تعالوا نضحك شوية على البلاوى اللى بنعملها فى لوجى

[amr.elsayed]

كيف حالكم جميعا ويا رب نكون كلنا بخير
الموضوع دة للناس الجريئة واللى بتحب تعترف على نفسها زى حلاتى كدة
يعنى كل واحد فينا يقول على البلاوى اللى عملها فى لوجى سواء اهمال ومعاملة قاسية واكيد حنستفاد من المواقف دى
وطبعا هبدأ بنفسى وممنوع الضرب
البلوة الاولى :-
اخوكوا فى الله مدخن ( ربنا يتوب عليا منها ) فى يوم من الايام راكب العربية وكنت مجهد اليوم دة
وقاعد على كرسى السواق ومنتظر واحد من صحابى وماسك الزفتة السيجارة وحاطط ايدى فوق راسى
و بتمطع ولا اكنى طالع من شالية فى شرم الشيخ ... ابص فوقي الاقى السيجارة عمالة تحرق فى سقف العربية البيج عاااااااااا فضلت باصص للحرقة فى السقف وكان هاين عليا ارمى نفسى فى البحر .
محدش يشتم
البلوة التانية :-
كان يوم خميس بعد شراء لوجى بكام يوم وقابلت صحابى المقاطيع بالليل بعد ما كل واحد خلص شغله
والليلة عيد بقى ونازلين بقى راكبين لوجى الجديدة والنهاردة الفسحة على لوجى
طير يا عم على البحر علشان نطلع على بحرى و الشيخ وفيق نبدأ اليوم
وعينكوا ما تشوف الا النور ماشى بسرعة شوية والمفروض انى حاخد اليوتيرن الجاى
والدنيا كانت ضلمة ومش شايف اليوتيرن كويس وهووووووووب الاقى نفسى جوة اليوتيرن
على سرعة غير مناسبة ليوتيرن خااااالص رحت شادد تكتين فرامل يد راحت العربية معرضة
ولا اجدعها رالى وانا ميت من الخوف على العربية وركبى بتخبط فى بعضها لانى كنت خلاص على وشك
البس فى الرصيف بتاع اليوتيرن وشوية المقاطيع فاكرنى بخمس فى اليوتيرن احتفالا بالعربية الجديدة
هههههههه واللى يقولك يا جامد يا عمورة والللى يقولك العب عالامريكانى ... ميعرفوش الخيبة
اوعى حد يسيحلى احسن اجى ابيع العربية تبقى فضايح برة وجوة بدل فبريقة برة وجوة
البلوة التالتة :-
فى يوم من ذات الايام كالعادة اشتريت معطر للعربية من بتاع التكييف وكان كويس فا خلص
روحت اشترى واحد تانى بس مالقيتش النوع اللى انا كنت جايبه قولت مش حتفرق كلها روائح حلوة
المهم فك يا عم العلبة ركب المشبك فى الهواية مش راضى يركب .. يمين شمال مافيش فايدة .. اتارى المشبك بتاعه مش مناسب لهواية تكييف اللوجان
رينجو يتهد ويسيبوا وهو حيطلع ريحة لوحده طبعا لأ انا راسى والف سيف لازم الزقه فى هواية التكييف
وعمال ادور على اى حاجة فى درج العربية ولاقيت المشبك بتاع المعطر القديم وكان راكب كويس مع فتحة التكييف
بس المشكلة ان مكان المشبك واسع فى المعطر الجديد .. رينجو ينهد ابدا .. روحت جايب امبوبة امير
الزق يا عم المشبك فى المعطر الجديد .. الله اكبر نجحت العملية هييييييية ركبت وثابتة وزى الفل
بص بقى يا عم رينجو حواليك هههههههه ازازة الامير كنت ماسكها بالشقلوب وانا بركب المعطر
ومش حتكلم واقول حصل ايه تخيلوا انتوا بقى ومش عايز شتيمة ... امسح يمين امسح شمال لحد ما صوابعى لزقت فى بعضيها زى التحية العسكرية بالظبط ولحد دلوقتى فى نقطة على الكونسول
كل ما شوفها افضل اضحك على اليوم دة
البلوة الرابعة :-
فى يوم من ذات الايام نازل من الشغل وكنت خارج بعد الشغل مش مروح والعربية كانت متربة
طبعا ازاى وازاى العربية متربة زى ما يكون لو ما شيت بيها متربة التيل حيقفش ولا الماتور حيجيب وش سلندر
اسحب يا عم الريشة بتاعت التراب وهوووووب الدراع بتاعها يتكسر قولت مش مهم حنضفها يعنى حنضفها
ارمى يا عم دراع الريشة وامسكها من حتة الحديدة اللى بتمسك فى الدراع وفى منتهي الانشكاح
اسمع خيييييييييييييييييييييك اه يانى يا قلبى يانة ياما .. الحديدة عملت بشلة للعربية ولا اجدعها عيل ماشى
بمسمار يعلم على العربيات لا وايه بايدى قمة الذل
.................................................. ...................

