سيارات الوحوش نعمة أم نقمة ؟

[Ahmed Samy]

انا متابع مواضيع شاركي و باقي اصحاب الميجان عن الامكانيات الذكية اللي فيها
وبرضه متابع الموضوع الأعطال من فترة
و عندي رغبة ملحة في سؤال لأنه محيرني
هو يا جماعة الأعطال دي انتوا حاسين انها عادية ؟؟
يعني لما أشتري عربية جديدة و ألاقي أعطال زي اللي قريتها من كويلات لبطارية لتعريق زيت لصوت ...الخ هل ده كان بالنسبة ليكم شعور عادي ؟؟
انا لا اتعجب ..أنا أسأل فعليا

سؤال كمان ..
هل الأعطال دي ظهرت في الميجان الهاتشباك الفرنساوي ولا في السيدان التركي فقط ؟؟

يعنى ..هو ده العادي بتاع العربية و لا دي مشاكل من تركيا ؟؟

سؤال كمان بقى ....

2008 في حد اشتكى من الحاجات دي
لأني عارف ان فيه حاجات اتغيرت من موديلات 2005 و 2006 زي سوفت وير الفتيس و الجنوط الألومنيوم ..فهل العيوب دي اختفت ؟؟؟


أنا مش عارف أحكم على العربية دي
لأنها يا هاتطلع تنتن ....يا تنتن


فعلا انا لما أقرا المواصفات ...يا سلااااام تحس انك مبسوووووط قوي

ولما تسمع المشاكل ....واحدة واحدة قلبي اتقبض

و طبعا العربية سعر اعادة البيع نازل يعني اللي هايشتريها ماينفعش يرجع في كلامه

مستنى ردودكم بس عايز أوضح نقطة
انا مش باتكلم من وجهة نظر مستخدم سيء و مش عايز يروح الصيانات و لا يصرف ولا كده

أنا باتكلم من مبدأ مستخدم جيد هايروح الصيانات الدورية بانتظام ..بس عايز يروح بكرامته

[ecybrarian]

انا في الحقيقة معي عربية ميجان موديل 2005(ترخيص 2006) وكل العيوب إللي فيها عيوب سواق (زي مانت قلت)..يعني الراجل صاحب العربية الاصلي غير بوجيهات عادية مش الأصلية (بوجيهات رينو) كانت النتيجة إن العربية بتعمل miss fire في البطيئ، والكمبيوتر بيعمل رسائل تخض. طبعا انا اتخضيت بس الموضوع كان بسيط

المشكلة التانية الجنوط ودي حلها سهل..تخللي بالك شوية وانت سايق وتخش المطبات والحفر (وما اكثرها) بالراحة..يا تغيرهم بطقم اندونيسي او طقم رينو لاجونا استيراد(لسبب او لآخر طقم الاجونا امتن من الميجان)

الحاجة الأخيرة تجد في المنتدي المشاكل فقط لأن أنا لو عربيتي كويسة هابعت ليه او اقول ايه على المنتدى..أأكد لحضرتك إن عدد العربيات الميجان في الشارع إللي زي الفل أكتر من العربيات إللي فيها مشاكل وبعدين دي عربيات وفي الشارع وحتى إللي فيها مشاكل بيقى أغلبها عيب سواقة

افتكر في واحد في المنتدى معاه فيرنا بعت يسأل اذا كان ضروري يغير زيت بعد أول 1000 كيلو؟؟ المضحك إنه عمل بعربيته 35000 كيلو من غير ما يروح للصيانة ولا مرة :-)))

واضح إن حضرتك يا دكتور مستخدم راقي للعربية وده إن شاء الله يخللي أي عربية معاك ما تعملش إلا الحد الأدنى من المقالب

بس الأهم إن تكون مقتنع وحابب العربية (اي عربية) ناوي تشتريها وما تسمعش اشتغالات الناس إللي تكرهك في اي عربية تشتريها

[Ahmed Selim]

عزيزى أبو مايا

العربية دى حكايتها حكاية

أولاً معظم المشاكل المذكورة كانت بتظهر فى بعض سيارات مو 2005 وقلما ظهرت فى 2006 ( بتكلم على مشاكل الكويل والبطارية طبعاً )

