محتاج نصيحة (ميجان مستعمل)

[egyptian_eagle]

سلام عليكم
يا جماعة انا ناوي ان شاء الله اشتري عربية مستعملة لان دي اول سواقة ليا ومش عايز اخبط في الزيرو,وعجباني جدا الرينو ميجان في شياكتها والاوبشنز اللي فيها واسعارها المناسبة الي حد ما.
فكنت عايز اعرف من اهل الخبرة في منتدي الرينو ايه افضل موديل في الميجان؟؟واللي يهمني اكتر ايه هي الموديلات اللي ابعد عنها واللي فيها مشاكل كتيرة؟؟وهل الميجان بشكل عام مشاكلها كتير واعطالها كتير وهتغلبني ولا ايه ظروفها؟
وحاجة اخيرة,,,لو بفاضل بينها وبين الاوبل فكترا,,,ايهما افضل؟؟

شكرا جزيلا مقدما وارجو المساعدة يا شباب لاني فعلا محتار في امر العربية دي

[تامر.محمد]

لو ميزانيتك تجيب يبقى كل ما كانت احدث كل ما كانت احسن , مشاكل 2007 و طالع اقل شوية من الاقدم منها , بس في المجمل الفيصل الاساسي حالة العربية اللي قدامك

بصفة عامة هي عايزة حد فاهم او حد بيستشير حد فاهم , لأن تفاصيلها كتير و عايزة اللي يشتغل فيها الصنايعي بتاعها بس عشان ماحدش يبهدلها , بالمناسبة ضروري تعرف محافظتك فيها صنايعية رينو ولا لأ قبل ما تقبل على الخطوة دي و لو لأ يبقى بلاش

دي احوال العربية في مصر من لسان ملاكها

http://www.nilemotors.net/Nile/447202-a.html

دي تفاصيل العربية

http://www.nilemotors.net/Nile/399181-2.html?highlight=%D8%AA%D9%82%D8%B1%D9%8A%D8%B1+%D8%A7%D8%AA%D8%A3%D8%AE%D8%B1+%D9%83%D8%AA%D9%8A%D8%B1+%D8%B5%D9%88%D8%B1

لو فيه استفسارات تانية قول و احنا معاك ان شاء الله :)

[egyptian_eagle]

شكرا جزيلا ليك استاذ تامر علي سرعة الرد
هو بالنسبة للميزانية فممكن تسمح بس انا كدة هبقي فقدت ميزة المستعمل وهي السعر القليل نسبيا,,,يعني لو جبت حاجة موديل حديث فانا كدة هبقي قربت بشكل كبير من سعر عربية زيرو معقولة واكيد مش ده المطلوب.
انا من القاهرة فاكيد فيه صنايعية بيشتغلو فيها.
بس كنت عايز اعرف من حضرتك ايه افضل مكان ممكن الاقيه فيه عربيات مستعملة كويسة ونضيفة,وهل يفضل الكشف عليها بواسطة فني اخده معايا وانا بشتريها ولا اكشف عليها في التوكيل؟؟ايه الافضل من وجهة نظر حضرتك

[تامر.محمد]

شكرا جزيلا ليك استاذ تامر علي سرعة الرد
هو بالنسبة للميزانية فممكن تسمح بس انا كدة هبقي فقدت ميزة المستعمل وهي السعر القليل نسبيا,,,يعني لو جبت حاجة موديل حديث فانا كدة هبقي قربت بشكل كبير من سعر عربية زيرو معقولة واكيد مش ده المطلوب.
انا من القاهرة فاكيد فيه صنايعية بيشتغلو فيها.
بس كنت عايز اعرف من حضرتك ايه افضل مكان ممكن الاقيه فيه عربيات مستعملة كويسة ونضيفة,وهل يفضل الكشف عليها بواسطة فني اخده معايا وانا بشتريها ولا اكشف عليها في التوكيل؟؟ايه الافضل من وجهة نظر حضرتك

احم , ما تقرا اول لينك جبتهولك طيب , من اولها كده كسل ؟ -_-

بص حوار السعر الرخيص , لو بنتكلم ان 2007 الحالة الكويسة سعرها في السبعينات فانت مازلت بتتكلم في الرخيص , ده ما جابش سعر فيرنا زيرو مانيوال , في نفس الوقت العربية دي لو نضيفة هاتديك اللي هاتديهولك عربيات سعرها النهارده زيرو ب150 الف و طالع بلا مبالغة , و خد بالك هي دي فئة الميجان