طبعا المواقف دى الواحد بيتعلم منها وساعتها الواحد بيبقى عايز يعيط
بس بعد فترة بتبقى مواقف مضحكة
هااااا مين حيكون جرئ ويدخل على كرسى الاعتراف ويحكى البلاوى اللى عملها .... قر واعترف

[wassim_nasser]

والله العربية دي بتصعب عليا من المعاملة الوحشة بس طبعا مش للمراحل بتاعتك دي خالص .. العربية دي أول عربية ليا و أول عربية اسوقها ف حياتى من بعد ماتعلمت علي 124 .. وطبعا زي أي واحد لسه بيتعلم خد عندك تبطيل كتير عشان لسه رجلك ماظبطتش ع الدبرياج و قابل مطبات بالليل وبالذات الزراعي بتاع اسيوط - سوهاج كنت باكل مطبات غبية علي 40 و 50 كم/ساعة .. بس الحمدلله دلوقتي احسن .. الزغلول الكبير كان ف الصحراوى ف مدخل المنيا فيه حته فيها ملف حاد جدا والاسفلت مش مظبوط جيت بالف بسرعه وأتوبيس جاي ف المقابل راح حدف عليا .. إضطريت انا كمان أضيق لفتى رحت لقيت الدركسيون جاب أخره و العربية مشيت علي عجلتين وراحت لفت حوالين نفسها وطلعت بره الطريق .. طبعا لو كنت دوست فرامل رجل ولا شديت الهاندبريك كانت زمانها اتقلبت .. غير كده الغباوة بتاعت كل يوم .. نقر وحفر خدها ع السريع وسلملي ع المساعدين .. بس انا عربيتى بنت ناس مش دايره ف الشوارع عمال علي بطال يادوب عامله 5000

[gebreel]

ههههههههههههههههههههههههههههه احب انا الفضايح دي =)))

كملوا كملوا

[amr.elsayed]

الحفر سهلة بس خلى بالك من المطبات يا وسيم احسن دى مؤزية اوى وربنا يستر طريقك
انا بقى عندى لعبة حلوة اوى اسمها لعبة البلاعات ... يا بقى لعبة البلاعات دى ؟؟؟؟
عندنا فى اسكندرية على البحر من اول ميامى لحد المندرة الحارة الشمال بيكون فيها بلاعتين كل 100 متر
وطبعا احنا عارفين هما لية عاملينهم اتنين علشان لو فاديت واحدة تلبس التانية وهنا بقى التحدى
انا بقى امسك الحارة دى واللعبة هى انك تعدى البلاعتين فى كل مرة من غير ما تقع فى واحدة منهم
ولو وقعت فى واحدة يبقى 1/0 للحكومة ... لو وقعت فى الاتنين يبقى 2/0 للحكومة والعكس تحسب النقط ليك
ههههههههههه السواقة فى مصر حتجننى

[AbO_FaRaH]

من كم يوم الود بيدو ابنى كان خارج معايا وكان قعد فى على الكنبه...المهم

الود بيدو بيحب يعقد قام ويربط الحزم....بس انا اليوم ده غلست عليه وخلته قعد على الكنبه

مشيت...مشيت وبيدو لا بيعيط كالعاده ولا بيعمل اى صوت...ابص عليه فى المرايا الود زى الملاك

قالت اكيد فيه حاجه مش طبيعه....لانه ابنى وانا عارفه

وصلت المكان ونزلت عشان اخده معايا ......

لقيت البيه........كان عمل يحفر فى مسند الكرسى الامامى يمين...