يعنى عندك زميلنا محمد مصطفى معاه 2006 و العربية عاملة معاه 90 ألف تقريباً و مغيرش حاجة......اللهم باركله و يجعل كلامنا خفيف :)

المهم أن أسباب المشاكل المذكورة فى التوبيك الخاص بالأعطال هتلاقيها تنحصر فى الأتى.....
1- مو 2005 اللى كان فيه مشاكل و تحديداً فى الكويلات والبطارية والجنوط...........و معظم المشاكل تم حلها فى مو 2006 ما عدا مشكلة الجنوط.
2- سوء أستخدام أو سوء عناية بالعربية.
3- جهل عدد من الناس من مالكيها بطبيعة التكنولوجيا اللى فى العربية ( يعنى فى ناس كانو بيقولو أنها بتطلع رسائل فجأه من غير أسباب عشان تجبرك أنك تروح التوكيل.....نظرية المؤامرة بس النسخة المصرية )
4- الأشاعات اللى بتطلع عليها ( الكارت بيملح و الكاوتش لو غيرته لازم تعمله set up فى التوكيل و الفتيس اللى بيبوظ على طول و تمنه فى التوكيل 60 ألف جم :) مع أنهم فى التوكيل بيدوا ضمان على الفتيس 100 ألف كم ) يا ريت تراجع الموضوع ده
ميجان 2: أنها حقاً سيارة محترمة
الموضوع مكنش محتاج أكتر من مكالمة تليفون للتوكيل.....
عموماً المشاكل اللى فى العربية اللى هى زى ما أتفقنا معظمها فى مو 2005.....أيه اللى يصبرنا عليها؟؟؟؟
سؤال وجيه من سعادتك.........و الأجابة
أنا مش عارف أبدأ بالسبب الأول ولا التانى حسب الأهمية لأن الأتنين عندى فى نفس الأهمية.....عموماً هنقول
1- معاملة التوكيل اللى معتقدش أنك ممكن تلاقيها فى مصر فى أى توكيل.....يعنى مثلاً أنا باظ عندى 2 كويل بعد ما العربية خرجت برة الضمان بحوالى سنة وشوية......مين يقول أن التوكيل يغيرهملى ببلاش.....يبعتولى واحد لحد عندى مع أن العربية بتمشى....ويغيرهم ببلاش...بالمناسبة تمنهم لو أنا رحت التوكيل أركبهم حوالى 1150 جم و لو بعتولى حد حوالى 1300 جم.
ده غير أن العربية طوال ال 4 سنين إلا شهرين معملتش معايا مواقف بايخة غير 3 أو 4 مرات من ضمنهم المرة دى و مرة للبطارية و مرة فيوز ضرب عشان البطارية أتهزت من مكانها و ضرب عشان ميعملش ماس كهربائى...يعنى منعت ضرر محقق للعربية. ( العربية عاملة معايا 88 ألف كم وشوية فكة )

2- السبب التانى........و أه من السبب التانى
مبدأياً أنا أمتلكت عربيتين قبلها BMW 320 مو 86 و أوبل فيكترا 97.....و طبعاً الألمانى مفيهوش كلام....صح ولا أيه ؟؟؟
الميجان بأه مش عارف ليه بيبقى فيه بينها وبين صاحبها علاقة عشق وهيام و حب غريبة.....chemistry غير مبررة و ملهاش أى تفسير علمى.

السببين دول كفيلين بالنسبالى أنى أتمسك بالعربية دى و أنا متقبل أنها ممكن تقف منى مرة فى السنة.....و فى نفس الوقت و أنا واثق أن فى ورايا توكيل ياكل الظلط :) ده غير طبعاً مساعدة الوحوش اللى بألف توكيل.
يمكن أنا أكون مختلف عن كثير من الناس فى الحتة دى بس.....هنعمل أيه...أنا كده :)
وفى نفس الوقت أنا مرضاش أو محبش أركب عربية توكيلها متعرفش تاخد منه حق ولا باطل....زى حال معظم التوكيلات فى مصرنا الحبيبة......يعنى بالعربي....أحب أكون مع توكيل أعرف أخد حقى منه فى البلد دى اللى الحقوق فيها كلنا عارفين مصيرها.......عن أنى أكون معايا عربية توكيلها معرفش أخد حقى منه.....حتى لو العربية ده مش معرضة للأعطال زى الميجان......بس مين عارف؟؟

أسف للأطالة بس أرجو أنى أكون وصلت وجهة نظرى.