لو هتلاقي موديلات اقل سعرها في الستينات عادي و شغال بشرط الحالة النضيفة

بس تلاقيها حالة نضيفة و دي اهم نقطة , و اصعب نقطة

فين , اظن على النت اكتر حاجة

بالنسبة للكشف فممكن تكشف عند صنايعي رينو عادي بحيث لو فيها حاجة باينة يطلعها لك بدري بدري , و لو تمام تطلع على التوكيل تخبط ال500 ولا ال600 جنيه و تكشف شامل هناك بقى :)

[على مهران]

السلام عليكم
انا عضو جديد وسعيد ان اكون وسط الابطال دول

انا كان ليا كم سؤال انا لسه مشترى ميجان 2006 الفئة الاولى خليجى والحمد الله حالتها كويسه كشفت عليها فى مركز صيانه فى الاسكندرية متخصص فى الرينو فقط
بس من كم يوم ببص على المياة فى القربه لاقتها مطحنه كأن فيها طحينة كدا ايه نصيحتكم ليا
وياريت حد يقولى النور العالى بيشتغل ازاى لانى قلبت فيها كلها موصلتش لحاجه
اخر حاجه فى تسريب زيت ضئيل جدا من الماتور فى الجنب الايسر من السيارة دا عيب ايه

اسف على الاطاله وشاكر ليكم جدا

[تامر.محمد]

المياه المطحنة دي علامة جوان وش سلندر -_-

الحق اعمله بقى , بدل ما يخش في اضرار كتيرة , و حاول ترجع للي كشفوا على العربية لأن حاجة زي دي كان مفروض ما تفوتهمش

بالنسبة لتسريب الزيت من الجنب فهو طبعا جوان بيسرب , انهي جوان دي بقى حسب مكانه , الارجح انه جوان كرنك و الله اعلم

[loklok]

المياه المطحنه غالبا جوان الكوللر دي حاجه مشهوره في الميجان

[loklok]

لوتعرف مكان الكوللر بص عليه هتلاقيه بجانب الموتور فوق الفتيس وغالبا غرقان زيت

[على مهران]

شكرا ليكو والله يارجاله انا ححاول اوصل للكولر وابص عليه
بس لو كان هو بيتكلف كام ؟؟؟؟

شكرا

[albasha]

لو هيحتاج تغيير في حدود 600 جنيه
لكن لو الكولر اللي عندك ألومنيوم وهيحتاج يغير الجوان بس أعتقد أقل من كده بكتير

[mfraig]

واضح ان صاحب الموضوع مبتدئ في العربيات واظن الميجان مش اختيار مناسب ليك خالص
محتاج تكشف عليها صح وتجيب عربيه حاله حلوه جدا وتكون متأكد انها مش سهله في الصيانه ومش اي حد يلعب فيها ولو عاوز تشتري دماغك ابعد عنها

[على مهران]

شكرا ارجاله انا رحت للميكانيكى وغيرت الكولر عشان اللى كان فيها كان فيبر فجبت الالومنيوم بتاعه وطبعا الحساس مختلف فغير الفيشه بتاعته بس سعرها غالى قوى الفيشه دى 100 جنيه لوحدها بس الحمد الله غسل الموتور وربنا يسترها ميكنش فى حاجه تانى ان شاء الله.

[احمد صبري]

انا عاندي رينو وهي كويسه بس لازم يكون تعرف ميمانيكي وكهربائي كويسين
وانا عارض بتعتي للبيع لنفس الظرف ده

[تامر.محمد]

شكرا ارجاله انا رحت للميكانيكى وغيرت الكولر عشان اللى كان فيها كان فيبر فجبت الالومنيوم بتاعه وطبعا الحساس مختلف فغير الفيشه بتاعته بس سعرها غالى قوى الفيشه دى 100 جنيه لوحدها بس الحمد الله غسل الموتور وربنا يسترها ميكنش فى حاجه تانى ان شاء الله.

ليه غيرته اصلا ؟

[على مهران]

شكرا ارجاله انا كان عندى الكولر فيبر غيرته بواحد استعمال خارج اصلى الومنيوم بالحساس ب 450 جنيه بس لما رحت للميكانيكى قالى بعد ما فك وفى نهاية التركيب ان الفيشه بتاعته مختلفه عن اللى فى الفيبر وديه لوحدها ب 100 جنيه من عنده فاللى يشترى استعمال ياخد الفيشه بتاعة الحساس من البائع
بس دلوقتى المياه لونها كأنه مصدى برده مع انه فك الريداتير وغسله وخليته نضف القربه بس لونها كان مصفر برده فا مش عارف دا كدا طبيعى ولا ايه
شكرا ليكو مره تانى