الحمد لله لحقت المسند على اخر لحظه

[mabdelaziz]

أول يوم لى مع لوجى كان حكاية, 26 يناير 2011.
عربيتى القديمة كانت لادا, وطبعاً هناك فرق شاسع, المهم كنت مرعوب أصلاً كأنى أول مرة أسوق رغم إن وقتها كنت بقالى سنتين باسوق.
العربية كانت موجودة فى المخزن مش فى المعرض, عشان القلق اللى كان موجود فى الوقت ده طبعاً, وكنت واخد معايا اخواتى الاتنين عشان يبصوا معايا عليها, رحنا احنا ال 3 والمندوب بتاع المعرض معانا عشان نستلمها من المخزن, استلمنا وخلصنا وسلمونى المفتاح عشان أسوق العربية لحد المعرض عشان نخلص باقى الإجراءات, وأنا خايف ومرعوب ولسه مش متعود على العربية, وعمال اتحايل على المندوب يسوقها هو لغاية المعرض عشان خايف أعمل فيها حاجة, المهم قعدوا كلهم يشجعونى, توكلت على الله ودورت وطلعت على الطريق مش عاوز أزود عن التانى, والعربيات ماشية ورايا شغالين كلاكسات وأنا ولا كأنى سامع حاجة, وأخدتها واحدة واحدة لغاية ما وصلنا المعرض.

خلصنا الإجراءات وواخدين لوجى ومروحين, أخويا الكبير بيته فى السكة, قلت أوصله, فى الطريق لبيته فى مزلقان بس مكسر خالص, دخلت على المزلقان وماشى بالراحة عشان لوجى بقى لسه جديدة وكده, العربية وقفت على سكة القطر من الحفر وأنا مش ظابط رجلى على البنزين كويس, كل ما جى أدوس بنزين وصوت الموتور يعلى أخاف وأرجع أسيب, وكذا مرة تبطل منى, والوضع بقى خطير جداً لأن الجرس بتاع المزلقان ابتدى يرن عشان فى قطر جاى, وأنا عمال أقلق بزيادة وأعصابى تبوظ بزيادة, قلت أرجع ورا طيب على مالقطر يعدى, لقيت ورايا تريلا لازقة فى مباشرة وشغال كلاكسات لما بقى شكلى زبالة, إخواتى نزلوا يزقوا العربية وأنا برضه مش عارف أطلع بيها من المزنق ده.
ربنا كرمنى بواحد معاه ملاكى معدى من جنبنا وشايف الموقف الزبالة ده قام راكن عربيته قدام وقال ماتخافش أنا معايا عربية زياه سيبهالى وأنا أطلعهالك, ماصدقت بصراحة وقمت نازل وسبته طلعها...
بس طبعاً بعد ماكنت استحميت من العرق ومابقاش عندى أعصاب أصلاً.
شكرت الراجل الذوق ده , وكملنا وصلت أخويا وبعدين أخويا التانى كمل معايا, وروحت فسحت العيال وأمهم شوية بالعربية الجديدة, وده كان أول يوم لى مع لوجى حبيبتى.

ومن يومها وأنا كل ما أعدى على مزلقان أقطر أفتكر الموقف ده وأقعد أضحك مع نفسى على نفسى.

[blackhorse123]

اخوانى السلام عليكم
لوجان 2012 هاف اوبشن اول عربيه اركبها الحمد لله جبتها من ثلاثه شهور عملت لحد دلوقتى 10 الاف كيلو ( 10000) كيلو ..............ما تستغربوش

العربيه انا جبتها علشان طبيعه شغلى التى تتطلب سفر كثير
العربيه بتسافر من اسيوط الى قنا والاقصر والغردقه واسوان

اسبوعيا والعربيه ما شاء الله ما تقولش لا
جربتها على الطريق السريع العربيه تحفه ثبات غير عادى وتوازن على الطريق الملفات بتاخدها بسلاسه جدا
اقصى سرعه للعربيه 170 كيلو متر فى الساعه اقتصاديه فى البنزين جدا حتى لو انت ماشى على سرعه اكتر من 120 كيلو متر فى الساعه
الصراحه العربيه شبعت معايا مطبات كذا مره اخد مطب على سرعه 100 كيلو متر فى الساعه من شده المطب انا طرت فى الهوا ونزلت تانى بالعربيه .......... بس الحمد لله ربنا ستر
بجد فعلا عربيه ممتازه بس انا كان نفسى فى الفول ابشن بتاعتها بس مش مهم الحمد لله على كده
تانك البنزين بتاع العربيه ياجماعه 60 لتر وانا متاكد من كده مش 50 لتر
بس عندى سؤال ليه مش كل اللمبات اللى فى تابلوه العربيه اللى عند العدادت مش شغاله فى الهاف اوبشن اشمعنى فى الفول اوبشن بس مع انى العدادات الى حد ما واحد