[fahd_628]

احمد باشا اهلا بيك

بالنسبة للميجان احنا عندنا الحمد لله لحد دلوقتى عامل 25000 كم و مفيش اى حاجة و ان شاء الله تكمل على كدة

و بجد زى ما قالك احمد باشا فية كيمياء ما بين مالكى الميجان و عربياتهم و بيخليك تحبها و متقدرش تستغنى عنها

[ضيف]

بالنسبة للتوكيل
من حوالي إسبوعين كنت بعمل صيانة 25000 لقيت مهندس الإستقبال (بعد العربية ما دخلت و بدأوا شغل فيها) بيقول لي الهاند بريك فيه مشكله و لو لقوا هاند بريك في المخزن حيغروه (في الضمان) لو مفيش حيديني ورقة و يبقوا يتصلوا بي لما يجيلهم في قطع الغيار , الحمد لله لقوا و غيروه في الضمان.
الحقيقة كنت حاسس إن الهاند بريك بقاله كام يوم مش على طبيعته قلت يمكن أنا بقيت أشد الهاند زيادة عن اللزوم.
الحمد لله بيخدوا بالهم من حاجات ممكن تعدي على الواحد بس هم لأ.... يعني الموضوع بالنسبة لهم مش مسألة فلوس يسحبوها من العميل و خلاص
ده غير أنه نبهني إن التيل الأمامي قدامه بالكتير 1000 كم و محتاج يتغير (فعلاً غيرته بره بمعرفتي و فعلا كان قدامه فترة و يبدأ يؤثر في الطنابير).
ده غير تاريخهم المشرف إيام ما كان معايا دايو و بتعامل معاهم من سنة 99 كانت دايو لها صيانة عند eim في الكيلو 24 بالإسكندرية.

[renault monster]

الميجان بأه مش عارف ليه بيبقى فيه بينها وبين صاحبها علاقة عشق وهيام و حب غريبة.....chemistry غير مبررة و ملهاش أى تفسير علمى.

الكلمتين دول جم عالجرح

انا اول مره احب عربية بالشكل ده

انا كان معايا نيسان وهوندا وجربت الهونداي وجربت الكورولا وجربت الامريكي

بس والله ما حبيت اي عربية قد ما حبيت الميجان

انا بدأت اخاف عليها مني

وربا يوفقك يا احمد واتكل على الله

بس حافظ عليها علشان تعيش معاك

وبعد الردود الحلوة دي ما يتقالش اي كلام

[chato_eg]

عمرك شفت عربية خالية تمام من المشاكل ؟؟
أكيد لأ
و لا أغلى عربية فى الدنيا
الكمال لله و حده
لكن لما تيجى توزن المزايا و العيوب تلاقى الكفة راجحة جدا جدا للمزايا
المهم إنك تكون مستوعب و مقدر للمزايا
لو دخلت فى دائرة المعجبين بالعربية....هتهيم عشقا بها....
و فى ناس بتأخذ موقف ضدها نظرا لما لمسوه من مبالغة من الوحوش فى تقدير ما يروه أنها قطعة حديد على 4 كاوتشات
لكن لو نظرت للميجان II خارج المفهوم العام للماكينة و الآلة و إنها وسيلة مواصلات فى مرحلة ما بعد الدواب...
هتبدأ تستوعب الفكر الإنسانى الموضوع فى السيارة من قبل الصانع
و إنها ليست مجرد سيارة...بل هى قطعة فنية يعبر بها الإنسان عن أفكاره و شخصيته و على الآخرين أن يحترموا العمل الإبداعى بغض النظر عن استحسانهم له أو عدم ( استطعامهم )...لكن يكفى الاعتراف بالمجهود المبذول و أن هناك من قضى الكثير لكى تكتمل اللوحة بمثل تلك الهيئة...

