طرق النصب الجديدة من التوكيل

[Elmokadim]

السلام عليكم ورحمة الله وبركاته

الموضوع بإختصار جدا

انا معايا لوجان اوتو عاملة 15 الف كيلو

ورحت صيانة الـ 15 الف في العامرية لانه قريب ليا عن العبور لاني من دمياط

العربية دخلت بعد حوالي ساعة المهندس جالي قالي العربية عايزة تيل فرامل والتيل اللي فيها مش هيرجعك دمياط

دا اخره 200 كيلو

قولتله حضرتك العربية عاملة 15 الف بس ازاي التيل خلص
قالي دا طبيعي دي عربية اوتو والظاهر ان رجلك تقيلة علي الفرامل
وفي عربيات بنغير ليها التيل كل 10 الاف

قولتله ودا هيتغير بكام قالي ب 365 جنيه

رغم ان هنا في القسم قالو سعره 320 قولت يمكن زاد

قولتله غيره

ولما رجعت البيت وريت التيل لاخويا الكبير

قالي هما غيرو التيل لك ليه دا لسة فيه بدري

قولتله ازاي ؟

قالي زي ما بقولك

دخلت علي النت وقعت ادور علي شكل التيل وهو جديد

ودي كانت النتيجة

صورة تيل عادي جدا جديد


ودي صور التيل القديم بتاعي







هل معدل تأكل التيل طبيعي ولا كتير علي 15 الف كيلو ؟

وهل كدة التيل خلص بالفعل ويمكن انا اللي مش فاهم ولا لسة فيه زي ما اخويا قالي ؟

وفي النهاية ايه رآي حضارتكم في الموضوع دا ؟

وهل التيل ليه عمر افتراضي ولا ينفع استخدمه مرة تانية ؟

[hossam_elwani]

فعلا لسه فيه كتير ....بيعملو شغل زى الصنايعيه

[dr.hazem]

ده لسا فيه عالاقل من 4الى7آلاف كيلو...
تحياتي

Sent from my SE Arc S using Forum Runner

[AlGazar2]

التيل لسه فيه و مش فاهم ازاى تيل اصلى يقعد 15 الف فى الكورى الاصلى بيقعد حوالى 40:50 الف تقريبا مانيوال قول دى عشان اوتو يقعد 30 مثلا الا لو التوكيل بيسترخص تيل عشان الناس تغيره كل شويه و يبقى هو الكسبان كل 10 15 الف يغير تيل ياخد ضعف تمنه و مصنعيه تركيب قد كده و ملوش دعوه بحاجة تانية

[Land_Cruiser]

هل يا ترى حضرتك كنت حاسس بأى مشاكل من الفرامل؟ يعنى اشتكيت مثلا ان البدال بتاع الفرامل نزل تحت شويه او أداء الفرامل اتغير يعنى بقى اسوأ او كنت بتسمع صوت صفاره جايه منه و لا مكنش فى اى مشكله من الفرامل خالص؟

[Elmokadim]

مكنش في اي مشكلة في الفرامل والفرامة كانت كويسة جدا ولما كنت بمسك فرامك كان الكوتش بقف تماما

بس هو قعد يقولي الطنابير والتيل دا مش هيكمل 200 كيلو وزي ما انتم شايفين التيل قدامكم اهوه

يعني الحل مع الناس دي ايه التيل لسة في اكتر من نصه تقريبا

يعني دا مش حرام ؟

[Chemist 07]

معلش، اديك بتتعلم
بس فعلا الواحد لازم يقلب كلام بتوع التوكيل في دماغه، ويطابقه علي حالة العربية، لانه شكل معظم التوكيلات في مصر فيها اشتغالات

[Porsche911TT]

للأسف لسه فيه ولا 20 ألف كمان
بص الفرق بين الجديد والمتاكل

[sor2]http://www.mdxers.org/forums/attachments/problems/34641d1146779181-when-replace-brake-pads-dscn2834.jpg[/sor2]

[Egyzizo]

وكمان من جرأتهم ماعندهمش مانع يدوا للعميل جسم الجريمة ودليل إدانتهم ..
معلش ، أنا لو مكان حضرتك هابعت شكوى بالصور لشركة رينو
وهاخطف رجلى ومعايا التيل القديم للمركز ده وأقابل الراس كبيرة فيه وأقدم شكوى بالدليل.

[hesham ahmed]

تبا للسرقه العلني بجد ... التيل لسه فيه كتير
هو ملقاش حاجه في العربيه ما شاء الله عليها
قال يعورك في اي حاجه و خلاص

[dr.hazem]

وكمان من جرأتهم ماعندهمش مانع يدوا للعميل جسم الجريمة ودليل إدانتهم ..
معلش ، أنا لو مكان حضرتك هابعت شكوى بالصور لشركة رينو
وهاخطف رجلى ومعايا التيل القديم للمركز ده وأقابل الراس كبيرة فيه وأقدم شكوى بالدليل.

المفروض فعلا تقدم شكوى ولجهاز حماية المستهلك كمان لان انت وقعت ضحية أمام كلام التوكيل اللي قالك حاجة مش صحيحة اطلاقا والاثبات معاك....
دنا جايب لعربية اخويا تيل صيني وبنشد ونجري واوتو والتيل مكمل 25 ألف لحد دلوقتي ولسه فيه....
ايه الهم ده...

Sent from my SE Arc S using Forum Runner

[sanhory]

يا باشا ولا شكوي و لا غيره كويس انهم ادولك التيل القديم شيله في مكان كويس و ابقى ركبه تاني لما اللي فيها يخلص خالص و بكده تبقى استفدت برضه بيه و مرمتش الفلوس في الارض و اهو ممكن يمش عالاقل 5000 كم كمان بالميت

[Land_Cruiser]

مكنش في اي مشكلة في الفرامل والفرامة كانت كويسة جدا ولما كنت بمسك فرامك كان الكوتش بقف تماما

بس هو قعد يقولي الطنابير والتيل دا مش هيكمل 200 كيلو وزي ما انتم شايفين التيل قدامكم اهوه

يعني الحل مع الناس دي ايه التيل لسة في اكتر من نصه تقريبا

يعني دا مش حرام ؟

حرام طبعا لان التيل كويس و كمان مفيش اى شكوى من الفرامل تدعو حتى للشك . انا كنت بسأل علشان اتأكد ان التيل القديم اللى أعطوه لحضرتك بتاعك فعلا و متلغبطش مع تيل عربيه تانيه علشان الواحد ما يظلمهمش لكن بما ان مفيش اعراض لمشكله ده بيؤكد ان ده التيل بتاع حضرتك و هو سليم وما كنش فى داعى لتغييره

[ahmedeg1]

التيل لسه فيه مش اقل من 10 الاف كم كمان دى سرقه

[A.Adel]

على حد ما أعرف في الميجان

إنت المفروض صياناتك كل 10 الف
و الخمسات اللي في النص دي صيانة مجانية

صح ؟

هو ملقاش في عربيتك حاجة
فـقال يطلع أي مصلحة

ده المفروض إن EIM من أحسن التوكيلات في مصر كمان !!!!!!!!

بس الحمد لله إنها جت في تيل
إنت شيله عندك و ابقى ركبه بعدين
أو فك الجديد و ركب ده لحد ما يخلص

متضايقش نفسك الحمد لله إنها جت على اد كده :)