخر يتعامل بزيت شل أو موبيل ، ولا تجد شركة نيسان تهدد عملائها بخروج المحرك من الضمان لإختلاف ماركة الزيت !!!!!!!!
والسؤال الآن هل ستقوم بتغيير الزيت مرة أخرى بالتوكيل عند 10000 كم بزيت توتال ذو لزوجة أعلى ثم تخرج من التوكيل تنزله مرة ثانية ؟
لأنهم طبعا مش ممكن يعرفوا أنك غيرت الزيت إلا لوكان فلتر الزيت المركب بمعرفة فرنش موتورز مختلف بشكل ما عن الموجود لديهم أو لو عملوا تحليل للزيت الذى نزل من السيارة .
وفى هذه الحالة ستكون تكلفة تغيير الزيت مضاعفة !!!
بصراحة وبالرغم من ذلك .. تجربتك بتززززن فى دماغى بشدددة .
أرجو منك أن تتابع هذا الموضوع بملاحظاتك حتى موعد صيانة الـ 100000 لإستكمال الإفادة .. "كمل جميلك"

وتقبل تحياتى ،،،

[yasser100]

إسمح لى أولا أن أسجل إعجابى بهذا الموضوع وأحييك على الجرأة فى إقتحامك لموضوع إحتكار التوكيل لماركة معينة من الزيت لأسباب أكاد أجزم أنها تجارية بحتة ولا علاقة لها بمواصفات فنية ، لاسيما أن معظم التوكيلات الموجودة فى مصر لا تمانع فى قيام العميل بشراء الزيت بمعرفته طالما يطابق المواصفة الموصى بها من الصانع .

والعجيب أن شركة نيسان نفسها - صانعة المحرك - تنتهج أسلوب حرية العميل فى إختيار ماركة الزيت . والأدهى من ذلك أنه يمكن ان تجد مركز خدمة معتمد من نيسان يتعامل بزيت توتال وآخر يتعامل بزيت شل أو موبيل ، ولا تجد شركة نيسان تهدد عملائها بخروج المحرك من الضمان لإختلاف ماركة الزيت !!!!!!!!
والسؤال الآن هل ستقوم بتغيير الزيت مرة أخرى بالتوكيل عند 10000 كم بزيت توتال ذو لزوجة أعلى ثم تخرج من التوكيل تنزله مرة ثانية ؟
لأنهم طبعا مش ممكن يعرفوا أنك غيرت الزيت إلا لوكان فلتر الزيت المركب بمعرفة فرنش موتورز مختلف بشكل ما عن الموجود لديهم أو لو عملوا تحليل للزيت الذى نزل من السيارة .
وفى هذه الحالة ستكون تكلفة تغيير الزيت مضاعفة !!!
بصراحة وبالرغم من ذلك .. تجربتك بتززززن فى دماغى بشدددة .
أرجو منك أن تتابع هذا الموضوع بملاحظاتك حتى موعد صيانة الـ 100000 لإستكمال الإفادة .. "كمل جميلك"

وتقبل تحياتى ،،،

كل اللى حضرتك قولته مظبوط و اجبار غريب عمرى ما شفته فى 3 عربيات زيرو شاريهم قبل كده و فعلا نيسان مافيش مشكله عندها فى اسم ماركة الزيت و توكيلات تانيه كتير . على فكره التوكيل ما عندوش مانع تغير زيت الفابريكه فى اى وقت بعد الالف بس يكون بالكامل على حسابك :) و فيه ناس بعد مشكلة الزيت اللى ظهرت و اتأخرت فى معرفة السبب اخدوا معاهم انواع زيت تانيه و اجبروهم عليها . زيت الفابريكه ده على فكره ما اقل انواع الزيوت كجوده و الدليل على عدم اهميته انه يوصل 10000 كم . لو واحد اشترى العربيه و مشى عليه 1000 كم بس و سافر لمدة سنه و راح يعمل صيانه هايعملوا له ايه ؟؟؟ هايغيروا له زيت من اللى عندهم . يعنى لو كان مهم المفروض يغيروه له بزيت فابريكه برضه لغاية ما يوصل ل 10000 كم و ده مش بيحصل طبعا .
فين الضمان المكتوب ؟ فين الشروط ؟ فين مكتوب انه لو غيرت الزيت قبل 10000 تخرج من الضمان ؟
انا غيرت فى مركز معتمد و المفروض انه المراكز واخده تعليمات منهم و مش مانعين تغيير الزيت بعد الالف و ﻻ حاجه و قال لى اختم لك فى كتيب الصيانه كمان لو تحب لو هاتخرج من الضمان ما كانش وافق اصلا و قال لك غيره فى اى بنزينه بعيد عنى .
اخدت احتياطى قبل ما اعمل حاجه :)
لكن علشان يحتكرنى بالمنظر ده و يضر مصلحتى . اسف
طيب لو فيه ناس فى مدن او اماكن مافيهاش مراكز لهم و مجرد عايز يغير زيت زى الصعيد مثلا . يعمل ايه ؟

[ehab gamal]

اصل في ناس كتبت هنا علي المنتدي انهم قابله مشاكل مع التوكيل اللي في ابو رةاش في مشكله تغيير الزست بنوع تاني غير توتال و التوكيل رفض و قاله ان غيرت هتغير علي مسؤوليتك و الموتور يطلع من الضمان مع ان العربية اصلا نازله ريكومندد ليها الكاسترول مش التوتال عشان يعمل حاجه زي كده
اسلوب احتكار الزيت دا اسلوب غلط جدا و هيكره ناس كتير في العربية و يبعد الناس انها تشتري العربية

[yasser100]

اصل في ناس كتبت هنا علي المنتدي انهم قابله مشاكل مع التوكيل اللي في ابو رةاش في مشكله تغيير الزست بنوع تاني غير توتال و التوكيل رفض و قاله ان غيرت هتغير علي مسؤوليتك و الموتور يطلع من الضمان مع ان العربية اصلا نازله ريكومندد ليها الكاسترول مش التوتال عشان يعمل حاجه زي كده
اسلوب احتكار الزيت دا اسلوب غلط جدا و هيكره ناس كتير في العربية و يبعد الناس انها تشتري العربية

دلوقتى بعد مشاكل الزيت اللى حصلت ما بيفتحوش بقهم مع العملا . و العملا بهدلوهم و بعتوا لفرنسا و مواقع عالميه لحماية المستهلك . لما يعرفوا الاول المشاكل بتاعت الموتور يحلوها بدل ما كانوا يغيروا للناس المواتير و هيه سليمه يبقوا يكلمونا فى نوع الزيت اللى يفرضوه علينا

[ehab gamal]

يعني انا اتوكل علي الله و اشتري ميجان الفيس لفت الجديده ولا لا :d

[yasser100]

يعني انا اتوكل علي الله و اشتري ميجان الفيس لفت الجديده ولا لا :d

بص يا باشا , الميجان فيس ليفت الجديده مغريه جدا بصراحه , تحفه , اتفرجت عليها فى التوكيل و ناس كتير كانت رايحه تتفرج عليها مخصوص , بس عموما انا عن نفسى لو حد بياخد راييى فى شراء عربيه كل اللى اقدر اقوله ما لها و ما عليها و الاختيار على اللى بيشترى . اتفرج عليها كويس و شوف عربيات تانيه فى دماغك و خد قرارك من نفسك عن اقتناع . قسم رينو هنا مفتوح و مش بيدارى على اى مشكله , اقرا و شوف و ربنا يوفقك :)