بالنسبة لنا...هى مش بس عربية...و لا أعتقد أننا سوف ننساها بعد سنوات طويلة من الآن...بل ستظل عالقة فى الأذهان....و ده شىء عادة لا يحدث و خصوصا فى تلك الفئة السعرية..فهى ليست بالسيارة الفارهة

على فكرة...أكيد فى ناس راكبين العربية و مش حاسين أوى بكل اللى احنا بنتكلم فيه....لكن ده لا يعنى أنه مش موجود
و إحقاقا للحق أيضا...هناك الجميل و البديع من السيارات فى الدنيا لكن للأسف مش واخدة حقها فى مصر نظرا للتوكيلات المصرية و سلوكياتها المشينة

أنا مثلا كان نفسى أركب ال c4 أو ألفاروميو .....لكن عز العرب (سيتروين) الله يكرمهم سمعتهم زى الفل لدرجة تخليك قلقان و تحسسك بالذنب لو اشتريت عربية و توكيلها أى كلام و تبقى عارف كده و انت بتشترى و تكون حاسس إنك بترمى الفلوس فى الأرض....
غير لما تكون عارف إن فى توكيل محترم وراك مش هايسيبك تتورط فى العمق و يقولك ( حضرتك بره الضمان ...ده سوء استعمال...هى كده.....مافيش حل عندنا...استنى لما نبعت نجيب القطعة بال DHL من القطب الجنوبى على حسابك....و غيره )

و بعدين زى ما الوحوش قالوا...جملة المشاكل المعروفة إللى كانت فيها...كلها حاجات مش قاتلة...و تم التعامل معاها باحترام فائق من قبل الوكيل

إذا فسيارات الوحوش نعمة...بل و نعمة كبيرة جدا نحمد الله عليها...
كفاية إنى كل ما أحط رجلى فى عربية تانية أبقى عايز أرجع لعربيتى...مافيش حاجة تملأ العين و القلب زيها أبدا

[Sharky]

أحمد باشا

بص أنا مش حرغى كتير أنا حقولك المفيد المختصر
العربية داخلة معايا إن شاء الله على السنة الرابعة
كل إللى حصل فيها الأتى :
1- تغيير بطارية بعد سنة و 3 أشهر ببلاش داخل الضمان
2- تغيير الكويلات و دى ليها قصة فى اللينك دا

http://www.nilemotors.net/Nile/showthread.php?t=14369

غير كده و الحمد لله لم ارى منها أى مواقف بايخة

و رغم ذلك عندى إستعداد إن العربية تعطل منى شهر فى السنة فى مقابل إن كل ما إنزل أستعملها فى الـ 11 شهر الأخريين أبقى مستمع بيها جدا و مش عايز أنزل منها و هذا الإستمتاع بقيادتها لم أره فى أى سيارة أخرى من إللى سوقتهم (الياريس - الانسر - كرولا)
هذا الإستمتاع بقيادتها مخلينى عندى إستعداد أضحى بشهر فى السنة تعطل عن أنى أركب عربية من الباقى إللى ذكرته و ماتعطلش منى طوال السنة لكن أبقى غير مستمع بيها فى قيادتها و أحس إنها حاجة عادية مش فارق معايا سواقتها و حاسس إنى عايز أخلص مشوارى و أسيبها بسرعة

من الأخر يا احمد المعادلة
عربية تستمتع بقيادتها + توكيل محترم = ثقة و حب جارف للعربية
حتى لو ظهر بها أعطال حتكون مطمن لإن التوكيل فاهمها كويس و حيديك حقك غير باقى التوكيلات

قولى إنت بقى لو فى مكانى حتبقى مبسوط منها و لا لأ ؟؟

[chato_eg]

2- السبب التانى........و أه من السبب التانى

الميجان بأه مش عارف ليه بيبقى فيه بينها وبين صاحبها علاقة عشق وهيام و حب غريبة.....chemistry غير مبررة و ملهاش أى تفسير علمى.