[amr.elsayed]

البلوة الخامسة :-
يا دى التبطيل بس انت كانت مرعبة علشان على مزلقان انا بقى الموقف كان محرج جدا ازاااى اقولك يا سيدى
روحت استلم العربية من معرض سان ستيفانو ويدوبك طلعت بالعربية وماشيت شوية جنب شريط الترام ووقفت
فى اشارة شارع الاقبال لأ وايه كنت اول عربية فى الصف هوب الاشارة فتحت يالا يا لوجى لوجى نايمة
دور لوجى واطلعى يا لوجى ... لوجى تموت فى مكانها يخربيت كدة هههههههههه الاشارة قفلت
وانا مش عارف اطلع بالعربية وسطر عربيات طوييييييييل وراية
بس سيبك انت بقى الاشارة فتحت وروحت فارك وطالع .... صايع صايع يعنى ههههههههههههه

[akerima]

حكايتي مع لوجي تبتدي سنة 2010 شهر 6 تحديدا وكان اول موقف ليها معايا كنت مستلم من عند الطارق في ستي سنتر وفرحان وفي قمة سعادتي وكان يوم صيف رخم - انا اخت بالي ان لمبة البنزين منورة بس بصراحة من متعتي في السواقة مفكرتش حتي ادخل اي محطة بنزين من اللي علي الطرق

كنت ساعتها رايح سموحة لان شغلي هناك ومشغل التكييف بقي وعايش وفجاه !!!!!!!!!!!!!!!!!

العربية تبطل يانهاااااااااار كده من اول يوم - من اول يوم ايه من اول ساعة احني ابتدينا اليوم دا كانت درجة الحرارة 40 مثلا والشمس حارقة ووقفت فين قدام جرين بلازا ناحية شارع النصر وبالصدفة عشان اليوم يكمل لقيت ونش المرور في ضهري

واقف هنا ليه ؟؟؟ العربية بطلت قطعت بنزين وزي ما انت شايف لسة مستلمها حالا حتي لسة عليها لصقها ونمر تجاري

طيب يا ريت تتصرف او تزفها بعيد عن الشارع (ظابط المرور) - طيب اوديها فين ؟؟؟ معرفش اتصرف (دا برضة الظابط)

يعني اشيلها علي كتفي واجري بيها؟؟؟؟؟؟؟؟؟ دا طبعا في عقلي الباطني

طيب حاضر حكلم حد يجيبلي بنزين

المهم كلمت واحد صاحبي والحمد لله كان قريب مني جابلي بنزين في ازازة بيبسي بلاستك ودا اللي عامل المحطة رضي يدهولة ساعتها - بعدها رحت فولت اللوجي ومن ساعتها ولله الحمد عمري ما استنيت عليها لغاية ما علامة البنزين تنزل ل اتنين

المرة الجاية ححكلكوا اول خبطة للوجي واللي عملتة ساعتها

[akerima]

حكايتي مع لوجي تبتدي سنة 2010 شهر 6 تحديدا وكان اول موقف ليها معايا كنت مستلم من عند الطارق في ستي سنتر وفرحان وفي قمة سعادتي وكان يوم صيف رخم - انا اخت بالي ان لمبة البنزين منورة بس بصراحة من متعتي في السواقة مفكرتش حتي ادخل اي محطة بنزين من اللي علي الطرق

كنت ساعتها رايح سموحة لان شغلي هناك ومشغل التكييف بقي وعايش وفجاه !!!!!!!!!!!!!!!!!

العربية تبطل يانهاااااااااار كده من اول يوم - من اول يوم ايه من اول ساعة احني ابتدينا اليوم دا كانت درجة الحرارة 40 مثلا والشمس حارقة ووقفت فين قدام جرين بلازا ناحية شارع النصر وبالصدفة عشان اليوم يكمل لقيت ونش المرور في ضهري

واقف هنا ليه ؟؟؟ العربية بطلت قطعت بنزين وزي ما انت شايف لسة مستلمها حالا حتي لسة عليها لصقها ونمر تجاري

طيب يا ريت تتصرف او تزفها بعيد عن الشارع (ظابط المرور) - طيب اوديها فين ؟؟؟ معرفش اتصرف (دا برضة الظابط)

