حصر مبدئى لقطع غيار الداتشا نوفا وبدائلها الرخيصه

[hazemawad]

يا محسن ربنا يبارك لك على ذوقك ....
الواحد يقول اللى ليه واللى عليه و زميلنا بيسأل النصيحه ومش هانضله ولازم ندله على الصح

[Diablo]

صاجها واكصدامتها وفوانيسها بيتباعو فين؟

[mohsen128]

اعرف الفوانيس والاشارات بتتباع عند البساطي او في التوفيقة عند محسن ومدحت وكمان في مجري العيون عند ارزاق ومحل تانى بردو في مجري العيون مش متذكر اسمه ، ياريت لو حد يعرف من الاخوة يدخل ويشارك

[Ayman Elshimy]

داتشاوى جديد

أ/ حازم ممكن رقم موبايل حضرتك حابب اسألك سؤال عن الداشتا ومتقوليش قول على المنتدى

[ايهاب رستم]

السلام عليكم انا باغه الاشارات من التوفقيه من عند محل شغال فى جميع باغات السيارت عنده مصنع لتصنيعهم بى 25 الخلفى

[مصطفى الحاكم]

عشان افادة ملاك الداتشيا الغلابه اللى زى حالاتنا اللى بتوع قطع الغيار واخدينا سبعات فى تمنيات فى مقصات ولا حد بيقول لهم بتعملوا ايه وكلكوا عارفين طبعا ان كلمة السر عندهم داتشا نوفا قولها انت بس وهما عنيهم هاتلمع من الطمع والتاجر الجشع الصغير اللى جواهم هايصحى ويسن سنانه....
قولت اجمع شوية المعلومات اللى عندى على اللى عند زمايلنا فى المنتدى على المعلومات اللى حصلت عليها من المهندس طارق بتاع الاسكندريه واسردها كالاتى :
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــ
*_* الماتور بكامله من الالف للياء ماتور رينو 12.... يعنى لما تحتاج حاجه للماتور قول 12 ولا تقل نوفا .
*_* العفشه بكاملها عفشة ال 9
*_* الاسكاترا بكاملها رينو 19
*_* الفتيس هوه بقى اختراع الداتشا نوفا على اساس ال9 فنيا ولكن بقطع غيار مش هاتلاقيها غير فى الداتشا فقط ( وده انا تأكدت منه بعد الفك المتكرر والمرير للفتيس زى ما حضراتكم عارفين ومتابعين قد ايه كان طالع عينى ) وبعد مقارنته ب كتالوج الصيانه بتاع ال 9....
*_* الماستر بتاع الفرامل بتاع ال 9
*_* السيرفو بتاع ال128 زى مانتو عارفين
*_* ماستر الفرامل اللى ورا بتاع الشاهين
*_* التيل امامى بتاع الريجاتا 86 بس بتعديل بسيط بالصاروخ لاما فى التيل او فى منيمه فى الماستر
*_* طقم اصلاح الماستر الامامى بالكامل بتاع البيجو 504 وبتلاته تعريفه ولا الحوجه
*_* المروحتين بتوع الريدياتير اللى بيشتكى منهم شيل امهم وركب مروحه كبيره استيراد ب 125 بالقميص بتعها مع قص حته صغيره للزور النحاس بتاع الريدياتير من اعلى بس تركب كتاوت نور ايطالى او تركى ب 25 لمرحلتين المروحه مع الترموستات بتاعنا اللى برضه مرحلتين....
*_* كشافات النور الامامى بتوع الكيا برايد و عن تجربه الزملاء
*_* الاسطوانه موجوده فى اليابانى مع مس بسيط بالمبرد المثلث على السنون بتاعة الاسطوانه
*_*الديسك بتاع ال128 بالسوسته الواطيه مقاس 18

ويا جماعه بعد اذنكم جميعا عدم الاكتفاء بالمشاهده والقراءه بل يجب التفاعل بتبادل الخبرات لانكم كده بتمنعوا الناس اللى معندهاش الخبرة او المعرفه من الاستفاده ....

فياريت كل اللى واجهته مشكله وحلها او قطعة غيار مش موجوده و اتصرف ولاقاها فى انواع تانيه يكتب ويقول على المنتدى وماتخافوش المنتدى مابيعضش والله ولا فيه حد عندنا بيتريق او بيقل ادبه والحمد لله الناس كلها هنا محترمه سواء بتوع الداتشا نوفا او من الصفحات التانيه ....

وياريت تشرفونا بالسؤال او الاستفسار وياريت الكل يرد باللى ربنا يقدره عليه

ودمتم جميعكم بالخير......

[مصطفى الحاكم]

السلام عليكم
بشكر الاستاذ حازم على المجهود المبذول على قطع الغيار بصراحة الواحد كان تايهة في العربية دى وندمت انى اشتريتها
كنت بستفسر من حضرتك عايز اجيب مكنة جديدة اسقطها مكان اللى عندى عايز اعرف منين وبكام ونوع المكنة اية رينو لوجان ٩ او ١٢ او شورت بلوك وعند مين استيراد وهل هتنفع عندى ولا لا
بجد انا عايز اشكر كل القائمين على المنتدى بصراحة تناول المواضيع قمة في الرقي والاستفادة من اول ما فكرت اشترى عربية لحد دلوقتى كل حاجة بسال عنها بلاقيها بالتفصيل والاخوة الافاضل مش بيبخلوا على حد بمعلومة كل الشكر والتقدير
انا اشتريت عربية رينو داتشيا نوفا موديل 97
بصراحة مطلعة عينى كل شوية تظهر حاجة جديدة عايزة تتغير واخيرا المكنة محتاجة طقم شنبر والميكانيكى بيقولى لا ينفع او تحتاج تغير مكنة جديدة
ارجو من السادة الاعضاء الرد ضرورى وجزاكم الله كل خير