اسمح لى يا أحمد باشا أرد على مسألة ال chemistry دى

سببها ببساطة إن فى ناس..تعبوا نفسهم حبيتن تلاتة...واشتغلوا بنفس و ضمير ....و كان الهدف يعملوا حاجة كويسة يفخروا بيها..سواء بقى باعت و لا ما باعتش....دى مش مشكلتهم...هما عملوا إللى عليهم
ولما عمله شغلهم أكيد كان فى دماغهم إنهم هما و أولادهم و عائلتهم هتستعمل المنتج ده...فلازم الناس تبقى مبسوطة و فخورة أوى و هما بيستعملوه...مش مجرد حاجة تجارية و استهلاكية مثلا تقضى بيها المشاوير و بعد كام سنة تقلبها و تجيب غيرها

علشان احنا نتبسط بيها يبقى أكيد مش صدفة إنها طلعت very well thought of ...أكيد فى واحد عملها بقلب و وجع دماغه و حاول 100 مرة لحد ما وصل للتركيبة المثالية...
مين النهاردة بيشتغل بالطريقة دى ؟؟؟؟
معظم السلع ..غالية أو رخيصة...بتلاقيها شبه بعضيها...الفروق مش كبيرة
موبايلات شبه بعضها
عربيات شبه بعضها
الهدوم نفس الشىء
النظارات...تلاقيها موضة واحدة فى كله
أنا بقيت حاسس إنى عايش فى عالم يجمع ما بين أسوأ ما فى الشيوعية ( عدم وجود تفرد للشخصية ) و الرأسمالية ( معاك قرش يساوى قرش و الدنيا غالية ) فى آن واحد

الحمد لله إنى عرفت أطلع بالعربية دى من الدنيا

[momo10000]

الوحوووووش خلصوا كل الكلااااااااااااام ....

والعبد لله ممكن يغني اغنية ( خلصت فيك كل الكلام) للميجان ( اغنية قديمة لعمرودياب )....

الاغنية دي توصف حكاية حب الوحووووووش للعربية دي ...

شكرا ...

[Ramy_Tantawi]

السلام عليكم .

انا طبعاً مش هاقدر اقول نص اللي تفضلوا اخوتي الوحوش وقالوه ......لكن هازيد القصيده بيت زي ما بيقولوا واتكلم عن حاجه بالنسبه لي انا شخصياً من اهم العوامل اللي أثرت في اختياري للميجان ووصلتني لدرجه اني مش شايف اي حاجه غيرها.

على فكره عاوز اقول حاجه بخصوص الامكانيات والمزايا......هي طبعاً مبهره ومتفوقه جداً جداً في الموضوع ده كا فئه سعريه ومستوى وكفاءه ...ولكن مش ده الابهار الحقيقي في الميجان ومالكي السياره دي حاسين الكلام ده .....المزايا المتعدده والتكنولوجيا المتطوره فيها اصبحت ونيس لقائد السياره ! فهي ليست زجاج كهربائي ولا باور ناعم ولا عزل فائق وثبات ......الكلام ده كله ممكن تشعر به في سيارات اخرى وبالتالي في نظري الشخصي مش هو ده الابداع في الميجان اللي سبب عشق كل من امتلكها .....الابداع هو انك تكون سايق عربيتك وحاسس انك مطمن....مش حاسس انها بنزين وفرامل وخلاص.....لما تبص لعداد السرعه ترتاح نفسياً والله دون مبالغه ..وتحس ان في حد جوه التابلوه قاعد جنبك ومراقب ليك كل حاجه شغاله في العربيه ....الدنيا مطرت !! تلاقي المساحات اشتغلت بهدوء ...العربيه سخنت !! تلاقي ونيسك اللي في التابلوه بيقولك...في باب مفتوح ! حد لعب في الهاند وانت سايق يقولك.....زيت الفتيس سخن يقولك....كل صغيره وكبيره في السياره مدروسه تفصيلاً واجمالاً ومعاك الونيس اللي بقول عليه قاعد جوه التابلوه شغلته انه يراقب كل حاجه في العربيه ويأمنك ويطمنك من أول ما تحط الكارت لغاية ما توصل بالسلامه وجهتك ...تودعك سيارتك الجميله بانها تطمئن على امن وسلامة محركها كله تمام خلاص ..please remove card . تشيل الكارت وتفتح بابك تلاقي الدنيا كلها نامت في العربيه .....الدركسيون يقفل والكهرباء تنقطع تماماً ولا كاسيت ناسيه ولا نور ناسيه ولا اي حاجه .....