يعني اشيلها علي كتفي واجري بيها؟؟؟؟؟؟؟؟؟ دا طبعا في عقلي الباطني

طيب حاضر حكلم حد يجيبلي بنزين

المهم كلمت واحد صاحبي والحمد لله كان قريب مني جابلي بنزين في ازازة بيبسي بلاستك ودا اللي عامل المحطة رضي يدهولة ساعتها - بعدها رحت فولت اللوجي ومن ساعتها ولله الحمد عمري ما استنيت عليها لغاية ما علامة البنزين تنزل ل اتنين

المرة الجاية ححكلكوا اول خبطة للوجي واللي عملتة ساعتها

[tamer61]

إيه يا عم رينجو كل ده ... دا إنت تاخد الأوسكار في بهدلة لوجي و بجداره كمان ..... دا كل إللي أنا فاكره كان مطب صناعي أكلته على سرعه عاليه وده كان فرط حماس مع عمى ليلي و قليل من المنظره لأني كنت واخد غرزه ولقيته قدامي بس ربنا ستر بس الهبده كانت شديده .

[amr.elsayed]

اوسكار بس طب ححكيلك على بلوة تانية علشان خاطر تامورة حبيب الملايين
البلوة السادسة :-
فى يوم خميس وراجع متاخر من السهر مع اصحابى والدنيا هس هس ومش لاقى راكنة عند البيت
فين وفين لاقيت راكنة صغيرة يدوب على اد العربية فى شارع جانبى والدنيا ضلمة ... المهم يمين شمال ركنت فيها وانزل من العربية
الاقى العربية طالعة برة شوية صغيرة ... اتهد بقى انا واحمد ربنا واطلع بيتنا .. لأ .. دور يا عم تانى وحضن شوية على الرصيف
ويدوب بعدل نفسى للامام شوية وسمعت خييييييك اتارى فى طوبة مش شايفها امام العربية والاكصدام اتحك فيها من تحت
المهم نزلت باصيت على العربية والحمد لله جت سليمة .. المشكلة بقى فيه ايه ... طلعلى راجل من شباك العمارة فى الدور الارضى اللى جنب الركنة ودار بينى وبينه الحوار دة

الراجل بصوت جاهورى :.... ايه اللى انت عاملته دة ؟؟؟؟؟ !!!!
انا :.... حصل خير يا حج والحمد لله العربية سليمة
الراجل :... العربية سليمة !!!!!!!! انت ازاى يا استاذ تخبط الطوبة بتاعتى !!!!
انا :.... طوبة ايه ...... لا يا حج انت فاهم غلط العربية هى اللى اتخبطت فى الطوبة وانا مش شايفها
الراجل ما سكتش ونزلى فى الشارع وعينه بتطلع نار :...
انت خبطت الطوبة بتاعتى وعايز تشيلها بالعربية وازاى ومش ازاى .... زى ما يكون خبطت فى السرير بتاعه مثلا
وانا اصلا مزبهل ومش فاهم يعنى ايه خبطت الطوبة بتاعتى ..... وفضل على كدة وانا اخده على اد عقله .. يا حج حقك عليا ما تزعلش
لحد ما بقيت عمال اطبطب على الطوبة واقولها ما تزعليش يا طوبة حقك عليا
وعمال اقوله تحب اوديها المستشفى احسن تكون اتعورت ههههههههه
فين وفين بقى لما راجل كبير طلع من بلكونة فى العمارة وراح داخل فيه شمال علشان ينهد ويسكت
والله حاجة تجننن ... الناس دماغها ضربت .. وانا خلاص صواميل عقلى فكت

[mohamed1979]

اللوجان و الحمد لله اكتر عربيه مرمطها فى حياتى
طلوع على الأرصفه ماشى
لبست مطبات بالهبل بيها و على سرعات عاليه كمان
فى يوم زحام رهيب عند نادى 6 اكتوبر فى اتجاه ميدان المطريه مشيت حوالى 300 م بيها على حصى و قطبان المترو و لا اجدعها عربيه 4 × 4
مياه و طرق مدقات و خلافه من طرق المحروسه و نجوعها و القرى فى الأرياف و الصعيد مفيش اى مشكله
سواقتى بيها على طرق السفر سرعات معظمها فوق ال 140
و ما شاء الله العربيه ادئها فوق الممتاز و ربنا يبارك فيها

[tamer61]

