ريحوني ابوس ايديكم .. ميجان :(

[simo4ever]

السﻻم عليكم ورحمه الله وبركاته ..
كل سنة وانتم طيبين بمناسبة السنة الجديدة .. ويارب تكون سنة سعيدة ع الجميع

ياحضرات انا كنت بدور على رينو ميجان اي موديل بقا مش هتفرق اذا كان 2005 او 06 او 07 .. ومش هتفرق مانيوال من اوتوماتيك
السؤال هنا .. ليه على طول بسمع ان الميجان مش اعتمادية ؟! يعني الناس اللى بتقول ان بيظهر فيها مشاكل واعطال مرة واحده .. طب الحاجات دي زي ايه !
والحاجات دي لما تظهر بتتعالج عادي وبتظهر تاني .. وﻻ صعب تتعالج وغالية وﻻ بتتعالج بصعوبة وغالية وبتظهر تاني برضو ؟! .. بصراحه انا مش فاهم حاجه .. يعني انا قريت مواضيع كتير عن الميجان هنا من وقت دخولي المنتدى وتقريبا كل مشاكلها هي الرسايل اللى بتظهر ع الشاشه .. غير كده مش شايف فيها حاجه .. اقسم بالله انا من كتر القلق اللى بسمعها عنها بحس انها عربية جاية من الفضاء .. طب احنا قولنا قبل كده انها زيها زي اى عربية وفيها نفس الحساسات اللى فى اى عربية بخﻻف حساسات النور والمطر اللى هي حساسات ترفيهيه .. طيب المشكلة فين برضو ؟!! انا نفسي حد يجاوبني ع السؤال دة .. بحس من الكﻻم اللى بيتقال عنها انها ﻻ تصلح انها تكون عربية .. طب واحد زيي معاه عربية سيتروين اكسارا 1 موديل 2001 وياما اتقال عنها كﻻم انها زبالة ... اقسم بالله جايبها مستعملة فى شهر 2 اللى فات ومتهانه .. وكنت بشتغل بيها مهندس drive test للناس اللى متعرفش يعني ايه .. يعني بيكون معاك عربية تقريبا شغاله 24 ساعه مشاوير لمواقع وقرف .. واقسم بالله اشتغلت بيها وكانت لمؤاخذه حمارة شغل وﻻ بتسخن وﻻ وقفت مني وﻻ اى حاجه وكنت مهمل فى صيانتها بحسب ظروف شغلي .. واسمها سيتروين وفرنساوي والكﻻم دة .. طب ماشي الميجان موديل اعلى وتكنولوجيا تاني واكيد ههتم بيها شوية .. بس مش لدرجة اني ابقى حاطط فى دماغي اني هعملها صيانة كل يومين تﻻته مثﻻ بالكﻻم اللى بسمعه !! او مثﻻ دي عربية مينفهش تسافر علشان قليلة الاصل ع الطريق وبتاعت مفاجأت .. طب ايه المفاجأت دي مش فاهم .. طب الحاجات دي توقف العربية خالص وﻻ مجرد رسايل تحذيرية ؟! ..
يا جماعه حد يريحني ويجبلبي الموضوع من الاخر ايه هو علشان بفكر ابيع السيتروين واجيبها ﻻني مش متعود على هاتش باك وكمان واطية جدا ع الارض ..
يعني مش عاوز حد يقولي اهتم بيها وبصيانتها وخلي ايدك فيها على طول .. ﻻن كلمة خلى ايدك فيها على طول بتديني احساس انها كل اسبوع عند ميكانيكي او كهربائي او عفشجي :D

وياريت شوية اسعار قطع غيار ليها الحاجات الاستهﻻكية والاكسسوارات وكده .. واكيد من بره التوكيل

واسف ع الاطالة ..

[eng_amg]

الميجان من العربيات إلي عجباني جدااااااااااا وحاسس إنها مظلومة..
لذلك أضم صوتي لصوتك وياريت الناس إلي معاهم ميجان يكلمونا عليها..

[adeltito]

بص انا لسه جايب ميجان 2005 من حوالى 5 شهور وهى عربية حلوة مفيش كلام بس متغلطش غلطتى وقبل ما تشترى اكشف عليها في التوكيل كويس بس متخفش زيها زى اى عربية محترمة محتاج ترعيها علشان ترعيك

[تامر.محمد]

اجابة السؤال المشهور

http://www.nilemotors.net/Nile/447202-a.html

بعد ما تقروا ... تحت امركم في اي استفسارات

[M.Radwan]

بص أنا هريحك..أي عربية لو شاريها سليمة من ناحية الموتور والكهرباء والفتيس والشاسيه..هتريحك ومش هتعملك مشاكل خالص..وكذلك الأمر في الميجان..اشتري عربية نظيفة وموديل قريب هتمشي معاك تمام
أنا كنت شاري عربيتي موديل 2009 عاملة 60000 كيلو وعملت بيها لغاية دلوقتي 35 ألف كيلو..مظهرش فيها غير مشكلتين..مرة مروحة التبريد الفيشة بتاعتها باظت وغيرتها ب 800 جنيه..ومرة حساس النقلات بتاع الفتيس باظ وغيرته في التوكيل ب 600 جنيه.. العربية موقفتش فعليا غير في المرة الأولى لما الفيشة باظط عشان طبعا العربية سخنت شوية بس الحمد لله بتطلعلك تنبيه باللون الأحمر عند العدادات أول ما الحرارة تعلى فورا. كل الصيانات التانية كانت حاجات استهلاكية: بطاحات مساعدين - تيل فرامل - شداد موتور + الصيانة العادية جوا التوكيل. على فكرة أنا بعمل بالعربية من 100 إلى 120 كيلو في اليوم، يعني استخدام تقيل يعتبر.

- لو العربية عطلت، اوعى تروح بيها التوكيل إلا لو عارف ايه العطل بالظبط وهيتكلف قد ايه! هتتعطل على الفاضي وهتدفع مبالغ محترمة في حاجات تافهة. يعني مثلا:
كل اسبوع عند الميكانيكي أو العفشجي ده طبعا مش هيحصل إلا لو العربية كانت شخشيخة :d
أنا من ساعت ما جبتها عملت صيانة في التوكيل 3 مرات وداخل على الرابعة أهو..وبرا عملت حاجات عفشة وميكانيكا حوالي 4 مرات برضه.. مع العلم إني مصبرش ع الحاجة وبحب أغير أي حاجة بايظة فورا ومبستحملش أي صوت في العربية :d
المشاكل اللى بتظهر مرة واحدة أغلبها مشاكل كهرباء وحساسات.

أنا شخصيا هقولك اشتري عربية نظيفة واكشف عليها كويس عمرها ما هتتعبك وهتستمتع بيها وبسواقتها وشياكتها.

[أسامه الحسيني]

توكل على الله واشترى ميجان بس بعد ما تكشف فى التوكيل انا جبتها فى شهر 3 الى فات وكان فيها مشاكل فى فيشة الكهرباء عقدتنى فى العربيه (طبعا كان السبب عك الصنايعيه )لكن الحمد لله بعد ما غيرت الفيشه تقريبا ما فيش مشاكل تذكر والحمد لله العربيه مبسوط منها