طيب دي حاجه من الحاجات اللي مبهره في الميجان واعتقد انها سبب اساسي في عشق مالكي هذه التحفه بارك الله لنا واياكم فيها ان شاء الله.

في سبب تاني ماقدرش اقول شخصي لكن اقدر اقول اني عشته من اوله لآخره .....وهو حاجه كنت انا لغاية 5 سنوات ماضيه فقط غافل عنها تماماً وهي امان السياره ........ازاي تدفع فلوس في حاجه بتشتريها وانت مطمن على نفسك واسرتك طول ما هم بداخلها .
الخمس نجوم امان كانوا لي شخصياً مصدر فخر اني امتلك سياره واخده خمس نجوم ......الى ان شاء الله -عزوجل - اني اجرب الخمس نجوم دول واشوفهم في عز الظهر ....والله العظيم لا تقدر باي مال .....صحيح في الاول والاخر باقول دائما ان لسه تاريخ صلاحيتي ممتد وبالتالي نجيت من الحادث ده انا واسرتي لكن برضه هي كانت سبب مسبب لبقائي انا وافراد اسرتي الحمد لله سالمين....دي حاجه بقى خلتني لغاية دلوقتي متمسك وكلي امتنان للميجان لدرجة اني كررتها تاني اول ما ربنا قدرني !!!يعني باختصار هاكرر الجمله اللي الوحوش قالوها فوق......انا كلي رضى اني اشيل العربيه وقت وعكاتها الصحيه واغيرلها بطاريه واعملها كل اللي هي عاوزاه طالما هي واخده بالها كده مني وباقي السنه بتعمل اللي عليها وزياده .

وطبعاً الحق يقال دائرة الاعجاب اكتملت بالتوكيل المحترم اللي ماسك العربيه دي........بيهون على الواحد حاجات كتيير شعورك ان وراك حد فاهم احتياجاتك وفاهم في العربيه كويس وقادر يوصلك اي وقت وفي اي مكان خلال ساعه واحده بس ده يبقى توكيل محترم وسبب اساسي في انتماء الوحووش للميجان وتقديرها كل هذا التقدير.

تحياتي لحضرتك يا استاذ احمد ولباقي الوحووووش اكرمهم الله جميعاً ووفقهم.

[M.Moustafa]

عزيزى أبو مايا

العربية دى حكايتها حكاية

أولاً معظم المشاكل المذكورة كانت بتظهر فى بعض سيارات مو 2005 وقلما ظهرت فى 2006 ( بتكلم على مشاكل الكويل والبطارية طبعاً )

يعنى عندك زميلنا محمد مصطفى معاه 2006 و العربية عاملة معاه 90 ألف تقريباً و مغيرش حاجة......اللهم باركله و يجعل كلامنا خفيف :)