اوسكار بس طب ححكيلك على بلوة تانية علشان خاطر تامورة حبيب الملايين
البلوة السادسة :-
فى يوم خميس وراجع متاخر من السهر مع اصحابى والدنيا هس هس ومش لاقى راكنة عند البيت
فين وفين لاقيت راكنة صغيرة يدوب على اد العربية فى شارع جانبى والدنيا ضلمة ... المهم يمين شمال ركنت فيها وانزل من العربية
الاقى العربية طالعة برة شوية صغيرة ... اتهد بقى انا واحمد ربنا واطلع بيتنا .. لأ .. دور يا عم تانى وحضن شوية على الرصيف
ويدوب بعدل نفسى للامام شوية وسمعت خييييييك اتارى فى طوبة مش شايفها امام العربية والاكصدام اتحك فيها من تحت
المهم نزلت باصيت على العربية والحمد لله جت سليمة .. المشكلة بقى فيه ايه ... طلعلى راجل من شباك العمارة فى الدور الارضى اللى جنب الركنة ودار بينى وبينه الحوار دة

الراجل بصوت جاهورى :.... ايه اللى انت عاملته دة ؟؟؟؟؟ !!!!
انا :.... حصل خير يا حج والحمد لله العربية سليمة
الراجل :... العربية سليمة !!!!!!!! انت ازاى يا استاذ تخبط الطوبة بتاعتى !!!!
انا :.... طوبة ايه ...... لا يا حج انت فاهم غلط العربية هى اللى اتخبطت فى الطوبة وانا مش شايفها
الراجل ما سكتش ونزلى فى الشارع وعينه بتطلع نار :...
انت خبطت الطوبة بتاعتى وعايز تشيلها بالعربية وازاى ومش ازاى .... زى ما يكون خبطت فى السرير بتاعه مثلا
وانا اصلا مزبهل ومش فاهم يعنى ايه خبطت الطوبة بتاعتى ..... وفضل على كدة وانا اخده على اد عقله .. يا حج حقك عليا ما تزعلش
لحد ما بقيت عمال اطبطب على الطوبة واقولها ما تزعليش يا طوبة حقك عليا
وعمال اقوله تحب اوديها المستشفى احسن تكون اتعورت ههههههههه
فين وفين بقى لما راجل كبير طلع من بلكونة فى العمارة وراح داخل فيه شمال علشان ينهد ويسكت
والله حاجة تجننن ... الناس دماغها ضربت .. وانا خلاص صواميل عقلى فكت

المهم يا عمرو الطوبه سليمه ولا حصل لها حاجه ..... إنت بتتكلم جد إن الراجل نزل من بيته يتخانق معاك علشان طوبه .... يا ليله كحلي ... دا أنا حتجنن خلاص

[amr.elsayed]

المهم يا عمرو الطوبه سليمه ولا حصل لها حاجه ..... إنت بتتكلم جد إن الراجل نزل من بيته يتخانق معاك علشان طوبه .... يا ليله كحلي ... دا أنا حتجنن خلاص

يا تامر انت لو تشوف المربع عندى (اللى انا ساكن فيه ) بقى عامل ازاى بعد الثورة هتفهم كل حاجة وحتفهم ليه الراجل مش مستحمل
ان اى حد يتعرض له حتى لو حيتعرض لحتة طوبة ولا تسوى.. باختصار المربع بتاعى دة تحول الى حصن تروادة
كل واحد حاطت طوب فى الركنة بتاعته وكل واحد حاطت حديد حديد حديد امام بيته
فا الراجل بيدافع عن الطوبة على انها احد ممتلكاته وان فى واحد بيتعدى عليها (على حسب تفكيره)
وبالتالى هو بيضرب على يد من حديد على اى حد يتعرض لها وعايز يسمع الناس كمان علشان مافيش حد يفكر
يهوب جنب الطوبة بتاعته
.....................
انا مشكلتى انى مش عايز اعمل حديد امام بيتى علشان انا شايف ان دى قلة ادب وتعدى على الممتلكات العامة
وحاخد حاجة مش من حقى ... فا انا رافض المبدأ دة خالص حتى لو كل الناس عملته مع انى سهل عليا ادى البواب 100 جنيه واقوله اعملى ركنة امام البيت
وساعتها حيعملى جراج مش راكنة .. بس مش راضى وعمال اقول اكيد الدنيا حتتصلح وحتبقى احسن من الاول
بالذات لما يعملوا المحليات ... بالاضافة انى مش قاعد كتير فى مصر ان شاء الله فالواحد عايز يطلع منها محترم على اد ما يقدر
وربنا يصلح حالنا جميعا