المهم أن أسباب المشاكل المذكورة فى التوبيك الخاص بالأعطال هتلاقيها تنحصر فى الأتى.....
1- مو 2005 اللى كان فيه مشاكل و تحديداً فى الكويلات والبطارية والجنوط...........و معظم المشاكل تم حلها فى مو 2006 ما عدا مشكلة الجنوط.
2- سوء أستخدام أو سوء عناية بالعربية.
3- جهل عدد من الناس من مالكيها بطبيعة التكنولوجيا اللى فى العربية ( يعنى فى ناس كانو بيقولو أنها بتطلع رسائل فجأه من غير أسباب عشان تجبرك أنك تروح التوكيل.....نظرية المؤامرة بس النسخة المصرية )
4- الأشاعات اللى بتطلع عليها ( الكارت بيملح و الكاوتش لو غيرته لازم تعمله set up فى التوكيل و الفتيس اللى بيبوظ على طول و تمنه فى التوكيل 60 ألف جم :) مع أنهم فى التوكيل بيدوا ضمان على الفتيس 100 ألف كم ) يا ريت تراجع الموضوع ده
ميجان 2: أنها حقاً سيارة محترمة
الموضوع مكنش محتاج أكتر من مكالمة تليفون للتوكيل.....
عموماً المشاكل اللى فى العربية اللى هى زى ما أتفقنا معظمها فى مو 2005.....أيه اللى يصبرنا عليها؟؟؟؟
سؤال وجيه من سعادتك.........و الأجابة
أنا مش عارف أبدأ بالسبب الأول ولا التانى حسب الأهمية لأن الأتنين عندى فى نفس الأهمية.....عموماً هنقول
1- معاملة التوكيل اللى معتقدش أنك ممكن تلاقيها فى مصر فى أى توكيل.....يعنى مثلاً أنا باظ عندى 2 كويل بعد ما العربية خرجت برة الضمان بحوالى سنة وشوية......مين يقول أن التوكيل يغيرهملى ببلاش.....يبعتولى واحد لحد عندى مع أن العربية بتمشى....ويغيرهم ببلاش...بالمناسبة تمنهم لو أنا رحت التوكيل أركبهم حوالى 1150 جم و لو بعتولى حد حوالى 1300 جم.
ده غير أن العربية طوال ال 4 سنين إلا شهرين معملتش معايا مواقف بايخة غير 3 أو 4 مرات من ضمنهم المرة دى و مرة للبطارية و مرة فيوز ضرب عشان البطارية أتهزت من مكانها و ضرب عشان ميعملش ماس كهربائى...يعنى منعت ضرر محقق للعربية. ( العربية عاملة معايا 88 ألف كم وشوية فكة )

2- السبب التانى........و أه من السبب التانى
مبدأياً أنا أمتلكت عربيتين قبلها BMW 320 مو 86 و أوبل فيكترا 97.....و طبعاً الألمانى مفيهوش كلام....صح ولا أيه ؟؟؟
الميجان بأه مش عارف ليه بيبقى فيه بينها وبين صاحبها علاقة عشق وهيام و حب غريبة.....chemistry غير مبررة و ملهاش أى تفسير علمى.

السببين دول كفيلين بالنسبالى أنى أتمسك بالعربية دى و أنا متقبل أنها ممكن تقف منى مرة فى السنة.....و فى نفس الوقت و أنا واثق أن فى ورايا توكيل ياكل الظلط :) ده غير طبعاً مساعدة الوحوش اللى بألف توكيل.
يمكن أنا أكون مختلف عن كثير من الناس فى الحتة دى بس.....هنعمل أيه...أنا كده :)
وفى نفس الوقت أنا مرضاش أو محبش أركب عربية توكيلها متعرفش تاخد منه حق ولا باطل....زى حال معظم التوكيلات فى مصرنا الحبيبة......يعنى بالعربي....أحب أكون مع توكيل أعرف أخد حقى منه فى البلد دى اللى الحقوق فيها كلنا عارفين مصيرها.......عن أنى أكون معايا عربية توكيلها معرفش أخد حقى منه.....حتى لو العربية ده مش معرضة للأعطال زى الميجان......بس مين عارف؟؟

أسف للأطالة بس أرجو أنى أكون وصلت وجهة نظرى.

العربية داخله ان شاء الله على 100 الف وهيكون ليها احتفالية خاصة لكل اللي يحب يشوف الميجان لما وصلت لل 100 الف مع الاهتمام بيبقى شكلها عامل ازاي

[chato_eg]

العربية داخله ان شاء الله على 100 الف وهيكون ليها احتفالية خاصة لكل اللي يحب يشوف الميجان لما وصلت لل 100 الف مع الاهتمام بيبقى شكلها عامل ازاي

بسم الله ما شاء الله...ربنا يبارك لك فيها كمان و كمان

[Sharky]

ربنا يبارك لك فيها يا محمد باشا

[M.Moustafa]

ربنا يخليكو يا شباب وزي ما قولتلكم ان شاء الله عربيتي هعمل احتفالية خاصة بعد صيانة ال 100 واي واحد من المنتدى حابب يجربها يجي ويقول ايه رائيه